ХӘЗИР 35 яшларындакы әр-аял Чуң Кюн билен Җули бәш йыл мундан озал Австралияның Сидней шәхеринде умумы пионер болуп гуллук эдйәрдилер. Чуң Кюн шейле гүррүң берйәр: «Биз ярым гүн ишләп, аматлы шертлерде яшаярдык. Бизиң яшаян еримизиң ховасы-да, шертлери-де дийсең говуды. Биз доган-гарындашларымызың ве дост-ярларымызың янында яшаяндыгымыза бегенйәрдик». Муңа гарамаздан, Чуң Кюн билен Җули биынҗалык болярды. Нәме үчин? Оларың Ехова көпрәк гуллук этмәге мүмкинчиликлери болса-да, дурмушыны үйтгетмәге яйданярдылар.

2009-нҗы йылда болан конгресдәки бир нутук олара гүйчли тәсир этди. Нутук билен чыкыш эден доган көпрәк гуллук этмек ислейәнлере йүзленип, шейле дийди: «Сүрүҗи машыныны диңе сүрүп барярка, оны чепе я сага өврүп билйәр. Шонуң ялы-да, Иса бизи угрукдырар ялы, биз хем бир ерде дурман, рухы максадымыза етмек үчин тагалла этмели» *. Нутукчының бу сөзлери Кюн билен Җулә айдылан ялы болды. Шол конгресде Тайванда гуллук эдйән миссионер әр-аял хем интервью берди. Олар гуллугындан шатлык тапяндыгыны гүррүң берип, шол ерде хенизем көмегиң герекдигини белләп гечдилер. Бу сөзлер хем Чуң Кюн билен Җулиниң хут өзлерине айдылан ялы болды.

Җули шейле гүррүң берйәр: «Биз шол конгресден соң, Тайвана гөчмек барада Ехова дога эдип, батыргайлык диледик. Йөне биз шонда-да горкярдык. Биз өзүмизи биринҗи гезек чуң бассейне бөкйән ялы дуйярдык». Олара Вагыз китабы 11:4-дәки шу сөзлер говы көмек этди: «Еле середйән экин экмез; булутлара бакян орак ормаз». Чуң Кюн: «Биз йөне бир „середип, бакып“ дурман, „экмели ве ормалы“ диен нетиҗә гелдик» диййәр. Олар дынгысыз дога эдип, миссионерлериң терҗимехалларыны окадылар  ве Тайванда гуллук эдйән доган-уялар билен хат алышдылар. Нетиҗеде, олар машынларыны ве өй гошларыны сатып, үч айдан Тайвана гөчдүлер.

Шу гүнлер дашары юртлы доган-уяларың 100-ден говрагы Тайванда вагызчыларың етмейән еринде гуллук эдйәрлер. Бу ерде Австралиядан, Британиядан, Канададан, Франциядан, Япониядан, Кореядан, Испаниядан ве АБШ-дан гелен 21—73 яш аралыгындакы доган-уялар гуллук эдйәрлер. Оларың арасында 50-ден говрак дурмуша чыкмадык уялар бар. Бу ыхласлы доган-уялара дашары юртда гуллук этмәге нәме көмек эдйәр? Гелиң, муны билелиң.

Канадалы Лора атлы дурмуша чыкмадык уя Тайваның гүнбатарында пионер болуп гуллук эдйәр. Ол 10 йыл мундан озал вагыз этмеги асла халамаярды. Лора: «Мен гуллуга кән чыкмаяндыгым үчин, өкде вагыз эдип билмейәрдим. Шол себәпли-де, вагыз этмеги халамаярдым» диййәр. Соңра Лораның Канададакы достлары биле Мексика гидип, шол ерде бир ай вагыз этмеги теклип эдйәрлер. Лора уя шейле диййәр: «Шонда мен илкинҗи гезек көп вагыз этдим. Вагыз гаты гызыклы болды!»

Шондан соң Лора Канадада башга дилде гечирилйән йыгнага гечмек ислейәр. Ол хытай дилини өвренмек үчин курса языляр ве хытай топарындакы доган-уялар билен вагыз эдйәр. Шейле-де Лора Тайвана гөчмеги максат эдинйәр. Ол 2008-нҗи йылың сентябрь айында максадына етди. Лора шейле гүррүң берйәр: «Тәзе ере өвренишйәнчәм, маңа такмынан бир йыл герек болды. Эмма мен хәзир Канада доланмагы гөз өңүне-де гетирип билмейәрин». Лора вагыз этмеклиге нәхили гараяр? Ол шейле диййәр: «Мен инди вагыз этмеги өрән говы гөрйәрин. Мукаддес Язгылар окувыны гечйән адамларың Ехова барада билим алып, дурмушыны өзгердйәндигини гөрүп дийсең бегенйәрин. Тайванда гуллук эдип, мен хакыкы шатлыгың нәмедигини билдим».

35 яшларындакы әр-аял Брайан билен Мишель такмынан секиз йыл мундан өң АБШ-дан Тайвана гөчйәрлер. Илкибада, олар вагза көп гошант гошуп билмейәрис дийип пикир эдйәрдилер. Эмма теҗрибели бир миссионер доган олара шейле диййәр: «Сиз бирине китапча хөдүр этсеңиз-де, белки, ол Ехова барада илкинҗи гезек билер. Шейдип, сиз эййәм вагыз ишине ваҗып гошант гошярсыңыз!» Шол рухландырыҗы сөзлер Брайан билен Мишеле гайратыны говшатман вагыз этмәге көмек этди. Башга бир доган олара шейле дийди: «Гөвнүчөкгүнлиге дүшмез ялы, хытай дилини өвренмекде газанян үстүнлигиңизи хер гүн дәл-де, бир этрап конгресинден бейлеки конгресе ченли барлап гөрүң». Шейлеликде, бу әр-аял өсүш эдип, хәзир өкде пионер болуп гуллук эдйәрлер.

Башга дили өвренмәге сизи нәме хөвеслендирип билер? Хайсы юртда гуллук этмек ислейән болсаңыз, шол юрда гидип гөрүң. Ол ердәки йыгнаклара гатнашып, доган-уялар билен гүррүңдеш болуң ве вагза чыкып гөрүң. Брайан шейле диййәр: «Худайың Патышалыгы барадакы хабары көп адамларың кабул эдишини ве доган-уяларың сөйгүсини гөрениңде, дашары юрда гөчүп, гуллук эдесиң гелйәр».

Тайванда вагызчыларың етмейән еринде пионер болуп гуллук эдйән доган-уяларың кәбири өзлерини эклемек үчин иңлис дилини өвредйәрлер. Кристин билен Мишель балык сатярлар. Кристин: «Мен өң хич хачан балык сатмандым, эмма бу маңа Тайванда яшамага көмек эдйәр» диййәр. Вагтың гечмеги билен, Кристиниң кәбир алыҗылары балыгы ызыгидер сатын алып башладылар. Кристин ярым гүн ишләп, өзүни ве аялыны эклейәр хем-де пионер болуп гуллук эдип билйәр.

АБШ-лы әр-аял Вильям билен Җеннифер такмынан еди йыл мундан озал Тайвана гөчдүлер. Вильям шейле диййәр: «Дил өвренмек, пионер болуп гуллук этмек, йыгнагың аладасыны этмек ве газанч этмек кәте бираз ядадяр». Олара үстүнлик газанмага ве шатлыгыны йитирмезлиге нәме көмек этди? Олар өңүнде етип болҗак максатлары гойдулар. Мысал үчин, олар хытай дилини өврененлеринде, өзлеринден хас көп зада гарашмадылар ве бираз хаялрак өсүш этселер-де, рухдан дүшмедилер.

Вильям бир этрап гөзегчисиниң: «Максадыңа етйәнчәң, хер бир үстүнлигиңе шатлан» диен сөзлерини ятлаяр. Башгача айтсак, максат гояныңдан соң, оңа етмек үчин әдйән хер бир әдимиңе шатланмалы. Вильям бу маслахата эермегиң оңа ве аялына эглишикли болмага, җогапкәр доганларың маслахатына гулак асмага хем-де тәзе ерде өкде вагыз эдип билер ялы герекли өзгеришиклери этмәге көмек эдендигини айдяр. Ол: «Биз вагыз эдйән еримизиң гөзел тебигатыны сынламага-да вагт тапярдык» диййәр.

АБШ-лы дурмуша чыкмадык Меган атлы пионер уя хем Вильям билен Җеннифер ялы, максадына етмек үчин эдйән «хер бир үстүнлигине шатланяр». Ол хытай дилинде говы гүрлемек үчин җан эдйәр. Меган уя хер хепде вагызчылар билен бирликде Тайваның улы гәми дуралгасы Гасюнда вагыз эдйәр. Ол ериң өрән овадан тебигаты бар. Меган Бангладешден, Хиндистандан, Индонезиядан, Филиппинден, Таиланддан ве Вануатудан гелен балыкчыларың гәмилерине айланып вагыз эдйәр. Ол шейле диййәр: «Балыкчылар гәми дуралгасында аз вагт болярлар. Шол себәпли биз олар билен деррев Мукаддес Язгылар окувына башлаярыс. Мен оларың хеммесине етишмек үчин, көпленч дөрт я-да бәш адам  билен билеликде окув гечйәрин». Меган хытай дилини нәдип өвренйәр? Ол: «Мениң хытай дилини чалтрак өвренесим гелйәрди. Эмма мен бир доганың: „Сен элиңде барыны этсең, Ехова саңа гуллук этмәге көмек эдер“ диен сөзлерини унутмаярын» диййәр.

Британиялы Кети дашары юрда гөчмәнкә, дурмуша чыкмадык уялар үчин хайсы юртда ховпсуз гуллук эдип болҗакдыгыны билеси гелйәр. Ол Ехова дога эдип, биынҗалыкланян затлары барада айдяр ве бирнәче филиала хат язып, дурмуша чыкмадык уялара нәхили ховпларың болуп билҗекдиги барада сораяр. Соңра ол гелен хатлары окап, Тайванда гуллук этмегиң говы болҗакдыгына гөз етирйәр.

2004-нҗи йылда 31 яшлы Кети Тайвана гөчйәр. Ол Тайванда башардыгындан сада яшамага чалышяр. Ол: «Мен доган-уялардан ир-иймишлериң ве гөк-өнүмлериң ниреде арзан сатыляндыгыны сораярдым. Оларың берен говы маслахаты пулумы тыгшытлы совмага көмек эдйәрди» дийип гүррүң берйәр. Кети уя сада яшамага нәме көмек эдйәр? Ол шейле диййәр: «Мен иййән йөнекей иймитиме, геййән сада эгин-эшигиме кайыл болмага көмек этмеги үчин көпленч Ехова дога эдйәрин. Ехова догаларыма җогап берип, маңа нәмәниң герекдигине дүшүнмәге ве ислейән затларымың хеммеси болмаса-да, кайыл болмага көмек эдйәр. Мен сада яшаяндыгыма бегенйәрин, себәби бу маңа бар үнсүми рухы ишлере бермәге көмек эдйәр».

Кетиниң дурмушы диңе бир сада дәл-де, эйсем, өрән гызыклы. Ол: «Мен көп адамларың хош хабара сесленйән еринде вагыз эдйәрин. Бу мениң үчин улы багт!» диййәр. Кети Тайвана гелип, пионер гуллугына башланда, шәхерде ики саны хытай йыгнагы барды. Шу гүнлер болса, ол ерде еди йыгнак бар. Кети: «Шейле улы өсүши өз гөзүң билен гөрүп, хасыл йыгымына гатнашмак билен, мениң хер гүнүм гызыклы гечйәр!» диййәр.

Ёкарда агзалан Чуң Кюн билен Җули хәзир нәхили гуллук эдйәр? Илкибада, Чуң Кюн хытай дилини говы билмейәндиги үчин, йыгнага кән бир хайры дегмейәндир өйдйәрди. Эмма йыгнакдакы доган-уялар бейле пикирде дәлди. Чуң Кюн: «Бизиң йыгнагымызы бөлүп, мени гуллук хызматчысы эдип белләнлеринде, мен, догруданам, көмек герек ерде гуллук эдйәндигиме дүшүндим» диййәр. Ол йылгырып: «Бу ерде хатда мениңем көмегим дегҗек экен!» диййәр. Шу гүнлер Чуң Кюн яшулы болуп гуллук эдйәр. Җули болса шейле диййәр: «Биз инди шатланып, канагат тапярыс. Биз бу ере көмек этмәге гелсек-де, өзүмиз хем көп затлары өврендик. Ехованың бизе бу ерде гуллук этмәге мүмкинчилик берендигине өрән миннетдар!»

Көп ерлерде хенизем вагызчылар етмейәр. Сен тизден мекдеби тамамлап, дурмушыңы нәмә багш этҗекдигиң барада ойланярмың? Сен дурмуш гурмадык болсаң, Ехованың гурамасында көпрәк хызмат эдесиң гелйәрми? Машгалаңыз билен Ехова гуллук эдип, сизде говы ятламаларың галмагыны ислейәрмисиңиз? Сиз пенсия чыкан болсаңыз, башгалар билен теҗрибәңизи пайлашмак ислейәрмисиңиз? Онда сизем вагызчыларың етмейән еринде гуллук этсеңиз, бол берекетлери алҗакдыгыңыза ынанып билерсиңиз.