ITINEKWAGH I TAMEN | U FATYÔ U KAVEN BIBILO
Doo u U Ôr Bibilo U Kav sha Ci u Nyi?
“Bibilo ka takerada u ior kpishi ve fe ér ka u kwaghaôndo yô. Kpa ior i China fa kwagh u Bibilo ga shi kwagh gba ve a i ga.”—MKAANEM MA LIN, KWASE U KEN CHINA.
“Ka mea ôr ityakerada i kwaghaôndo u Hindu u m lu ker la je kpa, m kav ga. Nahan Bibilo yô, a er nan ve me ôr me kava?”—MKAANEM MA AMIT, OR U KEN INDIA.
“M ne Bibilo icivir mer ka takerada u u tse kpishi yô, shi m ungwa mer ior mba hembe yamen i a ityakerada igen cii. Kpa m ngu a nenge a kôpi u Bibilo sha ashe am ga.”—MKAANEM MA YUMIKO, KWASE U KEN JAPAN.
Ior kpishi sha tar mba ne Bibilo icivir tsung. Nahan kpa, aluer ve fa kwagh u a lu ken Bibilo je kpa, kwagh u ve fe la vese ga. Kape ior mba ken veghertar u Ashia la kpa ve fe kwagh u ken Bibilo cuku tseegh je la. Kpa ka ve tseegh ga, ior kpishi mba ve lu ken ityar i Bibilo i samber ker wuee la je kpa fa kwagh u ken Bibilo kpuaa di tsô.
Nahan kpa, alaghga u pine wer, ‘Doo u me ôr Bibilo me kav sha ci u nyi?’ Aluer u kav kwagh u icighan takerada ne a kaa yô, kwagh la una wase u u eren akaa ne:
-
Kwagh a kuman we shi a saan we iyol
-
U fa u nengen sha mbamzeyol mba hen tsombor wou
-
Ishima ia pande u nyian we sha akaa
-
U hemba lun vea mbagenev doo doo
-
U fa u eren kwagh a inyaregh sha inja
Nenge ikyav sha kwagh u kwase u ken Japan, u i yer un ér Yoshiko la. Yange taver un u fan kwagh u a lu ken Bibilo jighilii yô, nahan a ôr i iyol na sha er una fa yô. Yange ôr zua a nyi kere? A kaa ér: “Bibilo wasem u zuan a kwagh u injaa ken uma wam, kua ishimaverenkeghen i sha kwagh u mlu u ken hemen. Hegen uma wam ngum a inja.” Amit u se ter mkaanem nam ken mhii u ngeren ne la yange time ken Bibilo iyol na, nahan a kaa ér: “Kpiligh mo iyol er Bibilo i lu a akaawan sha ci u hanma or yô.”
Bibilo wase ior umiliôn imôngo ken uuma vev sha gbenda u kpiligh iyol kpishi. Er nan u tim ker iyol you, u nenge er ia fatyô u wasen we la ga?
