ER I HII VE I TAVER MBAGENEV U NAN JIGHJIGH A KWAGH NE YÔ: Ishima ka ia vihi mbagenev je vea fa ape vea zua a kwagh u nan ve ishimasurun ga kpa, i lu ve er aluer ve sôn Aôndo ér a er kwagh sha mi, a wase ve vea wa ishima a mbamzeyol vev yô, a tese ér ve hemba wan ayol a ve ikyo tseegh yum. Kwase ugen u i yer un ér Raquel yô kaa ér ka mea tôô mbamzeyol av mea kar sha ican i ior kpishi ken tar ne ve lu yan kua mbamzeyol mba ve tagher a mi la nahan, “mbamzeyol av ve ndahar je m yem zamber a Aôndo mer a wase ve.”

KWAGH U MKAANEM MA AÔNDO MA TESE YÔ: Aôndo er kwagh u vesen sha u una wase uumace shi una sur ve asema yô. Hanma or sha tar nyian cii, i mar nan a isholibo; ka kwagh u mayange orumace nana fatyô u kuran atindi a Aôndo vough ga. Nahan kpa, “se doo Aôndo ishima . . . A tindi Wan Na [Yesu Kristu] hingir iwom sha asorabo ase.” (1 Yohane 4:10) Aôndo bugh gbenda sha nagh ku Yesu na sha uma na la ér se zua a mde u asorabo shi se lu a imo i ken ishima i wang shi se lu a ishimaverenkeghen i va lun uma gbem sha won ken tar u he, u bem la. * Kpa nagh ku ipaan ku Yesu kura ku sha ci u uumace tseghe tsô shin, ku tese ér kwagh gba Aôndo sha kwagh wou kpaa?

Nenge kwagh u apostoli Paulu ne. Kwagh u nagh ku Yesu la yange tsue un ken ishima je a nger ér: “Uma u m lu uma ken iyol hegen ne yô; ka sha jighjigh u nan ken Wan u Aôndo u m doo Un ishima man A gem A ne iyol Na sha ci wam la.” (Mbagalatia 2:20) Ka mimi, Yesu yange kpe cii ve Paulu va hingir Orkristu ye. Nahan cii kpa, Paulu nenge nagh kura ér ka iyua i Aôndo iyol na a ne un yô.

We kpa nagh ku Yesu na sha uma na la ka iyua i Aôndo iyol na a ne u yô. Iyua la tese ér u gba Aôndo kwagh tsung. Ia faityo u nan we “msurshima u tsôron man shi ishimaverenkeghen i dedoo,” nahan ‘u taver sha hanma tom u dedoo kua kwaghôron u dedoo kpaa.’—2 Mbatesalonika 2:16, 17.

Yesu na nagh sha uma na anyom kar zurum 2000 hegen. Ka nyi i tese ér Aôndo soo u yan ijende a we nyiana?