Bibilo Gem Ior

KA NYI yange i wase orgen u hiden ken kwaghaôndo u mbamaren nav yese un ker kpa va undu laa? Gumor ugen yange zua a ter u sar un u lu a mi ken uma na tsung la nena? Ôr ase mkaanem vem man.

“Yange gba u me hide hen Yehova.”​—ELIE KHALIL

I MAR UN KEN INYOM I: 1976

TAR NA: CYPRUS

INJAOR I YANGE LU YÔ: WAN U UNDU TER NA YÔ

YIASE YAM: I marem ken tar u Cyprus, kpa m gema m vese ken tar u Australia. Mbamaren av ka mbashiada mba Yehova, shi ve nôngo sha a fatyô ve cii ér vea tesem kwagh u Yehova a doom ishima kua Bibilo i i lu mkaanem nam la. Nahan kpa, m va kom anyom pue kar yô, m hii u hemban ve ato. Yange m due tugh nyighee, m za kohol mbayev mbagenev. Yange se ii umato, shi se nyôr ken akaa a zan iyol agen kpishi.

Sha hiihii la, m eren akaa ne ken myer sha ci u m cian mer a va doo mbamaren av ga. Kpa kule kule tsô, mciem mara kera va lu ken a mo ga. Yange m kôr ijende vea ior mba ve lu tamen a mo yem zende zende, shi ve soo kwagh u Yehova kpaa ga yô, maa ve tsarem inja ve i bo la. Ken masejime yô, m va kaa a mbamaren av mer, m kera soo u lun ken kwaghaôndo ve la ga. Yange ve wa ishima, ve nôngo ér vea wasem kpa m venda iwasen ve la cii. Kwagh ne za mbamaren av iyol kpishi.

M undun ya yô, m hii u man mcimbim ma bom, je yô, m gema kahan ikya kpishi, teen kpaa. Yange m er dang kpoghuloo, shi m hemban lun sha ubaa. M ngôôr vihin ishima kpaa ga. Shi or a ôr kwagh shin nana er kwagh u a doom ga yô, ishima i vihim i kondo, maa m hii u nanden a nan shi tan nan azu. Jighilii yô, yange m er hanma kwagh u i tesem ér gba u Orkristu nana er ga la cii.

GBENDA U BIBILO GEMA UMA WAM LA: Yange m kôr ijende kangenaa vea orgen u un kpa maan mcimbim ma bom, u yange ter na kpe shighe u lu yev la yô. Ashighe agen se lam tugh zan zan, se yav fele ga. Ashighe agen sea lamen tugh yô, a hii u ôron mo akaa a na, pasen mo er ishima i lu un ker yô, shi a ôrom er ka i sar un tsung u nengen a ter na u a kpe la yô. Er m vese m fa kwagh u ishimaverenkeghen i mnder u shin ku la yô, m hii u ôron un kwagh u Yesu, er yange nder mbakpenev shi a tendezwa u va eren nahan ken hemen yô. (Yohane 5:28, 29) Yange m kaa a na mer: “Se cii se mba va lun uma gbem sha won ken paradiso shin tar, nahan a hen ase er una va hide a nenge a ter na ve, a lu un yô.” Akaa a m ôr ijende yam ne kôr un ken ishima kpen kpen.

Ashighe agen ijende yam ne a hii u lamen sha atôakaa kposo kposo, er kwagh u ayange a masejime  shin kwagh u Ter man Wan man Icighan Jijingi Ka Aôndo Môm la nahan. Yange m ngohol Bibilo i ijende yam ne, m tese un avur a ruamabera kpishi a Bibilo i pase mimi sha kwagh u Yehova Aôndo man kwagh u Yesu kua ayange a masejime ne cii. (Yohane 14:28; 2 Timoteu 3:1-5) Er m lu lamen a ijende yam sha kwagh u Yehova nduuruu yô, mo kpa m lu hemban henen kwagh u Yehova ken ishima cii.

Tegh tegh tsô, ivor i mimi i mbamaren av nôngo sha afatyô ve cii lôô ken ishima yam, ve i gba teman tsô la, hii u vesen. U tesen ikyav yô, ashighe agen mea lu vea azende am sha ubaa, sea maan mcimbim ma bom kpa, m gba va hiin u henen sha kwagh u Yehova kpoo tsô. Azende am kpishi senge ér Aôndo doo a ishima, kpa ieren i a gema tese nahan ga. Er m kera soo u lun nahala ga yô, m kav kwagh u gba me er yô. Yange gba u me hide hen Yehova.

Shin er m fa kwagh u me er nahan kpa, u geman eren un la yô, taver mo kpishi. Akaa agen yô, taver mo u den ga; yange taver mo kpishi u den u man mcimbim ma bom ga. Shi m pav a azende am a tse la cii, nahan m hii u henen Bibilo vea Orkristu ugen u lu ortamen yô.

Nahan kpa, akaa agen gema taver mo u den kpishi. Yange taver mo u den ishimanyoon yam la kpen kpen. Ashighe agen m nôngo m de ishimanyoon, kpa ica i gba ga tsô shi m hide m gba nyoon ishima. Hanma kwa u kwagh ne a erem yô, i doom ga cii, i lum er kwagh hembam a hemba je nahan. Yange iyol kpem, nahan m lam a ortamen u lu henen Bibilo a mo la. Un lu or u waan ishima a mo shi eren a mo kundu kundu yô, nahan a taver mo ishima kpishi. Kwagen la, a kaa a mo ér m ôr ngeren ugen ken Iyoukura ua a pase er i doo u se yina ishima sha kwagh ga yô. * Yange se lam sha akaa a i gbe u me er shighe u ishima i lu vihin mo yô. Tegh tegh tsô, er m lu a kwagh u ngeren ne pase la ken ishima shi m lu eren msen hen Yehova yô, m gba kôron iyol yam tsaha. Ken masejime yô, i va erem batisema ken uwer u Aipor inyom i 2000 la, m hingir môm ken Mbashiada mba Yehova. Kwagh la yange doo mbamaren av je zua ga.

IWASEN I M ZOUGH A MI LA: Er m fe mer m kera ngu hôngor a iyol yam sha mcimbim ma bom shin ijimba i eren ga yô, m ngu a bem man imoshima i wang hegen. Ka mea eren tom shin mea zaan ma mkombo u Mbakristu shin mea eren iemberyolough, shin mea eren nyityôkwagh igen cii kpa, i hemba saan mo iyol. M ngu a menge u vough sha kwagh u uma hegen.

M wuese Yehova kpishi er mbamaren av yange ve gba uwer u wasen mo ga yô. Shi ka m hen sha mkaanem ma Yesu ma i nger ken Yohane 6:44 man, ér: “Ma or nana fatyô u gban van her a mo ga, saa Ter u A tindim la, Una urugh nan.” Ka mea hen er m fetyô u hiden hen Yehova sha ci u a ulugh mo la nahan, i doom kpishi.

 “Yange sarem tsung u lun a ter.”​—MARCO ANTONIO ALVAREZ SOTO

I MAR UN KEN INYOM I: 1977

TAR NA: CHILE

INJAOR I YANGE LU YÔ: LU VEA NONGO U MBAKUHWAN ITYOGHOLOUGH JANG JANG

YIASE YAM: Ngôm yange yesem hen gar u doonashe u i yer ér Punta Arenas la. Gar ne ngu hen zegemnger u i yer ér Strait of Magellan, u a lu ikyua ikyua a ityoughkitaregh ki veghertar u South America la. Shighe u m lu anyom ataan la, mbamaren av kera lu imôngo ga, nahan m nengen mer i tam kera. Yange sarem tsung u lun a ter.

Ngôm yange hen Bibilo vea Mbashiada mba Yehova, nahan a zaan mbamkombo mba Mbakristu vea mo ken Iyou i Tartor. Nahan kpa, er m soo kwagh u zan mbamkombo la ga yô, ashighe kpishi m nur zwa shighe u sea yemen sha gbenda yô. M va kom anyom 13 yô, m de u zan mbamkombo gbindigh gbindigh.

Hen shighe la, m hii u soon kwagh u ityogholough kpishi, shi m kav er m lu a iyua la yô. Shighe u m lu anyom 15 la, m gema kuhwan ityogholough jang jang hen uiniongo man mbamtem mba sha uyaav mba iorov man sha ubaa. Yange m ya ikyar a ior mba ve fa u kuhwan ityogholough tsembelee yô. Kwagh ne na yô, gba saren mo u kuhwan ityogholough mbi ityôô mbi ve kuhwan la. Nahan m hii u henen ityogholough mbi kuhwan hen makeranta ugen hen ningir wase, ape i tesen ior ityogholough mbi kuhwan la. M nyer anyom 20 yô, m mough m yem hen gartamen u Santiago, sha er me za seer henen ityogholough mbi kuhwan yô. Shi m za hemen u kuhwan ityogholough mbi karen jang jang mbira her.

Hen shighe ne cii, saan mo iyol ga. Er m lu nôngon mer me bee a zayol ne yô, m hingir u man msôrom hunden shi menam mcimbim ma bom vea mba se kuhwan kwagh imôngo, mba m tôô ve mer mba tsombor wam la. Mlu wam tese ihyembeato je lu ilian ga. Yange m huwa akondo a il shi m tsegha idyer, shi m de ice yam i sha ityough vese zan zan nôngo u nyôron shin iwenge.

Ashighe kpishi, ieren yam ne na m shi nôngon num shi lun a zayol vea dasenda. Shighe ugen la, m ma msôrom kpoghuloo, maa m mough m za ta num sha ior mbagenev mba teen mcimbim ma bom, mba ve lu zan mo man azende am iyol yô. Mbateen mcimbim ma bom mban gbidyem coholoo je ve vihim zwelegh.

Nahan kpa, azende am a sôngo sôngo ne gema er kwagh u hemban nyoon mo iyol cii. Iyange igen yô, m kav mer gumkwase u m keren yô lu yaven a ijende yam i sôngo sôngo. Azende am agen cii fa kwagh sha kwagh ne, kpa lu yeren mo a mi. Kwagh ne vihim pev.

M mough m hide m yem hen Punta Arenas, ape m za hii u tesen ior ityogholough man jita i kuhwan la. Shi m za hemen u kuhwan shi kuran ityogholough mbi karen jang jang la ken tser vea iniongo i kuhwan ityogholough mbi shon. M va zough a wankwase ugen u doonashe, u i yilan un ér Sussan la yô, se hii u lun imôngo. Shighe kar yô, Sussan kav ér ngô na lumun a ityesen i Aôndo Utar ken Môm la, kpa mo yô, m lumun a i ga. Nahan a pinem ér “Ka ityesen i han i lu i mimi?” M na un mlumun mer ityesen i Aôndo Utar ken Môm la ka i mimi ga, kpa me fatyô u tesen un ape Bibilo i ôr kwagh shon la ga. Nahan kpa, m fa or u nana fatyô u tesen un yô. M kaa a na mer Mbashiada mba Yehova vea fatyô u tesen un mimi ken Bibilo. Maa m er kwagh u yange m kera er ga anyom kar kpishi yô. Yange m er msen hen Aôndo shi m sôn un mer a wasem.

Ayange nga kar kpuaa yô, m nenge a orgen u lum inja er m vande fan un yô. Nahan m pine un  mer me fa una lu Orshiada u Yehova yô. Er mluashe wam cier or la iyol je lu kunden ikyarkyase nahan kpa, a kundu ishima, a nam mbamlumun sha mbampin mba m pine un sha kwagh u zan mbamkombo hen Iyou i Tartor la. Nahan m za ken Iyou i Tartor m za tema sha igbough i masetyô la sha er or a de fem ga yô. Nahan kpa, ior kpishi hii u kaven mo er yange m zaan mkombo sha ayange a m lu wanye la yô. Ve ngohol mo ave ahar, shi ve kuvem sha u tesen mo ér m doo ve ishima tsung, nahan kundum iyol kpen kpen. Lum inja er m hide hen ya nahan. M nengen a or u yange tesem Bibilo shighe u m lu wanye la yô, m kaa a na mer shi a hide a hii u henen Bibilo a mo.

GBENDA U BIBILO GEMA UMA WAM LA: Iyange igen yô, m ôr Anzaakaa 27:11, ape i kaa ér: “Wan wam, lu orfankwagh, na i saan mo iyol” la. Yange doom kpishi u kaven er orumace u kaka ne nahan kpa nana fatyô u nan ér i saan or u a gbe sha man tar la iyol yô. Nahan m mase kaven mer Yehova ka ter u m lu keren ken uma wam cii la!

Yange m soo u eren ishima i Terem u sha la, kpa msôrom ma man kua mcimbim ma bom gema ya tor ken a mo anyom imôngo. M va kav kwagh u Yesu a tese ken Mateu 6:24, ape i kaa ér: “Or môm môm ngu u nana fatyô u eren uter uhar tom ga” la. Er m lu nôngon mer me gema inja la, kwaghwan u i nger ken 1 Mbakorinte 15:33 la bende a mo tsung. I kaa hen ijiir la ér: “Ujende mba bov mba vihin mbamlu mba dedoo.” M kav mer, aluer m za hemen u zan hen ajiir a m vanden zan la shi m ngu zenden vea ior mba yange m vanden zenden a ve la her yô, me fatyô u den inja yam i dang la ga. Kwaghwan u i nger ken Mateu 5:30 la yange wanger mo; nahan gba u me er kwagh fese sha er me de akaa aa lu nan mo gbev mbu nôngon la yô.

Er m soo ityogholough mbi kuhwan jang jang yô, taver mo kpishi u den kwagh u m tsua u eren ken uma wam ne. Kpa sha iwasen i azende am a ken nongo u Kristu yô, ken masejime m va fatyô u den inja yam ne. M de msôrom ma man karen ikyaa inya la, shi m de u man mcimbim ma bom. Shi m hondo ityough kua gbem, shi m de ieren i huan akondo a il tseegh la. Zum u m kaa a Sussan mer m soo u hondon ityough sha yô, sar un u fan kwagh u ka m za er ken Iyou i Tartor la tsung. Nahan a kaa a mo ér, “M ngu zan vea we me za fa kwagh u i eren ken Iyou i Tartor la!” Kwagh u yange za nenge a mi la, doo un kpishi, nahan ica kera ga tsô un iyolna kpa hii u henen Bibilo. Ken masejime yô, mo man Sussan se er ivese. Ken inyom i 2008 la, i er se batisema, se hingir Mbashiada mba Yehova. Saan se iyol er se lu civir Yehova a ngôm imôngo yô.

IWASEN I M ZOUGH A MI LA: M kera ngu ken msaanyol u mimi ga, u tar u ne la ga, shi m pav a azende am a mimi ga la kpaa. Ityogholough mbi ungwan doom ishima her, kpa hegen m heren a her mbi me ungwa yô. Ka m wa mba hen tsombor wam kwagh sha akaa a yange erem la, kua mbagenev, hemban je yô agumaior, sha er a wase ve yô. M soo mer me wase ve ve kav er akaa kpishi a tar ne u ne se la, alaghga aa sar se tsung, kpa ken masejime yô, akaa shon cii ka a va hingir “hôngor” yô.—Mbafilipi 3:8.

M zua a azende a mimi ken nongo u Kristu, ape dooshima man bem ve dumbur la. U hemban cii je yô, m kporom ikyua a Yehova, nahan m zua a Terem.

[Ngeren u shin kpe]

[Mkaanem ma sha peeji 13 la]

‘M fatyô u hiden hen Yehova sha ci u a ulugh mo’