Kporom Hen Aôndo

Aôndo Vaan Afanyôô?

MBAAJIRIV 2:11-18

ER SE lu uumace mba yinan yô, ashighe agen ka se vaa afanyô. U tesen ikyav yô, ishima ia fatyô u vihin se zum u se bema eren kwagh yô. Bibilo ôr kwagh u doon ungwan ér Yehova kpa una fatyô u vaan afanyô. Kpa alaghga u kaa wer, ‘Aôndo ngu vough, eren kwagh kpe ga.’ Tsô, vaan afanyô sha nyi gbenda? Mlumun u sha mpin ne una wase se u kaven kwagh ugen u tan hindi iyol. Kwagh shon yô, ér: kwagh ker Yehova iyol, nahan akaa a se eren la nga a bende a na kehelee je. Time ase sha mkaanem ma i nger ken Mbaajiriv 2:11-18 la.

Takerada u Bibilo u Mbaajiriv nger kwagh u ashighe a ican ken uma u Mbaiserael. Mbaiserael tema hoghom hoghom ken Kanaan, tar u Aôndo tôndo zwa ér una na Aberaham la. A fatyô u paven akaa a Mbaiserael lu eren ken uderimbaanyomov imôngo ken hemen la, avegher anyiin; avegher shon yô ka: u undun Yehova man ican i yan man mzamber man myima. *

U undun Yehova. Mbakanaan na yô, Mbaiserael “undu [Yehova],” ve gema ve dondo mbaaôndo mbagenev; jighilii yô, “ve civir Baal man Ashetaroti.” * U undun Yehova imba la nahan lu mcivir u wang jim ve undu ye. Kape i lu ve “ve bam TER,” Aôndo u due a ve ken tar u Igipiti je la!—Ivur 11-13; Mbaajiriv 2:1.

Ican i yan. Mbaiserael yange vea undu Yehova yô, ishima i vihi un ker nahan a kera kura ve ga. Nahan ve hingir u lun “sha ikyev i mbaihyomov vev,” ve va ya ishar sha a ve.—Ivur 14.

Mzamber. Mbaiserael yange vea yaan ican tsusee yô, ve vaa afanyô, ve zamber a Aôndo ér a yima ve. Alaghga tsô, “mtoghor ve u ve toghor sha ikyev i . . . mba eren ve ican la” lu ikyav i tesen mzamber ve la. (Ivur 18) Mzamber u ve zamber a Aôndo la lu môm ken akaa a ve eren gbem gbem yô. (Mbaajiriv 3:9, 15; 4:3; 6:6, 7; 10:10) Aôndo yange una ungwa nahan a er nena?

Myima. Yange Yehova una ungwa mtoghor u Mbaiserael nahan “mhôônom [ma] kôr” un. Ishember i ken zwa Heberu i í gem heen ér “mhôônom kôr” la, a fatyô u geman i kpaa ér “vaa afanyô.” (Nenge Genese 6:6) Shighe u i gem i ér “vaa afanyô” yô, tese ér mba ôron kwagh “u or geman ishima shin awashima u nan.” Takerada ugen kaa ér: “Mbaiserael yange vea toghor nahan mhôônom ma kôr Yehova, maa a gema awashima na u tsahan ve la, a hingir u yiman ve.” Sha mhôônom nam ma kôron yô, Yehova yange a “ver ve mbaajiriv” mba ve yiman ve sha ikyev i mbaihyomov vev yô.—Ivur 18.

U nenge kwagh u yange a na ve Aôndo a vaa afanyô shin a gema awashima na kpa? Lu inja i ior nav yange ve sôr la. Hen sha kwagh ne sha gbenda ne kpaa: Alaghga ter u lun a dooshima una tsaha wan na u a er kwagh shami ga yô, una yange un akaa agen a eren. Kpa una va kaven ér wan la gema inja sha mimi yô, una kera na un mtsaha la ga.

Kwagh u Mbaiserael u se er sha heen ne tese se nyi sha kwagh u Yehovaa? Isholibo i eren sha apera la ne un ishima vihin, kpa mba ve gem a asema yô, zungu ve mhôônom. U fan ser kwagh u se eren la ngu a kôr Yehova iyol la ka kwagh u se er asenge a mi ga. Er nan u hen u eren akaa sha er u na a “saan [Yehova] iyol” ga? (Anzaakaa 27:11) U er nahan yô, mayange u vaa afanyô ga cii.

[Ngeren mba shin kpe]