A Kar a Mbamzeyol Mba Uumace Cii Sha Tar Jimin Cii Kera

ICAN i yan ngi hanma ijiir cii, man ior kpishi ka ve ker igbenda i wasen mba ve lu yan ican la. Ikyav i tesen yô, mbaeren tom iyouci ka ve er tom shighe gôgônan sha er vea wase mbauangev man mba vihin ayol yô. Mbaeren tom u pirin usu man dasenda man mbafanatindi man ior mba wasen mbagenev shighe u aahe a er la cii, mba keren u van ior a mpever shin yangen ican i ma ve ye la. Imba iniôngon la ka i wase ior asange asange mba kwagh a tsule ve la, kpa ma or môm shin mzough u una kar a ican i yan sha tar kera cica cii je kpa ngu ga. Kpa Aôndo yô, ngu a tahav shi a kegh iyol u van a myôhôryol sha tar jimin cii.

I na se ibumun ken takerada u masetyô u Bibilo la ér: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpase 21:4) Nenge ase er ikpelaior ia zua a iwasen sha ityendezwa la yô. Ityendezwa la sav pasen er Aôndo a we ishima u been a hanma ican i yan cii yô.  Una er kwagh ne sha u karen a ityav mbi nôngon man ijen man angev man ifer kua mbaaferev cii sha tar kera. Oruma môm kpa nana kôrcio u eren imba kwagh ne ga.

Kwagh u Tartor u Aôndo Ua Er La

Aôndo una kure awashima na sha ikyev i or u tahav nav mbu cir ken mbu Aôndo sha won cii la, or la ka Yesu Kristu u yange i nder un shin mbakpenev la. Shighe ngu van u Yesu una tema tor sha tar ne a or u hendan a na shio yô. Ator man upesiden shin mbapatii vea kera tema tor sha uumace ga. Hen shighe la a lu Tor môm man gomoti môm, ka Tartor u Aôndo je la, una hemen uumace ye.

Tartor la ua kar a hanma gomoti u uumace cii kera. Tsuaa tsuaa la je, Bibilo tsenga pasen ér: “Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikyev i ma ikyur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.” (Daniel 2:44) Ior mba sha tar cii vea lu ken mzough sha ikyev i gomoti u perapera môm, gomoti la ka Tartor u Aôndo.

Zum u Yesu lu or shin tar la, a ôr kwagh u Tartor la acin imôngo. Yange ter u ken msen u ter wase la, shi wa mbahenen nav kwagh ér ve eren msen ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Aluer u nenge yô, Yesu tese ér tartor la gba zua vea u eren ishima i Aôndo shin tar, man ka ishima na u karen a ican i yan shin tar cii kera.

Icighan gomoti u Aôndo la una va a averen a ma gomoti u uumace môm kpa una kôr cio u van a mi cuku tsô kpaa ga yô. Umbur wer, Yehova na Wan na ér a lu iwom sha ci u uumace sha er vea zua a uma u tsôron yô. Sha hemen u Tartor la, ior vea vese a ar sha mlu u vough. Kanyi ia due kere? Yehova “Una tim ku sha won kera; Ter AÔNDO Una ese mliam sha ishiv mbi iorov cii.”—Yesaia 25:8.

Ior mbagen vea pine ér: ‘Hii nan ve Aôndo a lu a er kwagh ga zan zan hegene? Ngu keghen nyi?’ Yehova yange ma er kwagh tsuaa je sha u karen a ican i yan kera shin yangen a yange i je kpaa. Nahan kpa, a de ér i za hemen, ka sha ci u keren mtsera na iyol na ga, kpa ka sha ci u ônov nav shin tar ve̱ zua a iwasen i been mayange ga. Mbamaren mba wan ve nan doo ve ishima yô, vea de ér wan la nana nyôr ken mtaver, aluer ve fa ér kwagh la una va nan a mkpeyol u tsan gbem yô. Kape Yehova kpa a lu a atôakyaa a dedoo a á ne ve a de ér uumace ve ya ican sha anshighe kpuaa je la, man i pase atôakyaa la ken Bibilo. Atôakyaa shon kua akaa anza er ian i Aôndo a ne ior i eren kwagh u ve soo a mkighir shio la, man isholibo man ahon a yange i gba ér mtemtor u Yehova doo ga la. Bibilo shi pase ér i na or u ken jijingi u ifer ugen, ian i hemen tar ne sha anshighe kpuaa. *

Shin er se fatyô u pasen atôakyaa la cica cii ken ngeren ne tseegh ga nahan kpa, akaa nga ahar aa a ne se ishimaverenkeghen man ishimataver yô. Kwagh u hiihii yô: Yehova una na se averen a hemba nyityô ican i se vande yan cii. Heela tseegh ga, Aôndo bum a vese ér: “Á kera umbur akaa a tsuaa la ga, man shi aa kera va or ken ishima kpaa ga.” (Yesaia 65:17) Aôndo una kar a ican i í lu eren ior sha anshighe kpuaa, u i ne iferkwagh ian ne kera, a tsa sha won kpa ican ia kera shi er or ga.

Kwagh u sha uhar yô: Aôndo ver shighe u karen a ican i yan kera, u mayange una gema ga yô. Umbur wer, profeti Habaku pine shighe u Yehova una de numsuwen man num-nôngon ua za hemen yô. Yehova kaa a na ér: “Mpase u sha mnenge ne ngu keghen shighe na . . . gadia una va kpee, una bunde ga.” (Habaku 2:3) Er se nenge ken ngeren u una dondo la nahan, “shighe na” la zulum.

[Ngeren u shin kpe]

 [Ngeren u Kiriki u a lu sha peeji 7 la]

Avur a Bibilo a a Er Kwagh u Averen a ken Hemen yô

ITYAV MBIA KERA LU GA:

“Va, va nenge nen ityom i TER, A er akaacieryol shin tar, A er ityav mbi bee zan zan ar hen ikighir i tar je.”—Pasalmi 46:8, 9.

BADOON SE ISHIMA VEA HIDE:

“Mbaperapera kua mba ve lu perapera ga vea nder shin ku.”—Aerenakaa 24:15.

KWAGHYAN UNA LU SHA CI U HANMA OR CII:

“Iyiav [mbia] ngee shin tar sha ityouv mbi iwoov je kpaa, asagher a mbi [aa] hingir war war.”—Pasalmi 72:16.

ANGEV MBUA KERA LU GA:

“Ma or u nan tem ker kpaa nana kera kaa er: Kwagh nyoon mo, ga.”—Yesaia 33:24.

MBAAFEREV VEA KERA LU GA:

“Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.”—Anzaakaa 2:22.

PERAPERA UNA TEMA TOR:

“Nenge, tor ugen [Yesu Kristu] una tema tor sha perapera, atiator kpaa aa kura tar sha ijirôron i mimi.”—Yesaia 32:1.

[Ufoto u sha peeji 7 la]

Tartor u Aôndo ua kar a nyityô ican i yange se vande yan cii kera