1. Ka ieren i Aôndo i nyi i hembe ciilii, man er u fe nahan yô, ka u ken ishima a na nena?

BIBILO i i lu mkaanem ma Yehova a ne i nger la pase se ér, “Aôndo ka dooshima.” Bibilo gba kaan tsô ér dooshima ka môm ken aeren a Yehova a doon tsung la ga, kpa i kaa ér ‘Aôndo ka dooshima.’ (1 Yoh. 4:8) Ka ieren na i tseer tseer i hemban cii. Yehova ngu di a dooshima tsô ga, kpa un iyol na ngu dooshima. Doo se kpishi er se fe ser Aôndo u a gbe sha man tar kua hanma kwagh u uma cii la i lu Aôndo u dooshima yô! Eren hanma kwagh cii sha dooshima.

2. Dooshima u Yehova la na yô, se mba a vangertiôr ser nyi? (Nenge foto u a lu sha mhii u ngeren ne la.)

² Akaa a Yehova a gbe la doo un ishima tsung. Sha nahan yô, se mba a vangertiôr ser akaa a a we ishima u eren sha ci u uumace la cii, una er cica, shi kwagh la una va uumace mba una lu hemen ve la a averen a hemban cii. U tesen ikyav yô, dooshima u Yehova na yô, “A ver iyange i Una ôr tar cii ijir sha mimi, sha Or u A ver nan” yô, ka Yesu Kristu je la. (Aer. 17:31)  Se mba a vangertiôr ser, kwagh ne kpa ka kwagh u Yehova una er yô. Uumace mba kwagh u perapera a doo ve ishima shi ve ongo imo i Aôndo yô, ijirôron la ia na mlu ve u ken hemen la una doo gbem sha won.

3. U hen wer luun er uumace ve doo Aôndo ishima ga nahan, mlu ve u ken hemen la ma a lu nena?

³ Hen ase yôô, luun er uumace vea doo Aôndo ishima ga nahan, mlu u uumace u ken hemen la ma a lu nena? Uumace ma ve ze hemen u hemen ayol a ve shi ma ve lu sha ikyev i Satan, aôndo u tar ne u a ban a dooshima shi a vihi tu tsung la. (2 Kor. 4:4; 1 Yoh. 5:19; ôr Mpase 12:9, 12.) Kwagh ne tese ér, luun er ka dooshima u Aôndo la ga yô, mlu u tar ne u ken hemen la ma a vihi ato je ma i gande ôron.

4. Yehova yange de ér i laha hemen na u perapera la sha ci u nyi?

⁴ Diabolo yange hembe Yehova ato yô, a mee uumace mba hiihii mbara kpa hemba Aôndo ato. Diabolo puu hemen u Aôndo u perapera la shi laha ian i a lu a mi i hemen sha won cii la. Sha nahan yô, Satan lu kaan ér hemen na hemba doon a u Aôndo u a gbe akaa cii la. (Gen. 3:1-5) Maa Yehova na Satan ian ér a tese aluer hemen na hemba doon mimi yô, kpa sha anshighe kpuaa tsô. Er Yehova a lu a kwaghfan kpishi yô, a de ér shighe a kar i kuma u hanma or nana nenge wang er hemen môm u doo u kom sha hemen na ga yô. Akaa a vihin tsung a a er uumace la tese ér uumace man Satan vea fatyô u hemen se sha gbenda u dedoo ga.

5. Akaa a a er uumace ken anyom a karen ne tese wang ér nyi?

⁵ Ken anyom 100 a a kar ne tseegh, ityav wua ior hemba miliôn 100. Nyian ne, tar ngu hemban vihin seer a seer. Ka kwagh u Mkaanem ma Aôndo tsengaôron ér una va er ken “ayange a masejime” a tar ne je la. Bibilo kaa ér: “Udangmbaiorov man mbatsughunior vea yem hemen hemen vea hemba vihin a vihi kwagh.” (2 Tim. 3:1, 13) Akaa a a er uumace ken anyom a karen ne tese wang a akperan shio ér mkaanem ma gen ma Bibilo i er ne kpa ka mimi. I kaa ér: “TERE, m fa, gbenda u or ngu sha ikyev i nan ga; or u zenden la, mvershigh u iaven i angahar a nan ngu sha ikyev i nan ga.” (Yer. 10:23) Yehova gba uumace a mfe shin ian i lun sha tseeneke ve a na shio ga.

6. Ka nyi i ne ve Yehova a de ér iferkwagh i za hemen sha anshighe kpuaa?

⁶ Aôndo de ér akaabo a er shin tar sha u tesen er uumace ve kom u hemen ayol a ve ga yô, kpa ka cii la ga, a er nahan sha ci u kwagh u a we ishima u va eren ken hemen la kpaa. Kwagh la tese wang ér ka hemen u Aôndo tseegh u doo ye. Yehova una timin mbaaferev shi una been a iferkwagh kera yô, aluer or shi laha hemen u Yehova u sha dooshima la hen shighe la yô, una kar a nan kera fese je. Yehova una tim or u nan hembe ato la fese, gadia akaa a hemen u uumace u ve a mi la na yô, mayange una kera de ér shi or a hii iferkwagh igen ga.

7, 8. Ka igbenda kpishi i nyi nahan Yehova a tese dooshima na u vesene?

⁷ Yehova tese se dooshima na u hemban la sha igbenda kpishi. Ikyav i tesen yô, nenge ase er a gbe sha man tar ve kehe shi ve doo ashe yô. A gba shawon, ngu a azuku-asan ubiliôn imôngo, shi hanma ijuku-asan yô, ngi a asan ker ubiliôn ubiliôn kua ityar kpishi. Iyange kpa ka ishan igen i i lu ken ijuku-asan i tar wase kpa u lu ker la. A iyange shio yô,  akaauma ma a lu sha tar ga. Kwagh ne cii tese ér ka Yehova a gbe se ye, shi a tese agee man kwaghfan man dooshima na tseer tseer. Sha kpôô yô, “hii sha igbetar je mba nengen a mlu [u Aôndo] u i nengen a mi sha ashe ga la, inja na yô, ka agee a Na a tsôron man mlu Na u sha inja i Aôndo la, mba nengen a mi sha ashe a ishima ken aeren a Na. Nahan mba a ityôkwagh i ishôôgh ga.”—Rom. 1:20.

⁸ Yehova er tar ne sha er uma una lu ker yô. Hanma kwagh u a er shin tar cii ngu uumace man annyamev a iwasen. Yange er paradiso u doon ashe sha ci u uumace shi na ve mhen man iyol i vough sha er vea fatyô u lun uma gbem sha won yô. (Ôr Mpase 4:11.) Heela tseegh ga, “ne mbaumav cii kwaghyan, gadia erdoo Na ka u tsôron gbem sha won.”—Ps. 136:25.

9. Er Yehova a lu Aôndo u dooshima nahan kpa, nengen kwaghbo nena, man ka sha ci u nyi?

⁹ Er Yehova a tese ér un ngu Aôndo u dooshima nahan kpa, a pase wang ér un kôr kwaghbo ihyom. U tesen ikyav yô, Pasalmi 5:4-6 ôr kwagh u Yehova ér: “We, U ngu Aôndo u ifer i dio U ga yô . . . mbaerenafer cii U vende ve . . . or u haan awambe inya man orcugh yô, ndôhôr TER ishima.”

10, 11. (a) Yehova una er a mbaaferev nena? (b) Yehova una er a uumace mba ve ongo imo na la nena?

¹⁰ Er Yehova a lu Aôndo u dooshima shi a ker kwaghbo ihyom yô, a wa ishima u been a iferkwagh sha tar man sha won cii shighe u una kure ikyaa i sha kwagh u or nan kom u hemen sha won cii la yô. Mkaanem ma Aôndo tôndo zwa ér: “Á va tim aferaior kera; kpa mba ve veren ashe hen TER yô, ka ve vea ya dyako u tar ye. Gadia shi côhin tsô iferor á kera lu ga; . . . Mbaihyomov mba TER kpaa vea lu er mhem u toho, vea kar kera—vea kar kera er mnyim nahan.”—Ps. 37:9, 10, 20.

¹¹ Bibilo shi tôndo zwa ér: “Mbaperapera vea ya dyako u tar, vea lu ken u gbem.” (Ps. 37:29) “Á saan [mbaperapera mban] iyol sha mngee u bem.” (Ps. 37:11) Ityendezwa ne kpa ia kure sha mi, sha ci u Aôndo u se doo un ishima la eren kwagh u hemban doon sha ci u mba ve civir un sha mimi la hanma shighe cii. Bibilo kaa a vese ér: “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpa. 21:4) Sha kpôô yô, mlu u doon tsung ngu keghen mba ve lu a iwuese sha dooshima u Yehova shi ve ongo imo na sha ci u ngu Orhemen ve la!

12. Ka an a fatyô u kaan ér nan ngu “or u vough”?

¹² Mkaanem ma Yehova kaa a vese ér: “Ver ishima sha or u vough, shi nenge sha or u mimi kpaa, gadia injar ngi sha ci u or u bem; kpa mbaasorabo yô, á tim ve imôngo icin i môm, á tim tsombor u mbaaferev kera.” (Ps. 37:37, 38) “Or u vough” la ka or nan va fe Yehova man Wan na shi nan ongo imo na, nan eren ishima na la. (Ôr Yohane 17:3.) Imbaor la nan nengen kwagh u Bibilo i er ken 1 Yohane 2:17 la beelee ga, i kaa ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” Er mkur u tar ne a mgbôghom ne, hingir torough torough u se “ver ashe hen TER, [shi se] wa ikyo sha gbenda Na.”—Ps. 37:34.

13. Yehova tese mbaasorabo dooshima u hemban cii nena?

¹³ Er se lu mbaasorabo nahan kpa, se fatyô u ‘wan ikyo sha gbenda u Yehova.’  Shi se fatyô u yan ikyar a Yehova kôôsôô sha ci u dooshima u hemban cii u a tese se la. A na nagh ku paan uumace la sha Yesu Kristu, nahan kwagh la bugh mba ve ongo imo na la ian i a pase ve sha ikyev i isholibo man ku u ve ye dyako hen Adam la a tuhwa. (Ôr Mbaromanu 5:12; 6:23.) Shighe u Yesu lu sha vea Aôndo anyom kpishi la, eren kwagh sha mimi, nahan Yehova lu a vangertiôr ér Wan na u ishima ishima ne una va shin tar kpa una za hemen u tilen sha mimi. Er Aôndo a lu Ter u doo ishima yô, yange ishima ia vihi un tsung shighe u i na Yesu atsan shin tar ne, shi i ôr un ijir sha mimi ga la kpen kpen je. Nahan kpa, Yesu za hemen u suen hemen u Aôndo la, shi tese ér orumace u vough nana kôrcio u tilen sha mimi hen Yehova, aluer nan tagher a mbamtaver mba vihin tsung je kpaa.

14, 15. Ku u Yesu la bugh uumace ian i nyi?

¹⁴ Er Yesu tagher a atsan a vihin tsung nahan kpa, a tile sha mimi shi a tese ér ka Yehova tseegh a kom u hemen ye. Yange civir Ter na sha mimi zan zan ku na. Shi se mba a iwuese sha naagh ku Yesu a ne sha u paan se sha ikyev isholibo, nahan bughun se gbenda u zuan a uma u tsôron ken tar u Aôndo a tende zwa u van a mi la. Apostoli Paulu pase er kwagh ne a lu dooshima u hemban je Yehova man Yesu ve tese se yô. A kaa ér: “Er se lu aseeraior her la je Kristu kpe er shighe va kuma vough yô, sha ci u mba ve fe Aôndo ga la. Gadia orperapera je kpaa ka ican u orgen  nana kpe sha ci u nan yô, nahan kpaa or u mimi yô, alaghga orgen nana cihi á lumun u kpen sha ci u nan. Kpa Aôndo tese se dooshima Na sha ku u Kristu A kpe sha ci wase er se lu mbaasorabo her la.” (Rom. 5:6-8) Apostoli Yohane nger ér: “Ka sha kwagh ne man i pasen dooshima u se doo Aôndo ishima la ye, er Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye, man A tindi Wan Na hingir iwom sha asorabo ase.”—1 Yoh. 4:9, 10.

¹⁵ Yesu yange pase er uumace ve doo Aôndo ishima yô, ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yoh. 3:16) Uumace doo Aôndo ishima tsung je yô, a tange iyol u eren kwagh u doon sha ci ve ga, shin er lu kwagh u nyoon un tsung nahan je kpaa. Dooshima na la ka u been mayange ga. Se fatyô u lun a vangertiôr ser shighe môm una de u soon se ga. Paulu nger ér: “M fa dedoo mer, ku shin uma, shin mbatyomov mba Shaav, shin tahav, shin akaa a hegen ne, shin akaa a lu van ken hemen, shin mbaageev, shin mtav, shin mze, shin ma kwagh ugen u i gbe un a gba kpaa, una fatyô u paven se a dooshima u Aôndo u a lu ken Kristu Yesu Ter wase la je ga.”—Rom. 8:38, 39.

16. Tartor u Mesiya la ka nyi, man ka unô Yehova a tsough ve ér ve hemen ken Tartor shono?

¹⁶ Tartor u Mesiya la ka kwagh ugen u a tese wang ér uumace doo Aôndo ishima tsung yô. Yehova wa Tartor la sha ikyev i Wan na, u uumace ve doon un ishima shi a kom u hemen la. (Anz. 8:31) Yehova tsua uumace 144,000 sha u ve za hemen vea Kristu sha yô. Ka a nder ve shin ku, vea yem sha kpa, ve za hemen u umbur akaa a yange ve tagher a mi shighe u ve lu uumace la. (Mpa. 14:1) Tartor lu itinekwagh i Yesu pasen kwagh a mi yô, shi a tese mbahenen nav u eren msen ér: “Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan.” (Mat. 6:9, 10) Sha kpôô yô, zum u Yehova una ungwa msen ne la, uumace mba ve ongo imo na la, vea zua a averen a doon tsung!

17. Pase ase mkposo u hemen u Yesu a hemen u uumace mba ve lu mbaasorabo la.

¹⁷ Hemen u Yesu u sha dooshima la kaha a hemen u uumace la kpishi je. Hemen u uumace la va a ityav mbi mbi woo ior umiliôn umiliôn yô. Nahan kpa, Tor wase Yesu Kristu yô, se doo un ishima shi ngu a aeren a Aôndo a doon tsung la, hemban je yô, dooshima. (Mpa. 7:10, 16, 17) Yesu yange kaa ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikyav Yav kpaa peese.” (Mat. 11:28-30) Nenge imba ityendezwa i doon tsung ne sha wono!

18. (a) Hii shighe u Tartor u Aôndo hii u hemen la je, ngu eren nyi? (b) Ka nyi se lu timen sha mi ken ngeren u dondon nee?

¹⁸ Akaaôron a profeti a Bibilo tese ér Tartor u Aôndo u sha la hii u hemen ken inyom i 1914 la. Hii shighe la je, mba kohol asande a mba vea za hemen vea Yesu sha, mba ve shi uma her la, kua “zegeikpelaior” i ia war mtim u tar ne, ia nyôr ken tar u he la. (Mpa. 7:9, 13, 14) Kpa zegeikpelaior ne ngee hegen kuma nena? Ka nyi i gbe u mba ve lu ken zegeikpelaior ne vea ere? Ngeren u dondon ne una na mlumun sha mbampin mban.