Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Se fatyô u eren nyi hanma inyom sha u wan agoyol u umbur ku u Yesu?

Kwagh môm u se fatyô u eren yô, ka u ôron avur a Bibilo a i tese ér se ôr hen shighe u M-umbur la. Se fatyô u nôngon seer eren tom u pasen kwagh la hen shighe ne. Shi se fatyô u eren msen, gbidyen kwar sha ishimaverenkeghen i Aôndo a ne se la.—1/15, peeji 14-16.

Yange lu iyua i kpilighyol i nyi i na anmgbianev mba ken tar u Japan?

Yange i na ve antakerada ugen u i gber Ivangeli i Mateu la ker yô. Lu Ivangeli i Mateu i ken Bibilo i New World Translation la i gema ken antakerada la ye. Ka ve na ior antakerada ne shighe u ve dugh kwaghpasen yô, shi ior kpishi mba ve fe kwagh u Bibilo ne ga kpa ngohol antakerada ne.—2/15, peeji 3.

Ka mbamlu mba nyi yange ve wase u samber a loho u dedoo sha ayange a mbaapostoli laa?

Bem u Mbaromanu va a mi la na yô, ayôôso kera lu kpishi ga. Mbaromanu yange ve er igbenda i doon kpishi, nahan mbahenen zenden sha mi pasen kwagh. Ior lamen zwa Grika wuee, nahan kwagh ne na kera lu ican u pasen kwagh ga, hen Mbayuda mba ve lu ken Tartor u Roma jimin cii la je kpaa. Shi mbahenen fatyô u eren tom a tindi u Roma la sha u palegh loho u dedoo iyol.—2/15, peeji 20-23.

Ken anyom a a sember karen ne, hii nan ve i kera fe pasen kwagh u akav a ken Bibilo man kwagh u a til sha ityough ki a la ken ityakerada yase ga?

Bibilo ôr kwagh u ior mbagenev ér yange ve lu ikyav i kwagh u vesen ugen. Mbagalatia 4:21-31 tese kwagh ne. Kpa doo u se yem pasen akav man kwagh u akav shon a til sha mi la ga. Nahan cii kpa, se fatyô u henen akaa a injaa hen ior mba i er kwagh ve ken Bibilo la, kua akaa a i er ker la kpaa. (Rom. 15:4)—3/15, peeji 17-18.

Ieren i dughun orsholibo u nan vende u geman ishima ken tiônnongo kera la, ka u tesen nan dooshima sha ci u nyi?

Bibilo lumun a kwagh u dughun or ken tiônnongo kera la, sha ci u kwagh ne ka a va a mbamtsera. (1 Kor. 5:11-13) Kwagh ne ka a va a icivir sha iti i Aôndo shi a kura tiônnongo u wang la, shi alaghga a na orsholibo la nan gema ishima. —4/15, peeji 29-30.