1, 2. Ka mkor u nyi yange gba u a na tsombor u kwase laa, man lu sha ci u nyi?

KWAGHÔRON u profeti u hiihii u i nger ken Bibilo la ngu se a inja kpishi sha ci u a pase er awashima u Yehova una kure yô. Shighe u Aôndo u mimi lu eren ityendezwa i ken Eden la, a kaa ér: “Me ver ihyom hen atô wou [Satan] vea kwase, man hen atô u vor wou a vor [shin tsombor] na kpaa.” Ihyom ne ia vihi nan je? Yehova kaa ér: “U [tsombor u kwase la] ua cagh u [Satan] ityough, we di kpaa ú cagh u ikishinguhar.” (Gen. 3:15) Ihyom i hen atô u iyô man kwase la ia vihi je yô, Satan una nôngo sha afatyô na cii ér una tim tsombor u kwase la kera.

² Sha nahan yô, kera kpiligh se iyol er i hii ve orpasalmi yange er msen sha kwagh u ior mba Aôndo nahan ne ga. A kaa ér: “Nenge, mbaihyomov Ou mough ayôôso, mba ve ker U ihyom kpaa, ve kende iyol sha; mba henen kwagh u bo sha u hendan a ior Ou, mba henen imôngo sha kwagh u vea er mba U yer ve kera la. Ve kaa ér: Va, sé za tim nen ve, ve̱ de kera luun ikyurior ga.” (Ps. 83:2-4) Yange gba u a kura ikyurior i tsombor u kwase la ua due ker la, sha er i de timin i̱ shin  i hôngor i̱ ga yô. Yehova yange due a uikyurmbayan mba vea kure awashima na ne vough yô.

3, 4. (a) Ka hanma shighe ikyuryan i Tindi la yange i hii u eren tomo, man ikyurior i Iserael lumun ér ia er nyi? (b) Yange i ya ikyur i sha Tindi la sha u yangen nyi?

³ Er ônov mba Aberaham man Isaka kua Yakob seer iyenge kuma umiliôn umiliôn la, Yehova gema ve ve hingir ikyurior, ka ikyurior i Iserael u tsuaa la je la. Yehova yange ya ikyur a Mbaiserael sha u nan ve Tindi, shi ve kpa ve lumun ér vea kura Tindi la. A er kwagh ne sha ikyev i Mose. Bibilo kaa ér: “[Mose] tôô Ruamabera u ikyuryan la, a ôr, ior ungwa dedoo; ve kaa er: Akaa a TER A kaa la cii, sé er, shi sé waan a ikyo kpaa. Tsô Mose tôô awambe la, mishi sha ior, a kaa er: Ka awambe a ikyuryan i TER A ye a ven sha akaaôron na cii je ne.”—Eks. 24:3-8.

⁴ Ikyuryan i Tindi la yange i hii u eren tom sha Uwo u Sinai ken inyom i 1513, cii man shighe u Yesu la ye. Lu sha ikyuryan ne Aôndo tsua ikyurior i Iserael u tsuaa la ver kposo ye. Yehova maa hingir ‘Orjir, man Orwan atindi man Tor’ ve. (Yes. 33:22) Kwagh u yange er Iserael la tese se kwagh u ior ka vea dondo akaawan a Aôndo shin vea dondo ga ve a er ve yô. Tindi la yange Mbaiserael u vôson kasev mba ken akuraior agen shi civir mbaaôndo mbagenev kpaa. Yange i ver Tindi la ér a kura tsombor u Aberaham sha u i de hôngor u ga yô.—Eks. 20:4-6; 34:12-16.

5. (a) Ikyuryan i Tindi la yange i bugh Mbaiserael ian i nyi? (b) Aôndo yange venda Mbaiserael sha ci u nyi?

⁵ Yange i veren upristi ken Iserael sha ikyev i ikyuryan i Tindi la. Upristi mban tile sha ityough ki nongo u upristi ugen u ua va er tom u vesen ken hemen yô. (Heb. 7:11; 10:1) Jighilii yô, ikyuryan i Tindi la yange i na ikyurior i Iserael ian i civirigh i hingir “tartor u upristi,” aluer ve kura atindi a Yehova wa ve la yô. (Ôr Ekesodu 19:5, 6.) Nahan kpa, Mbaiserael fatyô u kuran atindi a Aôndo wa ve la ga. Er ikyurior la ma ngohol Mesiya, u a lu vegher u vesen u tsombor u Aberaham la yô, i venda un; nahan Aôndo kpa venda i.

6. Lu awashima u nyi ikyuryan i Tindi la kure?

⁶ Er Mbaiserael kanshio u civir Yehova sha mimi yô, ve kera kuma u lun tartor u upristi la ga. Kpa u ngu wer ikyuryan i Tindi la bunde ga. Yange lu u ikyuryan i Tindi la ia kura tsombor la shi ia wase uumace vea fa Mesiya. Kristu ve shi ior mba fe un yô, ikyuryan i Tindi la maa kure awashima u i la. Bibilo kaa ér: “Kristu ka mkur u tindi.” (Rom. 10:4) Kpa mpin u a gem a dugh yô, ér: Ka unô vea lu sha ian i hingir tartor  u upristi laa? Yehova Aôndo ya ikyur igen, sha u veren ikyurior i he.

7. Lu nyi Yehova tsengaôron sha ikyev i Yeremia sha kwagh u ikyuryan i he?

⁷ Cii man ikyuryan i Tindi la i kure yô, Yehova ôr sha ikyev i profeti Yeremia ér Una ya “ikyuryan i he” vea ikyurior i Iserael. (Ôr Yeremia 31:31-33.) Ikyuryan la ia lu er ikyuryan i Tindi la nahan ga, sha ci u a gba u ior vea na nagh sha uile ve a fatyô u den ve isholibo ve ga. Kwagh a lu nahan sha ci u nyi?

8, 9. (a) Awambe a Yesu a hee inya la kure awashima u nyi? (b) Lu ian i civirigh i nyi bugh sha ci u mba ve lu ken ikyuryan i he laa? (Nenge foto u a lu sha mhii u ngeren ne la.)

⁸ Anyom nga kar uderi imôngo yô, Yesu ver iniongo i Kwaghyan u Ter u Aikighe sha iyange i Nisan 14, inyom i 33 la. Shighe u lu ôron kwagh u iyongo i wain la, a kaa a mbaapostoli nav mba 11 mbajighjigh mbara ér: “Iyongo ne ka ikyuryan i he i ken awambe Am a i hee sha ci wen ne.” (Luka 22:20) Takerada u Mateu kpa nger kwagh u Yesu ôr sha kwagh u wain la kaa ér: “Ka awambe Am a ikyuryan je ne, a i hee a sha ci u ior kpishi sha u den asorabo” yô.—Mat. 26:27, 28.

⁹ Ka sha awambe a Yesu la i ver ikyuryan i he la ye. Shi ka awambe la kpa a ne ve i lu u a fatyô u den se asorabo a ase gbem sha won ye. Yesu ngu ken ikyuryan i he ne ga. Er a er isholibo ga yô, gba u a de un kwaghbo ga. Kpa sha awambe a Yesu a hee la yô, Aôndo una fatyô u den ônov mba Adam asorabo a ve. Shi una fatyô u lumun uumace mbagenev ér ve lu “ônov” nav sha u tseghan ve sha icighan jijingi. (Ôr Mbaromanu 8:14-17.) Er Aôndo a nenge ve ér mba a isholibo ga yô, vea lu er Yesu, Wan u Aôndo u a lu a isholibo ga la nahan. Mba i shigh ve mkurem mban vea hingir “mbayandyako a Kristu imôngo,” shi vea lu sha ian i civirigh i lun “tartor u upristi.” Ka ian i civirigh i ikyurior i Iserael i i lu sha ikyev i Tindi la ta kera la. Apostoli Peteru ôr kwagh u “mbayandyako a Kristu imôngo” mbara ér: “Ne yô, ne mba icuwannongo, nongo u upristi mba sha inja i tor, icighanikyurior, nongoior u Aôndo jim, ka sha u né yôô aeren a Na a ageegh, Un u A yila ne ken ime, A va a ven ken iwanger Na i kpiligh iyol la.” (1 Pet. 2:9) Ikyuryan i he la ngi hange hange kpen kpen! I na yô, mbahenen mba Yesu hingir vegher u sha uhar u tsombor u Aberaham la.

10. Ka hanma shighe ikyuryan i he la hii u eren tomo, man i hii u eren tom cii shighe la ga sha ci u nyi?

¹⁰ Ka hanma shighe ikyuryan i he la hii u eren tomo? Lu shighe u Yesu ter kwagh u i̱ hen tugh nav mbu masetyô shin tar la ga. Cii man i̱ hii u eren tom yô, yange gba u a haa awambe a Yesu inya, shi una kôndo a yem sha a za na Yehova injar i awambe shon. Heela tseegh ga, a gba u icighan jijingi una sen sha mba vea lu “mbayandyako a Kristu imôngo” mbara. Sha nahan yô, ikyuryan i he la yange i hii u eren tom sha Pentekosti, inyom i 33, shighe u i tsegha mbahenen mba Yesu mbajighjigh sha icighan jijingi la.

11. Ikyuryan i he la yange i na yô, Mbayuda man Atôatyev cii hingir Iserael u ken jijingi nena, man ka iorov ume vea lu ken ikyuryan i he laa?

¹¹ Shighe u Yehova ôr sha ikyev i Yeremia ér una ya ikyur i he a Iserael la, kwagh ne tese ér ikyuryan i Tindi la ia va “kar kera.” Ikyuryan i Tindi la yange i kar kera shighe u ikyuryan i he la hii u eren tom la. (Heb. 8:13) Ikyuryan i he  la hiin u eren tom yô, Aôndo gema nengen Mbayuda man mbananjighjigh mba ken atôatyev mba i tsôngo ve ga la cii ér mba kwaghmôm, sha ci u “icôngo i mimi kpaa, ka kwagh u ken ishima, ka kwagh u ken jijingi, ka sha kwaghngeren la tsô ga.” (Rom. 2:29) Er Aôndo ya ikyur i he ne a ve yô, lu u una ver atindi a na “ken mhen ve shi ka ken asema a ve kpaa [Una] nger a ye.” (Heb. 8:10) Mba vea lu ken ikyuryan i he ne cii vea lu iorov 144,000. Ka ve vea lu ikyurior i he la ye; ka “Iserael u Aôndo” shin Iserael u ken jijingi je la.—Gal. 6:16; Mpa. 14:1, 4.

12. Ka akaa agen a nyi ken ikyuryan i Tindi la a fatyô u tôôn karen sha a ken ikyuryan i he laa?

¹² Akaa agen ken ikyuryan i Tindi la zua a akaa a ken ikyuryan i he la nena? Ikyuryan i Tindi la lu hen atô u Yehova vea ikyurior i Iserael, ikyuryan i he la di ngi hen atô u Yehova vea Iserael u ken jijingi la. Mose lu orhimen u ikyuryan i Tindi la, Yesu di ka Orhimen u ikyuryan i he la. Lu sha awambe a uile i ya ikyuryan i Tindi la ye; ikyuryan i he la di ka sha awambe a Yesu a hee la. Lu sha hemen u Mose i ya ikyuryan i Tindi la a ikyurior i Iserael ye; ken ikyuryan i he la di ka sha hemen u Yesu u a lu Ityough ki nongo u Kristu la i ye i ye.—Ef. 1:22.

13, 14. (a) Ikyuryan i he la gba zua sha kwagh u Tartor nena? (b) Saa a er nyi keng ve Iserael u ken jijingi la una fatyô u za hemen vea Kristu sha?

¹³ Ikyuryan i he la gba zua sha kwagh u Tartor sha ci u i̱ mar icighanikyurior i i lu sha ian i hingir utor man upristi ken Tartor u sha la yô. Ikyurior la ngi vegher u sha uhar u tsombor u Aberaham la. (Gal. 3:29) Nahan ikyuryan i he la sue ikyuryan i Aberaham la.

¹⁴ Kpa vegher ugen u Tartor la ngu a kure ga. Ikyuryan i he la mar Iserael u ken jijingi shi bugh gbenda u mba ve lu ker la vea hingir “mbayandyako a Kristu imôngo.” Nahan kpa, a gba u a ya ikyuryan igen ve vea lu sha ian i lun utor man upristi vea Yesu sha Tartor na ye.

15. Lu ikyuryan i nyi Yesu iyolna ya a mbaapostoli nav mbajighjigh mbara?

¹⁵ Yesu yange veren iniongo i Kwaghyan u Ter u Aikighe la yô, a ya ikyur a mbahenen nav mbajighjigh mbara; mba yer ikyuryan ne ér ikyuryan i Tartor. (Ôr Luka 22:28-30.) Er Yehova ka a lu ken uikyurmbayan mbagenev mbara nahan kpa, ikyuryan i Tartor ne yô, ngi hen atô u Yesu a mbadondon un mba i shigh ve mkurem la tseegh. Shighe u Yesu lu kaan ér, “er Terem kpaa A verem [Tartor] nahan” la, a shi nan kpa lu ôron kwagh u ikyur i Yehova ya a na ér una hingir “pristi gbem sha won sha inja i Melkisedeki” la.—Heb. 5:5, 6.

16. Ikyuryan i Tartor la bugh Mbakristu mba i shigh ve mkurem la gbenda u eren nyi?

¹⁶ Mbaapostoli mbajighjigh mba 11 mbara yange ve ‘taver ishima ve lu a Yesu ken ameen a i lu meen un la cii.’ Ikyuryan i Tartor la yange i na ve lu a vangertiôr ér vea za lu a na sha shi vea tema sha mkônom ma torom, vea lu utor man upristi. Nahan kpa, ka mba 11 mbara tseegh vea lu sha ian i civirigh ne ga. Shighe u Yesu u i ver un sha ian i civirigh la ande hen Yohane ken mpase u sha mnenge la, a kaa ér: “Or u nan hembe yô, Me na nana tema a Mo imôngo sha ikyônough Yagh ki torough di er Mo kpaa M hembe man M tem a Terem imôngo sha ikyônough Nagh ki torough nahan.” (Mpa. 3:21) Sha nahan yô, i ya ikyuryan i Tartor ne a Mbakristu mba i shigh ve mkurem, ve lu iorov 144,000 la. (Mpa. 5:9, 10; 7:4) Ka ikyuryan i i ne ve i  hingir u vea za hemen a Yesu sha je la. Kwagh ne ngu kwaghmôm a kwase u ka nan vôso tor u a lu hemen yô, nahan kwase la kpa nan hingir u hemen er nom u nan nahan la. Jighilii yô, Bibilo yila Mbakristu mba i shigh ve mkurem la ér “kwasehe” u Kristu, “ka iniunkwase i lun wang,” i Kristu a tende zwa u vôson je la.—Mpa. 19:7, 8; 21:9; 2 Kor. 11:2.

17, 18. (a) Sav pasen uikyurmbayan ataratar mba ve gbe ve zough sha kwagh u Tartor, mba se tim sha mi la. (b) Se fatyô u lun a jighjigh u nan u tenger ga la sha kwagh u Tartor sha ci u nyi?

¹⁷ Uikyurmbayan mba se tim sha mi ken ngeren mba uhar mban la gba zua a kwagh môm shin akaa ahar a sha kwagh u Tartor. (Nenge ngeren u a lu a itinekwagh ér, “Er Aôndo Una Kure Awashima Na Yô” la.) Kwagh ne tese wang ér ikyuryan i Tartor la har sha uikyurmbayan mbagenev mbara. Sha nahan yô, se mba a ityôkyaa i vesen i nan jighjigh taveraa ser Aôndo una er tom a Tartor u Mesiya la sha u kuren awashima u a lu a mi sha kwagh u tar man uumace la yô.—Mpa. 11:15.

¹⁸ Ka Tartor la tseegh ua fatyô u been a mbamzeyol mba uumace ye. Akperan nga sha kwagh ne ga. Se mba a vangertiôr ser ua va uumace cii a averen a tsôron. Yô, se za nen hemen u pasen mbagenev kwagh u mimi ne sha gbashima!—Mat. 24:14.