YESU yange kaa ér a yôhôr Yerusalem je iwen igen kpa ia kera tile sha igen ga. Kwaghôron u profeti ne va kure sha mi shighe u kurutya u Mbaroma u i yilan ér Titu la va tim Yerusalem ken inyom i 70 la. (Mat. 24:2) Shighe kar yô, Tor u Mbaroma ugen u i yilan ér Julian la, kohol iyol u va hiden maan tempel la.

Lu Julian lu tor u Roma u masetyô, u civir akombo ye. Lu anmgbian u ikyumenor u i yilan ér Constantine la, shi i tsaase un sha ikyev i mba ve senge ér ve mba Mbakristu la. Nahan cii kpa, va ye tor ken inyom i 361 yô, a venda ityesen i Mbakristu mbara kua aeren a ve a bo la, gema dondo ityesen i mbafanaôndoga. Takerada u pasen yiase ugen yila un ér “or u vendan mimi.”

Julian yange kôr mba ve senge ér ve mba Mbakristu mbara ihyom. Alaghga tsô ityôkyaa i môm yô, lu sha ci u shighe u lu anyom ataratar la, mba ken kwaghaôndo ne wua ter na man anterev nav. Mbaôron yiase i côôci ne kaa ér Julian yange kaa a Mbayuda ér ve hide ve maa tempel la, lu henen ér aluer i er nahan yô, kwagh la una tese ér Yesu lu profeti u aiegh. *

Ikyav tese wang ér Julian yange wa ago a hiden maan tempel la. Mbatôvon sha akaa a mbayiase mbagen nenge ér yange una hii u maan un kpa i fa jighilii ga. Shi yange una hii u maan kpa, i fa kwagh u na ve tom shon va tile ga. Kpa kwagh u i fe yô, Juliana yange tema tor lu a kuma anyom ahar ga je maa i wua un, shi tom shon kpa i de u kpum kpum.