Civir Aôndo U A Kighir Ior Ga La
Civir Aôndo U A Kighir Ior Ga La
“Gadia ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” —1 YOH. 5:3.
Ú FATYÔ U NAN MLUMUN KPA?
Satan ka a nôngo ér una na i̱ lu inja er atindi a Aôndo yuhwa kpishi nena?
Doo u se heren a her ior mba se kôr ijende a ve la sha ci u nyi?
Ka nyi ia wase se ve se za hemen u civir Aôndo u a kighir ior ga la sha mimi?
1. Yehova eren kwagh a ian i a lu a mi i eren kwagh u a soo la nena, man ka ian i eren nyi yange na Adam man Ifa?
KA YEHOVA tseegh a lu a ian i eren hanma kwagh u a soo cii ye. Nahan kpa kighir ior shin sangen yeke sha kwagh u ior ve eren la ga. A na ve ian i tsuan kwagh u ve soo la, man i kuren asaren a ve a vough la. U tesen ikyav yô, Aôndo yange wa Adam man Ifa tindi môm tseegh, a yange ve u yan “kon u mfe u fan kwagh u dedoo man kwagh u bo la.” (Gen. 2:17) Nenge er yange ve lu a ian gbanger gbanger i eren ishima i Orgban ve la sha wono!
2. Er nan ve mbamaren asev mba hiihii mbara yange ve hingir ikpan i isholibo?
2 Aôndo yange na mbamaren asev mba hiihii mban ian gbanger gbanger nahan sha ci u nyi? Yange gba ve sha ibeen na shi na ve imo i ken ishima, nahan ver ishima ér mdoo u un doo ve ishima la a mgbegha ve u eren kwagh u vough. (Gen. 1:27; Rom. 2:15) Kpa kwagh er vihi yô, Yehova gba Adam man Ifa kwagh ga, shi ian i yange na ve i tsuan kwagh u ve soo la kpa gba ve kwagh ga. Ve gema ve tsua ian i Satan na ve sha tindi ga, i lun sha tseeneke ve, eren kwagh sha asema a ve la. Nahan cii kpa, mbamaren asev mba hiihii mban hemba lun sha tseeneke ve ga, kpa ve gema ayol a ve kua ônov mba lu u vea va mar la cii ve tee isholibo, man kwagh ne gema va a ican i yan man ku.—Rom. 5:12.
3, 4. Satan ka a nôngo ér una tsugh se sha kwagh u mcivir u Yehova nena?
3 Er Satan yange kôrcio u meen Adam ma Ifa, mba ve lu vough la kua mbatyomov mbagenev ér ve hemba Aôndo ato yô, se kpa una fatyô u tsughun se. Ayom a na nga a gema ga. Ka a nôngo ér una tsugh se se̱ hen ser aluer se mba civir Aôndo yô, se zua a msaanyol man iember ga. (1 Yoh. 5:3) Ka mhen u ior ve lu a mi ken tar wuee je la, nahan aluer se mba lun vea ve hanma shighe yô, se va hii u henen kwagh er ve nahan. Anmgbian u kwase ugen u lun anyom 24, u yange er idya yô, kaa ér: “Ujende mba bov yange ve tsume a mo kpishi, sha ci u m lu cian mer me va due kposo a mbakov wam.” Alaghga we kpa u tagher a imba mtaver ne.
4 Kwagh ka a er i vihi yô, ashighe agen mbagen ken tiônnongo kpa ka ve lu a mnenge u ior mba ken tar ne. Anmgbian ugen u a lu gumor yô, kaa ér: “M fa agumaior agen ken tiônnongo, a a sôôr mba ve civir Yehova ga yô. Er m luun vea ve hanma shighe yô, m lu hingir er ve nahan. M kera gba taver ken jijingi ga. Kwaghyan u ken jijingi u se ye ken mbamkombo la kpa kera gba nyohon mo ga, shi m kera duen kwaghpasen kpaa ga. Nahan m fa je mer, kuma u me undu azende am ne ve, man lu kwagh u m er kpaa je la!” U fa er azende a ou aa fatyô u vihin we kpa? Nenge ase ikyav igen ken Bibilo.—Rom. 15:4.
YANGE NGOHOL VE ASEMA
5, 6. Abesalom yange tsugh mbagenev nena, man ayom a na la yange za ikyura je kpa?
5 Bibilo ôr kwagh u ior kpishi mba yange ve vihi mbagenev yô. Môm ken ior mban lu Abesalom, wan u Tor Davidi. Abesalom yange doo or velegh. Nahan kpa, shighe kar yô, a de mhange u sha hua iv un ken ishima, nahan a hii u tômon ikyônough ki torough ki ter na, ki ki lu sha ci na ga la. * Abesalom hii u eren ayom a ngohol hemen hen ter na, nahan a gba eren ikpamberashe, inja er kwagh u ior mba Iserael gba un ishima, kpa tor yô kwagh ve gba un ishima ga nahan. Er Satan yange er ken sule u Eden nahan, Abesalom er ior na jighjigh ér un soo u wasen ve, shi yange er aie sha ityough ki ter na keeng.—2 Sam. 15:1-5.
6 Ayom a Abesalom ne za ikyura je he? Yange nôngo u zan ikyura, gadia Bibilo kaa ér: “Abesalom ngohol nomsombaiorov mba Iserael asema.” (2 Sam. 15:6) Kpa ken masejime yô, kwagh hemba un. Shi kwagh er vihi yô, un man ior udubu imôngo mba yange tsugh ve ve dondo un la cii ve kpe.—2 Sam. 18:7, 14-17.
7. Kwagh u Bibilo i er sha kwagh u Abesalom la tese se nyi? (Nenge foto u a lu sha peeji 14 la.)
7 Er nan ve yange tsugh Mbaiserael mbara zange yum nahana? Alaghga akaa a Abesalom tôndo zwa u nan ve la yange sar ve. Shin alaghga mdooashe na la yange tsugh ve. A lu nyi je kpa, yange ve er kwagh a Yehova kua tor u Yehova ver la sha mimi ga. Nyian kpa, Satan ngu eren tom a ior mba lun er Abesalom nahan sha u ngohol ior mba Yehova asema. Alaghga ambaaior ne aa kaa ér atindi a Yehova yuhwa gande, shi mba ve civir un mba a msaanyol ga. Aluer u ungwa akaa ne nahan, u kav er a lu mbaaie cica cii, nahan u za hemen u civir Yehova sha mimi kpa? U kav er “tindi u vough” u Yehova la una due a we ken uikyangen sha kpa? (Yak. 1:25) Aluer u kav nahan yô, tese wer tindi la gba u kwagh, shi mayange de eren kwagh u una vihi mlu wou a Yehova ga.—Ôr 1 Peteru 2:16.
8. Ka akav a han a tese ér or ka nana wa atindi a Yehova ikyo ga yô, nan zua a msaanyol ga?
8 Ka agumaior je i hembe hangen Satan u tsughun ve ye. Anmgbian ugen u a hembe anyom 30 yô, ôr kwagh u shighe u lu hian a hia la ér: “Yange m nengen atindi a Yehova a we la mer nga kuran mo ga, kpa nga kighir mo a kighir.” Kwagh ne na yô, a er idya. Kpa kwagh ne na un iember ga. A kaa ér: “Yange ishima vihim shi m ya ibo ken ishima sha kwagh ne anyom kpishi.” Anmgbian u kwase ugen umbur kwagh u er un shighe u lu gumkwase la, a kaa ér: “Yange m eren idya kera yô, ishima vihim tsung, shi m nenge mer m kera gba kwagh ga. Hegen u anyom a kar i hembe 19 ne je kpa, ka mea umbur kwagh ne i vihim kpishi.” Anmgbian u kwase ugen kaa ér: “Yange mea umbur er ieren yam la i ne ishima i vihi mba ve doom ishima kpishi la tsung nahan, m ule kpishi shi m kera taver ken jijingi ga. Ka kwagh u vihin tsung, u fan wer Yehova lumun a ieren you ga la.” Satan soo ér we u hen sha akaa a vihin a isholibo i ve a mi la ga.
9. (a) Ka mbampin mba nyi vea wase se u henen sha gbenda u se nengen Yehova kua akaawan a na laa? (b) Er nan ve i doo u se fa Yehova tsembelee?
9 Kwagh er vihi yô, mbayev man mbaganden mbagen ka ve er idya cii ve ve mase kaven ér ihyembeato ne msaanyol ga ye. (Gal. 6:7, 8) Nahan pine iyol you wer: ‘M fa er ayom a Satan la a lu icugh jim kpa? M nengen Yehova mer ka Ijende yam i kôôsôô, i̱ i̱ eren aie ga, shi i̱ soo ér i kpem iyol kpa? M na jighjigh mer mayange una nyumem kwagh u dedoo, u una nam msaanyol la ga kpa?’ (Ôr Yesaia 48:17, 18.) Cii ve u na mlumun sha mbampin mban a ishima you i môm wer een yô, a gba u ú fa Yehova a kôr inya. Gba u ú fa Yehova tsembelee, shi u lumun wer atindi a ken Bibilo man akaawan a ker cii nga sha ci u kuran we, shi nga tesen ér u doo un ishima.—Ps. 25:14.
SÔN YEHOVA A NA U ISHIMA FAN KWAGH MAN I UNGWAN UN
10. Doo u se dondo ikyav i Tor Solomon shighe u lu gumor la sha ci u nyi?
10 Shighe u Solomon lu gumor her la, a kaa ken msen a iyol i hiden a mi ijime ér: “M ngu wanakiriki u kpeghee tsô, m fa u duen man u nyôron kpaa ga.” Nahan a sôn Yehova ér a na un ishima i fan kwagh man i ungwan imo na. (1 Utor 3:7-9, 12) Yehova yange ungwa msen u Solomon er sha mimi la. We kpa kape una ungwa msen wou je la, wea lu wanye shin wea bee iyol kpaa. Yehova una na u kwaghfan man mkav sha ivande ga, kpa aluer u ngu henen Mkaanem nam sha gbashima shi u ngu sônon un icighan jijingi shi dondon akaa a i we se ken mbamkombo mba tiônnongo u Kristu la hanma shighe yô, u hingir orfankwagh. (Yak. 1:5) Man Yehova ka a er ior nav mba ve lu agumaior je kpa, ve hemba mba ve we atindi na ikyo ga la kwaghfan, kua mba ve senge ér ve mba “mbafankwagh man mbakavenkwagh” mba ken tar ne la kpaa.—Luka 10:21; ôr Pasalmi 119:98-100.
11-13. (a) Ka atesen a injaa a nyi se fatyô u henen ken Pasalmi 26:4 man Anzaakaa 13:20 kua 1 Mbakorinte 15:33? (b) Ú dondo kwaghwan u ken avur a Bibilo ne nena?
11 De se time nen ase sha avur a Ruamabera a a tese se u tsuan azende a dedoo la. Avur ne aa wase se u fan er i hii ve i doo u se henen Bibilo shi se gbidyen kwar sha kwagh u se hen la sha er se seer fan Yehova tsembelee yô. Hanma ivur yô, ngi a kwaghwan u injaa sha kwagh u azende a se ker la: “M tem a ugbilinmbaiorov imôngo ga; lun yam a mbaayomov imôngo kpaa ga.” (Ps. 26:4) “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” (Anz. 13:20) “De tsughun nen ayol a en ga, ujende mba bov mba vihin mbamlu mba dedoo.”—1 Kor. 15:33.
12 Avur a Bibilo ne tese se nyi? (1) Yehova soo ér se heren a her azende ase. A soo u kuran se sha er se lu a aeren a dedoo shi se ya ikyar a na her yô. (2) Ior mba se ye ijende a ve la vea fatyô u vihin se shin wasen se u eren kwagh u dedoo. Kwagh u nyiman sha kwagh ne ngu ga. Gbenda u i nger avur ne la tese ér Yehova soo ér una ôr kwagh a kôr se ken ishima. A soo u eren kwagh ne nena? Aluer u nenge yô, i nger avur ne inja er mba wan a wa atindi, kaan ér “de eren ingin shin ingila ga” ze. Kpa i nger a inja er Yehova ngu kaan a vese ér: ‘Ka kwagh u a lu u mimi je ne. Ú dondo un je he? Awashima wou ngu nena?’ nahan.
13 Shi er i nger avur ne sha u tesen ér ka akaaôron a mimi yô, hanma shighe cii nga a iwasen shi a bende a ior ken mbamlu kposo kposo. U tesen ikyav yô, pine iyol you mbampin mban, wer: Me er nan ve me palegh ‘mbaayomovo’? Me palegh u yan ijende a ambaaior la nena? (Anz. 3:32; 6:12) Ka unô ve lu “mbafankwagh” mba Yehova a soo ér mo m zenden a ve laa? Ka unô ve lu “abumeaior” a Yehova a soo ér mo m palegh laa? (Ps. 111:10; 112:1; Anz. 1:7) Ka “mbamlu mba dedoo” mba nyi nahan ujende mba bov vea fatyô u vihini? Ka ken tar tseegh me tagher a ujende mba bov yee? (2 Pet. 2:1-3) U na mbamlumun sha mbampin mba wer nyi?
14. U er nan ve Mcivir u hen Tsombor wou una hemba doono?
14 Er se tim sha avur a Bibilo a atar a a lu sha heen nahan, u fatyô u timen sha avur agen kpaa, sha er u fa mhen u Aôndo sha atôakaa a a gbe u kwagh kua tsombor wou kpaa la. * Ne mbamaren, doo u ne time sha atôakaa ne shighe u ne lu eren Mcivir u hen Tsombor u aikighe la yô. Er ne lu eren nahan la, umbur nen ner awashima wen yô, ka u wasen hanma or hen tsombor wen nana seer fan ér atindi a Aôndo man akaawan a na tese ér se doo Aôndo ishima kpishi. (Ps. 119:72) Gba u kwaghhenen la una wase tsombor wou ua hemba lun gungur môm shi ua lu kôôsôô a Yehova kpaa.
15. Aluer u ngu a ishima i fan kwagh man i ungwan kwagh yô, u fa sha nyi?
15 Aluer u ngu a ishima i fan kwagh man i ungwan kwagh yô u fa sha nyi? Gbenda môm yô, ka u tôôn mhen wou karen sha mbamhen mba ior mba ve civir Aôndo sha ashighe a tsuaa la, er Tor Davidi nahan. A nger ér: ‘Doom u eren ishima You, Aôndo wam; atindiakaa a Ou ngam ken ishima.’ (Ps. 40:8) Kape or u a nger Pasalmi 119 la kpa a kaa je la, ér: ‘Atindiakaa a Ou, doom ishima zee! Kam kwagh u shin henen sha mi didi.’ (Ps. 119:97) U gba teman a tema tsô maa u lu a imba dooshima ne ga. Kpa a gba u ú henen Bibilo kpoghuloo, shi u eren msen shi u gbidyen kwar sha kwagh u ú hen la, nahan u zua a averen kpishi a or ka nana dondon atindiakaa a Aôndo ve nan zua a mi la.—Ps. 34:8.
NÔNGO ITYAV MBI KEN JIJINGI SHA ER U LU KEN UIKYANGEN GA YÔ
16. Aluer se soo u hemban ityav mbi ken jijingi sha er se lu ken uikyangen ga yô, ka nyi i doo u se fa?
16 Akuraior ka a kegh iyol u nôngon ityav sha er aa lu sha tseeneke u a yô. Nahan hemba kan hange hange u ú nôngo ityav mbi ken jijingi cii, sha er u lu ken uikyangen ga yô. Umbur wer ka Satan man tar ne man jijingi u taregh u bo la tseegh ve lu mbaihyomov ou ga. Gba u ú nôngo a mbamyen ou kua ishima you, i̱ i̱ we atseregh la kpaa. (Yer. 17:9; Ef. 2:3) Nahan kpa, sha iwasen i Yehova yô, u hemba ityav mbin. Hanma shighe u ú tsough u eren kwagh u vough cii, a̱ lu kwagh u kiriki shin u vesen kpaa, u zua a mbamtsera uhar. Hiihii yô, u na a saan Yehova iyol. (Anz. 27:11) Kwagh u sha uhar yô, u nenge er “tindi u vough u a pasen se a toho” la a lu a tahav mbu yiman se yô, nahan ishima ia hemba taver we u lun sha ‘gbenda u imbishi,’ u u ze ken uma la. Ken hemen yô, u va kera lu ken uikyangen ga kuaa, man ka kwagh u Yehova a tende zwa u nan mba ve civir un sha mimi je la.—Yak. 1:25; Mat. 7:13, 14.
17. Er nan ve i doo u se ure sha ci u mbamyen asev ga, man ka iwasen i nyi Yehova a ne se shighe u se tsum laa?
17 Nahan kpa, se cii ashighe agen ka se tsume. (Orpa. 7:20) Zum u ú tsum yô, de uren i ganden shin nengen wer u gba kwagh ga ze. Aluer u gba yô, kighir mough sha, aluer gba u ú za hen mbatamen mba ken tiônnongo wer ve wase je kpaa. Yakobu yange nger ér: “Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.” (Yak. 5:15) Mayange i de hungur we er Yehova a zungu mhôônom sha mimi ga, shi umbur wer yange urugh we va a we ken tiônnongo sha ci u a nenge a kwagh u injaa ken a we. (Ôr Pasalmi 103:8, 9.) Nahan aluer u za hemen u civir Yehova a ishima i môm yô, una gbihi u mayange ga.—1 Kron. 28:9.
18. Ka nyi se er ve Yehova una kura se, er i nger ken Yohane 17:15 nahana?
18 Shighe u Yesu lu eren msen vea mbaapostoli nav mba 11 mba jighjigh, hen tugh mbu mase lun shin tar ne la, ôr mkaanem ma maa hungur se mayange ga man ér: “Kura ve sha ifer.” (Yoh. 17:15) Lu mbaapostoli mba Yesu tseegh kwagh ve gba un ishima ga, mbadondon un nyian cii, kwagh ve gba un ishima. Nahan se fatyô u nan jighjigh ser Yehova una ungwa msen u Yesu la, una kura se ken ashighe a ican ne. Bibilo kaa ér: “[Yehova] ka perutya u mba ve zenden sha mimi yô; . . . sôron gbenda u mba i doo Un a ve la.” (Anz. 2:7, 8) Ka zange u zenden sha mimi hanma shighe ga, kpa ka cii kwagh u or a er ve nana zua a uma u tsôron shi nana lu ken uikyangen ga je la. (Rom. 8:21) De lumun wer or a bume u ú undu gbenda u zan ken uma ne ga.
[Ngeren mba shin kpe]
^ Yange i mar Abesalom cii ve, Aôndo er ityendezwa a Davidi sha kwagh u “vor” ye. Sha nahan yô, gba u Abesalom ma fa je ér ka un Yehova a tsough ér Davidi a kera lu ga yô, una ya tor ga.—2 Sam. 3:3; 7:12.
^ Avur agen a u fatyô u timen sha mi yô, ka 1 Mbakorinte 13:4-8, ape Paulu a er kwagh u dooshima la, man Pasalmi 19:7-11, u a pase averen kpishi a se wa atindi a Yehova ikyo ve se zua a mi la.
[Mbampin Mba Ngeren u Henen]
[Ufoto mba sha peeji 14 la]
Se er nan ve se fa ior mba ve lu er Abesalom nyian la shi se palegh ve?
