Mbampin Mba Mbaôron Takerada Ne Ve Pin La

Ka sha nyi gbenda nahan ku u mbacivir Aôndo mba jighjigh mbara u lu “kwagh u injaa kpishi” sha ishigh Nagha?

▪ Jijingi u Aôndo yange mgbegha orpasalmi wa icam kaa ér: “Sha ishigh ki TER yô, ku u uicighan Nav ka kwagh u injaa kpishi.” (Ps. 116:15) Uma u hanma or u civir Yehova sha mimi cii gba un kwagh kpishi. Nahan kpa, mkaanem ma i er ken Pasalmi 116 man ma ôron kwagh u ku u or môm tseegh tsô ga.

Shighe u i lu nan kwaghôron u kuugh hen ku u Orkristu yô, doo u a ôr mkaanem ma ken Pasalmi 116:15 man sha or u nan saa ku la ga, shin er nan civir Yehova sha mimi zan zan ku u nan nahan kpaa. Sha ci u nyi? Sha ci u mkaanem ma orpasalmi man gbanger hemba nahan. Ma tese ér Aôndo nenge ér ku u mbacivir un sha jighjigh jimin cii la vihin un tsung, nahan una de ér ve cii ve kpe ga.—Ôr Ps. 72:14; 116:8.

Pasalmi 116:15 na se vangertiôr ér, Yehova una de ér i tim mbacivir un sha mimi jimin cii shin tar ne kera ga. Sha kpôô yô, yiase yase i sha ayange ne tese ér se wa ishima a atsan kua mtev u sha ican, nahan kwagh ne tese wang ér Aôndo una de ér i tim se kera ga.

Er tahav mbu Yehova mbu lu a ikighir ga, shi i lu u awashima na una bunde ga yô, mayange una de ér i tim se jimin cii shin tar kera ga. Aluer Yehova de kwagh er nahan yô, a lu inja er mbaihyomov nav hemba un agee nahan; man kwagh a er nahan sha won ga! Shi aluer kwagh ngu nahan yô, awashima u Yehova a lu a mi ér tar cii u iv a ior mbacivir un sha mimi la kpa una kera kure sha mi ga; man kwagh a er nahan mayange ga. (Yes. 45:18; 55:10, 11) Heela tseegh ga, aluer orumace môm kera shi u civir un ken tembe u tempel na u ken jijingi la shin tar ga yô, a de u civir Yehova shin tar ne kuaa! Ior vea lu mba va hingir “tar u he” u u lu uumace mba perapera, mba vea va lu shin tar sha ikyev i “Sha u he” la kpaa ga. (Mpa. 21:1) Shi aluer ka u ior a kera lu shin tar ga yô, Hemen u Kristu u Anyom Dubu la kpa ua lu kwagh u mimi ga.—Mpa. 20:4, 5.

Aluer Aôndo de ér mbaihyomov nav ve tim ior nav shin tar cica cii yô, a huna ian i a lu a mi i hemen la, kua ieren na kpaa. Aluer kwagh er nahan yô, kwagh ne una va a ilyahan sha ian i Yehova a lu a mi i hemen sha won cii la. Shi kwagh ugen yô, er Yehova a ne iyol na icivir kua icighanti na yô, mayange una de ér i tim mbacivir un mba jighjigh jimin cii shin tar kera ga. Shi hen sha kwagh ne kpaa: Er Aôndo a ‘lu a ifer ga’ yô, mayange una de u kuran uumace mba ve civir un sha mimi la ga. (Dut. 32:4; Gen. 18:25) Heela tseegh ga, aluer Aôndo de ér i tim ior nav jimin cii yô, kwagh ne una hendan a Mkaanem nam man, ma kaa ér: “TER Una gbihi ior Nav kera ga, sha ci u iti Na i vesen la.” (1 Sam. 12:22) Sha kpôô yô, “TER Una ta ior Nav kera ga, man Una undu dyako Na kpaa ga.”—Ps. 94:14.

Ka kwagh u surun se ishima kpishi er se fe ser mayange a tim ior mba Yehova cica cii shin tar kera ga nahan! Sha nahan yô, se nôngo nen sha afatyô wase cii se civir Aôndo sha mimi, se suur sha ityendezwa na ne, i kaa ér: “Hanma ityumugh ki i var sha ci u vihin we iyol, ikyôl ia lagh ki ga; hanma zwa u ua mough ua hendan a we sha ijir kpaa, ú hemba u. Kwagh ne ka dyako u mbayev mba TER kua perapera ve u a dugh her a Mo je ne.”—Yes. 54:17.

[Mkaanem ma sha peeji 22 la]

Mayange Aôndo una de ér i tim ior nav kera ga