Ka Saan We Iyol u ‘Lun Ave sha Iwasen i I Lu Nan’ la Kpa?

 YANGE i fa Mbakristu mba ken Filipi mba sha derianyom u hiihii mbara sha mne u ve naan kwagh mgbeghaa sha u suen mcivir u mimi la. Jijingi yange mgbegha apostoli Paulu nger ve washika ér: “M sughun Aôndo wam hanma shighe u ka mea umbur ne yô. Gbem je, ken hanma msen wam cii, m ngu sônon sha ci wen cii a iember je, ka sha ci u ne lu ave a mo imôngo sha u pasen Loho u Dedoo hii sha iyange i hiihii la je, zan zan ar hegen.” (Fil. 1:3-5) Paulu umbur shighe u Lidia vea ya na cii er batisema, shi hanger ér un vea ikyar-tom na ve tsa hen ya na la.—Aer. 16:14, 15.

 Shighe kar kpuaa yô, tiônnongo u he u i ver ken Filipi la tindi Paulu a akaa sha ci u gbayol na kuma kwa har nahan, shighe u lu vea mba nan jighjigh a na imôngo ken Tesalonika ukasua imôngo la, man ijiir ne gba ica a gar u Filipi nôngo u kuman ukilomita 160. (Fil. 4:15, 16) Anyom nga kar kpuaa yô, er anmgbianev mba  ken Filipi man mba ken Masedonia tagher a atsan kpishi shi ve lu ken ‘ibanave tsung’ la, ve ungwa kwagh sha kwagh u ugbayol mba Mbakristu mba ken Yerusalem mba i lu tôvon ve a ican la, nahan ve soo u wasen ve. Paulu er shiada ér iwasen i ve na la “hemba agee ve ken inya.” Nahan kpa, a nger ér: “Ve zamber a vese ngeelee er i̱ na ve ian, ve kpaa vea lu ave sha iwasen i i lu nan” la.—2 Kor. 8:1-4; Rom. 15:26.

 Mbafilipi ngohol Kwaghaôndo u Mbakristu anyom kar er pue nahan, kpa ve lu tesen ieren i nan iwasen mgbeghaa la her. Er ve ungwa ér i wuhe Paulu ken purusu ken Roma yô, ve tindi Epafroditu a akaa ér a za na Paulu sha ci u gbayol na hen ijiir i i gba ica kuma ukilomita 1,287 yô; yange kar sha gbenda, shi per zegemnger kpaa. Ikyav tese wang je ér Mbafilipi yange ve soo ér vea na Paulu akaa sha ci u gbayol na, sha er una fatyô u zan hemen a tom u pasen kwagh shi taver anmgbianev ishima la, shin er i wuhe un ken purusu nahan kpaa.—Fil. 1:12-14; 2:25-30; 4:18.

 Nyian ne, Mbakristu mba mimi nenge ér u suen tom u pasen kwagh u Tartor shi geman ior hingir mbahenen la ka ian i civirigh. Mba suen tom u Tartor sha u nan shighe ve man inyaregh vev shi eren u sha agee a ve kpaa. Ngeren u kiriki u a dondo ne tese igbenda igen i u fatyô u suen tom u pasen kwagh la yô.

[Ngeren u kiriki u a lu sha peeji 22, 23 la]

Igbenda I Mbagenev Ve Tsough U Eren

IYUA I SUEN TOM U PASEN KWAGH U I LU EREN TAR SHA WON CII NE YÔ

Mbagenev kpishi ka ve er iyua ne sha u veren inyaregh ki vea kenden shin akwati u eren iyua u i nger sha mi ér “Worldwide Work” (Tom u i Lu Eren Tar sha Won Cii La).

Hanma uwer yô, atôônanongo a Mbashiada mba Yehova nga a tindi a inyaregh kin shin afishi a Mbashiada mba Yehova a a lu ken tar ve la. Or nana fatyô u tindin a inyaregh ki nan soo u eren iyua a mi la hen afishi a Mbashiada mba Yehova a hen tar u nan la. Aluer or ngu tindin a cheque yô, nana nger ér i kimbi “Watch Tower.” Or nana fatyô u eren iyua sha akaa a hweegh man akaa a injaa agen. Aluer or ngu tindin a amba akaa ne yô, nana nger kwagh u tesen ér akaa shon ka iyua.

IGBENDA I EREN IYUA

Dugh u eren iyua sha inyar jighilii kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Igbenda shon yô ka:

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Bam: Or nana fatyô u ngeren ér shighe u nan kpe yô, i na Watch Tower inyaregh ki nan koso ken bam man jindinyar i nan we ken bam nan zough a mtsera sha mi la, er atindi a bamegh a tese la vough shin penshen u nan.

Shia man Mtsera: Or nana fatyô u nan Watch Tower iyua i shia i nan yam vea bam shin kômpeni shin mtsera u nana zua a mi sha anzô a ior ve ngohol hen a nan la.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Aluer ka ya u ior ve lu her u or nana lu her zan zan nana kar kpen je kpaa. Kpa a hemba doon aluer u lam a afishi a branci a ken tar wou cii ve u er imba iyua ne yô.

Ngeren u Tesen Kwagh u U Soo Wer i Er Shighe u U Kpe yô man u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, nger Afishi a Branci a Mbashiada mba Yehova a ken tar u Najeria la sha adereshi u a lu shin heen ne gayô gbidye waya. U fatyô u pinen afishi a branci a a nengen sha tar u ú lu ker la kpaa.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020