Iemberyolough You Ngi Wasen We Kpa?
Iemberyolough You Ngi Wasen We Kpa?
“Karen nen faan nen kwagh u a doo Ter ishima yô.”—EF. 5:10.
1, 2. (a) Mkaanem ma Aôndo ôr nyi i tesen ér Yehova soo ér se ember uma? (b) Aluer se nenge iemberyolough ser ka “iyua i Aôndo” yô, kwagh la una mgbegha se u eren nyi?
BIBILO ngi a mkaanem kpishi ma ma tese ér Yehova soo ér se lu uma tseegh ga, kpa se ember uma yô. U tesen ikyav yô, Pasalmi 104:14, 15 kaa ér Yehova ka a na sha er or nana zua a “kwaghyan shin inya yô, man zar u wain sha u nan or msaanyol, man mkurem sha u engem or ishigh, man ruam sha u taver or ishima.” Sha kpôô yô, Yehova ka a er iyiav mbi vese mbi ume atam sha u se zua a mkurem man wain sha u nan se tahav. Nahan kpa, wain di gem ‘ne or msaanyol.’ Yehova ne se akaa a hange hange a se lu a mi ve se lu uma la tseegh ga, ka a na se akaa a aa na se iember la kpaa. (Orpa. 9:7; 10:19) Sha mimi yô, Yehova soo ér se ember, ishima yase kpa i iv a “msaanyol.”—Aer. 14:16, 17.
2 Sha nahan yô, ityôkyaa ngi i ishima ia na se ibo shighe u se tee ian sha u ‘nengen inyon i sha’ shin “ityombo i ken toho” shin eren ma kwagh u nan se msaanyol ken uma la ga. (Mat. 6:26, 28; Ps. 8:3, 4) Uma u dedoo ka “iyua i Aôndo” Aôndo a ne yô. (Orpa. 3:12, 13) Aluer se mba nengen shighe u eren iemberyolough la ser ka môm ken uiyua mba Aôndo yô, kwagh ne una mgbegha se u eren kwagh a mi sha gbenda u ua na a saan un u a ne se iyua la iyol yô.
Tsua Iemberyolough sha Kwaghfan
3. Er nan ve i doo u a na hanma or ian i tsuan iemberyolough i nan soo?
3 Mba ve lu a mnenge u vough sha kwagh u iemberyolough yô, ve fa er i gbe u a ver ikighir yô. Sha ci u nyi? U̱ nan mlumun sha mpin ne yô, de se tôô iemberyolough se kar sha kwaghyan. Ityô kwaghyan i ior kpishi ve soo hen ma veghertar la, a gema a soo i hen veghertar ugen ga. Jighilii yô, alaghga kwaghyan u a doon ior hen ma ijiir, una za ior mba hen ijiir igen zwa ga. Kape iemberyolough i i doon Mbakristu mba ve lu hen ma veghertar ishima la, ia vihi Mbakristu mba hen veghertar ugen ishima je la. Mbakristu mba ve lu hen ijiir i môm je kpa, alaghga kwagh u or môm nan nenge ér ka iemberyolough la i doon nan la (alaghga nan ngu ôron ma takerada u dedoo), una lu kwagh u duen orgen ishima; shin kwagh u or môm nan nenge ér ka kwagh u nan nan msaanyol la (adooga nan ngu nahan ikyekye, nengen ajiir), orgen nana nenge ér ka kwagh u vôron a vôr nan. Nahan cii kpa, se lumun ser, ambaakaa er kwaghyan man iemberyolough nahan, hanma or ngu a ian i tsuan kwagh u nan soo yô.—Rom. 14:2-4.
4. Er nan ve i gbe u se heren a her iemberyolough i se tsua? Tese ikyav.
4 Nahan kpa, se fa ser, er i ne ian ér hanma or nana tsua iemberyolough i doon nan nahan kpa, ka u or a gba eren hanma ityô iemberyolough tsô ga. U tesen ikyav yô, shi hen ase sha ikyaa i kwaghyan i se vande teren la. Shin er alaghga se soo u yan akaayan kposo kposo nahan kpa, aluer se fa ser ma kwaghyan saa ishe yô, se ya un ga. Kwaghfan u se lu a mi la una wase se se ya kwaghyan la ga, sha ci u una fatyô u nan se angev. Kape iemberyolough kpa, se fatyô u eren i atô kposo kposo je la; kpa se gema se er iemberyolough i ia fatyô u wuan se, shin i í lu a ipila ker, shin i ia na or nana saa ishe la ga. Aluer se mba eren ambaakaa la yô, se lu peren atindi a Bibilo, shi aa fatyô u vihin se iyol shi vihin ikyaryan yase vea Yehova kpaa. Gba u se hen sha kwagh u iemberyolough i se soo u eren la tsembelee, nahan se tsua i ia lu se a iwasen shi ia doo Yehova yô. (Ef. 5:10) Se er kwagh ne nena?
5. Se er nan ve se fa ser iemberyolough yase zua sha kwagh u Mkaanem ma Aôndo ma tese?
5 Saa iemberyolough ia zua sha kwagh u Mkaanem ma Aôndo ma tese la ve ia lu se a iwasen shi ia doo Yehova ishima ye. (Ps. 86:11) Wea soo u fan, aluer iemberyolough i u soo la zua sha kwagh u Mkaanem ma Aôndo ma tese yô, pine mbampin mba utar mban. Mbampin mba shon ka: ka nyi? ka hanma shighe? man ka unô? De se time sha mbampin mban hegen.
Ka Nyi I Lu ken Iemberyolough Laa?
6. Ka iemberyolough i nyi nahan i doo u se venda, man ka sha ci u nyi?
6 Cii man u nyôr iyol ken ma iemberyolough yô, hii pinen iyol you wer, Ka nyi? Inja na yô, ‘Ka nyi i lu ken iemberyolough i í doom ishima laa?’ Er u lu keren mlumun sha mpin ne la, doo u ú umbur wer iemberyolough ngi ker avegher ahar. Vegher u hiihii la, ka iemberyolough i Mbakristu vea nyagh kuaa yô; vegher u sha uhar la di ka iemberyolough i Orkristu nana soo yô, nana er shin nana er ga yô. Vegher u hiihii la ka nyi? Ken tar u ifer ne, iemberyolough i ior ve eren nyian ne kpishi ngi a akaa a Mkaanem ma Aôndo ma vende wang, a or a er yô, nana lu peren atindi a Aôndo la. (1 Yoh. 5:19) Mbakristu mba mimi ka ve venda amba a iemberyolough ne inyigh i môm. Kwagh ne kua iemberyolough i í lu a ieren i keren msaanyol sha u bulan mbagenev shi eren ve akaa a nyoon la, kua kwagh u azôv man ieren i nomsoor yaven a nomsoor shin kwase yaven a kwase la man u nengen ufoto mba ijimbagh kua ipila shin iemberyolough i í tese ér idya ka kwaghbo ga la cii. (1 Kor. 6:9, 10; ôr Mpase 21:8.) Aluer se venda u zan ikyua a amba a iemberyolough la ape se lu cii yô, se lu tesen Yehova ser se ‘nyagh kwagh u a lu u ifer’ yô.—Rom. 12:9; 1 Yoh. 1:5, 6.
7, 8. Se tôv iemberyolough i dedoo se fa nena? Tese ikyav.
7 Vegher u sha uhar la ka iemberyolough i i lu a akaa a Mkaanem ma Aôndo ma vende jighilii ga yô. Cii man se tsua imba iemberyolough ne yô, a gba u se tôô i se kar sha atindiakaa a ken Bibilo, sha er se fa kwagh u Yehova a nenge ér ka u vough la yô. (Anz. 4:10, 11) Maa se tsua kwagh u se er ve imoshima yase ia lu wang yô. (Gal. 6:5; 1 Tim. 1:19) Se er kwagh ne nena? Hen ase sha kwagh ne: Cii ve se ya ma kwaghyan u se lu a vande fan ga yô, ka se soo u fan kwagh u i er kwaghyan shon a mi la. Kape zum u se lu tsuan iemberyolough i se er kpa, ka se soo u fan kwagh u iemberyolough shon cii ve se mase tsuan i je la, sha er se fa aluer iemberyolough shon doo sha ci u Orkristu yô.—Ef. 5:17.
8 Ikyav i tesen yô, alaghga u ngu or u soon anumbe. Kape ior kpishi ve soo anumbe je la. Anumbe nga ne msaanyol kpishi. Nahan kpa, aluer u soo anumbe agen sha ci u mba gbe gesa u a ken bem ga, shin ior mba eren a mba we uma ve ikyo ga, shin iyolvihin ngi ker kpishi, shin ior ka ve geren a sha ayongo, shin ior mba eren anumbe ne kua mba geren ve cii mba nengen ér tar ve hemba doon a u mbagenev di ye? U tôvon u faan kwagh u a lu ken iemberyolough la cii yô, adooga u nenge wer mnenge wou la zua sha u Yehova kua loho u bem man u dooshima u se lu pasen mbagenev la ga. (Yes. 61:1; Gal. 5:19-21) Kpa aluer u fa dedoo wer iemberyolough la ka i atindiakaa a Yehova a lumun a mi yô, u zua a mtsera.—Gal. 5:22, 23; ôr Mbafilipi 4:8.
Ka Hanma Shighe Ka M Er Iemberyolough Laa?
9. Mlumun u se na sha mpin u a kaa ér, ‘Ka hanma shighe nahan me er iemberyolough?’ la una pase nyi sha kwagh wase?
9 Mpin u sha uhar, u shi u pine iyol you yô, ka hanma shighe? Inja na yô, ‘Ka hanma shighe nahan me er iemberyolough laa? Me vihi shighe sha mi a kuma nena?’ Mlumun u se ne sha mpin u a kaa ér Ka nyi? la pase kwagh u asaren a ase kpishi, kwagh u se lumun a mi man kwagh u se lumun a mi ga la. Nahan kpa, mlumun u sha mpin u a kaa ér ka hanma shighe? la una tese akaa a a hembe lun hange hange ken uma wase la, ka kwagh u se nenge ser ngu se a inja man u se nenge ser ngu a iwasen ga je la. Kpa, ka nyi ia wase se ve se fa ser iemberyolough i se tsough la ngi se a iwasena?
10, 11. Mkaanem ma Yesu ma i nger ken Mateu 6:33 mara ma a wase se u veren shighe u se vihi sha u eren iemberyolough nena?
10 Yesu yange kaa a mbahenen nav ér: “Ter Aôndo wou A̱ doo u ishima sha ishima you cii, man sha uma wou cii, man sha mfe wou cii kua sha agee ou cii.” (Mar. 12:30) Sha nahan yô, mdoo u Yehova a doo se ishima la ka kwagh u hiihii ken uma wase. Se tese ser kwagh ngu nahan sha u dondon kwaghwan u Yesu ne, a kaa ér: “Kpa vande keren nen tartor Na man perapera Na, man akaa ne cii á seer ne a ye.” (Mat. 6:33) Mkaanem mara maa wase se u fan iemberyolough i ia lu se a iwasen man shighe u se vihi sha mi la nena?
11 Umbur wer, Yesu yange wa se kwagh ér se ‘vande keren tartor Na.’ Yesu kaa ér se ‘ker tartor Na tseegh’ ga. Kwagh ne tese ér, Yesu yange fa ér a gba u se ker Tartor kua akaa agenegh kpishi ken uma. Gba u se lu a ijiir i tsan man kwaghyan man akondo a huan, shi se hen makeranta shi se lu a tom u eren shi se eren iemberyolough, kua ambaakaa la nahan. Nahan kpa, ka kwagh môm ken atô u akaa a se keren la tseegh i gbe u se vande keren ye, ka Tartor je la. (1 Kor. 7:29-31) Se faan kwagh u i gbe u se hii keren yô, se ver iemberyolough man akaa agen cii hiihii ken uma wase ga, kpa se vande keren Tartor. Aluer se er nahan yô, iemberyolough i eren akuma akuma la ia lu se a iwasen.
12. Kwaghwan u i nger ken Luka 14:28 la una wase se sha kwagh u iemberyolough nena?
12 Sha nahan yô, gba u se vande henen sha shighe u a gba u se vihi sha iemberyolough la tsembelee cii ve se mase tsuan i ye. (Luka 14:28) Gba u se fa shighe u i ma iemberyolough i ye se la. Shi gba u se fa shighe u i gbe u se vihi sha i la kpaa. Aluer ka u se nyôr iyol ken iemberyolough man kwagh la una na se kende akaa a injaa, er kwaghhenen u sha tseeneke man mcivir u hen tsombor, shin se de u zan mbamkombo mba Mbakristu shin pasen loho u dedoo u Tartor yô, doo u se vihi shighe sha imba iemberyolough la ga. (Mar. 8:36) Kpa aluer iemberyolough i se eren ashighe ashighe la ka i na se agee, sha u se za hemen u keren Tartor yô, se fatyô u kaan ser shighe u se vihin sha mi la ka u saan ishe ga.
Ka unô Me Eren Iemberyolough la Vea Ve?
13. Er nan ve i gbe u se wa ikyo sha kwagh u ior mba se eren iemberyolough vea ve laa?
13 Mpin ugen u ú pine iyol you yô, ka unô? Inja na yô, ‘Ka unô m soo mer me eren iemberyolough vea ve?’ Ka a inja u se hen sha kwagh u ior mba se eren iemberyolough vea ve la. Sha ci u nyi? Sha ci u ior mba se eren iemberyolough a ve imôngo la vea bende a ityô iemberyolough i se tsough la. Di er kwaghyan kpa ka a hemba zan zwa, shighe u se ye vea azende a dedoo nahan, iemberyolough kpa ka i hemba maan se iyol shighe u se er i vea azende a dedoo yô. Kape i lu ve ka i maa se iyol kpishi, hemban cii je yô agumaior, u eren iemberyolough vea mbagenev je la. Nahan kpa, cii man se tsua iemberyolough i se er yô, se vande tsuan ior mba vea lu azende a dedoo la, se gema se palegh mba vea lu azende a bo la sha er iemberyolough yase la ia lu a iwasen yô.—2 Kron. 19:2; ôr Anzaakaa 13:20; Yak. 4:4.
14, 15. (a) Yesu ver se ikyav i nyi sha gbaa u tsuan azende a vough-loo? (b) Ka mbampin mba han i gbe u se pine ayol a ase sha kwagh u azende ase?
14 Aluer se mba dondon ikyav i Yesu sha u tsuan azende yô, a wase se. Hii shighe u igbetar la je, uumace doo Yesu ishima. (Anz. 8:31) Shighe u lu shin tar ne la, yange tese dooshima hen hanma inja or cii. (Mat. 15:29-37) Nahan kpa, Yesu tese mkposo u lun a ior doo doo man u lun a ior kôôsôô. Er lu a ior cii doo doo nahan kpa, gema tsuan a tsua mba una luun a ve kôôsôô yô. Yesu yange kaa a mbaapostoli nav mba jighjigh mba 11 mbara ér: ‘Aluer ne eren kwagh u M we ne tindi sha mi yô, ne mba akar Am je.’ (Yoh. 15:14; shi nenge13:27, 30 kpaa.) Ior mba Yesu waan ve ken ikyum yô, lu mba ve dondon un shi ve civir Yehova la tseegh.
15 Sha nahan yô, shighe u se lu henen sha kwagh u ma or u ú soo wer nana lu ijende you i kôôsôô yô, doo u ú umbur mkaanem ma Yesu mara. Pine iyol you mbampin amba er: ‘Or ne lamen shi eren kwagh sha gbenda u tesen ér ngu dondon atindi a Yehova man a Yesu kpa? Ngu a mnenge môm vea mo sha kwagh u anza a dedoo man aeren a wang je he? Me lu vea na nahan una taver mo ishima ér m vande keren Tartor la ken uma wam shi m civir Yehova sha mimi kpa?’ Aluer mlumun u sha mbampin mban ka een yô, fa wer u zua a ijende i dedoo, i u fatyô u eren iemberyolough a nan imôngo yô.—Ôr Pasalmi 119:63; 2 Kor. 6:14; 2 Tim. 2:22.
Iemberyolough i Se Tsough la Zua sha Atindi a Bibilo Kpa?
16. Ka nyi i gbe u se fa sha kwagh u iemberyolough yase?
16 Se hila time sha mbampin mba sha kwagh u iemberyolough utar mba ve kaa ér: ka nyi? man ka hanma shighe? man ka unô? la. Gba u iemberyolough ia zua sha tindi u Bibilo sha hanma mpin ne ve ia lu se a iwasen ye. Sha nahan yô, cii ve se nyôr iyol ken ma iemberyolough yô, gba u se kar i sha atindi a Bibilo. Aluer se soo u fan ser iemberyolough i se tsough la i doo shin i doo ga yô, gba u se pine ser: ‘Ka nyi i lu ken iemberyolough laa? Ka iemberyolough i dedoo shin ka i bo?’ (Anz. 4:20-27) Aluer se soo u fan shighe u se vihin u eren ma iemberyolough i se tsough yô, gba u se pine ser: ‘M vihin shighe sha iemberyolough ne ka kom nena? Shighe u m vihin sha i la ngee yumuu?’ (1 Tim. 4:8) Aluer se soo u fan mba i doo u se er iemberyolough a ve yô, se pine ser: ‘Ka unô me er iemberyolough ne a ve? Ahuraior ne ka a dedoo shin ka a bo?’—Orpa. 9:18; 1 Kor. 15:33.
17, 18. (a) Se tôv ayol a ase nena ve se fa ser iemberyolough i se tsough la zua sha atindi a Bibilo shin i zua ga? (b) U kange ishima wer u er nyi sha kwagh u iemberyolough youwe?
17 Aluer ma iemberyolough zua sha atindi a Bibilo ga yô, i doo sha ci wase ga. Kpa aluer se nôngo ser iemberyolough yase i zua sha atindi a Bibilo sha igbenda i itiar ne yô, iemberyolough yase ia va Yehova a icivir shi ia lu se a iwasen kpaa.—Ps. 119:33-35.
18 Sha nahan yô, de se nôngo se eren nen iemberyolough i vough sha shighe u vough, shi se eren i vea ior mba vough kpaa. I lu isharen i hanma wase u dondon kwaghwan u Bibilo ne, a kaa ér: “Nahan yô, aluer nea yaan kwagh, shin nea maan kwagh shin nea eren nyityô kwagh kpaa, eren nen akaa cii sha ci u icivir i Aôndo.”—1 Kor. 10:31.
U Fatyô u Pasen Kpa?
U dondo kwaghwan u a lu ken . . .
• Mbafilipi 4:8 la nena?
• Mateu 6:33 la nena?
• Anzaakaa 13:20 la nena?
[Mbampin mba ngeren u henen]
[Foto u sha peeji 9 la]
(U soo u ôron ngeren ne cii yô, nenge takerada u)
✔Ka nyi
[Foto u sha peeji 10 la]
(U soo u ôron ngeren ne cii yô, nenge takerada u)
✔Ka hanma shighe
[Foto u sha peeji 12 la]
(U soo u ôron ngeren ne cii yô, nenge takerada u)
✔Ka unô
[Foto u sha peeji 10 la]
Se dondo ikyav i Yesu sha u tsuan azende ase man iemberyolough yase nena?
