Mkaanem ma Aôndo Doo U Ishima sha Mimi Kpa?

ORGEN iti na ér Lorraine, a kaa ér: “Shighe u m hii a hii Bibilo i ôron ayange ayange la, m gba ôron i tsô mer gba u me er nahan, i̱ doom ishima keng ga. Yange i taver mo u kaven, nahan ashighe kpishi m kera ver ishima ga.”

Mbagenev kpa kaa ér shighe u ve hii a hii Bibilo i ôron la, maa ve iyol a mi ga. Nahan kpa, ve taver ishima sha ci u ve fa ér ka u ôron Icighan Ruamabera la i lu shami ye. Orgen u i yer un ér Marc yô kaa ér: “Shighe u ú lu ôron Bibilo man shighe u ú lu henen kwagh sha tseeneke wou la, ishima ngôôr danen we sha akaa agen ga cii. Yange m er mbamsen dông shi m nôngo kwagh tsung mer Bibilo i ôron ayange ayange la i hingir kwagh u me eren hanma shighe yô.”

U er nan ve Bibilo i̱ i̱ lu Mkaanem ma Aôndo a ne i nger la ia hemba doon we ishima? Ú er nan ve Bibilo ia maa u iyol u ôrono? Nenge ase mbamhen mba i dugh a mi shin heen ne.

Mbaawashima man Igbenda

Er msen shi ver ishima shighe u ú lu ôron Bibilo yô. Sôn Yehova a wase u lu a isharen i henen Mkaanem nam. Zamber a na a bugh u ishima sha er u hemba kaven kwaghfan na yô. (Ps. 119:34) Ú er nahan ga yô, ica a gba ga tsô u gema henen Bibilo a u nan ishima her shio, maa alaghga ú kera lu a ishima i henen kwagh ga. Kwase ugen iti na ér Lynn, a kaa ér: “Ashighe agen ka m ôr Bibilo ayem ayem yum, nahan m kera ver ishima sha atôakaa a injaa agen, a me fatyô u henen la ga. Ashighe kpishi ka m kav semakwagh u Bibilo i lu ôron la tsembelee ga. Kpa ka m er msen sha er me lu a iyol tsaha yô, nahan kwagh la ngu a wasem u veren ishima.”

Kwagh u ú hen la a gba u kwagh. Umbur wer u ôron Bibilo kaven shi eren akaa a mimi a u er ken Bibilo la, una na u uma u tsôron. Sha nahan yô, nôngo sha afatyô wou cii zua a atôakaa ken Bibilo a wasen we, shi er kwagh u ú hen la. Orgen u i yer un ér Chris yô kaa ér: “Ka m ker akaa a aa wasem u fan aeren a am a a doo ga yô kua mbaawashima av mba injaa ga kpaa. Saan mo iyol kpishi u nengen er Bibilo kua ityakerada yase kpishi i er akaa a wasen mo, shin er mbangeren í mbara ve lu a vande zuan a mo mayange ga nahan kpaa yô.”

Tsua akaa a injaa a u fatyô u eren yô. Nôngon u henen kwagh u he sha kwagh u ior mba Bibilo i er kwagh ve la. U fatyô u zuan a akaa a dedoo a i er sha mbagenev kpishi ken Bibilo la sha u timen ken takerada u Insight on the Scriptures shin u Watch Tower Publications Index la. Aluer u fa nomso man kasev mba i er kwagh ve ken Bibilo la er ka ior kpôô kpôô mba ve lu a aeren a ve kua mbamnenge vev yô, kwagh u ú hen hen a ve la una hemba lun we a iwasen.

Ker igbenda i he i pasen ior kwagh ken Ruamabera. (Aer. 17:2, 3) Kwase ugen u i yer un ér Sophia yô, ngu henen Bibilo a awashima la. A kaa ér: “Awashima wam yô, ka u ma m hen shi ma m fe igbenda i he i lamen a ior sha akaa a ken Ruamabera shighe u m dugh kwaghpasen kua ashighe agen kpaa, sha er me fatyô u pasen mimi u Bibilo wang yô. Gbenda u Iyoukura ka i pase kwagh la ka ikyav i doon tsung, i̱ tesen mo er me er kwagh ne yô.”—2 Tim. 2:15.

Nenge a kwagh u Bibilo i̱ lu ôron la ken ishima you. Mbaheberu 4:12 kaa ér: “Mkaanem ma Aôndo ma uma.” Shighe u ú lu ôron Ruamabera yô, nenge a kwagh u ior mba Bibilo i er kwagh ve mbara lu nengen a mi sha ashe a ve la ken ishima you, sha er loho u Aôndo ua nyôr u ken ishima yô. Nôngon u ungwan kwagh u ve lu̱ ungwan la shi i lu u ken ishima er lu ve nahan. Tôô  akaa a yange er ve la kar sha mbamlu ou. Hen kwagh sha igbenda i yange ve nenge sha mbamzeyol vev la. Kwagh ne una na u hemba kaven Bibilo shi umbur akaa a u hen la.

Tôô shighe time sha avur a a taver we u kaven la kua mbampase mba sha avur shon sha er u kav a wang yô. Hanma kwa u ú lu henen Bibilo yô, tôô shighe naleghaa. Nahan alaghga u tagher a mbampin mba injaa mba a gba u ú seer tôvon sha mi ken ityakerada yase yô. Asember a u fe inja i a ga la, ker a ken takerada u pasen asemberakaa, ôr ungeren mba shin kpe man avur agen a a tese ape u za ve u zua a kwagh u a zough sha kwagh u ú lu ôron la yô. Er u lu seer kaven kwagh u ú lu ôron shi eren sha mi la, kape Mkaanem ma Aôndo a ne i nger la kpa ma a lu hemban doon we ishima je la. Nahan u fatyô u ôron imba kwagh u orpasalmi yange ôr ne, ér: “M ngohol mbampase Ou [Yehova] mer ve̱ lu dyako wam gbem, gadia ka ve, ve lu iember i ishima yam ye.”—Ps. 119:111.

De er ngeren u ú lu henen kwagh ker la torough torough been ga. Shighe u ú ver u henen kwagh sha tseeneke wou la a̱ vese, kpa a de karen ikyaa inya ga. Wa ikyo sha shighe u ú ver wer u waan agoyol sha mbamkombo mba tiônnongo la kpaa. Orgen iti na ér Raquel, a kaa ér: “Ashighe kpishi ka i hingir mo iyol haghelaa je m kera fatyô u veren ishima sha kwagh u m lu henen la ga. Sha nahan yô, ashighe a henen kwagh, a lihen yum ga la nga hembe wasen mo. Nga wasen mo u zuan a mtsera u hemban cii ken kwaghhenen wam.” Chris kaa ér: “Ka mea hen kwagh torough torough yô, imoshima yam i zam iyol, sha ci u ka mea er nahan m umbur akaa kpuaa tseegh. Kwagh u m hen la nyôron mo ken ishima ga.” Sha nahan yô, de torough a torough ga.

Mkaanem ma Aôndo ma sar u tsung. Apostoli Peteru kaa ér: “Atumba a man a mimi a sha kwaghôron u Aôndo la a̱ sar ne tsung er anikyundanev mba forototo nahan, sha er né vese sha mi u zan ken myom yô.” (1 Pet. 2:2) Ka gbe a gba u anikyundanev vea lu a isharen i man atumba ga. Sha marami ve je, ka lun ve pe man atumba. Kpa ruamabera kaa ér gba u mkaanem ma Aôndo ma a sar se tsung. Aluer hanma iyange u ngu ôron peeji u Bibilo môm tseegh kpa, ú ngôôr lun a isharen la ga. Kwagh u alaghga sha hiihii la una lu u ican ne, ica ia gbaan ga yô, una gba doon we tsung.

Gbidye kwar sha kwagh u ú er ken Ruamabera la. Aluer u gbidye kwar sha kwagh u ú er ken ruamabera yô, shi u zua a mtsera kpishi. Kwagh ne una wase u u̱ tôôn atôakaa a ken jijingi a u tim sha mi la zuan imôngo. Ica ia gbaan ga yô, u lu a isha i kwaghfan, i í er sha utagbede mba ken jijingi yô, ia lu kwagh wou u doon tsung.—Ps. 19:14; Anz. 3:3.

 Er Kwagh u Injaa a Shighe Wou

Saa u nôngo kwagh kpoghuloo ve u za hemen a ieren i veren ishima sha kwaghhenen la ye, kpa u er nahan yô, u zua a averen mgbeghaa. U hemba kaven Ruamabera tsembelee. (Heb. 5:12-14) Mkav man kwaghfan u ú zua a mi ken Ruamabera u jijingi mgbegha ior nger la una va u a msaanyol man iember man bem. Kwaghfan u ken Mkaanem ma Aôndo la ngu “kon u uma” sha ci u mba ve kusu un shi ve eren kwagh a mi la.—Anz. 3:13-18.

Aluer u ngu henen Mkaanem ma Aôndo kpoghuloo yô, u lu a ishima i kaven kwagh. (Anz. 15:14) Kwagh la una wase u u̱ geman wan orgen kwagh u kôron nan ken ishima, u a dugh ken Bibilo jighilii yô. Aluer u ngu nan ian wer kwagh u ú lu ôron ken Ruamabera man ken ityakerada i “wanakiriki u jighjigh man u fan kwagh” la a̱ wase u u̱ tsuan akaa a u er yô, Mkaanem ma Yehova a ne i nger la ma a na u zua a mmem shi u taver ken jijingi. (Mat. 24:45) U hemba lun a vangertiôr man ishimaverenkeghen, shi Mkaanem ma Yehova ma a hemen we ken mhen man kwaghôron wou kua aeren a ou cii. Heela tseegh ga, u za ikyura ken hanma kwagh u ú eren ken mcivir u Aôndo cii.—Ps. 1:2, 3.

Aluer Aôndo doo u ishima a ishima you cii yô, kwagh la una mgbegha u pasen mbagenev jighjigh wou u nan. Kwagh ne kpa una fatyô u van we a mtsera kpishi. Sophia ngu keren gbenda ér una umbur avur a ken Ruamabera shi una pasen kwagh a mi sha igbenda kposo kposo, sha er mbayaav vea ungwa a doo ve shi tom na u pasen kwagh, u Mbakristu ve eren la ua maa un iyol shi una fa u tsembelee kpaa yô. A kaa ér: “Ka mea nenge ior a kegh ato u ungwan mkaanem ma ken Bibilo nahan i saan mo iyol kpen kpen.”

Nahan kpa, mtsera u hemban cii, u ú zua a mi sha u soon Mkaanem ma Aôndo yô, ka u yan ikyar a Yehova kôôsôô. Bibilo i henen ia wase u u̱ fan atindiakaa a na shi kaven er dooshima na a lu a inja tsung yô, shi u kav nagh ku a we kpishi la man ijirôron na kpaa. Kwagh u vesen ugen u hemban ngun shin u ú er ve u hemba zuan a mtsera a ngun yô, ngu sha won ga. Uve ityough ken u timen sha Mkaanem ma Aôndo. U eren nahan la ka u eren kwagh u injaa a shighe wou je la.—Ps. 19:7-11.

[Ngeren u kiriki/Ufoto u sha peeji 5 la]

MBAAWASHIMA MAN IGBENDA I ÔRON MKAANEM MA AÔNDO

▪ Er msen shi ver ishima shighe u ú lu ôron Bibilo yô.

▪ Kwagh u ú hen la a gba u kwagh.

▪ Tsua akaa a injaa a u fatyô u eren yô.

▪ Ker igbenda i he i pasen ior kwagh ken Ruamabera.

▪ Nenge a kwagh u Bibilo i̱ lu ôron la ken ishima you.

▪ Tôô shighe time sha avur a a taver we u kaven la kua mbampase mba sha avur shon sha er u kav a wang yô.

▪ De henen kwagh ayem ayem ga.

▪ Mkaanem ma Aôndo ma sar u tsung.

▪ Gbidye kwar sha kwagh u ú er ken Ruamabera la.

[Foto u sha peeji 4]

Shighe u ú lu ôron Bibilo yô, tôô wer u ngu ken imba mlu u ior mba u lu ôron kwagh ve ken Bibilo la