Dondo Kristu, Orhemen u Vough La

MBA ve dondon mba hemen tar ne yô, ashighe kpishi ka ve va ahenge. Kpa mba ve dondon Kristu yô mba ve ahenge mayange ga. Yesu kaa ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en.” (Mat. 11:28, 29) Hemen u Kristu ngu ne mmem man msaanyol. Mba i hembe ve iyol man mba i nzughul a ve la cii, kwagh ve gba Yesu ishima tsung, nahan ngu lôhôn ve ér ve tôô igbur na i dooshima la sha ayol a ve. Nahan kpa, u dondon hemen u Yesu la wa nyi kere?

Apostoli Peteru nger ér: “Kristu kpaa ya ican sha ci wen, A ver ne ikyav je sha u né dondo Un ijime yô.” (1 Pet. 2:21) Gba hange hange u se dondo sha angahar a Kristu sha ci u nyi? Tôô ase wer gba u we vea mbagenev ne kar hen ijiir i i hôn ubom her nzughul nzughul yô, man ka or môm ken a ven tseegh nan fe er ne kar hen ijiir la ne due iyol ishô ye. U dondo nan ijime, man alaghga je yô u lu ndyaren sha angahar a nan la vough vough ga he? Kape mkpeyol wase u ken hemen kpa a har sha u se dondon ikyav i Yesu vough je la. U eren nahan la wa u ungwan un shi eren kwagh u a kaa la man u eren kwagh a mba ve ôron kwagh sha ci na la ken ijoughave.

Ungwa shi Er Kwagh u U Ongo La

Yesu yange sôôn kuren Ityesen na i sha Uwo la yô, a kaa ér: “Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande. Ura nôô, uikyuwan sen, ahumbeura ta sha iyou la, kpa i gba ga, sha ci u i we i imagh sha vande yô.”—Mat. 7:24, 25.

Sha nahan yô, Yesu yila or u nan ongo mkaanem nam shi nan eren kwagh u ma kaa la ér “orfankwagh.” Se mba tesen icivir sha ikyav i Yesu la shi se mba wuese i sha u ungwan imo na a ishima yase cii kpa, shin ka se hemban soon u tsuan akaa agen ken akaa a Yesu a kaa ér se eren, a se nenge ser nga ican u eren ga shin a zua sha mbamlu asev laa? Yesu kaa ér: “M eren akaa a doon [Aôndo] gbem.” (Yoh. 8:29) Se nôngo nen kpoghuloo se dondo nen ikyav na la.

Sha derianyom u hiihii la, mbaapostoli ver ikyav i dedoo sha kwagh u dondon hemen u Kristu la. Shighe ugen la Peteru kaa a Yesu ér: “Nenge, se se undu akaa cii, se dondo U.” (Mar. 10:28) Sha kpôô yô, mbaapostoli nenge hemen u Yesu lu ve a inja kpishi, je ve undu akaa a ve agen sha asema a ve sha u vea dondo un yô.—Mat. 4:18-22.

Eren Kwagh a Mba Ve Ôron kwagh sha ci u Kristu la ken Ijoughave

Er mgbôghom u Yesu una kpe la, a ter gbenda ugen u se fatyô u dondon hemen na yô. A kaa ér: “Or u nan lumun hanma or u M tindi yô, nan ngu lumun Mo.” (Yoh. 13:20) Sha nahan yô, Yesu yila mba a shigh ve mkurem, ve lu mba ôron kwagh sha ci na la ér “anmgbianev” nav. (Mat. 25:40) Er í nder Yesu shin ku kôndo yem sha la, i gema tom na la i na sha ikyev i “anmgbianev” nav, ve hingir mba ôron kwagh “sha ci u Kristu,” lôhôn mbagenev ér ve hime a Yehova Aôndo. (2 Kor. 5:18-20) Saa se eren kwagh u “anmgbianev” mba Yesu ve kaan se la ve, a tese ér se lumun hemen na ye.

Doo u se gbidyen kwar se nengen kwagh u ka se er sha kwaghwan u ken Ruamabera u ka i  na se sha shighe vough ken ityakerada yase i pasen Bibilo la. Ka sea timen ken Ruamabera shi sea zaan mbamkombo mba tiônnongo yô, kwagh la a umbur se akaaôron a Kristu. (2 Pet. 3:1, 2) Ka se tese ser se mba a iwuese sha kwaghyan u ken jijingi u i ne se la tsung, sha u yan un hanma shighe cii. Nahan kpa, aluer mba kimbir wan se ma kwagh ashighe ashighe yô, doo u se er nena? Ikyav i tesen yô, Mkaanem ma Aôndo wa Mbakristu kwagh ér ve er ivese “ken Ter tseegh.” (1 Kor. 7:39) I time sha itinekwagh ne ken Iyoukura sha ashighe ashighe hemba anyom deri môm hegen. Anmgbianev mba Kristu mba tesen ér se doo ve ishima mimi je ikyaryan yase a Yehova gba ve kwagh, nahan mba gberen ngeren mba sha itinekwagh ne kua akaawan a ken jijingi agen ken ityakerada yase. Gbenda môm u se tese ser se mba dondon Kristu, Orhemen wase u vough la yô, ka u veren ishima sha akaawan ne.

Anzaakaa 4:18 kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha tembe la.” Sha mimi yô, hemen u Yesu ngu yemen hemen hemen, u saa ijiir i môm ga. Gbenda ugen u se er kwagh a “anmgbianev” mba Kristu ken ijoughave yô, ka u se lumun akaa a “wanakiriki u jighjigh man u fan kwagh” a gberen ken ityakerada yase ashighe ashighe, a i nyôôso sha mkav u se kav mimi u Ruamabera la.—Mat. 24:45.

Shi ka se tese ser se mba hiden a iyol ijime hen “anmgbianev” mba Kristu sha u eren kwagh a mbatamen mba ken tiônnongo ken ijoughave. Apostoli Paulu kaa ér: “Ungwan nen imo i mbahemenev enev, hide nen a ayol a en ijime hen ve gadia mba kuran uuma enev.” (Heb. 13:17) U tesen ikyav yô, alaghga ortamen ugen nana wa se kwagh ér ka hange hange u se eren Mcivir u hen Tsombor u aikighe la hanma shighe, shin nana due a mbamhen mba wasen se sha akaa agen ken tom wase u pasen kwagh la. Ortamen u zenden sha di nana wa se kwagh ken Ruamabera sha ma kwagh ken uma u Orkristu. Aluer se ngohol imba kwaghwan la yô, se lu tesen ser se mba dondon Kristu sha ci u ngu Orhemen wase.

Tar ne ban a hemen u dedoo je gande. Kpa gema nenge er i kundu se iyol u dondon hemen u Kristu u sha dooshima la sha wono! Yô, se nôngo nen sha afatyô wase cii, se eren nen kwagh u Orhemen wase a kaa la, shi se eren nen kwagh a mba a lu eren tom a ve nyian la ken ijoughave.

[Ufoto u sha peeji 27]

U ngohol kwaghwan u Ruamabera u a kaa ér we u de zough iyol you sha igbur i môm a or u nan ne jighjigh ga, imôngo ga la kpa?