Za Hemen U Taver Ken Jijingi Shighe U Ú Lu Nengen Sha Oruange U Hen Tsombor Wou yô

KWASESHIADA ugen, mba yer un ér Kim, yange i pav un ikyua a gwangerjime i dugh iveghemkwagh i nderan uma i bo, maa shi i zua un a kyansa. Nom na, Steve kaa ér, “yange mba paven Kim mba dughun iveghemkwagh i bo la yô, shi i er un twer u sôron kyansa atô ahar. * Twer ne na yô, a vôr kpishi. Yange kera faantyô u zenden sha kpishi ga.”

U fatyô u henen er yange a vihi Steve ken ishima er lu kenger ikyar na u ishima ishima ne, lu nôngon a bouange ne la kpa? Alaghga u ngu a or hen tsombor wou u nan lu yan ican a angev mbu vihin tsung shin nan lu nôngon a mtaver u iyolbeen yô. (Orpa. 12:1-7) Aluer ka nahan yô, fa wer, u we u nengen sha or u doon we ishima tsembelee yô, a gba u ú nenge sha iyol you. Aluer u hingir u vôron ken jijingi yô, ishima ia hii u yinan we shi kwagh ne una bende a gbong gbong wou u sha iyol kpaa, nahan alaghga u kera fatyô u nan or u ken tsombor wou la iwasen i kwagh a gbe nan a mi la ga. Ú er nan ve ú za hemen u taver ken jijingi shighe u ú lu nengen sha oruange laa? Kanyi nahan mba ken tiônnongo u Kristu vea fatyô u eren sha u wan mba ve lu dedoo ga la ikyo?

U Nenge sha Oruange shi U Ver Ishima sha Mlu Wou u ken Jijingi Nena?

U we u nenge sha oruange hen tsombor wou shi u er akaa ken tiônnongo vough, shi u gba angev ga yô, a gba u ú sôr mlu wou shi u sôr shighe wou kua agee ou kpaa. Anzaakaa 11:2 kaa ér: “Kwaghfan ngu hen mbahiden a iyol ijime.” Inja i ishember i ‘hiden a iyol ijime’ la sha gbaa u nengen sha oruange yô, ka u fan wer gba u ú de u eren akaa agen. Nahan a gba u ú time sha akaa a u ser u ver u eren kua ityom i u lu a mi i eren la sha er u er tom a gande tahav ou ken inya ga yô.

Steve u se vande teren kwagh na la, yange er  kwagh sha kwaghfan sha u hiden nengen sha ityom i lu a mi ave la. Yange eren tom u uke shi lu ortamen u wasen mzough u mbatamen tom shi lu ortamen u nengen sha tomshiren ken tiônnongo u Mbashiada mba Yehova ugen ken tar u Ireland. Shi yange lu môm ken Kômatii u Wasen sha Kwagh u Iyouci hen anteregh na la. Steve kaa ér, “mayange Kim gba ahon ér mo m de u nengen sha zayol na m ngu hemban veren ishima sha ityom ne ga, nahan kpa, yange m fa er m lu eren tom lu hemban er ma m er la yô.” Tsô Steve er nena sha kwagh ne? A kaa ér: “Yange m eren msen shi m henen sha kwagh ne zumbee yô, m tsua mer me kera er tom u ortamen u wasen mzough u mbatamen tom la ga. M lu ortamen her, kpa er m gema ityom yam igen i ken tiônnongo m na mbagenev yô, m hemba zuan ian i lun vea Kim shi nengen sha a na doo doo.”

Shighe kar yô, hide taver Kim iyol. Steve man Kim hide time sha mlu ve, nahan sha iwasen i kwase na yô, Steve shi fatyô u hiden eren ityom na i yange vanden eren ken tiônnongo la. Steve kaa wener: “Se uhar cii se hen u eren akaa a angev mbura na se ian u eren la tseegh. M wuese Yehova kpishi sha iwasen na shi m wuese kwase wam kpaa, er yange suem a u gban ijir shio, shin er lu dedoo ga nahan kpaa la.”

Shi nenge ase sha kwagh u er Jerry, u lu ortamen u ningir sha, man kwase na, Maria la. Yange  gba u vea de akaa agen a ve soo u eren yô, sha er vea nenge sha mbamaren vev mba been ayol yô. Maria kaa ér: “Mo vea orya wam yange se lu a isharen i eren tom mishen ken tar ugen. Nahan kpa, Jerry lu wan u mbamaren nav u môm môm, man gema gba u a nenge sha a ve. Nahan se hide se lu ken tar u Ireland sha u nengen sha a ve. Sha nahan yô, yange se fatyô u lun vea ter u Jerry shighe u i kôr un gambe sha iyouci la cii, zan zan kar kpen. Hegen ne, se mba za sôron ngô u Jerry hanma iyange, sha er aluer gba un u se wase un sha ma kwagh yô, se wase un yô. Tiônnongo u ngô u Jerry a lu her la wase kpishi. Kwagh ne na yô, se mba eren tom wase u ningir sha la her.”

Er Mbagenev Vea Wase La

Zum u apostoli Paulu lu ôron kwagh u kasev mba côgholov mba a na ve iwasen ken tiônnongo yô, a nger ér: “Aluer or nana kera nenge sha ior mba nan ga man jim je yô, ka mba ken ya u nan la, nan nyiman jighjigh u nan ve, nan hemba gban kera a or u nan ne jighjigh ga yô.” Paulu umbur mba ve lu Mbakristu a na imôngo la ér, aluer ve soo ér kwagh u ve lu eren la a lu “kwagh u doon sha ishigh ki Aôndo” yô, gba u vea kuren mbamgbe mba sha inyar mba mbamaren vev man mbamaren mba mbamaren vev mba been ayol. (1 Tim. 5:4, 8) Nahan kpa, mbagenev ken tiônnongo kpa vea fatyô u nan iwasen, man doo u vea er nahan kpaa.

Nenge ase kwagh u er Hakan vea kwase na Inger, mbabeenyol mbagen ken tar u Sweden la. Hakan kaa ér: “Shighe u i zua kwase wam a kyansa yô, kunda se uhar cii iyol kpishi. Inger vande lun kere kere, kwagh za un iyol shighe môm ga. Nahan kpa, gema hingir u se zaan iyouci hanma iyange u za sôron twer, shi icigh ki maan la kpa nzughul a na kpishi je. Hen shighe la cii Inger luun hen ya, nahan gba u me luun vea na me nengen sha a na.” Tiônnongo yange wase Hakan man Inger nena?

Mbatamen mba ken tiônnongo sôr ian sha er Hakan vea kwase na vea ungwan akaaôron a ken mkombo sha telefon yô. Heela tseegh ga, anmgbianev mba nomso man mba kasev za sôron ve shi lamen a ve sha telefon kpaa. Shi ve ngeren ve uwashika shi ve tindin ve a ukaade mba taver ve ishima kpaa. Hakan kaa ér: “Yange se zua a iwasen hen anmgbianev asev kua hen Yehova kpaa. Ikyo i ve wa se ne wase se kpishi u zan hemen u taver ken jijingi. Kwagh ka a er i doo yô, Inger mough angev mbura, nahan se hide sa mba zan mbamkombo mba Mbakristu ken Iyou i Tartor.” Mba ken tiônnongo ka vea er kwagh u ve fetyô cii sha u wasen mbauangev man mbabeenyol mba ken tiônnongo yô, ve lu tesen ér ve mba ‘ahuraior a á lu a dooshima gbem, man shi anmgbianev mba i mar ve sha ci u ayange a ican’ yô.—Anz. 17:17.

Iniôngon You Gba Yehova Kwagh

U nengen sha or u ken tsombor wou u nan lu uange la ka tom u yuhwan kpen kpen. Nahan kpa, Tor Davidi lu nger ér: “Saan or u nan we mba i hembe ve iyol ikyo la iyol,” ka mba i hembe ve iyol, amba er mba ve gbe angev, i gbe u a wase ve la nahan.—Ps. 41:1, NW.

Mba ve nengen sha mbauangev shin mba ican i tser ve la vea fatyô u zuan a msaanyol sha ci u nyi? Anzaakaa 19:17 kaa ér: “Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la.” Kwagh u mbacivir Aôndo u mimi sha jighjigh la gba un ishima, man veren mba ve zungu ve mhôônom la dedoo. Orpasalmi Davidi yange wa icam ér: “TER Una sue [imba or la] sha gambe u nan u uange; [una] gema myavinya u nan la sha iyange i angev mbu nan.” (Ps. 41:3) Se fatyô u lun a vangertiôr ser aluer or u nengen sha mbagenev doo doo la nan nyôr ken mtaver shin ma kwagh tser nan yô, Yehova una wase nan.

Ka kwagh u doon tsung u fan er Yehova Aôndo a nengen shi a lumun a iniôngon yase i se nôngon sha er se nenge sha mba hen tsombor wase mba ve lu uange la nahan! Shin er u nan mba iwasen la i gbe u nôngon kwagh kpoghuloo nahan kpa, Ruamabera na se ibumun ér: “anza a iniav mbin ne doo Aôndo.” —Heb. 13:16.

[Ngeren u shin kpe]

[Ufoto u sha peeji 18]

Eren ityom i ken jijingi akuma akuma shi lumun iwasen hen mbagenev