Kwaghpasen U Ken Kasua

SHIGHE u apostoli Paulu lu ken gar u Atene la, zaan ken kasua hanma iyange za pasen ior loho u dedoo sha kwagh u Yesu. (Aer. 17:17) Paulu pasen kwagh ken kasua sha ci u ka pe ior mba Atene hemban lun je la.

Ior mba Yehova mba samber a loho u Tartor u Aôndo ne ken kasua, shin er anyom a kar hegen je i nôngo u kuman 2,000 nahan kpaa. Mba eren kwagh ne sha ci u nyi? Sha ci u mba hembe zuan a ior ken kasua. Nyian ne kasua una fatyô u lun ajiir a vesen a teen akaa. Mbashiada mbagenev sôn ian hen orvesen u hen ijiir i teen akaa sha er vea taren ityakerada i Bibilo sha tebur sha er ior ve nenge a mi yô.

Ikyav i tesen yô, yange i ver ityakerada i Bibilo ken ijiir i teen kwagh igen ken gar u New Jersey, ken tar u Amerika, doo kpen kpen, man ityakerada ne ôr kwagh u icombor ia er ve ia za hemen u lun saan saan yô. Lu nyi i due kere? Ken iyange i môm tseegh ior ngohol ityakerada ken ijô kposo kposo kuma 153.

Kwase ugen u va hen pe i ver ityakerada ne yô, kegh ato zulee sha kwagh u kwase Shiada ugen lu ôron la. Kwase la lumun ér ka hange hange u den ser Aôndo a lu ken uma wase kua hen tsombor kpaa. Nahan ngohol takerada u Hen Kwagh sha Ikyev i Ortesen Uhemban La man Kwaghmyer u Msaanyol hen Tsombor kua Questions Young People Ask—Answers That Work la.

Nomsoor ugen va kar hen pe i ver ityakerada i pasen Bibilo yô lu yemen hen ijiir i teen kwagh igen i i lu ikyua a ijiir i i ver ityakerada la yô. Kpa cii man a nyôr ken iyou la yô, ashe gber un sha takerada u Young People Ask la. Anmgbian u kwase u tile hen ijiir shon la fa je ér takerada la doo or ne. Maa a pine un ér, “Ma takerada doo u heene?” Or la lumun shi hôn uwer sha takerada  u Young People Ask la. Anmgbian u kwase ne maa na un takerada shon u lu zan uwegh ér una tôô la. A kaa ér, un ngu a mbayev mba nomso utar. Er lu lamen a kwase Shiada ne yô, a kaa wener un lamen a mbayev nav kwa môm tseegh ken lahadi. Mbayev nav mba uhar ka agumaior. Shi er lu bughun takerada ne nengen yô, a kaa ér iliam ve i hen tsombor cii ia hemban haren sha takerada ne. Kwase ne shi tese un takerada u Kwaghmyer u Msaanyol hen Tsombor la, shi kaa a na ér un vea kwase na vea zua a akaa ken takerada ne kpishi a aa wase tsombor ve yô. Kwagh ne doo or la kpen kpen, nahan a er iyua i suen tom u pasen kwagh ne shi lumun ér Orshiada nana va hen kwagh a na man tsombor na.

Yange i lu Mbashiada mban ken ishima nena shighe u ve pase kwagh hen ijiir i teen akaa i vesen nee? Anmgbian u kwase ugen kaa ér, “Kwaghpasen u ken kasua ne doom kpen kpen. Yange lu kwagh u doon u me de u ôron kwagh a mi ga.” Anmgbian u kwase ugen di kaa ér: “Yehova kaa ér a pase loho u dedoo ne zan zan a ar sha akighir a tar cii. Man loho u dedoo ne bende a ior kpishi nyian ken Paramus, New Jersey, hen ijiir i i bugh kasua u vesen u teen akaa la. Yange i lu kwagh u doon kpen kpen. Hanmaor u yange nan pase kwagh hen ijiir la cii saan nan iyol. Yange vihi se u yemen shighe u kasua kough la kpen kpen.”

U fatyô u pasen loho u dedoo ne sha igbenda kposo kposo kpa? Se mba hembe pasen kwagh sha uya uya. (Aer. 20:20) Nahan kpa, se hen nen u pasen kwagh ken kasua man hen ijiir i teen akaa kpaa.