Tile Nen Ving, Tsô Né Nenge Myom U Yehova!
Tile Nen Ving, Tsô Né Nenge Myom U Yehova!
“Wa nen ago iyol, tile nen ving, tsô né nenge myem u TER Una yima ne” la.—2 Kroniku 20:17.
1, 2. Er nan ve num tan u “Gogi, u ken tar u Magogi” u ú nangem la ú hembe vihin a tswam u eren u ú lu anger ior ityar ityar laa?
IOR mbagenev kaa ér tswam u eren ka u tan num sha ityô i tar ne cii, shin sha ibughashe i tar ne jighilii je. Sha nahan yô, doo u a nenge sha imba kwaghbo u kwagh ne a lu van a mi la fele fele je. Kpa hide di sha vegher ugen yô, num tan ugen ngu u ú hembe vihin aa u ngun yô, kpa ityô i tar ne wa ikyo sha ú yum ga shin kwagh gba ve sha ú ga. Kanyi i lu num shono?
2 Ka num u “Gogi, u ken tar u Magogi” u Bibilo i er kwagh sha mi ken Esekiel ityough 38 la. U kaan ér num tan ne hemba vihin a tswam u eren u ú lu anger ior ityar ityar la ka u kehen a kehe a kwaghôron tsô shinii? Mayange ga, gadia num tan u Gogi la hemba mte u tan num sha ugomoti mba uumace tseegh tsô la. Num ne ka sha gomoti u Aôndo u sha la! Nahan kpa, Orgbanakaa ngu er uumace mba alaghga vea fatyô u nôngon kwagh a num tan sha ugomoti vev kpeghee tseegh la ga, un ngu a tahav mbu been a num tan u Gogi u ú hembe vihin cii la.
Num Tan sha Gomoti u Aôndo La
3. Hii ken inyom i 1914 la je, i kaa a mbahemenev mba tar ne ér ve er nyi, man ve er nena?
3 Er yange i ver Tartor u Aôndo sha ken inyom i 1914 la je, ahendan nga zan hemen hen atô u Tor u Aôndo a ver a lu hemen sha hegen la man tar u ifer u Satan ne. Sha shighe la, i kaa a mbahemenev mba uumace ér ve wa ayol a ve sha ikyev i Orhemen u Aôndo a tsough la. Kpa ve venda u eren kwagh ne, er yange i tsengaôron nahan, ér: “Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la, mba kaan er: Sé tôndo nen ikangenev Vev kera, sé kende nen ikor Ve her a vese kera!” (Pasalmi 2:1-3) Ahendan a sha hemen u Tartor la aa ar sha iaven i vesen sha shighe u num tan u Gogi u Magogi la je a lu kwagh u myer ga.
4, 5. Uumace vea fatyô u nôngon num a gomoti u Aôndo u sha u i nengen a mi ga la nena?
4 Alaghga a lan se ishima se hen er uumace nahan vea fatyô u nôngon num a gomoti u sha u i nengen a mi ga la yô. Bibilo pase ér, gomoti shon ne ka “mba dubu deri man akunduahar kar unyiin mbara mba i paa ve shin tar la” kua “Waniyôngo,” Kristu Yesu. (Mpase 14:1, 3; Yohane 1:29) Er gomoti u he ne a lu u sha yô, i yila un ér ka “Usha mba hev,” kpa mba ve lu shin tar ne ve lu sha ikyev i gomoti ne yô, i yila ve vough nahan ér, “tar u he.” (Yesaia 65:17; 2 Peteru 3:13) Mbakpishiv ken mba 144,000 mba vea tema tor a Kristu imôngo la ve er tom ve shin tar ne sha jighjigh ve bee kera kpaa. Nahan ve mban ne ve tese ér ve kuma u eren ityom ve i he i sha la.
5 Nahan kpa, asande a mba 144,000 la shi shin tar ne her. Ken iorov mba hemban iyenge 15,000,000 mba yange ve za iniongo i Kwaghyan u Ter u Aikighe ken inyom i 2002 la, lu iorov 8,760 tseegh ve tese ishimaverenkeghen i i tsough ve sha ci u tom u sha ne ye. Ma or tsô u nana cihi a ta num sha asande aa a shi her a mba i gbe u vea lu nongo u Tartor la yô, ka Tartor u Aôndo jighilii je nan lu tan num sha ú ye.—Mpase 12:17.
Tor la Hemba Kpaa
6. Yehova man Kristu ve nenge ahendan a i ve a mi sha ior mba Aôndo la nena?
6 Yange i tsengaôron kwagh u Yehova una er sha ahendan aa a va a mi sha Tartor na u a ver la, ér: “Wen u A tem Sha, ngu sen, TER ngu nahan ve tar. Zum la Una ôr kwagh a ve sha iyugh Na, Una ta ve mciem iyol sha ishima Na i vihin tsung. Nahan kpaa, Mo M ver Tor Wam sha icighanwo Wam, Shion.” (Pasalmi 2:4-6) Shighe ar hegen u Yehova una hemen Kristu “sha u una hemba” yô. (Mpase 6:2) Yehova nenge ahendan aa á va a mi sha ior nav sha shighe u mhembe u masetyô ne nena? A nenge ahendan ne ér ka sha na jighilii je man sha Tor na u a lu hemen la kpaa. Yehova kaa ér: “U nan bende a ven yô, nan bende a hongorshe [wam].” (Sekaria 2:8) Man Yesu yange ôr wanger wanger ér, hanma kwagh u ior ve er a anmgbianev nav mba i shigh ve mkurem la cii yô ka un je i er a na ye, man kwagh u ve vende u eren a ve cii kpaa ka un je ve vende u eren a na ye.—Mateu 25:40, 45.
7. Ka sha atôakyaa a nyi ishima i vihi Gogi kpishi a mba ve lu “zegeikpelaior” i í pase kwagh u i̱ ken Mpase 7:9 laa?
7 Nahan kpa, mba ve lu suen asande a mba i shigh ve mkurem kpoghuloo la kpaa Gogi una vihi ishima a ve. Ior mba ken hemen yô, vea lu ior mba ken “tar u he” u Aôndo la ka “zegeikpelaior” i mba i yer ve “ve due ken hanma ikurior man hanma nongo man hanma nongoior man hanma zwa kpaa” la. (Mpase 7:9) I ôr kwagh ve ér “ve tile sha ishigh ki ikônough ki torough kira man sha ishigh ki Waniyôngo ve haa akondo a pupuu iyol.” Kwagh ne tese ér Aôndo man Kristu Yesu lumun a ve. Ve kôr “andar a avilegh sha ave” mba genger amo kaan ér Yehova kuma u lun Tor u sha won cii, un u mtemtor na a lu sha ikyev i Yesu Kristu u a ker un Tor, a lu “Waniyôngo u Aôndo” la.—Yohane 1:29, 36.
8. Num tan u Gogi la ua na Kristu a er nyi kwagha, man kanyi ia due ken kwagheren na laa?
8 Num tan u Gogi la ua na un u Aôndo a ker un Tor la una mough sha man una nôngo ityav mbi Armagedon la. (Mpase 16:14, 16) Mba ve vende u lumun hementor u Yehova cii vea tim. Kpa gema di mba ve we ishima a ican sha ci u ve sue Tartor u Aôndo yum la yô, vea zua a myôhôryol gbem sha won. Apostoli Paulu nger kwagh sha kwagh ve nahan ér: “Ka ikav i ijirôron i mimi i Aôndo i tesen er ne kuma tartor u Aôndo u ne lu yan ican sha ci u u la. Gadia ka Aôndo kwagh u vough u oron mba ve lu tôvon ne a ican la iyev eren ve ican. Man ne mba i eren ne ican yô, Una na ne mmem a vese imôngo sha mpase u á va pase Ter Yesu Sha, a mbatyomov Nav mba ageev imôngo ken igyamusu; Una tsaha mba ve fe Aôndo ga man shi mba ve we Loho u Dedoo u Ter wase Yesu iko ga la kpaa.”—2 Mbatesalonika 1:5-8.
9, 10. (a) Yehova yange wase Yuda hemba mbaihyomov nav mba taver agee la nena? (b) Kanyi i gbe u Mbakristu mba sha ayange ne vea za hemen u erene?
9 Sha shighe u zegecan u a lu van u una kure sha Armagedon la, Kristu una nôngo ityav a kwaghbo cii. Kpa ma ityôkyaa ia lu i mbadondon nav vea nôngo ityav ga, vough er anyom udubu imôngo aa a kar la kpa yange gba u ior mba ikwe ihiar i tartor u Yuda la kpa lu u vea nôngo ityav ga nahan. Ityav yange mbi lu mbi Yehova, shi a na ve mhembe kpaa. Ngeren la kaa ér: “TER ver mbagenev myer er ve̱ kegh Mbaamon man Mbamoabi kua ior mba sha uwo u Seir, mba ve va ityav hen Yuda la; nahan i hemba ve je. Gadia Mbaamon man Mbamoabi, ve mough ityav a ior mba ve tem sha uwo u Seir la, er vea wua ve, vea tim ve purututu. Tsô, zum u ve wua ior mba ve tem sha Seir la, ve bee yô, ve gema ve gba timin ayol a ve. Zum u Yuda va hen igungu u mbakuran u a lu ken deserti la yô, ve nenge ikpelaior; yô, nenge, ve hingir akom hen inya gbulugh gbulugh, ma or môm nan war ga.”—2 Kroniku 20:22-24.
10 Kwagh ne yange er vough er Yehova tsengaôron nahan, ér: “Ka ne né nôngo ityav . . . ga.” (2 Kroniku 20:17) Kwagh ne ka ikyav i Mbakristu vea dondo zum u Yesu Kristu una mough u ‘masen kuren mhembe na’ la. Kpa hegen ne yô, mba nôngon kwagh a kwaghbo ka sha ikyav mbi utyaav mbi yolough ga, kpa ka mbi ken jijingi. Ka sha gbenda ne ve lu ‘hemban kwaghbo sha kwagh u dedoo’ ye.—Mbaromanu 6:13; 12:17-21; 13:12; 2 Mbakorinte 10:3-5.
Ka An Nana Hemen Ityav mbi Gogi La?
11. (a) Ka iniongo i nyi Gogi una yar tom a í u tan numu? (b) U lun tsevaa ken jijingi la wa nyi kere?
11 I pase un u a lu Gogi u Magogi la ér ka Satan Diabolo u kwagh a hembe un hii ken inyom i 1914 la je. Er a lu or u ken jijingi yô, una ta num iyolna ga, kpa una yar tom a iniongo i uumace sha u eren akaa aa a soo la. A lu unô vea lu iniongo i uumace nee? Bibilo pase kwagh ne vighe vighe ga, nahan kpa i̱ tese akav agen a aa fatyô u wasen se u kaven í yô. Er akaa a lu eren shin tar zan vough vough sha u kuren akaaôron a profeti a ken Bibilo nahan, se hingir u kaven kwagh ne kure kure. Ior mba Yehova mba keren mbaahaba sha akaa ga, kpa mba tsevaa ken jijingi, ve fa dedoo er akaa a patii man a kwaghaôndo a a lu eren ne a lu zan vough vough sha u kuren kwaghôron u profeti u ken Bibilo la yô.
12, 13. Profeti Daniel yange tsengaôron kwagh u num tan u masetyô sha ior mba Aôndo la nena?
12 Profeti Daniel yange seer tan iwanger sha kwagh u num u masetyô u a ta sha ior mba Aôndo la, sha u ngeren wener: “Una [tor u ken imbusutarimese la] due a ishima i nyoon tsung sha u timin ior kpishi man shi u saren ve kera. Una mande utenti mba iyou i tor hen harga u zegemnger a icighanwo u Icivirigh.”—Daniel 11:44, 45.
13 Sha ashighe a i nger Bibilo la yô, “zegemnger” la lu Zegemnger u Tamen shin Zegemnger u Mediterenia la, man “icighanwo” la lu Shion u Yehova a er kwagh u ú la, wener: “Mo M ver Tor Wam sha icighanwo Wam, Shion.” (Pasalmi 2:6; Yosua 1:4) Nahan, u ôron kwagh ne sha gbenda u ken jijingi yô, tar u hen “harga u zegemnger a icighanwo” la tile sha ityough ki ijiir i yôughyôugh i ken jijingi i Mbakristu mba i shigh ve mkurem la. Kera mba a zegemnger u uumace mba ve lu paleghaa a Aôndo la ga, man mba veren ashe u hemen a Kristu Yesu imôngo sha Tartor u sha. Ikyav tese wang ér, tor u ken imbusutarimese la una ver ashe sha mbatomov mba Aôndo mba i shigh ve mkurem la kua akar a ve a zegeikpelaior i i̱ til sha jighjigh la zum u una sa kwan a ta num sha a ve sha u kuren kwaghôron u profeti u Daniel la.—Yesaia 57:20; Mbaheberu 12:22; Mpase 14:1.
Mbatomov mba Aôndo Vea Er Nena?
14. Ka akaa atar a nyi ior mba Aôndo vea er shighe u a ta num sha ve laa?
14 I ver ishima ér mbatomov mba Aôndo ve er nena sha shighe u a hii u tan num sha a ve laa? Kwa ne kpa, kwagh u ikurior i Aôndo yange i er sha ayange a Yehoshafati la ka kwagh u a lu ve ikyav yô. Ver ishima wer, yange i wa ior mba ikyurior ne tindi ér ve er akaa atar: (1) ve wa ago iyol, man (2) ve tile ving, shi (3) ve nenge myom u Yehova. Ior mba Aôndo mba sha ayange ne vea yar tom sha mkaanem man nena?—2 Kroniku 20:17.
15. Ikyav i ior mba Yehova wan ago iyol la ér nyi?
15 Ve wa ago iyol: Ior mba Aôndo vea cia ga, vea za hemen u wan ago iyol a suen Tartor u Aôndo taveraa je. Vea za hemen u lun a mtil paleghaa ve u Mbakristu la. Vea ‘tile dông, vea kpoghor ga’ ken tom u ve lu shiren Yehova sha jighjigh la, shi vea za hemen u wuese Yehova ken igbar sha ci u erdoo na la. (1 Mbakorinte 15:58; Pasalmi 118:28, 29) Ma mkighir môm u hegen shin u ken hemen kpa ngu u una fatyô u tenger a ve kera sha mtil ve u Aôndo a lumun a mi ne ga.
16. Mbatomov mba Yehova vea tile ving sha nyi gbenda?
16 Tile ving: Mbatomov mba Yehova vea nôngo ér vea yima ayol a ve ga, kpa vea suur sha Yehova a ishima ve cii. Ka un tseegh a lu a tahav mbu yiman mbatomov nav ken anzughul a ken tar ne ye, shi a tôndo zwa wener una er nahan. (Yesaia 43:10, 11; 54:15; Ukwelegh 3:26) U se suur sha Yehova la kua u nan jighjigh a gbenda u a lu yaren tom a ú wang je sha u kuren mbaawashima nav upuembaanyomov ve kar hegen imôngo la. Nahan gba u Mbakristu mba mimi vea hemba lun a vangertiôr ken ior mbacivir a ve imôngo mba Yehova man Tor na u a lu sha ikyôn la ve ne ve tahav ér ve hemen la, a hemba ave a tse. Ior mba jighjigh mban vea tese ior mba Aôndo gbenda. Aluer or hure gbendatesen ve la kera yô, kwagh a tser nan.—Mateu 24:45-47; Mbaheberu 13:7, 17.
17. Er nan ve mbatomov mba Yehova mba jighjigh mbara vea nenge myom u Yehova laa?
17 Nenge myom u Aôndo: Myom una lu injar i mba ve til sha mimi ve u Orkristu shi ve suur sha Yehova sha u a̱ war ve la cii. Vea yôô mve u iyange i Yehova i ijirôron la zan zan ihwa i masetyô ne—man sha er ve fetyô la cii. Gba u igbetar cii ia fa ér Yehova ka Aôndo u mimi shi ngu a mbatomov mba jighjigh shin tar ne. Mayange je ma ityôkyaa ia kera lu i anyiman a zer lun sha kwagh u ian i Yehova a lu a mi i hemen la ga.—Esekiel 33:33; 36:23.
18, 19. (a) Icam i mhembe i i we ken Ekesodu ityough 15 la tese er a lu mba vea war num tan u Gogi la ken ishima nena? (b) Kanyi i doo u ior mba Aôndo vea er hegene?
18 Ior mba Aôndo vea nyôr ken tar u he a agee iyol, nahan a maa ve iyol u wan icam i mhembe, vough er Mbaiserael mba sha ayange a ngise la kpa ve er zum u i war ve shin Zegemnger u Nyian la nahan. Ve jimin cii man ve ker asange asange kpaa, vea lu a iwuese hen Yehova gbem sha won sha mkor na, nahan vea kimbir mkaanem ma yange i ôr ngise ngise, ér: “Me wa icam me ter TER, gadia A hemba tser tser . . . TER ka orutya je; iti na er [Yehova]. . . . uwegh Ough ku yanegh, TERE, ku her orihom. Sha ivesen i icivir You yô, U gbihi mba ve hendan a We mbara inya; U tindi iyugh You, va nande ve kera er adenga a alakema nahan. . . . Sha erdoo Wou, U hemen ior mba U paa ve yô, U hemen ve gbenda sha agee Ou, U za a ve hen icighanjiir Wou. . . . Ú nyôr a ve, Ú za môôr ve sha uwo u u lu dyako Wou la, ka ijiir i U gem i, i hingir ijiir You i teman her je la TERE, icighanjiir u ave Ou a ver un yô, TERE. TER Una tema tor gbem sha won je.”—Ekesodu 15:1-19.
19 Hegen u ishimaverenkeghen i lun uma gbem sha won i lu wanger wanger je i hembe ave a tse ne, ka ian i dedoo sha ci u mbatomov mba Aôndo i vea tese ér ve na ayol a ve hen Yehova shi vea nyôôso gbashima ve u ve lu a mi u civir un u a lu Tor ve u tsôron la!—1 Kroniku 29:11-13.
Ú Fatyô u Pasen Kpa?
• Er nan ve num tan u Gogi la ua lu sha mba i shigh ve mkurem kua iyôngo igen laa?
• Ior mba Aôndo vea wa ago iyol nena?
• U tilen ving la inja na ér nyi?
• Ior mba Aôndo vea nenge myom u Yehova la nena?
[Study Questions]
[Picture on page 26]
Yehova yange na Yehoshafati man ior nav mhembe, nahan ityôkyaa lu i vea nôngo ityav ga
[Picture on page 28]
Mba i shigh ve mkurem man iyôngo igen la mba a ci sha u kenden a hementor u Yehova sha
[Picture on page 30]
Ica a gba ga tsô ior mba Aôndo vea wa icam i mhembe er Mbaiserael mba sha ayange a ngise la nahan