Iwasen I Kaven Bibilo

BIBILO ka takerada u kahan inja kposo. Ior mba yange ve nger i̱ la ve kaa ér ka sha tahav mbu Aôndo yange ve nger i̱ ye, man kwagh u i nger ker la ngu a akav de ishar a tesen ér ikyaan ve ne ka i mimi. (2 Timoteu 3:16) Bibilo pase ape se dugh man er i hii ve se lu heen man ape se lu zan yô, kua akaa agen kpishi kpaa. Sha nahan yô, ka takerada u ú kom u se time ken ú kpee yô!

Alaghga ú nôngo wer ú ôr Bibilo kpa i̱ taver we u kaven. Alaghga ú fa ape ú ker ve ú zua a mbamlumun sha mbampin ou mbara ga. Aluer kape kwagh a lu ne yô, ú ngu tswen ga. Mlu wou ngu er orgen u yange lu ken derianyom u sha hiihii la nahan. Yange mough zende ken Yerusalem shin ikyekye na i kpelan lu yemen ken tar na, ken Etiopia. Ititor i Etiopia ne lu ôron kwaghôron u profeti u ken Bibilo u i nger ken takerada u Yesaia la genger genger, hen shighe la nahan í vande ngeren ú uderimbaanyomov kar utaankaruhar.

Fese nahan, orgen u̱ lu nyôngoso ikyooso ikyooso a ikyekye na la naregh zwa sugh un. Or la lu Filibu, orhenen u Yesu, a pine Oretiopia la ér: “U kav kwagh u u lu ôron ne kpa?” Oretiopia la gema kaa a na ér: “Á er nan man me kavaa? Saa or nana pasem.” Tsô a lôhô Filibu ér a̱ unde sha ikyekye la. Filibu pase inja i ivulugh ki yange or la lu vanden ôron la shi a za hemen a gba “ôron un kwagh u Yesu.”—Aerenakaa 8:30-35.

 Di vough er ngise Filibu wase Oretiopia la u kaven Mkaanem ma Aôndo tsuaa tsuaa la nahan, kape Mbashiada mba Yehova ve wasen ior u kaven Bibilo ainge je la. We kpa a saan ve iyol u wasen we. Kera cii cii yô, ka i hemba doon u henen Bibilo sha alô sha alô, hiin sha atesen a Ruamabera a hiihii la. (Mbaheberu 6:1) Wea nguren zan hemen yô, ú gba kuman u yan kwagh u apostoli Paulu a yer ér “kwaghyan u taver” la—inja na yô, ka akaa a mimi a a hembe zan shimi je la. (Mbaheberu 5:14) Shin er i lu Bibilo ú henen nahan kpaa, ityakerada igenegh—i wasen or u henen Bibilo la—ia wase ú u zuan a ajiir ken Bibilo a a tim sha agbaa a kwaghhenen imôngo shi a pase á kpaa yô.

A fatyô u sôron ian i kwaghhenen la veren sha shighe u a hagher we ga kua ijiir i a lu ú ican ga yô. Ior mbagenev mbativ yô, sha waya u gbidyen kpa ka ve hen kwagh je. Mba henen kwagh la inja er ka i hen kwagh ken klase nahan ga; ka kwaghhenen u i henen ishigh a shigh u i goom a mi sha u a̱ gba sha mlu wou vough kua mkav wou man mfetakerada wou kpaa yô. Gba u ú kimbi kwagh sha imba kwaghhenen la ga. (Mateu 10:8) Mbá eren ikyaren ga, shi a na ér u̱ va ahenge kpaa ga. A na mbamlumun sha mbampin ou cii, nahan ú hen ú fa er ú kporom ikyua a Aôndo yô. Kpa hii nan ve i gbe u ú hen Bibilo? Time ase sha atôakyaa a a ne ve Bibilo i henen ia seer iember ken uma wou yô.