ALUER u war ma aahe yô, alaghga u kav kwagh u mbagenev mba ve kpa ve war aahe la, yange ve tagher a mi yô. Akaa a mba ve war aahe ka ve tagher a mi yô, ka a je ne: ka i kpiligh ve iyol shi ka i taver ve u lumun a kwagh u a er ve la shi ka ve kera fa kwagh u ve lu sha mi ga shi ishima ka i nyian ve shi mnyam ma bom kpa ma cier ve. Mbakpishiv mba aahe a er ve la, ka i saan ve iyol ga shi ka ve vôr, kwagh ne a na yô, ve kera lu a isharen i nôngon kwagh ken uma ga.

Aluer aahe na akaa ou cii saa ishe yô, alaghga we kpa u nenge wer u kera fatyô u wan ishima ga. Shi alaghga u hii u henen wer ityôkyaa i injaa kera ngi i u za hemen u lun uma ga je kpaa. Nahan kpa, Bibilo pase se ér ityôkyaa i injaa ngi i u za hemen u lun uma yô, shi ér u fatyô u lun a ishimaverenkeghen i tenger ga wer, akaa a va za a doo ken hemen.

Orpasenkwagh 7:8 kaa ér: “Guda mkur u kwagh a mhii na.” Shighe u u hii u sôron akaa a yange aahe vihi la, ka i lu u inja er u kera ngu a ishimaverenkeghen ga nahan. Kpa er u we ishima u lu sôron akaa ken uma wou kure kure la, akaa a a va fatyô u geman sha gbenda u dedoo.

Bibilo tsengapasen shighe u “á kera ungwa imo i mlia . . . man vaa u gbidyen kpuaa kpaa ga” la. (Yesaia 65:19) Kwagh ne una er shighe u tar ua hingir paradiso, sha ikyev i hemen u Tartor u Aôndo la. (Pasalmi 37:11, 29) Mayange uaahe vea kera er ga. Akaa a vihin a or ka nana umbur ve i vihi nan tsung la, aa kera lu ga gbem sha won, sha ci u Aôndo Uhembanagee la tôndo zwa ér: “Á kera umbur akaa a tsuaa la ga, man shi aa kera va or ken ishima kpaa ga.”—Yesaia 65:17.

Orgbanakaa sôr akaa ver “sha u nan ne ishimaverenkeghen i dedoo ken masetyô,” inja na yô, ka uma u bem sha ikyev i hemen u Tartor u Aôndo, u u lu vough la je la. (Yeremia 29:11) Nenge ase kwagh u doon ne sha wono! Aluer u fa mimi ne yô, kwagh ne una fatyô u wasen we u zuan a ityôkyaa i injaa i zan hemen u lun umaa? Sally, u se vande ôron kwagh na ken mhii u ngeren ne la kaa ér, “Aluer u ngu umbur iyol you akaa a doon tsung a Tartor u Aôndo ua va a mi sha ci wase ken hemen la yô, kwagh ne una wase u u de u henen sha akaa a vihin a yange er u la, nahan u fatyô u wan ishima a mlu wou u hegen ne.”

Er nan u seer henen sha kwagh u ica a gba ga tsô Tartor u Aôndo ua er sha ci u uumace la ga? Aluer u er nahan yô, u lu a vangertiôr wer, a lu u ya ican sha ci u aahe kpa, u ngu a ityôkyaa i injaa i zan hemen u lun uma hegen, er u lu keghen shighe u aahe una va kera lu ga la. Kpa cii man shighe la yô, Bibilo ngi a akaawan a injaa a a wase u u nôngon a akaa a vihin tsung a aahe ka a va mi la. De se nenge akav kpuaa.