1, 2. (a) Ka mtaver u nyi mbamaren ka ve tagher a mi, man vea hemba mtaver ne nena? (b) Ka atôakaa anyiin a nyi se lu timen sha mini?

MBAMAREN mbagenev ken tar u France kaa ér: “Er se ne Yehova jighjigh nahan kpa, kwagh la maa tese ér ônov asev kpa vea er nahan keng keng ga. Jighjigh u nan ngu er dyako u tsombor nahan ga. Ônov asev ka ve nan jighjigh sha akaa kure kure.” Shi anmgbian ugen ken tar u Australia kaa ér: “Alaghga kwagh u hemban taver u u tagher a mi ken uma yô, ka u wasen ônov ou wer, ve maa jighjigh ve u nan. A gba u u er tom a akaa a u lu a mi la sha u wasen ve. Adooga u nenge wer u na mlumun u kuman wan wou sha mpin u a lu zan un iyol yô. Kpa shi, shighe karen yô, a hide a pine u mpin shon môm tsô! Alaghga shighe a karen yô, mlumun u yange u na wan wou ve kuma un sha kwagh u yange hange un u fan la una kera kuma un ga. Nahan a gba u u lu hiden timen sha atineakaa agen kwa kimbir kimbir vea wan wou.”

² Wea lu ormaren yô, ashighe agen ka u nenge wer u kuma u eren tom u tesen shi maan ônov ou wer ve hingir nomso shin kasev mba lun a jighjigh u nan gaa? Jighilii yô, or wase môm kpa nan kuma u eren tom ne sha kwaghfan u nan tseegh ga! (Yer. 10:23) Kpa se fatyô u zan ikyura ken tom ne aluer se de ser Aôndo a hemen se yô. Nenge ase akaa anyiin aa a na u wase mbayev ou u maan jighjigh ve u nan yô: (1) Fa ve tsembelee. (2) Tese ve sha gbashima. (3) Er tom a anzaakaa. (4) Waan ishima shi eren msen.

3. Mbamaren vea dondo ikyav i Yesu la sha u tesen mbayev vev nena?

³ Yesu yange cian u pinen mbahenen nav kwagh u ve ne jighjigh a mi la ga. (Mat. 16:13-15) U fatyô u dondo ikyav na la. Hemba doon u pinen mbayev ou wer ve pase u mbamnenge vev shighe u ishima i lu ve ker hang ga yô. Kwagh ne wa u lamen a ve sha akaa a a lu nan ve akpelan a tan ken ishima la. Anmgbian u nomso ugen ken tar u Australia u a lu anyom 15 yô kaa ér: “Terem ka a lamen a mo sha kwagh u jighjigh wam u nan shi a wasen mo u henen kwagh sha mi. Ka a pinem ér: ‘Bibilo kaa ér nyi?’ ‘U lumun a kwagh u Bibilo i kaa laa?’ ‘Er nan ve u lumun a mini?’ Yange a soo ér mo m na un mlumun ken mkaanem am, i de lu u hiden kimbir kwagh u ashen un shin ngôm a ôr la ga. Er m lu vesen seer la, gba u me naan mlumun a hemban di u lumun a kwagh u ve ôr la tseegh tsô.”

4. Er nan ve i gbe hange hange u mbamaren vea nenge mbampin mba mbayev vev ér ka beerkwagh ga? Tese ikyav.

⁴ Aluer taver wan wou u lumun a atesen a Bibilo agen kpa, de er kwagh a nan gagh shin ôron kwagh inja er kwagh u nan lu ôron la vihi u ga. Kpa wa ishima lam a nan kundu kundu, nahan wase nan u henen sha kwagh shon. Ter ugen kaa ér: “De tee mbampin mba wan wou la wer ka beerkwagh ga. De gbe huren kwagh u nan ôr la wer ka ankwagh u kiriki ga, shi de vendan u lamen sha atineakaa agen wer aa doo u u lamen sha mi ga ze.” Jighilii yô, doo u u nenge kwagh u mbayev ou ve pinen sha gbashima la wer, kwagh la gba ve ishima shi ve soo u seer fan kwagh shon. Shighe u Yesu lu anyom 12 la kpa, yange pinen mbampin mba hange hange. (Ôr Luka 2:46.) Gumor ugen ken tar u Denmark u a lu anyom 15 yô kaa ér: “Yange m kaan mer taver mo u nan jighjigh mer se mba a kwaghaôndo u mimi yô, mbamaren av lam a mo kundu kundu shin er alaghga kwagh u yange m ôr la taver ve nahan kpaa. Yange ve na mbamlumun sha mbampin av cii ken Bibilo.”

5. Mbamaren vea tese ér ve nenge kwagh u wasen mbayev vev u maan jighjigh ve u nan la ér ka beerkwagh ga nena?

⁵ Tese wer u fa mbayev ou tsembelee sha u fan gbenda u ve henen kwagh man er i lu ve ken ishima kua kwagh u a gbe ve la. De gbe tôôn ken ishima tsô wer, mba a jighjigh u nan sha ci u mba ze mbamkombo shi mba duen kwaghpasen vea we yum ga. Hanma iyange i u lu lamen a ve yô, ôron ve akaa a ken jijingi kpaa. Eren msen vea mbayev ou shi eren msen sha ci ve kpaa. Nôngo u fan akaa a a karen jighjigh ve u nan la shi wase ve u nôngon a akaa shon kpaa.

6. Mbamaren ka vea fa mimi u Bibilo tsema tsema yô, kwagh ne a wase ve u tesen mbayev vev nena?

⁶ Yesu yange a tese ior kwagh i kôr ve ken ishima, sha ci u yange soo Yehova man Mkaanem nam kua ior kpaa. (Luka 24:32; Yoh. 7:46) Aluer mbamaren kpa mba a imba dooshima ne yô, vea tese ônov vev kwagh u una kôr ve sha mtema yô. (Ôr Duteronomi 6:5-8; Luka 6:45.) Ne mbamaren, lu nen mba henen Bibilo shi eren nen tom a ityakerada i wasen se u henen Bibilo la. Seer fan kwagh u igbetar man ngeren mba ken ityakerada yase mba ve lam sha atineakaa ne la kpaa. (Mat. 6:26, 28) Aluer u ngu eren nahan yô, kwagh la una na mfe wou una seer shi Yehova una hemba doon we ishima shi u hemba fan igbenda i tesen ônov ou tsembelee la kpaa.—Luka 6:40.

7, 8. Aluer ishima i mbamaren i iv a akaa a mimi a ken Bibilo yô, kanyi ia due kere? Tese ikyav.

⁷ Aluer u iv ishima you a mimi u ken Bibilo la yô, kwagh la una mgbegha u u lamen a mba hen tsombor wou shami. Eren nahan hanma shighe cii, i de lu shighe u u lu wan iyol sha mbamkombo mba Mbakristu shin zum u u lu eren mcivir u hen tsombor la tseegh ga. Nahan kpa, de gbe kighir ve wer ne hen hanma kwagh tsô ga, kpa i lu akaa a u nenge wer ka mbamgbe mba tsombor wou shi i lu ikye you u eren nahan kpaa. Mbamaren mbagenev ken tar u Amerika ka ve lam vea mbayev vev shighe u ve  nenge a akaadoon tsung a Yehova a gbe shin ve lu yan kwaghyan imôngo yô. Ve kaa er: “Ka se umbur mbayev asev dooshima man ikyo i wan i Yehova a tese se sha akaadoon tsung a a ne se la.” Mbamaren mbagenev ken tar u South Africa kaa ér, ka vea yar ken ityev vea mbayev vev mbakasev mba uhar mbara yô, ve tôô shighe la ve tese ve gbenda u kpilighyol er ishamakaa ka i mende i hingir ikyon i vesen yô. Shi ve kaa er: “Ka se nôngo tsung u tesen mbayev asev mbakasev mbara u lun a iwuese sha uma man gbenda u kpilighyol u Yehova er un la.”

⁸ Ter ugen ken tar u Australia yange za a wan na u nomso u zulum anyom pue la hen ijiir i i veren akaa a mbayiase yô. Yange nenge ér doo u una wase wan na hen shighe ne a̱ seer taver jighjigh na u nan shi a nenge akav a a tese ér Yehova ka Orgbanakaa yô. A kaa ér: “Se nenge i ver annyamev mba shin mnger mba ve kera lu uma sha tar nyian ga mba i yer ér ammonoids man trilobites la. Yange kpiligh se iyol u nengen er annyamev mba ngise ve lu kpa ve kera lu hegen ga ne dooashe, shi ve lu kpelegh kpelegh kpa ve kwagh nzughul ken ve ga er annyamev mba sha ayange ne nahan yô. Aluer uma yange una hii sha gbenda u taver ga, kpa una va wa kpelegh kpelegh hegen yô, er nan ve annyamev mba ngise mba se nenge a mi hen ijiir ne la kpa lu kpelegh kpeleghe? Er kwagh u m hen ne lu kwagh u doon mo tsung yô, m pase wan wam kwagh shon.”

9. Er nan ve anzaakaa a doo u tesen kwagh a mi yumu, man anmgbian u kwase ugen yange er tom a mi nena?

⁹ Yesu yange a er tom a anzaakaa aa a na or nana hen sha kwagh shi aa kôr nan ken ishima shi aa wase nan u umbur kwagh shon yô. (Mat. 13:34, 35) Mbayev ka ve nenge a injakwagh i u lu ôron ve la ken ishima wang. Ne mbamaren, eren nen tom a anzaakaa kpishi ken ityesen yen. Ka kwagh u ngô ugen ken tar u Japan er vough je la. Yange tese mbayev nav mba nomso mbara kwagh u tar man er Yehova yange gba u sha ue yô. Ikyav i tesen yô, yange na mbayev nav mbara atumba man shogar man kofi. Nahan maa a ôr a hanmô ve ér nana kunde un kofi. A kaa ér: “Yange ve er kwagh la sha ue kpishi. M pinen ve er i hii man ve er kofi la sha ue yô, ve kaa a mo ér, ve soo u eren kofi la sha gbenda u una doom u man yô.” Nahan a pase ve ér, kape Aôndo kpa, yange gba tar sha ue sha er a kpe uumace iyol je la. Yange doo ve u henen kwagh la, shi mayange ityesen la ia hungur ve ga!

10, 11. (a) Ka ikyav i nyi u fatyô u eren tom a mi sha u wasen wan wou wer nana maa jighjigh u nan ne Aôndo laa? (Nenge foto u a lu sha mhii u ngeren ne la.) (b) Ka akav a nyi nahan u er tom a mi ve a wase we?

¹⁰ Ikyav i tesen yô, u fatyô u eren tom a ankwatakerada u ka a lu a akaawan a tesen or u yôron la, sha u wasen ônov ou u maan jighjigh ve u nan. U er kwagh ne nena? U fatyô u kaan kyeeke vea ônov ou, maa pasen ve er ne dondo akaawan a i tese ken ankwatakerada u tesen er a kaa kyeeke la yô. U been yô, na wan wou ma ityamegh ki kon, er ki apel nahan, maa pine nan wer: “U fa er ityamegh ki apel ne kpa ki lu a ngeren u ‘akaawan’ kpa?” Maa pav ityamegh ki apel la ker avegher ahar nahan dugh isham ker na nan. U been yô, pase nan wer isham la ngi er ka akaawan a wasen or u yôron ma iwer la nahan.  Ngi a akaawan a tesen er apel la una vese ve, una lu la. Kpa akaawan la gema taver hemba aa i nger sha u tesen or u kaan kyeeke la ica je. Alaghga u fatyô u pinen nan wer: “Aluer or nan ngu u nan nger akaawan a wasen or u kaan kyeeke yô, ka an nan nger akaawan a wasen apel la u vesene?” Aluer ka gumor yô, u fatyô u pasen nan wer akaawan a wasen kon u apel la u vesen cii, nga ken aveghemakaa a nderan uma la. Shi u fatyô u nengen sha akav agen a i tese ken antakerada u The Origin of Life—Five Questions Worth Asking (Mbampin Utaan mba i Doo u Se Pine sha Kwagh u Mhii u Uma Yô) la, aa a lu sha peeji 10 zan zan 20 la kpaa.

¹¹ Mbamaren mbagenev ka i doo ve u lamen vea mbayev vev ken ngeren mba ken Awake! u a lun a itinekwagh ér, “Was It Designed?” (“I Gba a Gbaa?”) la. Shin ka ve er tom a ngeren mban u tesen mbayev vev mba kiriki akaa a a taver u kaven ga yô. Ikyav i tesen yô, nom man kwase ugen ken tar u Denmark yange ve tôô igirgi i purugh ve kar sha annyonov. Yange ve kaa ér: “Igirgi i purugh ka i lu vough er annyonov nahan. Kpa igirgi i purugh ia fatyô u tan aji shi tseven agirgi a kiriki? I ver a ver ijiir jighilii i annyonov vea purugh vea za gbaan yôô? Shi u fatyô u karen ihyuran i igirgi sha atsam a inyon ka i waan laa? Nahan ka an nan hembe lun a kwaghfana? Ka or u a er agirgi la shin ka u a gbe annyonov laa?” Ka wea lam vea wan wou sha imba gbenda ne shi wea pine nan mbampin yô, kwagh la a wase nan u eren tom a “m-er u sha inja,” shi maan jighjigh u nan ne Aôndo la.—Anz. 2:10-12.

12. Akav a tesen aa wase mbayev u maan jighjigh u ve ne Bibilo la nena?

¹² Aluer u ngu eren tom a anzaakaa sha inja yô, kwagh la una wase wan wou u taver jighjigh u nan ne ér, hanma kwagh u Bibilo i ôr cii ka u mimi la. Ikyav i tesen yô, nenge kwagh u i nger ken Yobu 26:7 la. (Ôr.) U fatyô u tesen nan er i lu Aôndo a ne i nger ivur Bibilo ne nena? De gbe kaan a wan wou tsô wer kwagh u i nger ken ivur ne la due hen Yehova ga. Kpa gema ôr nan kwagh sha gbenda u nana hen sha mi yô. Pase nan er shighe u Yobu lu uma la, anar u nengen akaa a mi ken ica man agirgi a zan sha iamegh la lu a lu ga yô. Wan wou di tom na a lu u tesen er i taver kpishi u or nana na jighjigh ér, i har kwagh u vesen er tar nahan sha ma kwagh ga yô. Wan wou una fatyô u tesen er i taver u kwagh u lun a myohom er bor shin iwen nahan tilen sha ahumbe yô. Kwagh ne una wase wan wou u fan er Yehova yange na i nger akaa a mimi ken Bibilo ica gba cii ve, uumace va mase kaven ér akaa la ka a mimi ye.—Neh. 9:6.

13, 14. Gba hange hange u mbamaren vea tese mbayev vev er akaawan a Bibilo a lu a inja sha ci u nyi?

¹³ Ka hange hange u tesen mbayev ou er akaawan a Bibilo a lu a inja yô. (Ôr Pasalmi 1:1-3.) Igbenda ngi kpishi i eren kwagh ne. Ikyav i tesen yô, u fatyô u kaan a ônov ou wer ve tôô ér gba u vea za lu ken ma icile, shi mba a ian i tsuan iyengeior i ia lu her a ve imôngo yô. Maa pine ve wer: “Ka aeren a nyi hanmô ve nana lu a mi ve, vea lu ken bem shi vea eren kwagh ken mzougho?” Shi u fatyô u lamen a ve sha akaawan a doon tsung a i nger ken Mbagalatia 5:19-23 la kpaa.

¹⁴ Kwagh ne una wase ve u fan akaa a hange hange ahar. Kwagh u hiihii yô, akaawan a Aôndo ka a wase se u lun ken bem man mzough. Sha uhar yô, Yehova ngu wan se agoyol u va lun ken tar u he la, sha u tesen se kwagh hegen. (Yes. 54:13; Yoh. 17:3) U fatyô u ôron kwagh ne sha gbenda u a wanger nan yô, sha u tesen nan ma ikyav ken ityakerada yase. Er kwagh ne sha u ôron nan ma ngeren ken Iyoukura yase u ka a lu a itinekwagh ér, “Bibilo Gem Ior” la. Shin aluer or u ken tiônnongo wou nan gema inja sha er nana er ishima i Yehova yô, u fatyô u lôhôn nan wer nana va ôr ne yiase i uma u nan. Akav ne ka a na se nenge er akaawan a Bibilo a wasen se kpôô kpôô yô.—Heb. 4:12.

15. Shighe u u lu tesen mbayev ou yô, ka awashima u nyi i doo u u lu a mini?

 ¹⁵ Kwagh u se lu ôron yô, ka un ne: Shighe u u lu tesen mbayev ou yô, de gbe nen anyiman her ga, kpa nenge a kwagh u u lu ôron ve la ken ishima you. Nahan ôr kwagh sha gbenda u vea hen sha kwagh shon yô. Na kwaghhenen la a maa ve iyol shi a taver jighjigh ve u nan kpaa. Ter ugen kaa ér: “Mayange de vôron u duen a igbenda i he i hiden timen sha atineakaa a yange ne vande lamen sha mi la ga.”

16. Doo u mbamaren vea waan ishima a mbayev shighe u ve lu tesen ve kwagh la sha ci u nyi? Tese ikyav.

¹⁶ Jijingi u Aôndo ka a wase se u lun a jighjigh u nan taveraa. (Gal. 5:22, 23) Er ka i tôô ityamegh ki kon shighe ve ki vese nahan, kape jighjigh u nan kpa i lu je la. Sha nahan yô, de gbe uwegh ga shi waan ishima shighe u u lu tesen mbayev ou yô. Ter ugen u a lu a mbayev uhar ken tar u Japan yô, kaa ér: “Mo vea kwase wam yange se na ônov asev shighe wase kpishi. Hii shighe u ve lu iyev la je, m hen kwagh a ve hanma iyange miniti 15, saa di a lu sha iyange i mbamkombo mba Mbakristu ve se er nahan ga ye. Yange i taver se shin ve u tôôn miniti 15 henen kwagh ga.” Ortamen u sôron atôônanongo ugen nger ér: “Yange m lu a mbampin shin akperan sha akaa kpishi aa lu zan mo iyol kpa m ôr kwagh sha mi ga yô. Shighe kar yô, mbamkombo man mcivir u hen tsombor kua kwaghhenen u sha tseeneke wam la wasem u zuan a mbamlumun sha mbampin mban mbagenev. Ka nahan ve i gbe hange hange u mbamaren vea za hemen u tesen ônov vev ye.”

17. Er nan ve i doo u mbamaren vea ver ikyav i dedoo, man mbamaren mbagenev ver mbayev vev mba kasev imba ikyav ne nena?

¹⁷ Shi kwagh ugen u a lu hange hange yô, ka u veren ve ikyav sha jighjigh wou u nan la. Mbayev ou vea nenge akaa a dedoo a u eren la nahan kwagh la una na vea lu a aeren a dedoo. Er u lu ormaren yô, za hemen u maan jighjigh wou u nan. Mbayev ou ve nenge er u fe wer Yehova ngu kpôô kpôô yô. Shighe u ishima ka ia nyian mbamaren mbagenev mba ken icile i Bermuda yô, ve er msen hen Yehova vea mbayev vev imôngo ér, a wase ve, shi ve taver mbayev vev ishima ér ve kpa ve za eren msen sha tseeneke ve sha ikyaa shon. “Shi ka se kaa a wan wase u kwase u vesen la ser, ‘A suur sha Yehova shi a pasen kwagh u Tartor nduuluu shi ishima i de nyian un sha akaa kpishi ga.’ Ka una nengen a iwasen i Yehova yô, a fa je ér Yehova ngu wasen se. Nahan kwagh ne seer taver jighjigh u a ne Aôndo man Bibilo la.”

18. Ka mimi u nyi i gbe u mbamaren vea fa?

¹⁸ Sha nahan yô, doo u mbamaren vea fa er i lu mbayev vev ve lu a ian i tsuan kwagh u vea na jighjigh a mi ye. Er u lu ormaren yô, a gba u u lôô shi u ur mngerem. Kpa ka Aôndo tseegh una na mvese yô. (1 Kor. 3:6) Yô, er msen sôn jijingi u Aôndo shi nôngo kpoghuloo sha u tesen mbayev ou kwagh. Aluer u er nahan yô, fa dedoo wer Yehova una haa u iveren.—Ef. 6:4.