NGEREN U TIMEN SHA MI 49
Yehova Una Ungwa Mbamsen Av Je Kpa?
“Né vaa a Mo, man né za, né za sônom man Mo kpaa Me ver ato her a ven.”—YER. 29:12.
ICAM 41 Ter, M Ngu Sônon We, Yô Ungwam
KWAGH U I TIM SHA MI KEN NGEREN NE YÔ a
1-2. Ka nyi ia na ve alaghga se nenge ser Yehova ngu ungwan mbamsen asev ga?
“I̱ SAAN we iyol ken TER, man Una na u asaren a ken ishima you ye.” (Ps. 37:4) Ityendezwa la i doo je gande! Kpa doo u se ver ishima ser hanma kwagh u se sôn Yehova cii yô, a na se kwagh shon ave ave jee? Se pine nahan sha ci u nyi? Nenge ikyav sha akaa ne. Anmgbian u kwase ngu eren msen ér ma un ze Makeranta u Mbapasen Ivangeli i Tartor. A er msen anyom imôngo kpa mba a lôhô un ga. Anmgbian ugen di ngu sônon Yehova ér angev nav ma mbu bee sha er una er tom ken tiônnongo kpoghuloo yô. Kpa ngu zuan a guda sha won ga. Mbamaren mbagenev ken tiônnongo mba eren msen ér wan ve ma a ze hemen u lun ken mimi. Kpa wan ve kar ishima gba den u civir Yehova tsô.
2 Alaghga we kpa u ngu sônon Yehova ma kwagh, kpa ngu a na u kwagh shon ga. Nahan alaghga u kaa wer ngu ungwan msen u mbagenev, kpa mba ou yô ngu ungwan ga. Gayô u ngu henen wer alaghga tsô u er ma kwaghbo, ka nahan a lu ungwan mbamsen ou ga ye. Kape anmgbian u kwase ugen yange hen je la, iti na ér Janice. b Un vea nom na yange sar ve kpishi u za eren tom shin Betel, nahan ve lu eren msen sha kwagh shon. A kaa ér: “Yange m lu a vangertiôr mer a ngôôr yilan se shin Betel ga.” Kpa ve kegh iwer kar zan zan va hingir anyom imôngo, kpa i lu a yila ve ga. Janice kaa ér: “Yange ishima vihim shi m kera fa kwagh u me er ga. M lu henen kwagh u m er ve i doo Yehova a mo ga la. M er msen hen a na sha kwagh u a sarem la jighilii, man er nan ve a ongo msen wam ga?”
3. Ka nyi se lu timen sha mi ken ngeren nee?
3 Ashighe agen yô, alaghga a lu se er Yehova ngu ungwan msen wase ga nahan. Mbajighjigh mba sha ayange a tsuaa la je kpa mbagenev kwagh la yange a za ve iyol. (Yobu 30:20; Ps. 22:2; Hab. 1:2) Ka nyi ia wase u u lun a vangertiôr wer Yehova una ungwa mbamsen ou we? (Ps. 65:2) Kwagh u una wase se u nan ikyaa sha mpin la yô, a gba u se hii timen sha mbampin mban: (1) Ka nyi Yehova una ere? (2) Ka nyi Yehova a soo ér se ere? (3) Alaghga a gba u se hide se sôn kwagh ugen kposo sha ci u nyi?
KA NYI YEHOVA UNA ERE?
4. Yeremia 29:12 kaa ér Yehova tôndo zwa u eren nyi?
4 Yehova tôndo zwa ér una kegh ato a mbamsen asev. (Ôr Yeremia 29:12.) Mba ve civir Aôndo sha mimi la ve doo un ishima, nahan mayange una venda u ungwan mbamsen vev ga. (Ps. 10:17; 37:28) Nahan kpa, ngura tese ér ka hanma kwagh u se sôn un cii, una na se ga. A gba u se kegh zan zan tar u he ua kar van man se zua a akaa agen a se sônon la ye.
5. Ka nyi Yehova ka a ver ishima u nengen a mi shighe u a kegh atô a mbamsen asev laa? Ta iwanger.
5 Yehova ka a nenge aluer akaa a se sônon la zua sha awashima na yô. (Yes. 55:8, 9) A soo ér tar cii u iv a ior mba vea nenge ér un ngu Orhemen ve shi a doo ve u ungwan imo na yô. Kpa Satan kaa ér aluer uumace mba sha tseeneke ve yô, a hemba saan ve iyol. (Gen. 3:1-5) Yehova de ér uumace ve kar u hemen ayol a ve ve nenge er kwagh u Diabolo a kaa la i lu aie yô. Ka hemen u uumace u ve a mbamzeyol mbagenev kpishi mba se tagher a mi nyian la ye. (Orpa. 8:9) Se fa er i lu u Yehova una kar a mbamzeyol asev cii kera hegen ga yô. Sha ci u aluer a bee a ve cii hegen yô, mbagenev vea kaa ér ka hemen u uumace je u er nahan ye. Vea hen ér uumace vea lu sha tseeneke kpa kwagh môm a er ve ga.
6. Gba u se lu a vangertiôr ser Yehova una ungwa mbamsen asev hanma shighe sha gbenda u dedoo man sha mimi sha ci u nyi?
6 Yehova una fatyô u ungwan msen môm sha igbenda kposo kposo. Ikyav i tesen yô, zum u Tor Hesekia gba angev je lu nôngon u kpen la, a sôn Yehova ér a bee un angev mbura. Yehova er kwagh sha msen na la, a bee un angev. (2 Utor 20:1-6) Kpa zum u apostoli Paulu zamber a Yehova ér ‘asaa ma a due ken a na kera’ la, Yehova de Paulu lu a asaa, u a shi nan kpa lu angev la, ken iyol na her. (2 Kor. 12:7-9) Shi hen sha kwagh u mbaapostoli mba uhar mban kpaa, Yakobu man Peteru. Ve cii Tor Herode yange soo u wuan ve. Nahan tiônnongo er msen sha ci u Peteru, shi yange vea er msen sha ci u Yakobu kpaa. Nahan kpa, i wua Yakobu. Peteru yô due ken purusu sha ivande. (Aer. 12:1-11) Alaghga se pine ser, ‘Er nan ve Yehova yange war Peteru, kpa Yakobu yô war un ga?’ Bibilo pase ityôkyaa ga. c Kwagh u se fe yô, igbenda i Yehova cii ‘ngi a ifer mayange ga.’ (Dut. 32:4) Shi se fa ser Yehova yange lumun Peteru kua Yakobu. (Mpa. 21:14) Ashighe agen yô, Yehova una ungwa mbamsen asev er se ver ishima la ga. Kpa er se fe dedoo ser Yehova eren kwagh a vese sha dooshima man sha mimi hanma shighe yô, se mba gbe ahon sha nyityô kwagh i a tsough u eren sha mbamsen asev ga.—Yobu 33:13.
7. Se nôngo se palegh nyi, man ka sha ci u nyi?
7 Se nôngo se palegh u tôôn mlu wase karen sha u mbagenev. Ikyav i tesen yô, alaghga se sôn Yehova ser a wase se sha kwagh ugen, kpa se nenge a kwagh u se sôn la ga. Shighe karen yô, se fa orgen u nan kpa nan sôn imbakwagh la ve Yehova a ongo u msen u nan yô. Kwagh yange er anmgbian u kwase ugen nahan, iti na ér Anna. Yange er msen ér nom na Matthew ma a war angev mbu kyansa mbu lu yan ican a mi la. Anmgbianev mba kasev mbagenev uhar mba been iyol kpa ve lu yan ican a angev mbu kyansa hen shighe shon. Nahan Anna er msen kpoghuloo sha ci u Matthew kua anmgbianev mba kasev mba uhar mbara. Kyansa i anmgbianev mba kasev mbara bee. Kpa Matthew yô, kyansa na wua un. Sha hiihii la, Anna pine ken ishima ér, ‘Yehova wase anmgbianev mba kasev mbara ve, angev vev mbu bee ye shinii? Aluer a wase ve yô, er nan ve yange ungwa msen u m er mer angev mbu nomom mbu bee la ga?’ Jighilii yô, se fatyô u fan kwagh u yange er ve anmgbianev mba kasev mba uhar mbara war angev vev mbura ga. Kwagh u se fe yô, Yehova ngu va karen a hanma inja uange sha tar cii kera, shi sar un u va nderen ior asev mba ve kpe la cii shin ku.—Yobu 14:15.
8. (a) Yesaia 43:2 tese ér Yehova ka a wase se nena? (b) Msen una wase se shighe u se tagher a mbamzeyol la nena? (Nenge vidio i Msen Ka a Wase Se u Wan Ishima a Ican la.)
8 Yehova una wase se hanma shighe cii. Er se doo Ter wase u sha la ishima yô, a soo ér se ya ican ga. (Yes. 63:9) Nahan kpa, ka mbamzeyol cii a yangen ve u tan sha a vese ga. A fatyô u tôôn mbamzeyol asev mbagenev karen sha uifi shin iniomborusu. (Ôr Yesaia 43:2.) Nahan kpa, a tôndo zwa ér una wase se sha er mbamzeyol mbara vea hemba se ga yô. Shi a lu nyityô zayol je se tagher a mi kpa, una wase se sha er se za hemen u lun vea na kôôsôô yô. Yehova shi ka a wase se u wan ishima a mbamzeyol asev sha tahav mbu icighan jijingi na. (Luka 11:13; Fil. 4:13) Sha nahan yô, se fatyô u lun a vangertiôr ser hanma shighe cii yô, una na se kwagh u wasen se sha er se wa ishima shi se za hemen u civir un sha mimi yô. d
KA NYI YEHOVA A SOO ÉR SE ERE?
9. Yakobu 1:6, 7 tese ér hii nan ve i gbe u se na jighjigh ser Yehova una wase se?
9 Yehova soo ér se na un jighjigh. (Heb. 11:6) Ashighe agen yô, alaghga a lu se inja er mbamzeyol asev gande ave nahan. Maa adooga a taver se u nan jighjigh ser Yehova una wase se. Kpa Bibilo kaa a vese ér sha tahav mbu Aôndo yô, se fatyô ‘tsuen aver girgar.’ (Ps. 18:29) Nahan se kera ta akperan ga, kpa se er msen a jighjigh u nan taveraa ser Yehova una ungwa mbamsen asev.—Ôr Yakobu 1:6, 7.
10. Yehova soo ér sea sôn un kwagh yô, se er nena? Tese ikyav.
10 Yehova soo ér sea sôn un kwagh yô, se er kwagh u i gbe u se er ve se zua a kwagh shon la. Ikyav i tesen yô, alaghga anmgbian nana sôn Yehova ér a wase nan sha er nana zua a ian sha tom nana za mkohol u vesen yô. Yehova una ungwa msen la nena? Alaghga una na anmgbian la ishimataver sha er nana cia ga, nana za lam a orvesen u nan sha tom yô. Kpa shi a gba u anmgbian la nana za hen orvesen u nan la nana za sôn ian. Alaghga a gba u nana lam a orvesen u nan la kwa kimbir kimbir. Shi aluer gba sha mi yô, nana kaa ér i tôndo nan inyaregh sha ayange a nan lu yaren tom ga la.
11. Gba u se eren msen sha akaa a a ze se iyol la gbem sha ci u nyi?
11 Yehova soo ér se eren msen hanma shighe sha akaa a a lu se sha ishima la. (1 Tes. 5:17) Yesu yange tese ér ka hanma kwagh u se sôn Yehova cii una na se ave ave je ga. (Luka 11:9) Sha nahan yô, de gbe uwer ga! Eren msen hanma shighe man sha mimi. (Luka 18:1-7) Ka sea eren msen sha kwagh gbem yô, Yehova a nenge ér mimi je sar se u zuan a kwagh u se lu sônon un la. Shi kwagh la ka a tese ér se na jighjigh ser Yehova una fatyô u wasen se.
ASHIGHE AGEN SE DE KWAGH U SE LU SÔNON LA SE SÔN UGEN SHA CI U NYI?
12. (a) Ka mpin u nyi i gbe u se pine iyol yase sha akaa a se sônon ken mbamsen asev laa, man ka sha ci u nyi? (b) Se er nan ve mbamsen asev vea tese ér se mba ne Yehova iciviri? (Nenge ngeren u kiriki u a lu a itinekwagh ér “ Akaa a M Eren Msen sha Mi la Tese Ér M Ne Yehova Icivir Kpa?” la.)
12 Aluer se mba zuan a kwagh u se lu eren msen sha mi la ga yô, alaghga se pine iyol yase mbampin mba utar mban: U hiihii yô, ‘Kwagh u m lu sônon ne nahan ka sha inja je kpa?’ Ka se hen ser se fa kwagh u una hemba wasen se yô. Kpa alaghga akaa a se lu sônon la aa va lu se a inja ken hemen ga. Aluer se mba eren msen sha ma zayol yô, alaghga gbenda ugen u sôron zayol la ua lu, u u hembe doon a gbenda u se lu sônon la yô. Shi alaghga akaa agen a se lu sônon la a lu a sha ishima i Yehova ga. (1 Yoh. 5:14) Ikyav i tesen yô, nenge ikyav i mbamaren mba se vande ôron kwagh ve la. Ve lu sônon Yehova ér a wase wan ve a za hemen u lun ken mimi. Ve hen ér kwagh u ve lu sônon la ka sha inja. Kpa mayange Yehova una kighir mô wase ér nana civir un ga. A soo ér hanma wase, kua mbayev asev kpaa cii, nana tsua a ishima i nan u civir un. (Dut. 10:12, 13; 30:19, 20) Nahan mbamaren mbara yange ma ve lu sônon Yehova ér a wase kwaghwan ve a kôr wan ve ken ishima, sha er una hen u lun vea Yehova kôôsôô shi yan ijende a na yô.—Anz. 22:6; Ef. 6:4.
13. Mbaheberu 4:16 kaa ér ka hanma shighe Yehova una wase se? Ta iwanger.
13 Mpin u sha uhar yô, ‘Shighe kuma u Yehova una nam kwagh u m lu sônon un ne vee?’ Alaghga a lu se er ma se zough a kwagh u se lu eren msen sha mi la ave ave nahan. Nahan kpa, jighilii yô, Yehova fa shighe u i hembe doon u una wase se yô. (Ôr Mbaheberu 4:16.) Aluer se sôn Yehova kwagh man a na se kwagh shon ave ave la ga yô, alaghga se hen ser Yehova kaa ér ‘Kuma nahan, de u zan mo iyol.’ Kpa jighilii yô Yehova una lu kaan ér ‘Shighe ngu a kuma ga, sônon her.’ Ikyav i tesen yô, umbur kwagh u gumor ugen ken tiônnongo, u lu eren msen ér Yehova ma a bee un angev la. Yehova yange una bee un angev mbura sha ivande yô, Satan ma kaa je ér ka er Yehova a bee un angev mbura ve a lu civir Yehova her ye. (Yobu 1:9-11; 2:4) Bee kera yô, Yehova vande veren shighe u una va bee se iangev cii yô. (Yes. 33:24; Mpa. 21:3, 4) Nahan er shighe la a lu a va ga ne, se fatyô u veren ishima ser iangev yasev mbi bee sha ivande ga. Nahan anmgbian la yange ma lu sônon ér Yehova a na un agee kua mmem ken ishima, sha er una wa ishima a angev nav shi una za hemen u civir un sha mimi yô.—Ps. 29:11.
14. Ka nyi u hen ken kwagh u yange er Janice laa?
14 Hen sha kwagh u Janice, u yange lu eren msen ér ma un za er tom shin Betel la. Yange anyom kar atar cii ve mase kaven gbenda u Yehova ungwa msen na la ye. A kaa ér: “Ken anyom la cii, Yehova tesem akaa kpishi shi wasem u lun Orkristu u injaa. Yange gba u me seer nan un jighjigh. Shi gba u me hen u timen ken Bibilo vighe vighe. Shi gba u me fa mer hanma ijiir i m lu civir Yehova cii yô, a saan mo iyol.” Shighe karen yô, i kaa ér Janice vea nom na ve za er tom u sôron atôônanongo. Janice ka una umbur akaa a yange er un ne yô, a kaa ér: “Yehova yange ungwa mbamsen av, shin er lu sha gbenda u m lu veren ishima la ga nahan kpaa. Yange shighe kar cii ve m va mase kaven mer Yehova ungwa mbamsen av sha gbenda u dedoo ye. Kpa m wuese kpishi er kwagh ne a wasem u nengen mer m doo Yehova ishima yô.”
Aluer u nenge wer Yehova ungwa mbamsen ou sha ma gbenda ga yô, tsua akaa agen a u sôn un yô, er msen sha mi (Nenge ikyumhiange i sha 15) f
15. Ashighe agen a gba u se hemba veren ishima u sônon kwagh môm tseegh ga sha ci u nyi? (Shi nenge ufoto kpaa.)
15 Mpin u sha utar yô, ‘Doo u ma m lu eren msen sha kwagh ugene?’ Er i doo u se eren msen sha akaa a a lu se ken ishima la jighilii nahan kpa, aluer se mba eren msen ashighe agen kpa se hemba veren ishima sha kwagh môm tseegh ga yô, se hemba kaven kwagh u Yehova a soo ér se er la. Nenge ase ikyav sha kwagh u anmgbian u kwase ugen u lun kwav, u yange lu eren msen ér ma u ze Makeranta u Mbapasen Ivangeli i Tartor la. Yange soo ér una za makeranta sha er una fatyô u za eren tom hen ape kwagh a hembe gban sha mbapasenkwagh yô. Nahan shighe u lu eren msen ér ma i lehe un makeranta la, yange shi ma sôn Yehova ér a wase un una fa igbenda igen i seer eren un tom. (Aer. 16:9, 10) Maa ma pine ortamen u sôron atôônanongo sha u una fa aluer kwagh gba sha upania hen tiônnongo ugen u a lu ikyua yô. Gayô yange ma nger ma pine shin afishi a branci ape kwagh a gbe sha mbapasen kwagh u Tartor kpishi yô. e
16. Se fatyô u lun a vangertiôr ser nyi?
16 Er se hen ken ngeren ne nahan, se fatyô u lun a vangertiôr ser Yehova una ungwa mbamsen asev sha gbenda u dedoo man u tesen ér se doo un ishima. (Ps. 4:3; Yes. 30:18) Ashighe agen se er msen sha kwagh kpa se nenge a kwagh u se ver ishima la ga. Kpa mayange Yehova una venda u ungwan mbamsen asev ga. Se doo un ishima kpishi. Nahan una kende se mayange ga. (Ps. 9:10) Sha nahan yô, za hemen u “suur . . . sha a na hanma shighe,” eren msen hen a na, shi pasen un er i lu u ken ishima la jighilii.—Ps. 62:8.
ICAM 43 Msen u Ishughun
a Ngeren ne una pase er i hii ve se fatyô u lun a vangertiôr ser Yehova una ungwa mbamsen asev hanma shighe sha gbenda u dedoo man sha mimi yô.
b I yila mbagenev ken ngeren ne sha ati a ve kpôô kpôô ga.
c Nenge ngeren u a lu a itinekwagh ér “U Na Jighjigh a Gbenda u Yehova A Eren Akaa la Kpa?” la, ken Iyoukura i Febewari 2022, ikyumhiange i sha 3-6.
d Wea soo u seer fan er Yehova a wasen se u wan ishima a mbamzeyol asev yô, nenge vidio i Msen Ka a Wase Se u Wan Ishima a Ican la, sha jw.org/tiv.
e Wea soo u nengen akaawan a tesen er u fatyô u za eren tom hen haregh u branci ugen yô, nenge takeda u Organized to Do Jehovah’s Will la, ityough 10, ikyumhiange i sha 6-9.
f NGEREN U PASEN FOTO: Anmgbianev mba kasev uhar mba eren msen vea wa uwegh shin foom u zan Makeranta u Mbapasen Ivangeli i Tartor. Shighe karen yô, i lôhô u môm la, kpa ugen la yô i lôhô un ga. U i lôhô un ga la de ér iyol i kpe un ga, kpa ngu eren msen hen Yehova ér a wase un una fa igbenda igen i seer eren un tom. Maa ngu ngeren washika hen afishi a branci, ér una za er tom hen ape kwagh a hembe gban sha mbapasenkwagh yô.
