Ka sea henen Bibilo yô, se soo ser akaa a se hen sha kwagh u Yehova la a bende a ishima yase shin or wase u ken atô la. Esera ver se ikyav i dedoo sha gbaa ne. Yange “ver ishima na u timen sha atindi a TER.” (Esera 7:10) Se dondo ikyav na la nena?

Er msen. Cii ve u hii u henen kwagh yô, er msen. Sôn Yehova a wase u u kav kwagh u u lu henen la man er u dondo un yô.—Ps. 119:18, 34.

Hiden a iyol ijime. Aôndo ka a yer mimi na hen mba ve we ihyagh shin ve nengen ér ve fa kwagh la. (Luka 10:21) Awashima wase u henen kwagh i de lu u va tesen mbagenev ser se fa kwagh ga. Aluer se hen kwagh man se nenge ser gba u se nyôôso akaa agen kpa, se hide a iyol yase ijime se er nahan.

Wa ma icam ken atsam a ase a Tartor la. Atsam aa fatyô u benden a mlu wase u ken ishima la. Nahan aluer u wa icam i Tartor cii ve u hii kwaghhenen yô, kwagh la una fatyô u wasen we u hemban veren ishima sha kwagh u Yehova nahan kwagh u u hen la una hemba benden a we cii.