1. Yesu yange kaa ér nyi sha kwagh u akaainjaa a sha?

KA AKAA a injaa cii se nengen a mi sha ashe ga. Jighilii je yô, akaa a a hembe lun a injaa cii la se mba nengen a mi ga. Yesu yange ôr kwagh u akaa a injaa a sha a a hembe akaa a iyolough ica je yô, ken Ityesen i sha Uwo la. Yesu shi kaa ér: “Ape kwagh u injaa wou a lu la, ka her ishima you kpa ia lu ye.” (Mat. 6:19-21) Ka sea nenge ma kwagh ser ngu se kwagh u injaa yô, ishima i mgbegha se se nôngo sha afatyô wase cii ser ma se zough a mi. Ka se “koso akaainjaa sha,” sha u lun a iti i dedoo vea Aôndo. Yesu kaa ér akaainjaa a ngara nahan mayange aa fatyô u saan ishe ga shin or a ii ga.

2. (a) Paulu yange taver se ishima er i pase ken 2 Mbakorinte 4:17, 18 la ér se ver ishima sha nyi? (b) Ka nyi se lu timen sha mi ken ngeren nee?

² Apostoli Paulu yange taver se ishima ér se “veren ashe a ase . . . sha akaa a i nengen a mi ga la.” (Ôr 2 Mbakorinte 4:17, 18.) Akaainjaa a se nengen a mi sha ashe ga ne kua averen a se va zua a mi ken tar u he u Aôndo la kpaa. Se lu henen kwagh u akaainjaa anyiin a se nengen a mi ga a se fatyô u zuan a mtsera ker hegen la ken ngeren ne. Akaa shon yô, ka u yan ijende vea Aôndo man iyua i msen man iwasen i icighan jijingi a ne se la, kua iwasen i Yehova man Yesu kua mbatyomov ve ne se ken tom wase la. Shi se hen se fa er se tese Yehova ser se mba a iwuese sha akaainjaa a se nengen a mi ga ne yô.

3. Ka nyi i lu kwagh u injaa u hemban cii u se nengen a mi ga, man ka nyi i ne ve se fetyô u lun a kwagh shono?

³ Kwagh u injaa u hemban cii u se nengen a mi sha ashe ga yô, ka u yan ijende vea Yehova Aôndo. (Ps. 25:14) A er nan ve Aôndo una ya ikyar a uumace mbaasorabo kpa shi una lu icighan here? Una fatyô u eren kwagh ne sha ci u nagh ku ipaan ku Yesu kura ‘tôô asorabo a tar’ u uumace ne kera. (Yoh. 1:29) Cii ve Yesu a kpe yô, Yehova yange vande fan ér Yesu una tile sha mimi zan zan una kar kpen sha er una yima uumace yô. Ka nahan ve Aôndo fatyô u yan ijende a uumace mba ve lu uma cii ve Kristu va kpe la ye.—Rom. 3:25.

4. Tese akav a ior mba yange ve lu uma cii man shighe u Yesu la mba ve lu azende a Aôndo yô.

⁴ Nenge ase kwagh u nomso mbagen mba ngise ve lu uma cii man shighe u Yesu, mba yange ve lu azende a Aôndo yô. Aberaham yange lu a jighjigh u nan taveraa. Aberaham yange va kpe anyom kar hemba 1,000 kpa Yehova yila un ér “huror Wam.” (Yes. 41:8) Nahan ku je kpa ua fatyô u paven Yehova a azende a na ga. Yehova hungur a Aberaham ga. (Luka 20:37, 38) Orgen yô, lu Yobu. Yehova yange ôr kwagh u Yobu vangertiôr sha ishigh ki mbatyomov. Yehova yila un ér “or u mimi, u perapera, u cian Aôndo, palegh kwaghbo.” (Yobu 1:6-8) Daniel yange civir Aôndo sha mimi ken tar u ior civir akombo ker yô, nôngo u kuman anyom 80. Yange lu Yehova ken ishima a Daniel nena? Yange mbatyomov kaa a orbeenyol ne acin imôngo ér a ‘doo Aôndo ishima.’ (Dan. 10:11, 19) Se fatyô u lun a vangertiôr ser Yehova ngu veren ashe tsung keghen iyange i una nder azende a na a doon un ishima ne shin ku yô.—Yobu 14:15.

5. Ka nyi ka i gba u or a er ve nana ya ijende a Yehova kôôsôô?

⁵ Ka uumace mbaasorabo ume ve lu azende a Yehova a kôôsôô sha ayange nee? Ior umiliôn imôngo nyian mba azende a Yehova a kôôsôô. Se fa nahan sha ci u nomso man kasev man mbayev kpishi sha tar cii mba tesen sha ieren ve ér ve soo u lun azende a Yehova. Yehova ngu ken ‘mzough a mbaperapera.’ (Anz. 3:32) A ya ijende a ve sha ci u jighjigh u ve ne nagh ku ipaan ku Yesu la. Nagh kura na yô, Yehova ngu a de se tsegha ayol a ase sha ci na shi se er batisema. Ka sea eren kwagh u injaa ne yô, se kpa se kohol Mbakristu umiliôn imôngo mba ve tsegh ayol a ve, ve er batisema, ve lu ken ‘mzough’ vea Or u a Hembe sha won cii la!

6. Se tese ser ijende i se ye a Aôndo la i gba se kwagh nena?

⁶ Se tese ser ijende i se ye vea Aôndo la i gba se kwagh nena? Aluer se civir Yehova ken tse tar ne shighe lihe kpa, gba u se za hemen u lun ior mbajighjigh er Aberaham man Yobu nahan. Yange ve civir Yehova sha mimi anyom uderi imôngo. Shi gba u ijende i se ye vea Yehova la ia gba se kwagh je a hemba uma wase, vough er Daniel nahan. (Dan. 6:7, 10, 16, 22) Sha iwasen i Yehova yô, se fatyô u wan ishima a nyityô kwagh i karen jighjigh wase i se tagher a mi cii shi se za hemen u lun a na kôôsôô.—Fil. 4:13.

7. (a) Sha kwagh u Anzaakaa 15:8 a er yô, Yehova nengen mbamsen asev nena? (b) Yehova ongo mbamsen asev nena?

⁷ Kwagh u injaa ugen u se nengen a mi ga yô ka msen. Ka i maa azende a kôôsôô iyol u lamen, pasen ayol a ve mbamnenge vev kua er i lu ve ken ishima la kpen kpen. Ijende i se ye vea Yehova la kpa kape i lu laa? Een! Yehova lamen a vese ken Mkaanem nam, ka ker a pase se mbamhen nav kua mnenge na sha akaa ye. Se di ka se lam a na ken msen, se pase un akaa ase a ken myer kua er ishima i lu se ker la cii. Yehova ngu a soo u keghen ato a mbamsen asev  kpen kpen. (Ôr Anzaakaa 15:8.) Er Yehova a lu ijende yase shi se doo un ishima yô, ngu a kegh ato a mbamsen asev tseegh tsô ga, kpa ka a er kwagh sha mi. Ashighe agen ngu a er kwagh sha mi fese. Ashighe agen yô, a gba u se er msen sha kwagh shon kwa imôngo. Kpa se fatyô u lun a vangertiôr ser una er kwagh sha mi sha shighe vough man sha gbenda u hemban doon cii. Alaghga kwagh u a tsough ér una er la una lu kposo a kwagh u se lu veren ishima a mi la. Ikyav i tesen yô, alaghga una kar a ma imeen i se lu tagher a mi la kera ga, kpa una gema a na se kwaghfan man agee a “wan ishima a i.”—1 Kor. 10:13.

8. Se tese ser iyua i msen la i gba se kwagh nena?

⁸ Se tese ser se mba a iwuese sha iyua i doon tsung i msen ne nena? Gbenda môm yô, ka sha u dondon kwaghwan u a kaa ér: “Eren nen msen gbem” la. (1 Tes. 5:17) Yehova kighir se ér se er msen ga. Kpa a na se ian i eren kwagh sha ishima yase, shi a kaa a vese ér se ‘taver ishima sha msen u eren.’ (Rom. 12:12) Nahan se fatyô u tesen ser se wuese iyua ne sha u eren msen hanma shighe cii. Shi se hungur u sughun Yehova shi wuese un ken mbamsen asev ga cii.—Ps. 145:2, 3.

9. Anmgbian ugen nenge msen u eren nena, man we ka u nenge msen nena?

⁹ Aluer se civir Yehova anyom kpishi shi se nenge er a lu eren kwagh sha akaa a se sôn un ken msen la yô, gba u iwuese i se lu a mi sha iyua ne la ia lu seer a seer. Nenge ase ikyav i anmgbian u nomso ugen u a er tom u pasen kwagh hanma shighe i kom anyom 47 la, iti na ér Chris. A kaa ér: “Ka i doom u nderen faa lamen a Yehova ken msen shighe gôgônan. Ka mea lamen a Yehova pepe zum u iyange ka i duen a due shi hanma kwagh a doo u kenger la nahan, i kundum iyol kpen kpen! Kwagh ne ka a mgbegham u sughun un sha uiyua mba a ne se la cii, kua iyua i eren msen ne kpaa. Shi ka mea va eren msen aikighe yô, m za mase yaven a imoshima i wang.”

10. Gba u icighan jijingi u Aôndo una gba se kwagh tsung sha ci u nyi?

¹⁰ Iyua igen i se nengen a mi sha ashe ga i i doo u ia gba se kwagh tsung yô, ka icighan jijingi.  Yesu yange taver se ishima ér se de gbe uwer u eren msen sônon icighan jijingi ga. (Luka 11:9, 13) Yehova ne se agee sha ikyev i jijingi na, kua “agee a a gande a orumace” la kpaa. (2 Kor. 4:7; Aer. 1:8) Sha iwasen i icighan jijingi u Aôndo yô, se fatyô u wan ishima a nyityôkwagh i se tagher a mi i karen jighjigh wase cii.

11. Icighan jijingi una fatyô u wasen se sha nyi gbenda?

¹¹ Icighan jijingi una fatyô u wasen se u eren ityom i i ne se ken mcivir u Aôndo yô. Icighan jijingi u Aôndo ngu a wase se u seer lun a u mfe man mkav. Ngu a wase se u eren ityom yase i Mbakristu. Sha mimi yô, zum u kwagh u dedoo a dugh ken iniôngon yase yô, doo u se umbur ser ka sha iwasen i icighan jijingi u Aôndo se kercio u eren kwagh u se er ken mcivir na la ye.

12. Er Pasalmi 139:23, 24 a tese nahan, ka nyi se fatyô u sônon ser icighan jijingi a wase se u erene?

¹² Gbenda ugen u shi se fatyô u tesen ser icighan jijingi u Aôndo gba se kwagh tsung yô, ka sha u sônon ser ma a wase se u fan mbamhen mba bov man asaren a bo a a lu se ken ishima yô. (Ôr Pasalmi 139:23, 24.) Aluer se er msen se sôn imbakwagh la yô, Yehova una wase se sha ikyev i icighan jijingi na, se kav mhen shin isharen i bo i i lu se ken vanger la. Shi zum u se kav ma mhen shin isharen i bo ken a vese yô, gba u se er msen ser icighan jijingi u Aôndo a na se agee shin tahav mbu hendan a mhen shin isharen shon. Aluer se er nahan yô, se lu tesen ser se kange ishima ser se palegh u eren nyityôkwagh i ia na Yehova una de u wasen se sha ikyev i icighan jijingi cii.—Ef. 4:30.

13. Se seer lun a iwuese sha iyua i icighan jijingi la nena?

¹³ Se fatyô u seer lun a iwuese sha iyua i icighan jijingi la sha u gbidyen kwar sha akaa a icighan jijingi shon a lu eren sha ayange a ase ne la. Cii man Yesu a kôndo a yem sha yô, yange kaa a mbahenen nav ér: “Ne va ngohol tahav zum u icighan jijingi una sen sha a ven yô, nahan ne lu mba eren shiada sha kwagh wam ken Yerusalem man ken Yudia kua ken Samaria cii, man ken ajiir a hemban gban ica sha tar.” (Aer. 1:8) Mkaanem man ma kuren sha mi nyian sha gbenda u kpilighyol. Sha iwasen i icighan jijingi yô, i kohol iorov mba kuman  miliôn anigheni man tiôn nahan sha tar cii mba civir Yehova. Heela tseegh ga, se mbacivir Yehova se mba ken mzough u anmgbianev sha tar cii bem bem, sha ci u icighan jijingi u Aôndo ngu wasen se u lun a aeren a dedoo er dooshima man iember man bem man ishimawan man erdoo man ieren i dedoo man jighjigh u nan, man ishima i legh legh man iyolkôrontsaha nahan. Ka aeren ne cii a kohol a lu “ityamegh ki jijingi” ye. (Gal. 5:22, 23) Sha mimi yô, icighan jijingi ka iyua i doon tsung!

14. Ka iwasen i se nengen a mi ga i nyi ka sea pasen kwagh ve se zua a mini?

¹⁴ Se mba a iyua igen i se nengen a mi ga yô; iyua shon yô ka u “eren tom vea” Yehova man Yesu kua mbatyomov. (2 Kor. 6:1) Ka se er kwagh ne hanma shighe u se lu eren tom u geman ior hingir mbahenen la yô. Paulu ôr kwagh na iyol na kua kwagh u ior mba ve eren tom ne cii ér: “Se mba mbaeren tom a Aôndo imôngo.” (1 Kor. 3:9) Ka sea eren tom ne yô, se lu mba eren tom imôngo a Yesu kpaa. Umbur wer, yange kaan a mbadondon un ér ve ‘gema ior mba ken akuraior cii ve hingir mbahenen’ yô, shi a kaa a ve ér: “Me luun a ven.” (Mat. 28:19, 20) Kpa hide mbatyomov di ye? Doo se kpishi er mbatyomov ka ve lu a vese zum u se lu pasen “loho u dedoo u tsôron, . . . hen mba ve tem sha tar” la yô!—Mpa. 14:6.

15. Ôr kwagh u ken Bibilo u a tese tom u Yehova a eren ken tom wase u pasen kwagh la yô.

¹⁵ Iwasen i Yehova man Yesu kua mbatyomov ve ne se la wase se u eren nyi? Ka sea taan ivor i Tartor yô, igen i haa sha asema a dedoo nahan i vese. (Mat. 13:18, 23) Ka an ka nan na ivor i mimi la i vese shi i ume atama? Yesu yange pase ér or môm nana fatyô u hingir ordondon un ga, saa ‘Ter una urugh nan.’ (Yoh. 6:44) Bibilo ôr er imbakwagh ne yange i er yô. Umbur kwagh u za hemen zum u Paulu za pase kasev mbagen kwagh ken won u gar u Filipi yô. Bibilo ôr kwagh u kwase ugen ken atô ve la u i yilan un ér Lidia yô. I kaa ér: “Yehova bugh un ishima wang sha u a ver ishima sha akaa a Paulu lu ôron la.” (Aer. 16:13-15) Kape Yehova a urugh ior umiliôn imôngo, a ve a ve hen a na er Lidia nahan je la.

16. Ka an i gbe u se na nan iwuese sha akaa a dedoo a a dugh ken kwaghpasen wase?

¹⁶ Ka an jim i gbe u se wuese nan sha nyityôkwagh i se kercio u eren ken tom wase? Paulu yange na ikyar sha mpin la ken kwagh u nger hen tiônnongo u ken Korinte la. A kaa ér: “Yange m lôô, Apolo gema ur, kpa ka Aôndo a lu nan mvese ye, sha er or u lôôn la shin or u urun la nana ya icivir ga, kpa a lu Aôndo u ka a na mvese la tseegh yô.” (1 Kor. 3:6, 7) Ka Yehova i gbe u se wuese un sha hanma kwagh u dedoo u a dugh ken tom u pasen kwagh wase ye, vough er Paulu kpa yange er nahan.

17. Se tese iwuese sha ian i “eren tom vea” Aôndo man Kristu kua mbatyomov la nena?

¹⁷ Se tese iwuese sha ian icivirigh i se lu a mi u “eren tom vea” Aôndo man Kristu kua mbatyomov la nena? Se er kwagh ne sha u nôngon kpoghuloo keren aan a pasen ior mbagen loho u dedoo. Igbenda ngi kpishi i se er kwagh ne yô, er u pasen kwagh “ken igbar man sha uya uya” nahan. (Aer. 20:20) Mbagen yô shi ka i doo ve u pasen kwagh shighe u ian i dugh yô. Ka vea zua a or u ve fe nan ga yô, ve sugh nan sar sar maa ve hii iliam a nan. Or la kpa nana nguren lamen a ve yô, maa ve goom a iliam la sha kwaghfan ve ôr nan loho u dedoo u Tartor.

18-19. (a) Ka se ur ivor i mimi nena? (b) Ôr er Yehova yange wase orgen u lu henen Bibilo yô.

¹⁸ Er se lu “mbaeren tom a Aôndo imôngo” yô, gba u se lôôn ivor i mimi tseegh ga, gba u se urun i kpaa. Aluer sar or u seer fan kwagh u  Bibilo i tese yô, doo u se nôngo sha afatyô wase se hide se za sôr nan, gayô se ker gbenda orgen nana za sôr nan, nana hii u henen Bibilo a nan. Ka sea nenge er Yehova a lu wasen orhenen Bibilo la u geman mhen kua mnenge u nan nahan, i saan se iyol kpen kpen.

¹⁹ Nenge ase kwagh u orgen ken tar u South Africa u a sôron twer ityôô yô. Mba yer iti na ér Raphalalani. Yange gbe henen Bibilo yô, kwagh u hen la doo un tsung. Kpa va fe kwagh u Mkaanem ma Aôndo ma er sha kwagh u lamen a uter mba ve kpe la yô, taver un u lumun kwagh la kpishi. (Dut. 18:10-12) Nahan kpa a de ér Aôndo a wase un u geman mhen na. Shighe kar yô, Raphalalani de twersôron na la, shin er lu gbenda u zuan a ime-mnger la nahan kpaa. Hegen u Raphalalani a lu anyom 60 ne, a kaa ér: “M sugh Mbashiada mba Yehova kpishi er ve wasem sha igbenda kposo kposo yô, er u wasen mo zuan a tom nahan. U hemban cii yô, m wuese Yehova er a wasem u sôron uma wam yô, hegen m er batisema m hingir Orshiada, nahan ka m due kwaghpasen.”

20. U kange ishima wer u er nyi?

²⁰ Se time sha akaainjaa anyiin a se nengen a mi ga yô, ken ngeren ne. U hemban ken a cii yô, ka ian icivirigh i se lu a mi i yan ijende kôôsôô a Yehova la. Ijende i se ye vea Yehova la wase se u zuan a mtsera ken akaainjaa agen a se nengen a mi ga yô, er ian i icivirigh i se lu a mi i eren msen la kua iwasen i icighan jijingi a ne se man er Yehova man Yesu kua mbatyomov ve lu suen se ken tom wase u pasen kwagh la nahan. Yô, se kange nen ishima u seer wuese akaainjaa a se nengen a mi ga ne. Shi se za nen hemen u sughun Yehova hanma shighe cii er a lu Ijende i hemban sha won cii nahan yô!