1. Ka nyi ka i na ve i saan se iyol kpishi?

 YEHOVA soo ér i saan se iyol. Se fa, msaanyol shin iember ka vegher u ityamegh ki icighan jijingi. (Gal. 5:22) Er or u nan ne kwagh la ka i hemba saan nan iyol a or u nan ngohol la yô, ka i saan se iyol kpishi shighe u se lu eren tom wase u pasen kwagh la kpoghuloo, shi wasen anmgbianev asev sha igbenda kposo kposo yô.—Aer. 20:35.

2-3. (a) Mbagalatia 6:4 tese ér ka akaa a ahar a nyi aa wase se ve a za hemen u saan se iyol u civir Yehova? (b) Ka nyi se lu timen sha mi ken ngeren nee?

² Apostoli Paulu ter akaa ahar a aa wase se ve a za hemen u saan se iyol yô, er i nger ken Mbagalatia 6:4 nahan. (Ôr.) Kwagh u hiihii yô, awashima wase i lu u civir Yehova sha afatyô wase cii. Aluer se mba civir Yehova sha afatyô wase cii yô, ka keng a saan se iyol. (Mateu 22:36-38) Sha uhar yô, a gba u se palegh u tôôn iyol yase karen sha mbagenev. Sea lu a gbong gbong iyol shin sea lu a mi ga, shin a tsaase se u eren ma kwagh shin a tsaase se ga, shin sea lu a mfe u eren akaa nan nan shin sea lu a mi ga kpa, kwagh u se fetyô u eren la cii yô, a gba u se wuese Yehova. Sha ci u hanma kwagh u se lu a mi yô, ka Yehova a ne se ye. Shi kwagh ugen yô, aluer mbagenev hemba fan igbenda igen i eren tom u pasen kwagh la a vese kpa, a gba u se ember, er ve lu eren kwagh a mfe ve la sha u wuese Yehova, i lu sha u keren icivir ve shin mtsera ve ga yô. Se gba gesa a ve ga, kpa se hen a hen kwagh ken a ve.

³ Ken ngeren ne, se lu timen sha kwagh u una wase se ve, shighe u se nenge ser se mba fantyô u eren akaa sha ci u Yehova er i sar se la ga kpa, a za hemen u saan se iyol yô. Shi se nenge er se fatyô u eren kwagh a nyityô iyua i Yehova a ne se cii sha gbenda u hemban doon, shi se time sha akaa a se fatyô u henen ken ikyav i mbagenev yô.

4. Ka nyi ia na iyol ia kpe se mbageneve? Tese ikyav.

⁴ Mbacivir Yehova mbagenev ka vea bee iyol shin vea hingir kor kor kpa, i taver ve kpishi u nengen ér gbong gbong ve pande. Kape kwagh u anmgbian u kwase ugen u i yer un ér Carol kpa yange lu je la. Yange zua a ian i icivirigh i za eren tom hen ape kwagh hemba gban sha mbapasenkwagh yô. Hen shighe la hen Bibilo a iorov 35, shi wase mbagenev kpishi ken a ve vese, tsegha ayol a ve sha ci u Yehova shi ve er batisema. Carol yange zua a iveren kpishi ken tom na u pasen kwagh la. Maa va gba angev hingir kor kor, nahan hemban lun hen ya. A kaa ér: “M fa ka angev av mbun mbu ne ve m kera fetyô u eren kwagh er mbagenev nahan ga ye. Nahan kpa m nenge mer m ngu civir Yehova sha mimi er ve nahan ga. Er m kera fetyô u eren akaa a i sarem u eren sha ci u Yehova la cii ga yô, kwagh la ka a na iyol i kpem kpishi.” Carol soo ér ma un eren akaa a a sar un u eren sha ci u Yehova la cii. Sha kpôô yô, a kuma iwuese. Se na jighjigh ser doo Aôndo wase u a zungwen mhôônom la a na, er a lu civir un sha afatyô na cii yô.

5. (a) Aluer shighe ugen iyol ka i kpe se sha ci u akaa a se kera fetyô u eren sha ci u Yehova ga la yô, ka nyi i doo u se umburu? (b) Ufoto mban tese ér ma shighe môm kpa anmgbian la de u civir Yehova sha afatyô na cii ga nena?

⁵ Aluer shighe ugen iyol ka i kpe u sha ci u akaa a u kera fetyô u eren sha ci u Yehova ga la yô, pine iyol you wer, ‘Ka nyi Yehova a soo ér m ere?’ Yehova soo ér we u civir un sha afatyô wou cii ken mlu wou la. Hen ase sha kwagh ne. Iyol kpe anmgbian u kwase ugen u a hembe anyom 80 yô, sha ci u a nenge ér un kera ngu fantyô u eren tom u pasen kwagh la kpishi er yange un eren shighe u un lu anyom 40 kar la ga. A hen ér shin er un lu nôngon sha afatyô na cii nahan kpa, doo Yehova a na ga. Kpa mimi je, kape i lu laa? Hen ase. Aluer anmgbian u kwase ne lu civir Yehova sha afatyô na cii shighe u lu anyom 40 kar la, shi hegen u a hembe anyom 80 ne kpa ngu nôngon sha afatyô na cii yô, tese ér ma shighe môm kpa a de u civir Yehova sha afatyô na cii ga. Shighe u se va hii u henen ser akaa a se fetyô u eren sha tahav asev cii la kuma u Yehova una wuese ga yô, doo u se umbur ser ka Yehova iyol na ka a nenge ér akaa a se fetyô u eren sha ci na la kuma u una wuese shin una wuese ga ye. Aluer Yehova nenge u ngu civir un sha afatyô wou cii yô, una wuese we, una kaa ér: “U er doo!”—Nenge Mateu 25:20-23.

6. Ka nyi se fatyô u henen ken ikyav i Maria laa?

⁶ Aluer se mba hemban veren ishima sha akaa a se fetyô u eren la, ka sha akaa a agee a ase a yen u eren la ga yô, a saan se iyol. Hen ase sha kwagh u anmgbian u kwase ugen, iti na ér Maria. Yange lu yan ican a angev, nahan kera lu fantyô u eren tom u pasen kwagh la kpishi ga. Sha hiihii la ishima za un iyol, je yô lu nengen ér un kera ngu Yehova a iwasen ga. Kpa va hide hen sha kwagh u anmgbian u kwase ugen hen tiônnongo na, u yange yaven a yav inya tseegh yô. Maria maa tsua ér una wase un. A kaa ér: “Yange m ver shighe vea na mer se duen kwaghpasen imôngo, se lamen a ior sha hanseeti shi se ngeren ve uwashika. Hanma shighe u m due kwaghpasen vea na cii, yange mea hide yô, i saan mo iyol kpishi, sha ci u m fa je mer m er kwagh u wasen anmgbian wam u kwase.” Se kpa aluer se hemba veren ishima sha akaa a agee a ase a kom u eren la, ka sha akaa a agee a ase a yen u eren la ga yô, a hemba saan se iyol cii. Kpa aluer ka u se fatyô u seer eren kwagh ugen, shin ma kwagh ngu u se fatyô u eren tsembelee sha ci u Yehova di ye?

7. Apostoli Peteru yange wa Mbakristu kwagh ér nyi?

⁷ Ken washika u hiihii u apostoli Peteru nger la, yange taver anmgbianev nav ishima ér, hanma iyua i ve lu a mi cii yô, ve eren tom a mi sha u taver mbananjighjigh mbagenev asema. Peteru nger ér: “Hanma or nana̱ eren tom u wasen  hanma wen a iyua i i ne nan yô, er iyua shon i lu la cii, sha ci u ne mba mba̱ nengen sha ya mba̱ fan kwagh. Gadia i tese ne erdoo u sha mhôôn u Aôndo.” (1 Pet. 4:10) Gba u se eren tom a iyua i se lu a mi la er se fetyô la cii, se cia ser aluer se mba eren nahan yô, mbagenev vea gba se iyuhe shin iyol ia kpe ve ga. Aluer se mba eren tom a uiyua asev ga sha ci u atôakyaa la yô, se mba civir Yehova sha afatyô wase cii ga.

8. 1 Mbakorinte 4:6, 7 tese ér gba u se palegh u kaan ihyagh a uiyua mba se lu a mi la sha ci u nyi?

⁸ Gba u se eren tom a uiyua mba se lu a mi la er se fatyô la cii, kpa gema gba u se wa ikyo sha er se kaan ihyagh a mi ga yô. (Ôr 1 Mbakorinte 4:6, 7.) Ikyav i tesen yô, alaghga ka taver we u hiin Bibilo i henen a ior ga. De cian u eren tom a iyua la ga. Kpa gema umbur wer gba hange hange u u palegh u kaan ihyagh a iyua la. De se tese ikyav. U due kwaghpasen u sha uya uya, maa kwagh za er u u doon we kpishi; u za zua a or u nan lu a isharen yô, maa u hii u henen Bibilo a nan. Girim we iyol u ôron mba ken annongo wou mba u due kwaghpasen vea ve la kpishi. Ne mba za hiden ne mba va kohol imôngo yô, anmgbian u kwase ugen ngu ôron er un ne or magazin yô. A na or magazin; we u hii u henen Bibilo a or. Nahan u er nena hen shighe ne? U fa je wer kwagh u doon u a er u la una taver mba ken annongo wou la ishima kpishi. Kpa u gema u soo wer u kegh, kwagen tsô u ôr kwagh a mi, sha er anmgbian u kwase u a ne or magazin la una nenge ér we u fa u pasen kwagh hemba un ga yô. Aluer u er nahan yô, a doo kpen kpen. Kpa mayange de deen u hiin Bibilo i henen a ior ga. U ngu a iyua la, nahan er tom a mi!

9. Gba u se eren tom a uiyua asev nena?

⁹ Gba u se umbur ser hanma iyua i se lu a mi cii, ka Aôndo a ne se ye. Nahan gba u se eren tom a uiyua asev mbara sha u taver hanma or ken tiônnongo ishima, i de lu sha u tesen ser se hemba fan u eren ma kwagh ga. (Fil. 2:3) Aluer se mba eren tom a agee a ase kua mfe wase sha u eren ishima i Aôndo yô, se ember sha kwagh la, kpa a lu sha ci u se hemba fan u eren akaa a mbagenev shin sha ci u se mba tesen ser se hemba ve ga, kpa a lu sha ci u se mba eren tom a uiyua asev mbara sha u eren akaa a van Yehova a icivir.

10. Doo u se tôô iyol yase se kar sha mbagenev ga sha ci u nyi?

¹⁰ Aluer or wa ikyo ga yô, nana hii u tôôn mfe u nan lu a mi u eren ma kwagh tsembelee la karen sha mfe u orgen u nan fe kwagh shon tsembelee ga yô. Ikyav i tesen yô, alaghga anmgbian ugen nan fa u nan kwaghôron u ken igbar tsembelee. Ka kwagh u nan fe u eren tsembelee je la. Kpa ken ishima i nan yô, nana lu henen ér nan hemba anmgbian ugen u a fe u nan kwaghôron tsembelee ga la. Kpa alaghga anmgbian la nan  gema nan fa u ngohol ior shi tesen ônov mba nan tsembelee, shi nan fa u eren tom u pasen kwagh la tsembelee. Se wuese Yehova er se lu a anmgbianev mba nomso man mba kasev kpishi mba ve lu a uiyua, shi ve lu eren tom a uiyua vev mbara sha u civir un shi wasen mbagenev yô!

11. Gba u se nôngo sha afatyô wase cii se dondo ikyav i Yesu sha ci u nyi?

¹¹ Shin er i doo u se tôôn iyol yase se karen sha mbagenev ga nahan kpa, se fatyô u henen akaa a injaa kpishi ken mbacivir Yehova mbagenev. Or u i hemba doon u se hen kwagh ken ikyav i nan yô, ka Yesu. Shin er Yesu lu a mshi môm môm ken a na ga nahan kpa, se fatyô u henen kwagh ken aeren a na a a doo yum la, kua gbenda u yange eren akaa la. (1 Pet. 2:21) Aluer se mba nôngon sha afatyô wase cii dondon ikyav na la er se fetyô la cii yô, se hemba civir Yehova sha mimi, shi se hemba fan u eren tom wase u pasen kwagh la tsembelee.

12-13. Ka nyi se fatyô u henen ken ieren i Tor Davidi?

¹² Se fatyô zuan a nomso man kasev mba jighjigh mbagenev ken Bibilo mba yange ve yina, kpa ve kom u se dondo ikyav ve yô. (Heb. 6:12) Hen ase sha kwagh u Tor Davidi. Yehova yange yila un ér “or u sha ishima yam.” (Aer. 13:22) Kpa Davidi yange yina. Jighilii yô, yange er akaabo a vesen. Nahan kpa, a ver se ikyav i dedoo. Sha ci u nyi? Sha ci u yange i kôôm un kpa, yem u keren ishô ga. Yange lumun kwaghwan u i wa un taveraa la, shi vaa afanyô sha kwaghbo na sha mimi. Kwagh ne na yô, Yehova de un kwaghbo.—Ps. 51:3, 4, 10-12.

¹³ Se fatyô u henen kwagh ken Davidi sha u pinen ayol a ase ser, ‘Ka a wam kwagh nahan, m er nena? Ka m nenge a ibo yam fele, shin ka m yem u keren ishô? Ka m na or ibo sha kwagh felee? Ka m nôngo sha afatyô wam cii mer me kera kimbir kwaghbo u m er la gaa?’ U fatyô u pinen iyol you mbampin er mbara nahan shighe u u lu ôron kwagh u nomso man kasev mba jighjigh mbagenev ken Bibilo yô. Mbamzeyol mba u lu nôngo a mi la, ka mba ve kpa yange ve tagher a mi yôô? Ka aeren a dedoo a nyi nahan yange ve tese? Hanma orjighjigh u u lu ôron kwagh u nan yô, pine iyol you wer: ‘Me er nan ve me lu er or u yange civir Yehova sha mimi hanma shighe ne nahana?’

14. Aluer se mba nengen gbenda u mbacivir Yehova mbagenev ve eren kwagh la yô, a wase se nena?

¹⁴ Aluer se mba nengen gbenda u mbacivir Yehova mbagenev mba ve bee iyol kua mba ve lu agumaior ve eren kwagh la yô, a wase se kpishi. Ikyav i tesen yô, alaghga u fa ma anmgbian hen tiônnongo wou, u mbakov mba nan ve lu kighir nan ér nana hemba Yehova atô, shin u mba hen  tsombor u nan ve soo ér nana de civir Yehova ga, shin u nan lu yan ican a angev, kpa nan lu civir Yehova sha mimi her yô. U nenge nan ngu a aeren a doon, a u soo wer we kpa u lu a mi yôô? Aluer u hen sha ikyav i dedoo i anmgbian u nomso shin anmgbian u kwase la nan ver la yô, kwagh la una wase u sha igbenda i we kpa u fatyô u wan ishima a mbamzeyol ou yô. Se wuese Yehova er se lu a anmgbianev mba jighjigh mba se fatyô u dondon ikyav ve la yô, ka kwagh u saan se iyol kpishi je!—Heb. 13:7; Yak. 1:2, 3.

15. Ka kwaghwan u apostoli Paulu u nyi se kpa una wase se se za hemen u civir Yehova saan saana?

¹⁵ Gba u hanma wase nana eren tom a iyua i nan lu a mi la sha afatyô u nan cii ve, tiônnongo una lu ken bem shi una eren kwagh ken mzough ye. Hen ase sha kwagh u Mbakristu mba sha ayange a mbaapostoli la. Yange ve lu a uiyua kua ityom kposo kposo. (1 Kor. 12:4, 7-11) Er ve lu a akaa la nahan kpa, ve gbaan gesa a mbagenev ga, shin ve eren ayôôso a mbagenev kpaa ga. Kpa Paulu wa ve kwagh ér gba u hanma ve nana eren tom u “maan iyol i Kristu.” Paulu nger washika hen Mbaefese, kaa a ve ér: “Hanma ilyeegh ki iyolough ka ki a eren tom sha inja yô, kwagh ne a na iyol i via, er i lu vesen sha dooshima la.” (Ef. 4:1-3, 11, 12, 16) Mba yange ve dondo kwaghwan u Paulu ne yô, ve lu eren akaa a van a bem ken tiônnongo shi wasen tiônnongo u eren kwagh ken mzough, er nyian kpa se nenge anmgbianev ve lu eren ken atôônanongo a ase nahan.

16. Ka nyi i gbe u se kange ishima u erene? (Mbaheberu 6:10)

¹⁶ Kange ishima wer, mayange u tôô iyol you u kar sha mbagenev ga. Kpa hen kwagh ken ikyav i Yesu, shi nôngo kpoghuloo eren kwagh er un kpa eren nahan. Dondo ikyav i mbajighjigh mba sha ayange a i ngeren Bibilo la kua mba sha ayange a ase ne. Aluer u za hemen u civir Yehova sha afatyô wou cii yô, na jighjigh wer Yehova ‘ban a perapera ga, nahan una hungur a tom wou ga.’ (Ôr Mbaheberu 6:10.) Yô, za hemen u civir Yehova saan saan, shi fa wer ka i saan Yehova iyol u nengen er u lu civir un sha afatyô wou cii yô.