NGEREN U TIMEN SHA MI 35
ICAM 123 Lumun u Suen Hemen u Aôndo
Er Mbatamen Vea Wase Mba i Dugh Ve ken Tiônnongo Kera Yô
“Kape orisholibo môm kpa aluer nan gema ishima yô, a ember sha, sha kwagh u nan a hemba mbaperapera 99 mba ityôkyaa i lu i vea gema ishima ga la je la.”—LUKA 15:7.
KWAGH U SE LU HENEN YÔ
Se nenge er i hii ve i gbe u a dugh ior mbagenev ken tiônnongo kera, man er mbatamen vea wase ambaaior la aa gema ishima aa hide hen Yehova yô.
1-2. (a) Yehova nengen orsholibo u nan venda u geman ishima la nena? (b) Ka nyi Yehova a soo ér orsholibo nana ere?
KA HANMA ieren cii Yehova a lumun a mi ga. A kôr isholibo ihyom. (Ps. 5:4-6) A ver ishima ér se kuran atindi a na a a lu ken Bibilo la. Nahan kpa, Yehova fa ér se yina nahan se fatyô u kuran atindi a na a mshi shio ga. (Ps. 130:3, 4) Nahan cii kpa, mayange lumun a ‘mba cian Aôndo ga, mba ve gem erdoo u sha mhôôn na la a hingir ve ityôkyaa i eren akaa a ndôhôrshima’ la ga. (Yuda 4) Jim je yô, Bibilo kaa ér “a va tim mba ve vende Aôndo la” sha shighe u ityav mbi Aôndo mbi Armagedon la.—2 Pet. 3:7; Mpa. 16:16.
2 Nahan kpa, Yehova soo ér or môm nana tim ga. Er se vande henen ken ngeren mba ken Iyoukura ne nahan, Bibilo pase wang ér “sar un u ior cii ve zua a ian i geman ishima.” (2 Pet. 3:9) Mbatamen mba ken tiônnongo ka ve wase orsholibo ér nana undu igbenda i nan i bo la sha er nana hide hen Yehova yô. Ka ve wa ishima a nan hen shighe ne er Yehova kpa a eren nahan. Nahan kpa ka mbaasorabo cii ve lumun u geman ishima ga. (Yes. 6:9) Er mbatamen ka ve wasen ve ér ve hide hen Yehova nahan kpa, mbagen ka ve za hemen u eren isholibo la her. Ka nyi i doo u mbatamen vea er hen shighe ne?
“DUGH NEN IFEROR LA . . . KERA”
3. (a) Ka nyi Bibilo i kaa ér i er a orsholibo u nan venda u geman ishima? (b) Aluer or venda u geman ishima yô se fatyô kaan ser nan soo ér i dugh nan ken tiônnongo kera sha ci u nyi?
3 Orsholibo ka nana venda u geman ishima yô, i gba u mbatamen vea dondo kwaghwan u ken 1 Mbakorinte 5:13 ape i kaa ér: “Dugh nen iferor la hen atô wen kera” la. Se fatyô u kaan ser ka kwagh u orsholibo la nan soo je la. Nan ngu sundan kwagh u nan lôô yô. (Gal. 6:7) Se ôr nahan sha ci u nyi? Sha ci u mbatamen nôngo acin imôngo ér vea wase nan nana gema ishima, kpa nan venda. (2 Utor 17:12-15) Ieren i nan tese ér nan venda u kuran atindi a Yehova.—Dut. 30:19, 20.
4. Ka a dugh orsholibo u nan vende u geman ishima ken tiônnongo kera yô i yôô sha ci u nyi?
4 Ka a dugh orsholibo u nan vende u geman ishima la ken tiônnongo kera yô, i yôô ér nan kera ngu Orshiada u Yehova ga. a Kwaghyôôn la ka i lu u heen or shon ga. Kpa ka i lu sha ci u anmgbianev mba nomso man mba kasev vea dondo kwaghwan u Bibilo u a kaa ér “de nen u lun imôngo” vea or shon, shi “kwaghyan tsô kpa de ye nen imôngo” vea nan ga la. (1 Kor. 5:9-11) Ityôkyaa ngi i i ne ve Yehova a we tindi la yô. Apostoli Paulu nger ér: “Ankwa u cuku kpa ka a na ijenmwe jimin cii i ange.” (1 Kor. 5:6) Aluer i de orsholibo u nan vende u geman ishima nan ngu ken tiônnongo her yô, mbagenev ken tiônnongo la vea hen ér ityôkyaa ngi i kuran atindi a Yehova ga.—Anz. 13:20; 1 Kor. 15:33.
5. Shighe u i dugh anmgbian ken tiônnongo kera yô, doo u se nengen nan nena, man ka sha ci u nyi?
5 Shighe u i dugh anmgbian ken tiônnongo kera yô, doo u se nengen nan nena? Er i lu u se kera luun imôngo a nan ga nahan kpa doo u se nengen ser kwagh u nan bee a bee je ga, kpa nan ngu iyôngo i Yehova i i saa yô. Iyôngo ia tsume kpa ia fatyô u hiden va kohol ikyumuile. Umbur wer, or u nan lu iyôngo i i saa la yange nan tsegha iyol i nan sha ci u Yehova. Kpa kwagh ka a er i vihi yô, nan kera ngu eren sha iceghzwa i nan ga, man ka kwagh u vihin kpishi. (Esek. 18:31) Nahan kpa, er shighe a lu her shi Yehova a kegh iyol u zungwen mhôônom yô, se ver ishima ser or shon nana va gema ishima. Mbatamen vea wase or u i dugh nan ken tiônnongo kera la nana gema ishima, a hide ken tiônnongo nena?
ER MBATAMEN VEA WASE MBA I DUGH VE KEN TIÔNNONGO KERA YÔ
6. Ka nyi mbatamen vea er sha u wasen or u i dugh nan ken tiônnongo kera laa?
6 Ka a dugh or ken tiônnongo kera yô, mbatamen ve de u nôngon ér vea wase nan nana hide hen Yehova? Mayange ga cii! Shighe u kômatii u mbatamen a kaa a or ér i dugh nan ken tiônnongo kera yô, ka a pase nan kwagh u nana er ve nana hide ken tiônnongo yô. Kpa mbatamen ka ve er kwagh i hemba nahala. Ashighe kpishi ka ve pase orsholibo la ér, iwer ia karen kpuaa yô, vea soo u hiden teman vea nan sha er vea fa nana gema ishima yô. Aluer iwer kar kpuaa man orsholibo la nan lumun u teman vea mbatamen yô, vea taver nan ishima ér nana gema ishima a hide ken tiônnongo. Aluer nan gema ishima hen shighe la ga je kpa, mbatamen vea pase nan ér vea va tema vea nan ken hemen, shi vea taver nan ishima ér nana gema ishima.
7. Shighe u i dugh or ken tiônnongo kera yô, mbatamen ka ve dondo ikyav i Yehova i zungwen mhôônom la nena? (Yeremia 3:12)
7 Mbatamen ka ve zungwe or u i dugh nan ken tiônnongo kera la mhôônom, vough er Yehova nahan. U tesen ikyav yô, Yehova yange keghen ér Mbaiserael ve gema ishima cii ve una wase ve ga. Kpa yange a tindi uprofeti nav hen a ve cii ve, ve va mase geman ishima ye. Ngeren u sha uhar ken Iyoukura ne pase er Yehova yange kaa a Hosea ér a de kwase na kwaghbo shi a hide a na, shin er kwase la lu eren isholibo i vesen her nahan kpaa. Sha nahan yô, Yehova tese ior nav ér un zungu mhôônom. (Hos. 3:1; Mal. 3:7) Mbatamen ka ve dondo ikyav i Yehova la, sha ci u ka ve soo ér orsholibo la nana gema ishima nana hide, nahan mba eren kwagh u una na a taver nan u hiden ga.—Ôr Yeremia 3:12.
8. Injakwagh i Yesu ôr sha kwagh u wan u a undu ter na la wase se u kaven er ka i lu Yehova ken ishima a mba ve de u civir un la nena? (Luka 15:7)
8 Umbur kwagh u ter u ken injakwagh i Yesu ôr sha kwagh u wan u a undu ter na la yange er la, er i lam sha mi ken ngeren u sha uhar la nahan. Ter la yange nenge wan na gbe hiden hen ya je maa, a “yevese a za kuve un, a gba susen un zwa.” (Luka 15:20) Aluer u nenge yô, ter la yange kegh ér wan na la a zamber ve una de un kwaghbo ga. Kpa ter la yevese za kuve wan na, sha ci u wan na doo un ishima. Kape ka i lu Yehova ken ishima a mba ve de u civir un je la, man mbatamen ka ve er kwagh u ve fetyô cii sha u dondon ikyav i Yehova ne. Ve soo ér iyôngo i i saa ne i “hide hen ya.” (Luka 15:22-24, 32) Orsholibo ka nana gema ishima a hide yô, i ember sha; shin tar kpa kape ka i ember je la!—Ôr Luka 15:7.
9. Ka nyi Yehova a soo ér mbaasorabo ve ere?
9 Kwagh u se hen ne tese wang ér, mayange Yehova lumun a orsholibo u nan vende u geman ishima la ga. Nahan kpa, Yehova te mbaasorabo kera ga. A soo ér ve hide hen a na. Nahan or ka nana gema ishima a hide hen Yehova yô, nenge er ka i lu un ken ishima a nan yô. Hosea 14:4 kaa ér: “Me wanger mhirjime ve, vea gba doon mo ishima tsô; gadia iyugh Yam gema her a na kera.” Er mbatamen ve fe er ka i lu Yehova ken ishima a mbaasorabo yô, ka ve ver ishima sha er vea fa aluer orsholibo nan hii u geman ishima yô. Mkaanem man ma wase mba ve undu Yehova la ve fa ér ve doo un ishima her, nahan ve hide hen a na a atimbir shio.
10-11. Mbatamen ka ve nôngo ér vea wase mba yange i dugh ve ken tiônnongo kera la nena?
10 Mbatamen vea wase mba i dugh ve ken tiônnongo kera anyom a kar imôngo la nena? Alaghga je yô ve de u eren akaa a yange na ve i dugh ve ken tiônnongo kera la. Ashighe agen je yô, adooga vea kera umbur ityôkyaa i yange i dugh ve ken tiônnongo kera la kpaa ga. Vea kera lu ken tiônnongo ga anyom a kar nan kpa, mbatamen vea ker ve vea za sôr ve. Shighe u mbatamen ve za sôr imbaor ne yô, vea fatyô u eren msen vea nan je kpaa, shi vea taver nan ishima ér nana hide ken tiônnongo. Nahan kpa, aluer or undu tiônnongo shighe gôgônan yô nana vôr ken jijingi, nahan a gba u nana hide a hen kwagh u Yehova man mimi u ken Bibilo la. Sha nahan yô, aluer or shon nan kaa ér nan soo u hiden ken tiônnongo yô, mbatamen vea fatyô u tsuan ma anmgbian ér nana hen Bibilo a or shon, aluer mba a hide a nan ken tiônnongo ga je kpaa. Nahan kpa, ka mbatamen vea tsua anmgbian u nana hen Bibilo a or shon ye.
11 Mbatamen vea dondo ikyav i Yehova i zungwen mhôônom la, nahan vea ker mba ve undu Yehova la cii shi vea taver ve ishima ér ve hide ken tiônnongo. Aluer orsholibo la nan de akaa a yange nan er shami ga la shi nan gema ishima yô, i de kera timbir u hiden a nan ken tiônnongo ga.—2 Kor. 2:6-8.
12. (a) Ka unô nahan i gbe u mbatamen vea wa ikyo sha kwagh ve cii ve vea hide a ve ken tiônnongo? (b) Doo u se palegh u henen ser mba ve er asorabo agen yô, mayange je Yehova una zungwe ve mhôônom ga, sha ci u nyi? (Shi nenge ngeren u shin kpe kpaa.)
12 Ashighe agen yô, a gba u mbatamen vea wa ikyo tsembelee cii ve vea hide a orsholibo u nan gem ishima la ken tiônnongo ye. U tesen ikyav yô, aluer or la yange nan nzughul a wanye shin nan venda mimi, gayô nan er ayom sha u paven ivaa yô, a gba u mbatamen vea fa wang ér nan gema ishima sha mimi, cii ve vea hide a nan ken tiônnongo ye. (Mal. 2:14; 2 Tim. 3:6) Gba kpee u mbatamen vea kura ikyumuile. Nahan kpa, gba u se fa ser Yehova una lumun hanma orsholibo u nan gem ishima sha mimi, nan de u eren kwaghbo nan hidi hen a na cii. Shin er i gbe u mbatamen vea fa wang ér or u yange nan er a mbagenev sha mimi ga la nan gema ishima sha mimi cii ve vea hide a nan ken tiônnongo nahan kpa, mayange ve de kaan ér a tsa kpa Yehova una zungwe or shon mhôônom ga ze. b—1 Pet. 2:10.
KWAGH U TIÔNNONGO UNA ER YÔ
13. Gbenda u se eren kwagh a or u i kôôm nan la kaha a gbenda u se eren kwagh a or u i dugh nan ken tiônnongo kera la nena?
13 Er i pase ken ngeren u ken ijime la nahan, ashighe agen ka i yôô ken tiônnongo ér i kôôm or. Shighe u kwagh a lu nahan yô, se fatyô u lun imôngo vea nan sha ci u se fa ser nan gema ishima shi nan de ieren i bo la. (1 Tim. 5:20) Nan ngu ken tiônnongo her, shi gba u anmgbianev mba nomso man mba kasev vea taver nan ishima ér nana za hemen u eren kwagh u vough. (Heb. 10:24, 25) Nahan kpa, or u i dugh nan ken tiônnongo kera yô, kwagh u nan kaha. Ka se ‘de u lun imôngo a or shon, kwaghyan tsô kpa se mba ye imôngo vea imbaor la ga.’—1 Kor. 5:11.
14. Mbakristu vea er tom a imoshima ve i Bibilo i tsaase i la u eren kwagh a or u i dugh nan ken tiônnongo kera la nena? (Shi nenge foto kpaa.)
14 Kwagh u i ôr ken 1 Mbakorinte 5:11 la tese ér shighe u i dugh or ken tiônnongo kera yô, se fatyô u lôhôn nan ser nana va mkombo ga, shi shighe u nan ve mkombo kpa se fatyô u sughun nan gaa? Ka nahan ga. Ka mimi, se luun imôngo vea or u i dugh nan ken tiônnongo kera ga. Kpa Orkristu nana fatyô u eren tom a imoshima i nan i Bibilo i tsaase i la u tsuan ér nana lôhô or u i dugh nan ken tiônnongo kera la mkombo u tiônnongo, aluer ka or u hen tsombor u nan shin yange nan lu ijende i nan i kôôsôô cii ve i dugh nan kera yô. Aluer or shon nan va mkombo yô, se er kwagh a nan nena? Kera yô, yange se sughun imbaor la ga. Nahan sha ingin kpa, hanma Orkristu yô nana er tom a imoshima i nan i Bibilo i tsaase i la u tsuan kwagh u nana er sha ikyaa ne yô. Mbagen yô a doo ve u sughun imbaor la shighe u nan ve mkombo yô. Nahan kpa, se lam a or shon gôgônan ga shi se er akaa agen vea nan kpaa ga.
Hanma Orkristu nana er tom a imoshima i nan i Bibilo i tsaase i la u tsuan ér nana lôhô or u i dugh nan ken tiônnongo kera la mkombo shin sughun nan shighe u nan ve mkombo yô (Nenge ikyumhiange i sha 14)
15. Ka mbaasorabo mba han i er kwagh ve ken 2 Yohane 9-11? (Shi nenge ngeren u kiriki u a lu a itinekwagh ér “ Yohane man Paulu Yange Ve Lu Ôron Kwagh u Inja Isholibo i Mômô?” la.)
15 Alaghga mbagenev vea pine ér, ‘Kpa Bibilo kaa ér, Orkristu u nan sugh or u i dugh nan ken tiônnongo kera yô, nan ngu nyôron nongo a or shon ken aeren a nan a ifer la gaa?’ (Ôr 2 Yohane 9-11.) Nahan kpa, avur a a kase 2 Yohane 9-11 la nga ôron kwagh u mbavendan mimi, kua ior mba ka ve taver mbagenev asema kpoghuloo ér ve er akaa a Bibilo i vende yô. (Mpa. 2:20) Sha nahan yô, aluer or nan ngu samber a atesen a mbavendan mimi kpoghuloo shin aeren a bo agen yô, mbatamen vea za sôr nan ga. Nahan kpa, ishimaveren ngi ér, nana fatyô u geman ishima hiden ken tiônnongo. Kpa aluer imbaor la nan ngu a gema ishima nan hide ga yô, mayange se sugh nan shin se lôhô nan ser nana va mkombo u tiônnongo ga.
DONDO IKYAV I YEHOVA I A ZUNGU MHÔÔNOM SHI KUNYA U KER UN LA
16-17. (a) Ka nyi Yehova a soo ér mbaasorabo ve ere? (Esekiel 18:32) (b) Mbatamen vea er tom vea Yehova shighe u ve lu wasen mbaasorabo ér ve gema ishima la nena?
16 Ka nyi se hen ken ngeren mba ken Iyoukura nee? Yehova soo ér or môm môm nana tim ga! (Ôr Esekiel 18:32.) A soo ér mbaasorabo ve gema ishima ve hide hen a na. (2 Kor. 5:20) Ka nahan ve, Yehova yange a shi taver ikyurior i Iserael man ior nav mba ve undu un la asange asange asema ér, ve gema ishima ve hide hen a na ye. Mbatamen mba ken tiônnongo ka ve er tom ken mzough vea Yehova sha u taver mba ve er asorabo a vesen la ishima ér ve gema ishima.—Rom. 2:4; 1 Kor. 3:9.
17 Mbaasorabo ka vea gema ishima yô, i ember sha kpishi! Ter wase u sha, Yehova iyol na kpa ka a ember kpishi shighe u iyôngo na i i saa la i hidi ken tiônnongo yô. Ka sea hen sha kunya u ka u kôr Yehova a mbaasorabo la, kua mhôônom nam ma zungwen man erdoo na la yô, a seer doon se ishima.—Luka 1:78.
ICAM 111 Akaa A Nan Se Iember
a Se kera yôôn kwagh u mba i dugh ve ken tiônnongo kera la ser, kera mba Mbashiada mba Yehova ga ze. U zuan sha mkaanem ma Paulu ma ken 1 Mbakorinte 5:13 la yô, se gema yôôn ser i dugh ve ken tiônnongo kera
b Sha kwagh u Bibilo i er yô, isholibo ngi jighilii i a fatyô u kaan ér ingin ka isholibo i a de or a mi ga ze, kpa ka isholibo i or er sha apera sha u hendan a Aôndo shi nan vende u geman ishima yô. Aluer or er imba isholibo la kpa, ka Yehova man Yesu tseegh vea kure nan ijir ye.—Mar. 3:29; Heb. 10:26, 27.
