1. Ka sea pasen mbagenev er yange hii ve se fa Yehova shi se hingir u civir un nahan, kwagh la a wase se nena?

 “YANGE u fa mimi nena?” Ka keng u vande nan mlumun sha mpin ne acin imôngo. Ka mpin u ka se hii pinen anmgbian u nomso shin kwase shighe u se soo u seer fan nan je la. Ka i doo se u ungwan er yange hii ve anmgbianev asev fa Yehova shi hingir u civir un yô. Shi se kpa ka i doo se u ôron ve er se lu Mbashiada mba Yehova ve i saan se iyol yô. (Rom. 1:11) Ka sea lamen sha akaa ne yô, kwagh la a wase se u umbur er mimi a doo se ishima kpishi yô. Shi kwagh la ka a seer taver se ishima u “zenden ken mimi her,” ka u eren kwagh ken uma wase cii sha gbenda u se zua a iveren i Yehova shin una lumun se je la.—3 Yoh. 4.

2. Ka nyi se lu timen sha mi ken ngeren ne?

² Ken ngeren ne, se lu timen sha atôakyaa agen a mimi a doo se yô. Shi se time sha igbenda i se fatyô u tesen ser iyua i injaa ne doo se la kpaa. Ka keng kwaghhenen ne una na se hemba sughun Yehova er a urugh se a ve a vese ken mimi yô. (Yoh. 6:44) Shi una na a seer saren se u tesen ior mimi u Bibilo.

3. Ka sha ityôkyaa i hemban cii i nyi mimi a doo se?

³ Mimi doo se sha atôakyaa kpishi. Kpa ityôkyaa i hemban cii yô, Yehova Aôndo u mimi a due hen a na la doo se ishima. Bibilo i i lu Mkaanem nam la wase se u fan un ser A hemba agee cii shi ngu Aôndo u a gbe sha man tar la tseegh tsô ga,  ma tese se kpaa ér ngu Ter wase u sha, shi se doo un ishima shi kwagh wase gba un ishima. (1 Pet. 5:7) Se fa Yehova Aôndo wase ka “Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je.” (Eks. 34:6) Ijirôron i mimi doo Yehova. (Yes. 61:8) Ka una nenge sea yaan ican nahan i vihi un kpishi. Nahan a kegh iyol shi sar un u karen a atsan a ase cii kera sha shighe u a ver la. (Yer. 29:11) Se mba veren ashe a shighe u doon kpishi la! Ka nahan ve Yehova a doo se ishima kpishi ye!

4-5. Er nan ve apostoli Paulu yange tôô ishimaverenkeghen yase la kar sha imandetso?

⁴ Ityôkyaa igen kpa ngi i mimi a doo se yô. Mimi ne ngu wasen se kpishi. Ikyav i tesen yô, mimi u Bibilo wa ishimaverenkeghen yase i sha kwagh u mlu wase u ken hemen la ker. Apostoli Paulu yange nger kwagh u tesen er ishimaverenkeghen la i lu a inja yô, ér: “Se mba a ishimaverenkeghen ne inja er ka imandetso i sha ci u uma wase nahan, ka i̱ wase se u tilen dông a akperan a tan shio.” (Heb. 6:19) Shighe u se tagher a mbamzeyol yô, ishimaverenkeghen yase i sha kwagh u Bibilo i ôr la ka i wase se u tilen dông, er imandetso ka i kôr tso a tile ijiir i môm, a kuan ga nahan.

⁵ Lu ishimaverenkeghen i yemen sha i Mbakristu mba i shighe ve mkurem ve lu a mi la, Paulu lu ôron ye. Kpa kwagh u ôr la wa Mbakristu mba ve lu a ishimaverenkeghen i va lun uma gbem sha won ken paradiso shin tar la kpa ker. (Yoh. 3:16) Sha kpôô yô, saan se iyol kpishi er se fe ser ka u se va zua a uma u tsôron yô.

6-7. Yvonne yange fa mimi sha kwagh u mlu wase u ken hemen la nahan, kwagh shon wase un nena?

⁶ Nenge ase kwagh u yange er anmgbian u kwase ugen yô, iti na ér Yvonne. Yange i mar un ken mimi ga. Nahan shighe u lu wanye la, cian ku. A kaa ér yange un ôr kwagh ugen ken takeda u a hungur un sha won ga yô, ér: “Yange sev a hungwa a av maa a lu iyange i masetyô.” A kaa ér: “Mkaanem mara yange ma na yô, mea nyôr tugh kpa m fatyô u yaven ga, m henen sha kwagh u ken hemen. M kaan mer, ‘Ka keng uma una za hemen u lun. Aluer ka nahan ga yô, ityôkyaa i m lu uma jim yô ka nyi?’ Yange m soo u kpen ga!”

⁷ Yvonne va hingir gumkwase yô, zua a Mbashiada mba Yehova mbagenev. A kaa ér: “Yange m hii u nengen mer mimi je me fatyô u va lun uma gbem sha won ken Paradiso shin tar.” Anmgbian wase u kwase ne yange fa mimi nahan, kwagh la wase un nena? Shi a akaa ér: “Hegen ne ka m yav mem mem, ishima kera zem iyol sha kwagh u ken hemen shin ku ga.” Hen ase er mimi una doo Yvonne kpishi, shi a saan un iyol u pasen mbagenev ishimaverenkeghen na i sha kwagh u ken hemen la kpen kpen yô.—1 Tim. 4:16.

8-9. (a) Ken injakwagh i Yesu ôr la, orgen yange nenge kwagh u injaa u zua a mi la ér kwagh shon ngu a inja nan je? (b) Mimi ngu u a inja nan je?

⁸ Mimi u Bibilo la shi wa loho u dedoo u sha kwagh u Tartor u Aôndo ker. Yesu tôô mimi u sha kwagh u Tartor la kar sha kwagh u injaa u a lu myer yô. Er i nger ken Mateu 13:44 nahan, Yesu kaa ér: “Tartor u sha ngu er kwagh u injaa u a lu myer ken sule, u or nan za zough a mi ve shi nan hide nan yer un nahan. Er i saan nan iyol yô, nan yem nan za tee akaa a nan cii nan za yam sule shon.” Aluer u nenge yô, or la lu keren kwagh u injaa la ga. Kpa za asegh sha mi yô, de akaa agen kpishi ken uma, sha er una nôngo  a lu a kwagh u injaa shon yô. Jighilii yô, a za tee akaa a na agen cii. Sha ci u nyi? Sha ci u a fa er kwagh u injaa u un zough a mi la a hembe lun a inja a akaa agen la cii ica je yô.

⁹ Kape we kpa u nenge mimi laa? U nenge un nahan je ka u henen a hen ga! Se nenge er kwagh môm a lu ken tar ne u se er ve a saan se iyol er se lu civir Yehova ve i saan se iyol sha mimi hegen, a ishimaverenkeghen i va zuan a uma u tsôron sha hemen u Tartor u Aôndo la ga yô. Ian i icivirigh i se lu a mi i yan ijende vea Yehova kangenaa la hemba se hanma kwagh u se de a kar se cii. Hemba saan se iyol u “eren hanma kwagh u a soo” yô.—Kol. 1:10.

10-11. Ka nyi yange i na ve Michael de uma u eren laa?

¹⁰ Se kpishi se de akaa agen kar se, sha er Yehova una lumun se yô. Mbagenev de ityom i injaa ken tar ne. Mbagen di de u keren ér vea lu a inyaregh kpishi la. Heela tseegh ga, mbagenev yange mba fe Yehova yô, ve de uma u yange ve eren la kpum kpum. Orgen kpa er nahan, iti ér Michael. Yange i mar un ken mimi ga. Shighe u lu gumor la, i tese un iniumbe i karen ihyô i i yer ér Karate la. A kaa ér: “Yange m soo mer me lu gbong gbong hanma shighe cii. Ashighe agen m nenge mer m gande u benden mo ikyôr inya.” Kpa Michael va hiin u henen Bibilo yô, kav gbenda u Yehova a nengen ipila shin tswam la. (Ps. 11:5) Lu Orshiada ugen vea kwase na ve henen kwagh a Michael ye. Michael ôr kwagh ve kaa ér: “Er yange ve lu tesen mo mimi je, ve bugh zwa ve kaa ér mo m de karate ga.”

¹¹ Michael gbe fan Yehova seer yô, Yehova lu doon un ishima seer a seer. Fe er Yehova zungwen mbacivir un mhôônom yô, Yehova hemba doon un ishima cii. Shighe karen yô, Michael kav er i gbe u una de kwagh u vesen ken uma na yô. A kaa ér: “Yange m fa je mer a taver kpishi u m de karate. Kpa shi m fa mer aluer m de yô, a doo Yehova a mo, shi m na jighjigh mer a kuma u me fatyô u den nyityôkwagh cii mer i karem sha ci na.” Michael nenge er mimi u un zua a mi la ngu a inja kpishi, ka nahan ve a de akaa agen kpishi a kar un ye.—Yak. 1:25.

12-13. Mimi u Bibilo wase Mayli nena?

¹² Bibilo tôô mimi kar sha imenger i i mondo iwanger ken ime yô, sha u tesen er mimi a lu a inja kpishi yô. (Ps. 119:105; Ef. 5:8) Anmgbian u kwase ugen ken tar u Azerbaijan, iti na ér Mayli, a wuese iwanger i Mkaanem ma Aôndo ma te un sha akaa la kpishi. Yange vese sha ikyev i mbamaren nav, man hanma ve eren kwaghaôndo u nan kposo. Ter na lu Ormusulumi, ngô na gema lu ken kwaghaôndo u Mbayuda. A kaa ér: “Yange m na jighjigh mer Aôndo ngu, mayange m ta akperan sha kwagh la ga. Kpa akaa agen kpishi tsumem. Yange m pine mer: ‘Ityôkyaa i Aôndo a gbe uumace jim yô ka nyi? Man ityôkyaa i or a ya ican ken uma u nan zan zan a va mase kenden nan ken usu nana hia gbem sha won yô ka nyi?’ Shi hanma kwagh u yange una er cii yô, ior ve kaa ér ka ishima i Aôndo. Nahan m pine mer: ‘Aôndo yô gbe kuran uumace tsô, ka i doo un u nengen er ior ve lu yan ican yôô?’ ”

¹³ Mayli yange za hemen u keren mbamlumun sha mbampin nav. Shighe karen yô, a lumun ér i hen Bibilo a na, maa hingir u civir Yehova. A kaa ér: “Akaa a mimi a Bibilo i wasem u nengen a mi la na yô, hemba saan mo iyol hegen. Mbamlumun mba Bibilo i ne sha mbampin av la wanger je akperan nga sha mi ga, nahan ishima yam mem.” Se cii se mba  wuese Yehova, ‘Un u a yer se se dugh ken ime se ve ken iwanger na i doon tsung la,’ er Mayli nahan.—1 Pet. 2:9.

14. Se er nan ve mimi una seer doon se? (Nenge ngeren u kiriki u a lu a itinekwagh ér, “ Akaa Agen a Se Fatyô u Tôôn Mimi u Bibilo Karen sha Mi Yô” la kpaa.)

¹⁴ Se tese ikyav sha iorov kpuaa di tsô, mba kwagh ve a tese ér mimi ngu a inja kpishi yô. Ka keng u fa mbagenev kpishi. Er nan u hii u tôvon mbagenev sha tseeneke wou sha er u fa atôakyaa agen a i gbe u mimi una doo se la ga? Aluer mimi ngu doon se seer a seer yô, se fa igbenda kpishi i tesen ser a doo se.

15. Se tese ser mimi doo se nena?

¹⁵ Se tese ser mimi doo se sha u henen Bibilo kua ityakeda i pasen Bibilo hanma shighe. Kera ga je kpa, hanma shighe akaa ka a lu kpishi a i gbe u se cii se hen yô, sea tsa ken mimi nan nan je kpaa. Magazin u Iyoukura u yange i hii gberen la kaa ér: “Mbaaie dumbur sha tar, nahan a taver kpishi u fan mimi. Saa u ker ve u zua a mi ye. . . . Saa u nôngo kwagh ve mimi una hingir kwagh wou ye. De fe kwagh u mimi môm tseegh maa i kuman we ga. . . . Henen her gbem, keren u seer fan akaa a mimi agen a Bibilo i tese yô.” Kwaghhenen  ngu ican, kpa gema ka kwagh u injaa kpishi.

16. Ka u hen kwagh nena ve u hemba kavena? (Anzaakaa 2:4-6)

¹⁶ Ka se cii takeda u ôron shin kwaghhenen a doo se ga. Kpa Yehova kaa a vese ér se “ker” u seer kaven mimi u Bibilo. (Ôr Anzaakaa 2:4-6.) Ka sea nôngon ser se er kwagh ne yô, i wase se kpishi. Anmgbian ugen iti na ér Corey, a kaa ér ka una ôron Bibilo yô, un ôr ivur i môm un time sha mi cii un ôr igen ye. A kaa ér: “Ka m ôr hanma ngeren u shin kpe sha ivur la, shi m bugh avur a Bibilo agen a a ôr imba kwagh la cii m ôr, shi m seer tôvon sha mi. . . . Ka mea ôr Bibilo nahan yô, m fa akaa kpishi!” Sea ôron Bibilo er Corey nahan shin sea ôron sha ma gbenda ugen kpa, ka se tese ser mimi doo se sha u tôôn shighe shi nôngon kpoghuloo henen i sha gbashima.—Ps. 1:1-3.

17. U dondon mimi la inja ne ér nyi? (Yakobu 1:25)

¹⁷ Se fa, u henen mimi u Bibilo la tseegh kuma ga. Kwagh u se er ve mimi una wase tsembelee yô, saa se dondo mimi, ka u eren sha kwagh u se henen la je la. Saa se er nahan keng ve mimi una na a saan se iyol jim jim ye. (Ôr Yakobu 1:25.) Kpa se er nan ve se fa ser se mba dondon mimi? Anmgbian ugen kaa ér ka sha u tôvon iyol fan akaa a u lu eren sha mi, man a u lu a hii u eren sha mi tsembelee ga la. Apostoli Paulu kaa ér: “Sea za ikyura nan nan kpa, se za nen hemen u zenden sha inja sha inja sha gbenda ne.”—Fil. 3:16.

18. Gba u se nôngo sha afatyô wase cii se “zenden ken mimi her” sha ci u nyi?

¹⁸ Hen ase er ka sea nôngon sha afatyô wase cii ser se “zenden ken mimi her” ve, kwagh la a wase se kpishi yô! Kwagh ne ka a na i hemba saan se iyol ken uma wase tseegh tsô ga, kpa ka se na i saan Yehova iyol kua mba se civir un a ve imôngo la. (Anz. 27:11; 3 Yoh. 4) Ka atôakyaa a hemban cii a mimi a doo se shi se dondon mimi je la.