1. Ka kwaghôron u profeti u nyi Yesaia yange ôr sha Yesu, man ka kwagh u taver se ishima nena?

PROFETI Yesaia yange ôr kwaghôron u profeti sha Yesu u ka a na i saan se iyol shi se lu a ishimaverenkeghen yô. Yesaia yange tsengaôron ér Yesu una “gba ôron ijir sha kwagh u A nenge sha ashe tsô ga, kwagh kpaa Una gba kuren sha er A ongo sha ato Na tsô ga, kpa ka sha perapera Una ôr ijir i mbaatsanev ye.” (Yes. 11:3, 4) Hii nan ve kwagh ne a lu kwagh u taver se ishima? Ityôkyaa yô, se mba ken tar u i nyaghen ior kpishi shi msange u sha dooshima a dumbur ker yô. Se cii se mba veren ashe a Orjir u una va ôr se ijir sha mnenge u ashee tseegh tsô ga la!

2. Yesu yange kaa ér se er nyi, man ka nyi se lu timen sha mi ken ngeren nee?

² Hanma iyange yô, ka se kure ikyaa sha kwagh u ior. Kpa se yina, nahan se fatyô u kuren kwagh u ior vough er Yesu nahan ga. Ka se hemban nengen sha mluashe. Nahan kpa Yesu yange kaa ér: “De ôron nen ijir sha kwagh u ne nenge tsô ga, kpa ôron nen ijir sha mimi je.” (Yoh. 7:24) Yesu soo ér se dondo ikyav na shi se de kuren mbagen ijir sha kwagh u se nenge sha ashe tseegh tsô ga. Se lu timen sha akaa atar ken ngeren ne, a ka a na ior ve kure mbagen ijir sha mnenge u ashee yô. A yô ka, mlu u kwavyolough u or shin ape nan dugh la, kua inyaregh ki or lu a mi la man  anyom. Se nenge er se fatyô u dondon tindi u Yesu la sha akaa ne cii yô.

3, 4. (a) Lu nyi i na ve apostoli Peteru gema gbenda u nengen Atôatyev laa? (Nenge foto u a lu sha mhii u ngeren ne la.) (b) Ka mimi u nyi Yehova wase Peteru u kavena?

³ Shighe u i kaa a apostoli Peteru ér a za hen ya u Ortyôtyev ugen ken Sesaria u i yilan un ér Korneliu la, nenge ase er yange Peteru una lu henen sha akaa kpishi ken ishima yô. (Aer. 10:17-29) Peteru yange vese a mnenge u Mbayuda mbagen kpa lu a mi ér Atôatyev nga wang ga la. Nahan kpa, akaa va sember eren Peteru a na un gema mhen na la yô. Ikyav i tesen yô, Peteru sember nengen mpase u sha mnenge ugen. (Aer. 10:9-16) Lu nyi Peteru nenge a mi? A nenge a ikyagh lu senen sha a ishôso i wang ga shimi. Maa imo due ér: “Peteru, Mough sha, sôngo, ya!” Kpa Peteru venda u yan kwaghyan la, a venda shia shia kuma kwa tar je. Hanma kwa u Peteru una venda yô, imo la i kaa a na ér: “Kwagh u Aôndo A ser un yô, we de kera kaan wer, ka u wang ga ze.” Mpase u sha mnenge la been kera yô, ishima za Peteru iyol kpishi, a gba henen sha kwagh u imo shon lu ôron un jim yô. Ica gba ga maa ior mba Korneliu tindi yô va nyôr. Icighan jijingi ôron Peteru kwagh u una er yô, a mough a yem vea ior mba Korneliu tindi ve la imôngo.

⁴ Luun er Peteru kure ikyaa sha mnenge u ashee nahan, yange ma tsa ma nyôr nguhar hen ya u Korneliu kpa? Ga cii. Mbayuda yange ve zaan hen uya mba Atôatyev ga. Er mpav lu hen atô u Mbayuda a Atôatyev kpoghuloo nahan kpa, lu nyi i na ve Peteru zaa? Mpase u sha mnenge u i tese Peteru la gema mhen na, shi icighan jijingi kpa na un vangertiôr. Peteru yange ongo mkaanem ma Korneliu ôr la yô, jijingi mgbegha un ôr kwagh nahan ér: “Mimi je, m kav, Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” (Aer. 10:34, 35) Kwagh u Peteru va mase kaven ne doo un je gande! Nahan lu u mimi u Peteru va kav sha kwagh u msange u sha dooshima ne una bende a Mbakristu cii nena?

5. (a) Ka nyi Yehova a soo ér Mbakristu cii ve kava? (b) Aluer se fa mimi je kpa, ka nyi alaghga ia lu ken a vese here?

⁵ Yehova er tom a Peteru u wasen Mbakristu cii u kaven ér Un sangen sha dooshima ga. Yehova yô, tôôn ér ma ikyurior shin kweior shin tar shin zwa ugen hemba doon a ugen ga. Hanma nomsoor shin kwase u nan cie Aôndo shi nan eren perapera cii yô, ka a rumun nan. (Gal. 3:26-28; Mpa. 7:9, 10) Alaghga we kpa u lumun wer kwagh ne ka mimi. Kpa aluer u vese hen ya shin tar u kwagh u mbavia a mbavia a dumbur, shi i nyaghen ior shi mpav a lu her kpishi di ye? Alaghga u hen wer u ngu a ieren i sangen sha dooshima la ken a we ga, kpa alaghga ken atô u ishima you yô, kwagh ne una lu. Peteru u yange wase ior u kaven er Aôndo a lu u sangen a sange ga la je kpa, va tese ieren i sangen a sange la ken hemen. (Gal. 2:11-14) Nahan se er nan ve se dondo kwaghwan u Yesu la, se de u kuren ior ijir sha mnenge u ashee?

6. (a) Ka nyi ia wase se u been a ieren i sangen a sange la ken ishima yase kera elegh eleghe? (b) Ripoti i ortamen ugen yange nger yô, i tese ér nyi?

⁶ Gba u se tôvon sha mlu wase zulee, se nôngon ser a zua sha kwagh u Mkaanem ma Aôndo ma tese la. Ka nahan ve aluer mpav shin ieren i nyaghen ior la ia lu ken a vese kpa se fa ye. (Ps. 119:105) Se fatyô u pinen ma ijende yase i se ne i jighjigh yô ser, i ôr se aluer i nenge a kwagh ken avese u a tese ér se mba a mpav ken a vese her yô; aluer se ayol a ase se nenge a mi ga je kpaa.  (Gal. 2:11, 14) Alaghga ieren ne i wa amishe ken a vese yem ica je yô, se fa ser se mba a mi kpaa ga. Nenge ase ikyav sha kwagh u ortamen ugen. Yange nger ripoti tindi a mi shin afishi a branci sha kwagh u anmgbian ugen vea kwase na mba ve eren tom u pasen kwagh hanma shighe, shi ve tsee ishima kpishi yô. Nom ne lu or u ken kweior u ior kpishi nengen ér ve gba kwagh ga yô. Ortamen u nger ibaver ne la hen ér un yô un ngu a imba mnenge ne sha kweior la ga. A ôr akaa a dedoo kpishi sha iyol i nom la. Nahan kpa mase kuren ripoti la ér: “Er a lu ken [kweior la] nahan kpa, ieren man mlu u uma na wase mbagen u kaven wang ér, aluer or [due ken kweior la] tsô maa tese ér nan ngu côu côu shin nan ngu sha kwarkyar ga ze; gadia ka mlu u ior mba ken [kweior la] je la.” U nenge a kwagh u se lu ôron kpa? Aluer ka nyi iantom se lu sha mi je kpa, gba u se tôv ayol a ase tsema tsema shi se kegh a kegh iyol u lumun iwasen sha er se fa aluer ieren i sangen a sange la i shi ken ishima yase kpuaa kpaa. Shi ka nyi igen kpa se fatyô u erene?

7. Se tese ser se mba bughun ishima yase gbangelaa nena?

⁷ Aluer se bugh ishima yase gbangelaa yô, se na dooshima una kar a imbishi ieren i sangen a sange la. (2 Kor. 6:11-13) Nahan we u hembe lun vea ior mba ve lu kwavyolough er we nahan shin ne lu ityô i môm shin tar môm shin ne lamen zwa mômô? Aluer ka nahan yô, nungwan iyol a ior mbagen kpaa. U fatyô u kaan a ior mba ve dugh sha ajiir agen kposo yô wer, ne due kwaghpasen imôngo, shin u lôhô ve iwer hen ya wou gayô ma iniongo. (Aer. 16:14, 15) Aluer u er nahan yô, ishima you ia iv a dooshima poo, nahan ieren i sangen a sange la ia kera zua a ian i teman ken ishima you ga. Nahan kpa akaa agen kpa nga a ka a na se kure ior ijir sha mnenge u ashee yô. Hegen se time sha kwagh u inyaregh ki or lu a mi la.

8. Levitiku 19:15 tese ér aluer or ngu a inyaregh shin nan ngu icanor yô, kwagh la una na se nengen nan nena?

⁸ Inyaregh ka kwagh u una fatyô u benden a gbenda u se nengen mbagen yô. Levitiku 19:15 kaa ér: “De gbe tan ken icanor tsô ga, de hembe wan shagbaor iko kpaa ga, kpa ôr or u nan we ndor a we ijir sha perapera je.” Kpa aluer or ngu a inyaregh shin nan gba ican yô, alaghga kwagh la una na se nengen nan nena?

9. Ka mimi u nyi yange Solomon nger, man kwagh la tese se nyi?

⁹ Icighan jijingi yange mgbegha Solomon nger kwagh ugen u mimi u uumace mba ve yen ne ve eren, man a vihi kpishi yô. A ôr ken Anzaakaa 14:20 ér: “Icanor yô, or u wan ndor a nan je kpaa ka i kera doo nan a nan ga; kpa ornyar yô, ka nan lu a ahuraior kpishi.” Injakwagh la tese se nyi? Aluer se wa ikyo ga yô, a sar se u yan ijende a anmgbianev mba ve lu a inyaregh la kpa se gema se lu palegh mba ve lu a kwagh ave ga la. Er nan i doo u gbenda u se nengen ior la ua har sha kwagh u ve lu a mi ave la tsô ga?

10. Ka zayol u nyi Yakobu yange ta Mbakristu icin sha mi?

¹⁰ Aluer se mba eren kwagh a ior kposo sha ci u mba a inyaregh shin mba atsanaior yô, kwagh la una va a mpav ken tiônnongo. Orhenen Yakobu yange nger ér kwagh ne lu van a mpav ken atôônanongo sha ayange a mbaapostoli la. (Ôr Yakobu 2:1-4.) Gba u se wa ikyo sha er zayol ne una nyôr ken atôônanongo a ase nyian ga yô. Nahan se palegh ieren i kuren mbagenev ijir sha mnenge u ashee la nena?

11. Aluer or ngu a inyaregh shin nan gba ican yô, maa kwagh la tese ér nan ya ikyar a Yehova? Ta iwanger.

¹¹ Gba u se nengen anmgbianev asev er Yehova kpa a nengen ve la. Yehova nengen  ér or gba kwagh sha ci u nan ngu a inyaregh shin nan ngu icanor yum ga. Ka inyaregh ki se lu a mi shin ican i se gbe la ia na se lu kôôsôô a Yehova ga. Ka mimi Yesu yange kaa ér “ka ican u ornyar a̱ nyôr sha tartor u Sha,” kpa mayange kaa ér nana fatyô ga ze. (Mat. 19:23) Nahan kpa, shi Yesu kaa ér: “Saan ne iyol, ne mbaatsanev, gadia tartor u Aôndo ka u wen je.” (Luka 6:20) Kpa kwagh la tese ér mbaatsanev cii vea kegh ato a loho u Yesu shi vea zua a averen a doon tsung ga. Mbaatsanev kpishi yange ve kegh ato a na ga. Kwagh u se lu ôron jighilii yô, doo u Se kure ikyaa ser aluer or ngu ornyar shin nan ngu icanor yô, maa tese ér nan ya ikyar a Yehova kôôsôô ga.

12. Ka kwaghwan u nyi Ruamabera a we mbainyarev man mbaatsanev ciili?

¹² Se mba a anmgbianev mba nomso man mba kasev kpishi, mbagen ka mbainyarev mbagen ka atsanaior. Kpa ve cii mba civir Yehova a ishima i môm, man kwagh ne ka iveren. Ruamabera wa mbainyarev kwagh ér ve de “veren ishima sha inyaregh ki i fe kwagh sha min ken hemen ga la ze, kpa ve̱ ver ishima sha Aôndo.” (Ôr 1 Timoteu 6:17-19.) Shi Mkaanem ma Aôndo wa mbainyarev man mbaatsanev cii kwagh ér, inyaregh ki de saren ve ga. (1 Tim. 6:9, 10) Sha kpôô yô, aluer se bugh ashe ase, se mba nengen anmgbianev asev er Yehova kpa a nengen ve la yô, se palegh u kuren ve ijir sha kwagh u ve lu a mi shin ve lu a mi ga la. Nahan kpa anyom a or di ye? Doo u se kuren mbagen ijir sha anyom a vee? De se nenge.

13. Ruamabera tese se nyi sha kwagh u nan mbaganden iciviri?

¹³ Ruamabera wa se kwagh kwa kimbir kimbir ér se naan mbaganden icivir. Levitiku 19:32 kaa ér: “Mough tile sha, sha ishigh ki or u menden ivu, civir ishigh ki tamenor, cian Aôndo wou.” Anzaakaa 16:31 di kaa a vese ér “ivu ka tsar u sha ityou u icivirigh, mba zuan a i sha gbenda u perapera.” Paulu kpa yange wa Timoteu kwagh ér a de zehe a organden ga kpa a nengen imbaor la ér nan ngu ter. (1 Tim. 5:1, 2) Er Timoteu pande lu a tahav sha anmgbianev mbaganden mban nahan kpa, gba u una eren kwagh a ve sha mhôôn man sha icivir kpaa.

14. Ka hanma shighe nahan a gba u se wa organden kwagh shin se kôôm or u nan lu tamen a vese?

¹⁴ Nahan kpa, se dondo kwaghwan la a za kighir nena? Ikyav i tesen yô, aluer organden u ken tiônnongo nan ngu eren isholibo sha apera shin nan ngu samber a kwagh u a vihi Yehova ishima yô, gba u se gbaa kenger tsô, se bugh zwa gaa? Mayange kpa Yehova una kure or ijir sha mnenge u ashee ga shi una gba ungwan ato sha isholibo i or sha ci u nan ngu organden yum ga. Nenge ase kwagh u Yesaia 65:20 a kaa ne, ér: “Orsholibo . . . u nan kom anyom deri la [kpa], ifan ia kôr nan.” Esekiel kpa yange nenge a imbakwagh ne ken mpase u sha mnenge. (Esek. 9:5-7) Sha nahan yô, ka Yehova u a lu Or u tsan sha won la jighilii, i gbe u se na un icivir ye. (Dan. 7:9, 10, 13, 14) Aluer se er nahan yô, se cia u wan or kwagh shighe u i gbe u se wa nan kwagh ga, aluer ka igyandenor je kpaa.—Gal. 6:1.

15. Ka nyi se hen ken apostoli Paulu sha kwagh u nan agumaior a ken tiônnongo iciviri?

¹⁵ Kpa agumaior a ken tiônnongo di ye? U nengen a nena? Apostoli Paulu yange nger washika hen gumor Timoteu kaa a na ér: “Ma or nana̱ de lahan we er u ngu wanye ga, kpa hingir mbananjighjigh ikav sha kwaghôron man sha zende man sha dooshima man sha jighjigh u nan man mlu u wang kpaa.” (1 Tim. 4:12) Shighe u Paulu nger mkaanem man la, alaghga tsô Timoteu hemba anyom 30 kpuaa. Nahan kpa Paulu na un ityom i vesen. Se fa kwagh u yange na ve Paulu wa Timoteu  kwagh nahan ga, kpa kwagh la wanger wang. Gba u se kuren agumaior a ken tiônnongo ijir sha anyom a ve tseegh ga. Doo u se umbur ser Ter wase Yesu kpa yange er tom na shin tar cii kure shighe u lu anyom 33 tseegh yô!

16, 17. (a) Mbatamen vea er nan ve vea mase kuren ikyaa ér anmgbian u nomso nan kuma u a ver nan diakon shin ortamene? (b) Mnenge wase shin mnenge u ior ve lu a mi hen ityô yase la, una fatyô u hendan a kwagh u Ruamabera a tese nena?

¹⁶ Alaghga se due hen ijiir i i nengen ér agumaior gba kwagh ga yô. Aluer kwagh ngu nahan yô, alaghga a taver mbatamen mba ken tiônnongo u veren agumaior a a kom la mbatamen shin udiakon. Doo u mbatamen vea umbur ér, ruamabera ver anyom a or a nyôr cii ve a ver nan diakon shin ortamen ga. (1 Tim. 3:1-10, 12, 13; Titu 1:5-9) Aluer ortamen ngu eren kwagh sha ieren i ityôô yô, nan ngu eren kwagh u Ruamabera a tese ga. Mbatamen ve de kur ikyaa sha kwagh u agumaior sha mnenge ve shin sha aeren a ityôô ga, kpa i lu sha atindi a ken Mkaanem ma Aôndo.—2 Tim. 3:16, 17.

¹⁷ Nenge ase er aluer mbatamen mba dondon mnenge u hen ijiir ve ve, kwagh la una yange ve u veren anmgbianev mba nomso sha ityom ken tiônnongo yô. Ken tar ugen la yange i ver anmgbian ugen diakon shi i ver un nengen sha akaa kpishi, shi mbatamen kpa lumun ér ieren na zua sha aeren a Bibilo i tese ér aluer sar or pe lun ortamen ve nana lu a mi yô. Kpa i lumun u veren anmgbian la ortamen ga. Mbatamen mbagenev kpuaa sendegh ér ngu iyev iyev yum, ngu a tsoghul sha ishi a kuma u lun ortamen ga. Kwagh er vihi yô, i venda u veren anmgbian la ortamen sha ci u mlu na u sha iyol. Se tese di ikyav i môm tsô, nahan kpa ibaver tese ér ior mba a imba mnenge ne nahan sha ajiir kpishi sha tar. Nahan yô, gba hange hange u se suur sha kwaghwan u Ruamabera, a lu mnenge wase shin kwagh u i eren hen ityô yase la ga! Ka cii kwagh u se er ve se lu dondon kwagh u Yesu kaa ér se de u ôron mbagenev ijir sha mluashe ve je la.

18, 19. Ka nyi i gbe u se er ve se nengen mbagen er Yehova kpa a nengen ve laa?

¹⁸ Er se yen nahan kpa, se fatyô u henen u nengen ior mbagen er Yehova u a sangen a sange ga la kpa a nengen ve nahan. (Aer. 10:34, 35) Kpa a gba u se nôngo kwagh kpoghuloo shi hanma shighe yô, se umbur kwagh u Mkaanem ma Aôndo ma tese la. Aluer se er tom a akaawan la yô, se za ikyura sha u kuran tindi u Yesu wa ér se de u ôron mbagen ijir sha mnenge u ashee la.—Yoh. 7:24.

¹⁹ Ica a gba ga tsô Tor wase Yesu Kristu una va ôr uumace cii ijir man a lu sha kwagh u a nenge sha ashe tsô ga, shi una kure kwagh sha er a ongo sha ato na tsô ga, kpa una ôr ijir sha perapera. (Yes. 11:3, 4) Nenge er a doo sha wono!