NGEREN U TIMEN SHA MI 41
Tile sha Mimi sha Shie u “Zegecan” La
“Yehova a doo ne ishima, ne mba ne civir un sha mimi cii! Yehova kor mbajighjigh.”—PS. 31:23, NW.
ICAM 129 Se Wa Nen Ishima Her
KWAGH U I TIM SHA MI KEN NGEREN NE YÔ *
TÔÔ ase wer mbahemenev mba tar ne yôô kwagh u i ndera keghen ngise ér vea yôô la. Ve yôô ér: “Bem gba, zayol kera ngu ga!” Alaghga vea lu timin akende kaan ér i gbe je tar ngu a doo nahan ga. Vea soo ér se hen ser ve sôr mbamzeyol mba tar ne cii. Kpa vea lu a gbenda môm u yangen kwagh u una dondo la ga! Sha ci u nyi? Kwaghôron u profeti u ken Bibilo kaa ér, “maa fese je mtim una va sha a ve kpoo, . . . vea war mayange ga.”—1 Tes. 5:3.
1-2. (a) Ka nyi ica a gba ga je iyange igen mbahemenev mba tar ne vea yôô? (b) Ka mbampin mba nyi i gbe u a na mlumun sha mi?
2 Nahan kpa, mbampin mba injaav gema mba, mba i gbe u a na mlumun sha mi yô: Ka nyi ia er sha shie u “zegecan” laa? Ka nyi Yehova una ver ishima ér se er sha shie laa? Ka nyi se er hegen sha er se wa agoyol u va tilen sha mimi sha shie u zegecan laa?—Mat. 24:21.
KA NYI IA ER SHA SHIE U “ZEGECAN” LAA?
3. Er i ôr ken Mpase 17:5, 15-18 nahan, Aôndo una tim “Zegebabilon” nena?
3 Ôr Mpase 17:5, 15-18. A tim “Zegebabilon” kera! Er se vande ôron nahan, akuraior aa lu a kwagh môm u eren sha kwagh u una lu zan hemen hen shie ne ga. Sha ci u nyi? Sha ci u “Aôndo [una] wa ken asema a ve sha u ve̱ er sha awashima na.” Awashima na shon ka nyi? Ka u timin tartor u kwaghaôndo u aiegh sha tar cii kua Mbakristu Mbaaiev. * Aôndo una wa awashima na ken ishima i “akor pue” a “inyamkyume i̱ nyian dindee” la. Akor pue la tile sha ityough ki ugomoti mba ve lu suen “inyamkyume” i i lu Mzough u Ityar Cii la. (Mpa. 17:3, 11-13; 18:8) Shie u mbahemenev mba gomoti vea gema a ver ishigh u been a kwaghaôndo u aiegh kera la, a lu mhii u zegecan je la. Kwagh ne una er kwa môm kpoo shi a kpiligh hanma or sha tar cii iyol.
4. (a) Ka nyi alaghga ia na ve mbahemenev mba tar ne vea mough a ta num sha kwaghaôndo u aiegh? (b) Ka nyi alaghga ior mba yange ve zaan ukwaghaôndo mban la vea ere?
4 Se fa ityôkyaa i ia na ve mbahemenev mba gomoti vea mough a ta num sha Zegebabilon jighilii ga. Alaghga vea kaa ér ka ukwaghaôndo ve ne ve i lu kwagh u or a tema a kpe nan iyol ga ye, shi ka ve shi wan ave sha akaa a patii. Gayô vea kaa ér iniongo kwaghaôndo ne ombo inyaregh kua akaa kpishi mba a mi. (Mpa. 18:3, 7) A shi nan kpa, shie u mbahemenev mba gomoti vea ta num sha Zegebabilon la, a lu hanma or ken kwaghaôndo u aiegh cii a tim nan ga. Kpa, ka inja er ugomoti mban vea ta num a lu sha iniongo i ukwaghaôndo mban nahan. A timin iniongo i ukwaghaôndo mbara kera je, mba yange ve zaan mbaadua mba shon la vea mase kaven er mbahemenev mba kwaghaôndo vev mban ve fetyô u kuren uityendezwa vev ga yô, nahan vea kera lumun ér kwagh a zua ve a ukwaghaôndo mbara ga.
5. Ka nyi Yehova a tendezwa ér una er sha kwagh u zegecan man ka sha ci u nyi?
5 Bibilo kera pase shie u a tôô u timin Zegebabilon la ga. Nahan kpa se fa tsô ser kwagh la una tôô shie kpishi ga. (Mpa. 18:10, 21) Yehova tôndozwa ér una “pande ayange” a zegecan la kera sha er “mba a tsough ve” la vea war shi mcivir u mimi kpaa una war yô. (Mar. 13:19, 20) Nahan kpa, ka nyi Yehova una soo ér se er hen shie u zegecan una hii la zan zan shie u ityav mbi Armagedon mbia hii laa?
ZA HEMEN U CIVIR YEHOVA KEN MCIVIR U MIMI
6. Er nan ve u palegh kwaghaôndo u aiegh la tseegh a kom ga?
6 Er yange se hen ken ngeren u a kar la nahan, Yehova soo ér mbacivir un ve palegh Zegebabilon elegh elegh. Nahan kpa gba u se er kwagh a hemba di u palegh kwaghaôndo u aiegh tsô la. Gba u se kange ishima u suen kwaghaôndo u mimi, ka mcivir u wang u Yehova ne je la. Nenge ase igbenda ihiar i se fatyô u eren kwagh ne yô.
Mayange se bunden nen mbamkombo asev ga, aluer ka ken ashie a taver je kpaa (Nenge ikyumhiange i sha 7) *
7. (a) Se za hemen u kuran atindi a Yehova a we sha kwagh u aeren a wang la nena? (b) Mbaheberu 10:24, 25 pase er i gbe hange hange u kohol imôngo, hemban je yô, hegen la nena?
7 Hiihii yô, gba u se za hemen u kuran atindi a Yehova a we sha kwagh u aeren a wang la. Mayange se lumun a gbenda u tar u eren kwagh la kua hôngor u ú eren la ga. Ikyav i tesen yô, se mba lumun a ma ieren i ijimbagh i môm kpaa ga. Kwagh u nomso vôson nomso shin kasev vôson kasev man u nomsoor yaven a nomsoor gayô kwase yaven a kwase la kpa ka ieren i se lumun a mi ga yô. (Mat. 19:4, 5; Rom. 1:26, 27) Sha uhar yô, gba u se za hemen u civir Yehova vea mba civir Yehova mbagen imôngo. Se mba eren kwagh ne hanma ijiir i se fetyô cii; aluer ka ken Ayou a Tartor gayô ken uya mba anmgbianev shin ka ken myer je kpaa. Aluer ka nyi je i er kpa, ieren i kohol imôngo civir Yehova la ka kwagh u mayange je se gbihi ga. Jim je yô, gba u se “hemba eren nen nahan cii, er [se] nenge iyange la i lu mgbôghom yô.”—Ôr Mbaheberu 10:24, 25.
8. Loho u se pasen ne a shi nan kpa ua va gema ken hemen nena?
8 Ashi nan kpa loho u se lu pasen shie u zegecan la, ua lu kposo. Hegen ne se mba pasen ior loho u dedoo u Tartor shi nôngon sha afatyô wase cii geman ior hingir mbahenen. Nahan kpa shie la, loho u se lu pasen la ua tsee; Bibilo kar u sha awombo. (Mpa. 16:21) Se lu yôôn mtim u a sôôn van sha tar u Satan ne la. Kpa shie a kuma tsô se fa loho shon u se lu pasen la jighilii kua er se lu pasen u la kpaa. Nahan tsô se lu va eren tom a igbenda i se ndera eren tom u pasen kwagh ken anyom deri môm a a kar ne shinii? Shin se lu eren tom a igbenda igene? Ingira kpa a gba u se kegh, a va kuma tsô se fa. Nahan kpa, aluer ka nyi loho je se lu pasen kpa, ikyav tese ér se lu a ian i icivirigh i yôôn loho u ijirôron i Yehova a mciem shio!—Esek. 2:3-5.
9. Akuraior aa er nena sha loho u se lu pasen laa, nahan kpa doo u se lu a vangertiôr ser nyi?
9 Ikyav tese ér a shi nan kpa loho wase la ua na ishima ia nyima mbahemenev mba tar ne ker, vea soo ér vea bee a vese kera gbindigh gbindigh. Er hegen kpa se suur sha Yehova ken tom wase u pasen kwagh ne nahan, a gba u shie la kpa se suur sha a na. Se fatyô u lun a vangertiôr nahan je ser Aôndo wase una na se agee a eren ishima na.—Mika 3:8.
WA AGOYOL KEGHEN SHIE U A VA TA NUM SHA IOR MBA AÔNDO LA
10. Er yange i tsengaôron ken Luka 21:25-28 nahan, akaa a a lu zan hemen sha shie u zegecan la aa na a lu ior kpishi nena?
10 Ôr Luka 21:25-28. Shie u zegecan la, a kpiligh ior iyol u nengen er hanma kwagh u yange ve nenge lu zan hemen doo doo sha tar cii, una kôr a gema ityough tingir kwa môm kpoo yô. “Ican a tser” ve, vea lu cian ér alaghga ku ua kohol ve ken shie u hemban vihin cii u uumace vea nyôr ker ne. (Sef. 1:14, 15) Shie la, uma una hemba taver cii; man ior mba Yehova je kpa a lu ve kposo ga. Shi er se lu ior i tar ne ga yô, se ya ican sha igbenda igen. Alaghga akaa a hange hange a uma ne agen je kpa aa ban se.
11. (a) Mbahemenev mba tar ne vea va gema ashe cii a haa sha Mbashiada mba Yehova sha ci u nyi? (b) Er nan ve i gbe u se cia zegecan ga?
11 A zaan deghôô yô, ishima ia vihi ior mba yange i tim ukwaghaôndo vev la, ér Mbashiada mba Yehova mba eren kwaghaôndo ve her yum. Alaghga vea yem samber a ishimavihin ve la sha Intanet kpaa sha er ior ve fa er ishima i vihi ve tsung yô, nahan a hingir kpuunuu. Akuraior kua orhemen ve Satan, vea kôr se ihyom tsung er i lu kwaghaôndo wase tseegh a mase shin her yô. Kwagh la una tese ér ve kôrcio u kuren awashima ve u been a ukwaghaôndo sha tar kera cii la ga. Nahan vea gema ashe cii a haa sha a vese. Ka hen zum ne, akuraior aa hingir Gogi u Magogi ye. * Vea kohol imôngo u va tan num sha ior mba Yehova a agee ve cii. (Esek. 38:2, 14-16) Alaghga ishima ia hii u nyian se sha kwagh u akaa aa va lu zan hemen shie u zegecan la, hemban je yô, er se fe hanma kwagh u una va er vindi vindi ga yô. Nahan kpa, kwagh u se fe yô: Ityôkyaa ngi i se cia zegecan la ga. Yehova una lu wan se akaa a se ungwa ve se war yô. (Ps. 34:19) Shie la se fatyô u ‘tilen sha jighilii shi kenden ityouv sha’ sha ci u se fa je ser ‘myom wase zurum a zurum je.’ *
12. “Wanakiriki u jighjigh man u fan kwagh” ndera wan se agoyol sha kwagh u a lu van ken hemen la nena?
12 “Wanakiriki u jighjigh man u fan kwagh” hii u wan se agoyol u va tilen sha mimi sha shie u zegecan la shie kar hegen. (Mat. 24:45) A er kwagh ne sha igbenda kpishi. Gbenda môm yô, ka mbamkohol mba vesen mba sha shie vough mba hii ken inyom i 2016 zan zan 2018 la. Akaaôron a sha mbamkohol mban yange taver se ishima u seer lun a aeren a i gbe u se lu a mi er se mgbôghom a iyange i Yehova ne. De se hide se sav aeren ne kpase.
SEER TAVER IEREN YOU I MIMI, WAAN ISHIMA SHI LU A ISHIMATAVER
Wa agoyol hegen sha er u va war “zegecan” yô (Nenge ikyumhiange i sha 13-16) *
13. Se seer kangen ishima u civir Yehova sha mimi nena, man er nan i gbe u se er kwagh ne hegene?
13 Ieren i mimi: Mkohol u vesen u ken inyom i 2016 la yange lu a itinekwagh ér “Za Hemen u Civir Yehova sha Mimi!” Mkohol ne yange tese se ér aluer se ya ikyar kangenaa vea Yehova yô, se za hemen u civir un sha mimi. Shi yange i umbur se ér se fatyô u kporom ikyua a Yehova sha u eren msen shi henen Mkaanem nam kpoghuloo. Aluer se er akaa ne yô, sea tagher a mbamtaver nan nan kpa, se hemba ve. Er zegecan a zurum ne, gba u se fa ser, er se lu civir Yehova sha mimi shi suen Tartor na ne, se hemba tagher a akaa a karen mtil sha mimi wase cii. Ka keng ior vea naha se tar. (2 Pet. 3:3, 4) Ityôkyaa i vesen i môm i ior a er a vese nahan yô, a lu sha ci u se venda u suen tar u Satan ne. Gba u se taver mtil sha mimi wase hegen sha er se va za hemen u civir Yehova sha mimi sha shie u zegecan la yô.
14. (a) Ka nyi ia va gema sha kwagh u anmgbianev mba ve lu hemen shin tar laa? (b) Er nan ve a gba u se tile sha mimi hen shie laa?
14 Shie u zegecan la, a lu anmgbianev mba ve lu hemen hegen la vea lu hemen ga. Zegecan una hiin kera yô, mba i shigh ve mkurem la cii a yem a ve sha, vea za kohol imôngo u va nôngon ityav mbi Armagedon. (Mat. 24:31; Mpa. 2:26, 27) Kwagh ne tese ér Mbahemenev mba Shin Itine vea kera lu vea vese shin tar hen shie la ga. Nahan kpa, zegeikpelaior ia lu sarem sarem ga. A tsua anmgbianev mba ve kom yô, ken iyongo igen la, vea lu hemen. A gba u se tese ser se tile sha mimi hen Yehova sha u suen anmgbianev mbara shi dondon akaa a Aôndo una lu wan se sha ikyev ve la. A gba u se er nahan keng ve se war ye!
15. Se taver ishimawan yase nena, man hii nan i lu hange hange u se er kwagh ne hegene?
15 Ishimawan: Mkohol u vesen u ken inyom i 2017 la yange lu a itinekwagh ér “De Gbe Uwer Ga!” Mkohol ne yange wase se u seer lun a ishimawan. Yange se hen er i lu shie u akaa a doo tseegh se fatyô u wan ishima ga yô. Se fatyô u seer lun a ishimawan sha u suur sha Yehova. (Rom. 12:12) Mayange se hungur nen ityendezwa i Yesu ne ga. Yange kaa ér: “Or u nan taver ishima zan zan mkur la a yima nan.” (Mat. 24:13) Kwagh u Yesu ôr ne tese ér gba u se za hemen u tilen sha mimi aluer se tagher a mbamtaver nan nan kpaa. Aluer se mba wan ishima a hanma kwagh u karen jighjigh wase hegen yô, se seer taver mlu wase cii ve zegecan una hii ye.
16. Ka nyi ka i tese ér se taver ishima, man se seer lun a ishimataver hegen nena?
16 Ishimataver: Mkohol u vesen u ken inyom i 2018 la yange lu a itinekwagh ér “Taver Ishima!” Mkohol ne yange umbur se ér ka mfe wase shin akaa a se fe u eren la aa tese ér se taver ishima ga. Er ka i gba u se suur sha Yehova ve se lu a ishimawan nahan, ishimataver kpa kape i lu je la. Se er nan ve se hemba suur sha Yehova ciili? Se er kwagh ne sha u ôron Mkaanem nam hanma iyange shi gbidyen kwar sha gbenda u Yehova yima ior nav sha ayange a karen la. (Ps. 68:20; 2 Pet. 2:9) Shie u ugomoti vea ta num sha a vese la, a gba u se taver ishima shi se suur sha Yehova a hemba ave a tse. (Ps. 112:7, 8; Heb. 13:6) Aluer se suur sha Yehova hegen yô, se taver ishima zum u Gogi una va ta num sha vese la. *
VER ASHE KEGHEN MYOM WOU
Ica a gba ga tsô Yesu vea akumauitya a na a sha vea va ityav mbi Armagedon sha u va timin mbaihyomov mba Aondo! (Nenge ikyumhiange i sha 17)
17. Er nan ve i gbe u se cia Armagedon ga? (Nenge foto u a lu sha igbende la.)
17 Er yange i pase ken ngeren u a kar la nahan, se kpishi i mar se ka ken ayange a masejime ne. Shi se mba a ishimaveren i va waren zegecan la. Kwagh u una mase tan mkur u tar ne ikpi yô, ka ityav mbi Armagedon. Nahan kpa se mba a kwagh u cian ga. Sha ci u nyi? Sha ci u ityav mbin ka ityav mbi Aôndo. (Anz. 1:33; Esek. 38:18-20; Sek. 14:3) Yehova una naan wada yô, Yesu una hemen ikyumutya i Aôndo u za nôngon ityav. Yesu una lu vea mba i shigh ve mkurem mba ve nder ve yem sha la kua ikpela i mbatyomov. Vea ta num sha Satan kua azôv a na man akumautya a shin tar ne.—Dan. 12:1; Mpa. 6:2; 17:14.
18. (a) Yehova tôndozwa ér nyi? (b) Mpase 7:9, 13-17 na u vangertiôr sha kwagh u ken hemen nena?
18 Yehova tôndozwa ér: “Hanma ityumugh ki i var sha ci u vihin we iyol, ikôl ia lagh ki ga.” (Yes. 54:17) “Zegeikpelaior” i civir Yehova sha mimi ia “due ken zegecan” la uma! Maa vea za hemen u civir un sha mimi. (Ôr Mpase 7:9, 13-17.) Bibilo na se vangertiôr ér a va war se ken hemen! Se fa je ser “Yehova kor mbajighjigh.” (Ps. 31:23, NW ) Mba Yehova a doo ve ishima shi ve wuese un cii a doo ve u nengen er una tsegha icighanti na yô.—Esek. 38:23.
19. Ka nyi i doon tsung i lu keghen se ken hemene?
19 Gbidye ase kwar nenge er ma i nger 2 Timoteu 3:2-5, luun er ivur ne ngi ôron kwagh u ior mba vea va lu ken tar u he, u Satan una lu u tuur ior ken ityô ér ve er afer ga la yô. (Nenge ngeren u a lu a itinekwagh ér “ Er Ior Vea Eren Kwagh hen Shie la Yô” la.) Anmgbian George Gangas, * u yange lu môm ken Mbahemenev mba Shin Itine la ôr kwagh u shie ne kaa ér: “Nenge ase er tar ua doo, shie u a lu anmgbianev mba nomso man mba kasev tseegh vea lu sha tar la sha wono! Ica a gba ga tsô, u zua a ian i icivirigh i lun uma ken tar u he. U lu uma gbem er Yehova nahan. Ka u se lu uma gbem sha won.” Kwagh u se lu veren ashe a mi ne doo je gande!
ICAM 122 Tile Nen Dông, De Kpoghor Nen Ga!
^ par. 5 Se fa je ser ica a gba ga tsô “zegecan” una tser uumace cii. Ka nyi ia er ior mba civir Yehova hen shie laa? Ka nyi Yehova una ver ishima ér se er hen shie shono? Ka aeren a nyi i gbe u se seer lun a mi hegen sha er se va tile sha mimi? Ngeren ne una pase se akaa ne.
^ par. 3 ISHEMBER I I TE IWANGER SHA MI YÔ: Mbakristu Mbaaiev ka ukwaghaôndo shin ior mba ken mbaadua mba ve senge ér ve mba Mbakristu shin mba dondon Kristu kpa ve gem ve civir Yehova sha mimi ga shin ve dondon atindiakaa a na ga la.
^ par. 11 ISHEMBER I I TE IWANGER SHA MI YÔ: Ishember i Gogi u Magogi (shin zum u i yer zevera ér Gogi) la, ka mzough u akuraior a aa kohol imôngo sha u tan num sha mbacivir Yehova sha shie u zegecan la yô.
^ par. 11 Wea soo u seer fan akaa a aa va er zan zan ityav mbi Armagedon mbia kar peven yô, nenge takerada u Tartor u Aôndo Ngu Hemen! la, ityough 21. Wea soo u seer ôron kwagh u num u Gogi u Magogi una va ta sha ior mba Aôndo man er Aôndo una nôngo kwagh sha ci u ior nav sha shie u Armagedon la yô, nenge ityough 17 man 18 ki takerada u ken zwa buter u Pure Worship of Jehovah—Restored At Last! la.
^ par. 16 Mkohol u vesen u ken inyom i 2019 u a lu a itinekwagh ér “Dooshima Been Mayange Ga!” la tese ér Yehova una za hemen u kuran se nahan se mba a kwagh u nyian se ishima ga.—1 Kor. 13:8.
^ par. 19 Nenge ngeren u a lu a itinekwagh ér “His Deeds Follow Him” (Á Hungur a Akaa a Yange Er la Ga) la ken Iyoukura i ken zwa buter i uwer u Disemba 1, 1994.
