YANGE i er Ter u John batisema hingir môm ken Mbashiada mba Yehova, shighe u kwavanyom u 1950 lu yemen u za been la. Ter u John ne lu hen geri u kiriki ugen ken kpentar u Gujarat, tar u India. John vea anngôôv nav mba nomso uhar man mba kasev utar kua ngô ve cii ve zaan adua u Fada kpoghuloo, nahan ve hendan a ter u John sha kwagh u jighjigh na ne.

Iyange igen yô, ter u John tindi un a imbyurugh ér a za na ijende na i ken tiônnongo igen. Kpa sha iyange ne pepe, John vihi iyol kehelee sha ihyôwe shighe u lu bughun panpan u vesen ugen yô. Nahan kpa, er soo u ungwan imo i ter na yô, a kange tsar ikyondo sha ihyôwe u lu duen a awambe la, maa a gba zenden angahar yemen u za nan imbyurugh la.

John za nyer ape i tindi un la yô, ijende i ter na u gba u John a za na un imbyurugh la, lu hen ya ga, lu kwase na, u lu môm ken Mbashiada mba Yehova la tseegh lu her ye. Kwase la ngohol imbyurugh la yô, a nenge er John tôndo ivav sha ihyôwe yô, nahan a kaa ér una wase un. Tsô a za tôô anakwati na u sôron twer u aburabur la, a dugh icigh a ôô ivav la, been yô, a kange ihyôwe shon. Maa a er John tii i tseen wese wese. Hen shighe ne cii, lu lamen a na kundu kundu sha kwagh u Bibilo.

Nahan mnenge u John lu a mi sha kwagh u Mbashiada la hii u geman, maa a pine kwase la mbampin sha atineakaa ahar a un vea ter na ve gba zwa môm sha mi ga la. A pine sha u una fa aluer Yesu ka Aôndo shi aluer gba u Mbakristu vea eren msen hen Maria yô. Er Kwaseshiada ne fa zwa u ityôô u John u Gujarati la yô, a na un mbamlumun ken Bibilo ken zwa shon shi a na un antakerada u“This Good News of the Kingdom” (Loho u Dedoo u Tartor Ne Yô) la kpaa.

John hidi ken ya yô, ôr antakerada ne, nahan a nenge ér ka hiin na u ungwan mimi u Bibilo je la. Tsô a za hen fada na la, za pine un mbampin mba uhar mba pine Kwaseshiada la. Ngur lamen a na ica i gbe ga yô, fada la vihi ishima a na, tôô Bibilo ker un, maa ngor kaa ér: “U hingir Satan! Tesem ape Bibilo i kaa ér Yesu ka Aôndo ga la. Tesem ape Bibilo i kaa ér we u de civir Maria ga la. Tesem ase!” Ieren i fada ne la kpiligh John iyol saa her, nahan a kaa a na ér: “Mayange me kera ta nguhar ken adua u Fada ga.” Shi mayange ta ga!

John maa hii u henen Bibilo vea Mbashiada, shi lumun mcivir u mimi shi hii u eren Yehova tom. Shighe kar yô, mba hen tsombor na mbagenev kpishi kpa er nahan. Nyian ne, John ngu a iyolough sha ihyôwe i ken uwegh nagh ku yanegh, ku yange vihi iyol anyom 60 ken ijime la her. Ka una umbur er yange i tese un erdoo u Mbakristu kwa môm tseegh, ve kwagh ne mgbegha un u civir Yehova sha ayange a uma na jimin cii nahan, i doo un kpen kpen.—2 Kor. 6:4, 6.