Sha iyange i Oktoba 9, 2024 la, Mzough u A Eren Tom u Kuran Annyamev, i yer ér World Wildlife Fund la due a ibaver i zan iyol kpishi sha kwagh u uumace ve lu eren a annyamev yô. Ibaver la tese ér “ken atô u anyom 50 aa kar ne (ka 1970-2020 je la), ingyegh ki annyamev pande je kpilighiyol.” Ibaver la shi kaa ér: “Vea fatyô u kaan ér kwagh u una za hemen ken anyom ataan a ken hemen la, ka un una tese er annyamev vea lu sha tar ne ken anyom aa lu van ken hemen la ye.”

 Ior kpishi ka vea ungwa imba ripoti ne nahan yô, ishima i za ve iyol kpishi, man ka i lu sha inja je. Tar wase u u doo ashe yum ne doo se ishima, nahan ka sea nenge er i lu timin annyamev been yô, i vihi se kpishi. Ka i vihi se sha ci u Aôndo yange wa ishima ér se nengen sha annyamev.—Genese 1:27, 28; Anzaakaa 12:10.

 Sha nahan yô, alaghga u pine wer, ‘Se fatyô u kuran annyamev mba ve lu sha tar ne kpa? Bibilo kaa ér nyi?

 Sea nôngo nan nan kpa, ka se se fatyô u kuran annyamev mba sha tar ga, ka Aôndo una kura ve ye. Bibilo yange i tsenga ôron ken Mpase 11:18, ér Aôndo una ‘tim mba ve lu vihin tar la.’ Ivur Bibilo la tese se akaa ahar:

1.  1. Aôndo una yange ior sha er vea vihi tar ne vindi vindi ga yô.

2.  2. Ica a gba ga tsô Aôndo una er kwagh. Er nan se fe? Ka sha ci u i gbe je ashe nga a ver a ior vea tim annyamev sha tar er i lu nyian ne nahan ga.

 Ka nyi kwagh Aôndo una er sha u been a zayol nee? Una er tom a Tartor na shin gomoti na u sha la, u hemen tar ne cii. (Mateu 6:10) Gomoti u Aôndo la una tese uumace mba ungwan imo i Aôndo sha er vea fa u nengen sha annyamev doo doo yô.—Yesaia 11:9.