Nyian ne, hanma gomoti sha tar yô, kwagh nzughul ker. Ken ityar i i lu inja ér zayol ngu ga je kpa, ka i shi ungwan akaa a ndôhôrshima sha iyol i mbapatii shi asangen a ker kpa a lu hendanaa shi iniongo kposo kposo i shi eren ayôôso sha akaa a patii shi ishamior kpa i hendan a gomoti kpoghuloo je i vihin akaa.

 Bibilo pase ér gomoti u injaa ngu môm tseegh. Alaghga u vande ungwan kwagh u gomoti shon. Ka gomoti u Yesu yange ter kwagh na ken msen u Ter wase la.

•   “Gba keng u ne eren msen sha gbenda ne nahan: ‘Ter wase u sha, i tsegha iti you. Tartor wou u̱ va. I̱ er ishima you shin tar kpaa, vough er i eren sha nahan.’ ”—Mateu 6:9, 10.

 Ka nyi Bibilo i ôr sha kwagh u Tartor laa?

 Tartor la ua lu hemen tar ne sha.

•   Yesu yange yila gomoti la ér “Tartor u sha.” (Mateu 4:17; 5:3, 10, 19, 20) Sha ityôkyaa ne yô, yange kaa ér: “Tartor wam ka u shin tar ne ga.”—Yohane 18:36.

 Tartor la ua kar a hemen sha ityough ki ugomoti mba uumace.

•   Bibilo kaa ér: “Tartor [la] . . . ua hembe ityartor igen ne cii avur avur, ua tim i [ka ityartor i uumace je la], kpa u yô, ua lu gbem sha won.”—Daniel 2:44.

 Tartor shon u i lu Yesu a lu Tor u u la ua lu gbem sha won.

•   Bibilo kaa ér: “Mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.—Daniel 7:13, 14.

 Tartor la ua va a bem sha tar shi ior vea tema kundu kundu, kwagh u tan ve mciem iyol una lu ga.

•   Bibilo kaa ér: “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.—Mika 4:4.

 Shighe u Yesu lu shin tar la, yange na shighe na cii sha u “pasen loho u dedoo u Tartor.” (Mateu 9:35) Shi yange tsenga ôron ér:

•   “A pase loho u dedoo u Tartor ne a tser tar sha u u lu shiada hen akuraior cii, ka zum la mkur una va ye.”—Mateu 24:14.

 Nyian ne, ka pasen loho u dedoo u Tartor la ken ityar i hemban 240 nahan. Se mba kaan a we ser seer henen kwagh u gomoti ne, kua er hemen u gomoti shon ua fatyô u wasen we la.

 Nenge vidio ne Ka Nyi I Lu Tartor u Aôndo?