Ityough 4
Se Gber Bibilo i i Yer Ér New World Translation la sha Ci u Nyi?
Tar u Congo (Kinshasa)
Tar u Rwanda
Vegher ruamabera u Symmachus u a lu a iti i Aôndo ken Pasalmi 69:31 yô, a tsa kuma anyom 1700 shin 1800 nahan
Mbashiada mba Yehova yange ve gber Ubibilo kposo kposo ve samber a mi, shi ve er tom a mi upuembaanyomov imôngo. Kpa se va nenge ser gba u se gber mgem u Bibilo u he, u una hemba wasen ior u zuan a “mfe u mimi,” u Aôndo a soo ér hanma or nana zua mi la. (1 Timoteu 2:3, 4) Sha nahan yô, ken inyom i 1950 la, se hii u gberen avegher a Bibilo i New World Translation la ken zwa Buter, sha gbenda u i lamen ainge la. Hii shighe la je, i gema Bibilo ne sha gbenda u vough ken ijô i hemban er 100 nahan.
Yange kwagh gba sha Bibilo i i taver u kaven ga yô. Shighe ka una karen yô, gbenda u ior ve lamen zwa ve la u gema, shi mbamgem mba Bibilo kpishi wanger ga, shin asember a yange i gema Ubibilo mbara a mi la taver u kaven, sha ci u ior mba kera lamen nahan ga. Heela tseegh ga, i zua a ngeren mba tsev mba vough, mba ve nenge u lun kwaghmôm a ngeren mba Bibilo mba hiihii la, nahan kwagh ne na yô, i hemba zuan a mkav sha akaa a yange i nger ken uruamabera mba ken zwa Heberu man ken zwa Shiria kua zwa Grika la.
Yange kwagh gba sha mgem u Bibilo u a pase mkaanem ma Aôndo vough yô. Gba u mbageman Bibilo vea gema mkaanem ma yange i hii ngeren Bibilo a mi la vough, gba u vea nyôôso kwagh sha mkaanem ma Aôndo yange na i nger la ga. Nahan kpa, ken mbamgem mba Icighan Ruamabera kpishi, i dugh iti i Aôndo i Yehova la kera.
Yange kwagh gba sha mgem u Bibilo u una na Aôndo u a ne i nger i la icivir yô. (2 Samuel 23:2) Er i tese ken foto u vegher ruamabera u a lu shin heen ne nahan, ken Bibilo i New World Translation la, i hide i wa iti i Yehova sha ajiir a yange iti ne lu ken ngeren mba Bibilo mba ngise ngise mbara kuma er kwa 7,000 nahan la. (Ekesodu 6:3) Yange i tôv sha akaa vighe vighe anyom imôngo cii ve, se mase zuan a Bibilo i i doo u ôron, i i pase kwagh u Aôndo wang ne ye. Wea lu a Bibilo i New World Translation la ken zwa wou shin wea lu a mi ga kpa, se mba taver we ishima ser nôngo kpoghuloo gema ôron mkaanem ma Yehova hanma iyange.—Yosua 1:8; Pasalmi 1:2, 3.
-
Yange se nenge ser, gba u a gber mgem u Bibilo u he sha ci u nyi?
-
Ka nyi i doo u hanma or u i sar nan u henen kwagh u a lu ishima i Aôndo la cii nana eren hanma iyange?
