U ER kwagh a Yehova Aôndo kpa?— Á soo ér ú ôron kwagh a na. Mbá yer kwagh u ôron a Aôndo la ér msen u eren. Ashighe kpishi Yesu yange a ôr kwagh a Ter na u sha la. Ashighe agen yange una ôron kwagh a Aôndo yô, á soo ér una lu tswen. Kwagen la, Bibilo kaa ér, “A unde sha uwo, Un tswen, sha u za eren msen. Iyange i mir yô, lu her tswen.”—Mateu 14:23.

Ka hanma ijiir nahan ú za ve, ú za lu her tswen, ú er msen hen Yehova?— Alaghga ú lu tswen tugh ú ôr kwagh a Yehova cii ve ú mase yaven ye. Yesu kaa ér: “Shighe u wea eren msen yô, nyôr ken iyou you i ken iuv, u wuhe hunda kera yô, sôn Teru.” (Mateu 6:6) Ú eren msen hen Yehova hanma tugh cii man ú masen yaven kpa?— Yô, eren nahan.

Ior mbagenev yange vea lu vea Yesu kpa á er msen. Shighe u Lasaru, huror u Yesu yange kpe la, Yesu er msen vea ior mbagenev ape í ver Lasaru la.  (Yohane 11:41, 42) Yesu yange una kumba imôngo vea mbahenen nav kpaa a er msen. Ú ze mbamkombo ape ka i er msen kpa?— Ortamen ka nan er msen ken mbamkombo mbara. Nana ngulen eren msen yô, kegh ato zulee, sha ci u nan ngu ôron kwagh a Aôndo sha ci wou. Ka nahan ve a kure msen la we kpa ú fatyô u kaan wer “Amen” ye. Ú fa inja i kwagh u ka a̱ er msen a̱ kure ve i kaa ér “Amen” la kpa?— Inja na yô we kpa msen la doo ú. Inja na yô ú lumun a msen la, shi ú soo wer we kpaa msen la a̱ lu u wou.

Shi Yesu yange eren msen sha shighe u yan kwaghyan kpaa. Yange a sugh Yehova sha kwaghyan na la. Ú eren msen hanma shighe cii ve ú ye kwaghyan kpa?— Doo u se sugh Yehova sha kwaghyan u a ne se la cii ve, se hii u yan kwaghyan shon ye. Shighe u ú lu yan kwaghyan imôngo a mbagenev yô, alaghga a lu orgen nana er msen ye. Kpa aluer ú ngu yan kwaghyan tswen di ye? Shin aluer ú ngu yan kwaghyan vea ior mba ve sughun Yehova ga ye?— Aluer kwagh ngu nahan yô, er msen wou.

Gba u hanma shighe yô, ú eren msen ikyenge you ia duen shaa? Shin aluer ú er msen shin ishima kpa Yehova una ungwaa?— Se zua a mlumun sha kwagh u yange er Nehemia la. Un lu or u civir Yehova, kpa gema eren tom ken ya u Artashaseta, tor u Mbapershia.  Iyange igen yô, ishima vihi Nehemia hingir zunguluu gadia á ungwa ér gilgar u Yerusalem, gar u ior nav kpôô kpôô la, yôhôr.

Tor pin Nehemia kwagh u a er ve, á lu zunguluu yum nahan yô, Nehemia maa vande eren msen shin ishima. Nehemia kur msen la yô, maa ôr tor ityôkyaa i í ne ve ishima i̱ vihi un yô, shi sôn ér tor ma a ne un ian ma un yem ken Yerusalem, ma un za hidi ma un maa gilgar la. Tsô lu nyi i̱ ere?

Een, Aôndo ungwa msen u Nehemia la. Tor na un ian ér a̱ za! Tor shi na Nehemia ikyon i maan kwagh a mi kpishi i una za maa gilgar la yô. Nahan, sha kpôô yô, Aôndo una fatyô u ungwan mbamsen asev, aluer se er ve shin ishima je kpaa.—Nehemia 1:2, 3; 2:4-8.

Hen ase sha kwagh ne yôô. Doo u ú sua ityough inya shighe u ú lu eren msen yôô? Shin saa ú gure anu  inya shinii? Ú hen wer nyi?— Ashighe agen Yesu yange una eren msen yô, á gure anu inya. Kpa ashighe agen di yô yange á tile shisha. Shi ashighe agen di una eren msen yô á kende ashe sha, di er yange lu eren msen sha ci u Lasaru ve, er nahan.

Nahan kwagh ne tese ér nyi?— Een, tese ér kwagh gba sha gbenda u or nan til shin nan tem la ga. Ashighe agen yô, a hemba doon aluer ú wa ityough inya, ú kusu ashe yô. Ashighe agen di yô, alaghga ú soo u guren inya er Yesu kpa yange er nahan. Kpa, umbur wer, se fatyô u eren msen hen Aôndo hanma shighe cii, tugh man atetan, shi una ungwa msen wase kpaa. Kwagh u a hembe lun hange hange ken msen u eren yô, ka u se na jighjigh ser mimi je Yehova kegh ato ngu ungwan. Ú na jighjigh wer Yehova ongo mbamsen ou kpa?

Ka nyi akaa nahan se ôr Yehova ken mbamsen aseva?— Ôrom ase m̱ ungwa: Ka wea eren msen yô, kanyi kwagh nahan ka ú ôr Aôndo ken msen wouwe?— Yehova na se akaa a dedoo kpishi, nahan doo u se sugh un sha akaa shon, shin ka nahan ga?— Se fatyô u sughun un sha kwaghyan u se ye la. Kpa í lu je ú sugh un sha ci u kwavaôndo ú ú doo kenger la man ahu a ikyon a a lu gese gese la man uimondon mba doonashe mba ú nengen a mi la kpa?— Akaa ne cii ka un á er á ye.

Shighe ugen la, mbahenen mba Yesu pine un ér a̱ tese ve u eren msen. Nahan Ortesen Uhemban maa tese ve, shi tese ve akaa a í hembe lun hange hange u vea er msen vea sôn kpaa. Ú fa akaa shon kpa?— Tôô ase Bibilo you, bugh Mateu ityough 6. Hii sha ivur i sha 9 zan zan i̱ sha 13 la, se zua a kwagh u ior kpishi ve yer ér Msen u Ter Wase la. De se ôr ijiir la imôngo.

I nger heen ér Yesu yange kaa ér se̱ eren msen sha kwagh u iti i Aôndo. Á kaa ér se̱ eren msen ser i̱ tsegha iti i Aôndo. Iti i Aôndo ér nyi?— Een, Iti na ér Yehova, nahan gba u iti la ia doo se ishima.

Kwagh u sha uhar yô, Yesu tese se ér se̱ eren msen ser Tartor u Aôndo u̱ va. Tartor ne ngu hange hange sha ci u ka ú ua va a bem shin tar, shi ua gema tar ua hingir paradiso kpaa ye.

Kwagh u sha utar yô, Ortesen Uhemban shi kaa ér se̱ eren msen ser i̱ er ishima i Aôndo shin tar vough er í eren i̱ sha nahan. Aluer se mba eren msen nahan yô, gba u se eren kwagh u Aôndo á soo ér se̱ er la kpaa.

Kwagh ugen yô, Yesu shi kaa ér se̱ er msen se̱ sôn kwaghyan u se ya sha hanma iyange la. Shi sea er kwaghbo yô, se̱ er msen se̱ zamber Aôndo. Se̱ sôn Aôndo ser a̱ de se akaabo ase. Kpa cii man Aôndo una de se akaabo ase yô, saa se kpa se de ior mbagen akaabo a ve er se la. Á lu ú ican u den or a kwaghbo u nan gaa?

Kwagh u masejime yô, Yesu kaa ér se̱ sôn Yehova Aôndo a̱ kura se sha ikyev i orbo, ka Satan Diabolo je la. Nahan akaa ne cii ka akaa a i doo u se ter á ken msen wase hen Aôndo yô.

Doo u se na jighjigh ser Yehova ongo mbamsen asev. Se kera sôn ser a̱ wase se tseegh ga, kpa shi se za hemen u sughun un kpaa. Ka sea sôn un kwagh sha mimi, shi sea sôn un akaa a injaa yô, ka i saan un iyol kpishi. Shi una na se akaa a se sen la kpaa. Ú na jighjigh a kwagh ne kpa?