Yonatan lu wan u tor Saulu u hiihii. Yange lu orshoja u taver ishima kpishi. Je yô, Davidi yange kaa ér Yonatan taver agee hemba iguve man begha. Iyange igen la, Yonatan nenge a shoja i Mbafiliti mbagenev sha igyungu. Nahan a kaa a or u yisan un perutya la ér: ‘Saa Yehova una tese se ikyav cii ve, se ta num sha a ve ye. Ikyav shon yô, aluer Mbafiliti kaa a vese ér se kôndo se va yô, se za ta num sha a ve se hemba.’ Tsô Mbafiliti gba geren amo kaan a Yonatan kua or u yisan un perutya la ér: ‘Kôndo nen heen va nôngo nen num a vese!’ Maa iorov mba uhar mban unde sha igyungu la za ta num sha ushoja mbara wua ve 20.

Er Yonatan lu wan u Saulu u hiihii yô, lu u una va tema tor shighe u Saulu una kpe yô. Kpa Yonatan gema fa er Yehova tsua Davidi ér a va tema tor shighe u Saulu una kpe kera yô. Nahan cii kpa, Yonatan er  Davidi iyuhe ga. A ya ijende a Davidi. Yange ve doo ayol a ve tsung, je ve tôndo zwa ér vea wasen ayol a ve shi vea kuran ayol a ve kpaa. Tsô Yonatan gema riga utya na kua sanker man ada man kwange na u shin iwenge, na Davidi, sha u tesen ér ve ya ijende.

Shighe u Davidi lu yevese Saulu la, Yonatan za hen Davidi za kaa a na ér: ‘Taver ishima, de cian ga. Yehova tsua u ér u va lu tor. Terem kpa fa nahan.’ U soo u lun a ijende i dedoo er Yonatan nahana?

Yonatan yange war ku kuma kwa har, sha u nôngon ér una wase ijende na Davidi. Yange fa er ter na Tor Saulu soo u wuan ijende na Davidi yô, nahan a kaa a ter na ér: ‘Aluer u wua Davidi yô, a lu isholibo; a er ma kwaghbo ga.’ Saulu maa nyoon ishima a Yonatan. Anyom nga karen yô, Saulu vea Yonatan za ityav, maa ve uhar cii ve za kpe ken ityav mbi shon.

Yonatan yange kpen yô, Davidi gba keren wan u Yonatan u i yilan un ér Mefibosheti la. Za zuan a na yô, a kaa a na ér: ‘Teru yange lu ijende yam i dedoo, nahan me nenge sha a we ken ayange a uma wou cii. U lu hen ya wam, shi u yaan kwagh vea mo imôngo.’ Davidi yange hungur a ijende na Yonatan mayange ga.