Yesu yange tsuan mbaapostoli mba 12 mbara yô, a hungwa sha uwo la, a va hen ape ior kpishi zua lu keghen un yô. Lu ior mba ve due ken Galilia man Yudia man tar u Tiru man Shidon man Shiria, kua mbagenev mba ve per Ifi u Yordan ve va yô. Yange ve va a ior vev mba ve lu yan ican a iangev, kua mba ujijingi mba bov lu nzughur a ve yô. Yesu bee mba ve lu a angev la cii iangev vev, shi mba ve lu a ujijingi mba bov la kpa a dugh ujijingi mba shon kera cica cii. Maa hide tema hen kpe u uwo la gba lamen a ve. A pase kwagh u aluer se soo u lun azende a Aôndo ve, se er yô, ér gba u se suur sha Yehova shi se hen u yan ijende a na. Aluer ior doo se ishima ga yô, Aôndo una fatyô u doon se ishima ga. Gba u se eren a ior kundu kundu, shi se eren a hanma or sha inja, kua mbaihyomov asev je kpaa.

Yesu kaa ér: ‘Ka azende ou tseegh i gbe u aa doo u ishima ga. Gba u mbaihyomov ou kpa vea doo u ishima shi u deen ior kwaghbo sha mimi. Aluer or vihi ishima a we yô, za hen a nan fese je, za zamber a nan. Eren kwagh a ior er u soo wer we kpa ior ve eren a we la.’

 Yesu shi yange wa ior kwagh u injaa sha akaa a iyolough. A kaa ér: ‘Hemba doon u lun ijende i Yehova, a u lun a inyaregh kpishi. Aluer u ngu a inyaregh kpa, ormbaiv nana fatyô u iin ki. Kpa ijende you vea Yehova yô, or a fatyô u iin ga. Ishima i de zaan we iyol sha kwagh u u ya, shin u ma, shin u hua iyol ga. Nenge annyonov. Hanma shighe yô, Yehova ka a na ve kwaghyan, ve ya i kuma ve. Aluer ishima za u iyol sha akaa ne nan nan kpa, kwagh la una seer we ayange ga. Umbur wer Yehova fa akaa a kwagh a gbe u a mi la cii.’

Ikpelaior la vande ungwan orgen tese ve er Yesu nahan ga. Mbafarishi man Mbasadushi mba yange ve tesen kwaghaôndo la, tese ve akaa ne ga. Er nan ve Yesu yange fa ityesen yum nahana? Ka sha ci u, akaa a Yesu tesen la cii, lu Yehova tese un ve lu ôron ior ye.