YOSHIA ngu anyom anigheni tseegh shighe u a hingir tor u ikwe i ihiar i ken imbusutariyan i Iserael la. Ka iyev kpishi u or nana lu tor hen shighe ne. Nahan yô sha hiihii la ior mbaganden mbagenev ve wasen un sha u hemen tar la.

Shighe u Yoshia hemen anyom ataankarahar yô a hii u keren Yehova. A dondo ikav i utor mbadedoo anza er Davidi, Yehoshafati man Hesekia nahan. Hen shighe la, er a lu anyom pue kar tseegh la je, Yoshia er kwagh u tesen ishima i taver kpishi.

Shighe u Mbaiserael kpishi vé lu eren akaabo la shighe kar lihe. Ve civir mbaaôndo mbaaiev. Ve gule sha ishigh ki ieev mbila. Nahan Yoshia due vea ior nav tsô ve za hii u esen mcivir u aiegh ken tar la kera. Kwagh ne ka tom u vesen sha ci u ior kpishi lu civir mbaaôndo mbaaiev. Ú fatyô u nengen a Yoshia kua ior nav heen er ve lu hemben ieev mbila yô.

Been kera yô, Yoshia ver ior itiar sha u ve̱ nenge sha mser u tempel u Yehova yô. I kohol inyaregh hen ior i na ior mban sha ci u tom u i gbe u a er la. Er vé lu eren tom u tempel ne yô, pristi u tamen Hilkia za zua a kwagh u vesen keregh. Ka takerada u atindigh u yange Yehova ôr a Mose er a̱ nger ngise, ngise la. Yange ú saa anyom kar kpishi.

I tôô takerada shon i za a min hen Yoshia, man a kaa er i̱ ôr ú una ungwa. Er a kegh ato a ungwa yô, Yoshia mase kaven dedoo er ior mba dondon tindi u Yehova ga. Kwagh ne vihi un ken ishima kpishi, nahan á ande akondo a na, vough er ú nenge heen nahan. A kaa er: ‘Ishima vihi Yehova a vese, sha ci u uter asev yange ve dondo atindi a na a i nger ken takerada ne ga.’

Yoshia na zwa er pristi u tamen Hilkia a pine a fa kwagh u Yehova una e̱r a ve yô. Hilkia za hen kwase u i yilan er Hulda la, un lu profeti u kwase, nahan a za pine un. A na un loho u hen Yehova er a̱ za kaa Yoshia: ‘A tsaha Yerusalem a ior nav cii sha ci u ve civir mbaaôndo mbaaiev shi tar ne cii u iv a ifer. Kpa sha er we, Yoshia, ú er kwagh u dedoo yum yô, mtsaha ne una va ga zan zan saa ú kpe kera.’