Mateu 6:1-34
6 “Ver nen ishima, de eren nen perapera wen sha ashe a ior sha u ve̱ nenge ga. Ne er nahan yô, ne zua a injar hen Ter wen u a lu sha la ga.
2 Nahan zum u u lu nan iyua yô, de tsengan tôngon korough* er mbawanatseregh ve eren ken ushinagoge man sha ugodobi sha u ior ve̱ na ve icivir la ga. Mimi je m kaan ne ne, ve ngohol injar ve bee.
3 Kpa we yô, zum u u lu nan iyua yô, uwegh ou ku imesegh ku de fe kwagh u uwegh ou ku yanegh ku eren ga,
4 sha er iyua you la ia lu ken myer yô. Nahan Teru u sha u a nengen akaa a ken myer la una na u injar.
5 “Shi zum u ne lu eren msen yô, de eren nen er mbawanatseregh nahan ga. Ka ve soo u tilen eren msen ken ushinagoge man sha ajiir a ugodobi mba vesen ve pelegh yô, sha u ior ve nenge a ve. Mimi je me kaa ne, ve ngohol injar ve bee.
6 Kpa zum u u lu eren msen yô, nyôr ken iyou you shin atô, wuhe hunda, maa er msen hen Teru u i nengen a na ga la. Nahan Teru u sha u a nengen akaa a ken myer* la una na u injar.
7 Shighe u ne lu eren msen yô, de kimbir nen kwagh môm gbem, er ior mba ken akuraior ve* eren nahan ga. Ka ve hen ér ka sha u ôron akaa kpishi la man a ungwa ve ye.
8 Nahan de luun nen er ve ga, sha ci u Ter wen u sha la ngu a fa akaa a kwagh a gbe ne a mi la, je ne lu a sôn un ga.
9 “Gba keng u ne eren msen sha gbenda ne nahan:
“‘Ter wase u sha, i tsegha iti you.
10 Tartor wou u̱ va. I̱ er ishima you shin tar kpaa, vough er i eren sha nahan.
11 Na se kwaghyan nyian, u se ya ken iyange ne cii yô.
12 Shi de se a anzô* a ase, er se kpa ka se de mba ve lu se a anzô* la yô.
13 Shi de deen wer imeen i hemba se ga,* kpa yima se sha ikyev i Iferor.’
14 “Aluer ne de ior akaabo a ve yô, Ter wen u sha kpa una de ne akaabo.
15 Kpa aluer ne de ior akaabo a ve ga yô, Ter wen u sha di kpaa una de ne akaabo a en ga.
16 “Shighe u ne lu hôron kwaghyan yô, de yuen nen er mbawanatseregh nahan ga. Ka ve vihi ishigh sha, sha u ior ve nenge ér mba hôron kwaghyan. Mimi je me kaa ne, ve ngohol injar ve bee.
17 Kpa shighe u u lu hôron kwaghyan yô, haa mkurem sha ityou shi ôô ishigh,
18 sha er ior vea fa ér u ngu hôron kwaghyan ga, kpa a lu Teru u sha u i nengen a na ga la tseegh una fa yô. Nahan Teru u i nengen a na ga, un u a nengen akaa cii la, una na u injar.
19 “De u koson akaainjaa shin tar, ape ivina man nduran ve vihin kwagh, shi mbaiv kpa ka ve nyôr ve ii ne.
20 Kpa koso akaainjaa sha, ape ivina shin nduran ve vihin kwagh ga, shi mbaiv ve nyôron ve iin ga la.
21 Gadia ape kwagh u injaa wou a lu la, ka her ishima you kpa ia lu ye.
22 “Ka ishe i lu imenger i iyol ye. Nahan aluer ishe you ngi jighilii* yô, iyol you cii ia wanger.*
23 Kpa aluer ishe you ngi kenger akaa wue wue* yô, iyol you cii ia wa ime. Mimi je, aluer iwanger i i lu ken a we la ka ime yô, ime la wa mgbigh mgbigh!
24 “Or môm nana fatyô u eren mbavesen uhar tom ga; sha ci u nana kôr u môm ihyom, ugen la di una doo nan ishima, gayô nana var a u môm, nana gema a laha ugen la. Ne fatyô u eren Aôndo tom kua Inyaregh ga.
25 “Sha ci u kwagh ne yô, m ngu kaan a ven mer: Ishima i de u nyian ne sha ci u uma wen, sha kwagh u ne ya shin sha kwagh u ne ma la. Shi ishima i de u nyian ne sha ci u iyol yen, sha kwagh u ne zer la. Uma hemba kwaghyan gaa? Man iyol hemba ikyondo gaa?
26 Nenge nen dedoo sha kwagh u inyon i purugh; ngi lôôn iyiav ga, shi ngi sundan shin ngi kohol iyiav ken ayou kpaa ga. Kpa Ter wen u sha la koson i. Ne hemba gban kwagh a i gaa?
27 Ka an ken a ven sha ishimanyian i nan la, nana fatyô u seer miniti* môm sha ayange a uma u nana?
28 Heela tseegh ga, er nan ishima i lu nyian ne sha kwagh u ikyondo? Hen nen kwagh sha gbenda u ufaluwa mba ken toho ve vesen la. Mba eren tom ga, shi mba te mou kpaa ga.
29 Kpa me kaa ne, Solomon a iengem na cii je kpa, mayange i wuha un iyol er mô ve nahan ga.
30 Aluer imendenev mbi ken toho mbi ka mbi lu uma nyian, kper i kende mbi ken usu la je kpa, Aôndo ngu wuhan mbi iyol nahan yô, hide ne ve una wuha ne iyol a hemba nahan ga yee? Jighjigh wen u nan vese ga tsôô!
31 Yô, mayange ishima i de nyian ne kaan nen ner, ‘Se ya nyi?’ shin, ‘Se ma nyi?’ shin, ‘Se zer nyi?’ ga.
32 Akaa ne cii ka akaa a akuraior* a lu keren sha gbashima yô. Ter wen u sha la fa er kwagh a gbe ne a akaa ne cii yô.
33 “Sha nahan yô, za nen hemen u keren Tartor u Aôndo hiihii kua perapera na, tsô a seer ne akaa agen ne cii.
34 Yô, mayange ishima i de nyian ne sha kwagh u iyange i kper la ga, sha ci u iyange i kper la kpa ia lu a akaa a nan ishimanyian. Hanma iyange yô mbamzeyol mba i yina ga.
Ngeren mba shin kpe
^ Shin “yôôn angwe.”
^ Shin “u a nengen hanma kwagh la.”
^ Shin “er atôatyev a.”
^ Shin “de se asorabo.”
^ Shin “se de mba ve er se akaabo.”
^ Zwa Grika, “de ze a vese ken imeen ga.”
^ Shin “ngi kenger akaa wue wue ga.”
^ Shin “ia iv a iwanger.”
^ Zwa Grika, “wa ifer; wa dang.”
^ Zwa Grika, “ishiva.” Nenge Ngeren u Pasen Asember.
^ Shin “atôatyev.”
