Marku 11:1-33
11 Mba va zurum hen Uwo u Olev, ikyua a Yerusalem man Betefeji man Betani yô, a tindi mbahenen nav mbagenev uhar,
2 a kaa a ve ér: “Za nen hen angar u a lu se sha hemen ne, ne za nyôron ker je maa ne nenge i zer wanjaki u i lu je or nan lu a tema sha mi ga zan zan hegen yô. Sagh un nen va nen a mi heen.
3 Man aluer or pine ne ér, ‘Er nan ne eren nahana?’ yô, kaa nen ner, ‘Kwagh gba Ter a mi, shi a hide a mi her a ngôôr ga.’”
4 Nahan mba ze yô, ve nenge i zer wanjaki hen hunda ken won, hen kpe godobi, maa ve sagh un.
5 Kpa ior mbagenev mba ve tile her la pine ve ér: “Er nan ne saghen wanjaki laa?”
6 Ve ôr ve kwagh u Yesu kaa la vough, maa ve de ér ve yem.
7 Mba ve a wanjaki la hen Yesu yô, ve tar akondo a ve a haan iyol sha mi, maa Yesu tema sha mi.
8 Shi mbagenev kpishi gema akondo a ve a haan iyol tar sha gbenda, kpa mbagenev di lu gberen ahu a ikyon ken toho va taren sha gbenda.
9 Shi mba ve lu zan un sha hemen man mba ve lu van un ken ijime la cii lu ôron genger genger ér: “Ma u yima un!* Saan un u a ve ken iti i Yehova* la iyol!
10 Aôndo a ver Tartor u ter wase Davidi, u u lu van la doo doo. Ma u yima un, we u u lu sha usha mba hemban gban ica la!”
11 Tsô a nyôr ken Yerusalem a kar a yem ken tempel, a za nenge hanma kwagh, kpa er iyange bee yô, a due a yem ken Betani vea Mbapuekaruhar mbara.
12 Sev mbu aven, mba dugh ken Betani u hiden yô, ijen kôr un.
13 Tsô a nenge a kon u tur ken ica, u lu a ahu sha mi, maa a kar a za ér una za nenge kwagh a lu sha mi yô. Kpa va sôôn her yô, a zua a ityamegh sha mi ga, lu ahu tseegh, sha ci u lu shighe u tur umen ga.
14 Maa a kaa a u ér: “Mayange or a̱ de kera ye ityamegh you ga.” Mbahenen nav lu ungwan.
15 Tsô ve va nyôr ken Yerusalem. A kar a za nyôr ken tempel, maa a gba zendan mba ve lu teen akaa ker kua mba ve lu yamen akaa la cii ér ve due kera. Shi a daa utebul mba mbamusaninyaregh kua akaateman a mba ve lu teen mkungum la cii, gba.
16 Shi a lumun ér or môm nana tôô ikyagh nana kar a mi ken tempel ga.
17 Lu tesen ve kaan ér: “I nger ér, ‘A yilan iyou yam ér iyou i msen sha ci u akuraior cii’ gaa? Kpa ne na i hingir iyou i mbaiv.”
18 Upristi mba tamen man mbangerenatindi mba ongo kwagh ne yô, ve gba keren gbenda u wuan un, gadia ve lu cian un, sha ci u kpiligh ikpelaior la cii iyol a ityesen na.
19 Iyange va been yô, ve due ken gar la kera.
20 Sev mbu aven mba ngur karen pepe pepe yô, ve nenge kon u tur la uma nyôr shin amise.
21 Peteru umbur kwagh u ú yô, a kaa a na ér: “Rabi, nenge! Kon u tur u u we u ifyan la uma.”
22 Yesu gema kaa a ve ér: “Na nen Aôndo jighjigh.
23 Mimi je me kaa ne, aluer or kaa a uwo ne ér, ‘Môugh za gba shin zegemnger,’ man nan ta akperan ga, kpa nan na jighjigh ér kwagh u nan kaa ne una er yô, kwagh shon una er nahan je.
24 Sha nahan yô, m ngu kaan a ven mer, akaa a ne sônon ken mbamsen enev la cii, na nen jighjigh ner a na ne a, nahan ne zua a mi.
25 Shi zum u ne til ne lu eren msen yô, de nen hanma or nyityô kwaghbo u nan er ne cii, sha er Ter wen u a lu sha la kpa una de ne akaabo a en yô.”
26 *——
27 Shi ve hide ve va ken Yerusalem. Nahan ngur zenden ken tempel yô, upristi mba tamen man mbangerenatindi kua mbatamen za va
28 ve va pine un ér: “Ka sha tahav mbu nyi u eren akaa nee? Shin ka an nan ne u tahav mbu eren akaa nee?”
29 Yesu kaa a ve ér: “Me pine ne mpin môm. Nam nen mlumun, nahan me ôr ne tahav mbu m eren akaa ne a mi la.
30 Ka an yange nan tindi Yohane ér a er ior batisema? Lu Aôndo shin lu ioro? Nam nen mlumun.”
31 Tsô ve gba henen ker ayol a ve kaan ér: “Aluer se kaa ser, ‘Lu Aôndo’ yô, una pine se ér, ‘Tsô er nan yange ne na Yohane jighjigh ga?’
32 Kpa se cihi se kaa ser, ‘Lu ioro’?” Ve lu cian ikpelaior la, sha ci u ve cii ve nenge Yohane ér ka profeti kpôô kpôô.
33 Maa ve kaa a Yesu ér: “Se fa ga.” Yesu gema kaa a ve ér: “Nahan mo kpa me ôr ne tahav mbu m eren akaa ne a mi la ga.”
Ngeren mba shin kpe
^ Zwa Grika, “Hosana.” Ka u sônon Aôndo sha u a̱ va a myom, shi ashighe agen ka i ter ishember ne sha u tesen msaanyol.
^ Nenge Ngeren u Pasen Asember.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
