Bibilo ôr kwagh sha kwagh u wuan or u nan lu yan ican a angev tsung la jighilii ga. * Kpa, kwagh u Bibilo i ôr sha kwagh u uma man ku la, una wase se u lun a mnenge u vough sha ikyaa ne. Ka kwaghbo u wuan or, kpa tindi ngu u ar tese ér gba u or a er hanma kwagh u nan fetyô la cii, sha u wasen or u nan lu nôngon ku la u zan hemen u lun uma ga.

Bibilo pase ér, ka Aôndo a gbe se shi a lu “imbor i uma” ye. (Pasalmi 36:9; Aerenakaa 17:28) Hen ishigh ki Aôndo yô, uma ka kwagh u injaa tsung je. Sha ityôkyaa ne yô, Aôndo lumun a kwagh u or wuan iyol i nan shin orgen la ga. (Ekesodu 20:13; 1 Yohane 3:15) U seer yô, Bibilo tese ér gba u se wa ikyo sha er se kura uma wase man u mbagenev kpaa yô. (Duteronomi 22:8) Kwagh ne tese wang ér, Aôndo soo ér se nengen uma ér ka iwua i injaa.

Kpa aluer or gba angev mbu nana kpe keng di ye?

Bibilo lumun a kwagh u or wuan orgen la ga, aluer nan ngu nôngon ku shin ka u mayange nana war ga je kpaa. Ikyav i Saulu, Tor u Iserael la, lumun a kwagh ne. Shighe u vihi iyol ken utya kehelee la, yange kaa a wanakiriki na ér a wase un u been a uma na sha. (1 Samuel 31:3, 4) Kpa wanakiriki na ne venda. Nahan kpa, shighe kar yô, orgen va kaa sha aie ér yange un er sha imo i Saulu la. Nahan Davidi u lu a mhen u Aôndo la, kure or ne ijir ér ngu a ibo i awambe.—2 Samuel 1:6-16.

Gba u a nôngo sha hanma gbenda cii ér uma a za hemene?

Shighe u or nan lu nôngon ku yô, Bibilo kaa ér i er kwagh u una seer nan ayange ga. Kpa Bibilo gema tese se kwagh u vough u i doo u se fa yô. Ku ka orihyom wase u vesen, shi u va sha ci u isholibo. (Mbaromanu 5:12; 1 Mbakorinte 15:26) Er se keren ser se kpe ga nahan kpa, se mba cie ku ga, sha ci u Aôndo tôndo zwa ér una va nder mba ve kpe la. (Yohane 6:39, 40) Or u nan we ikyo sha uma yô, ka nan ker twersôron u u hembe doon, u i eren hen ijiir i nan la. Nahan cii kpa, kwagh ne tese ér gba u a ker u sôron or twer u ua na uma u nan una za hemen zum u nan lu nôngon ku la ga.

Kwagh u or wuan iyol i nan la ka isholibo i Aôndo una fatyô u den nan a i ga yôô?

Ei, Bibilo ter isholibo i or wuan iyol i nan la ken asorabo a or a er ve a de nan a mi ga la ga. Er kwagh u or wuan iyol i nan la i lu isholibo * i vesen nahan kpa, Aôndo yô kav akaa a ka a na ve or hingir u wuan iyol i nan la wang; er ihyundugh shin kwagh u sha tsombor gayô shighe u or nan vôr a uma la nahan. (Pasalmi 103:13, 14) Aôndo na ishimasurun ken Bibilo sha ci u mba ve lu yan ican tsung la. U seer yô, Bibilo kaa ér a va ‘nder mbaperapera kua mba ve lu perapera ga’ la shin ku. (Aerenakaa 24:15) Kwagh ne tese ér ishimaverenkeghen ngi i va nderen ior mba yange ve er asorabo a vesen, er u or wuan iyol i nan nahan la.