Yesu yange wa mbahenen nav tindi ér ve mar ônov shin ve de maren ônov ga ze. Mbahenen nav kpa mayange ve ôr kwagh nahan ga. Ma ijiir i môm ken Bibilo venda kwagh u mar yangen ga. Sha gbaa ne yô, gba u hanmaor nan lu a Kwagh u i nger ken Mbaromanu 14:12 ne ken ishima: “Hanmô wase nana va ôr [Aôndo] kwagh u nan iyol i nan je.”

 Sha nahan yô, ior mba ve vese ayol a ve cii mba a ian i tsuan u maren ônov shin maren ga. Shi vea fatyô u tsua iyenge i ônov mba ve soo kua maren la, man shighe u ve soo u maren ve la kpaa. Aluer nom man kwase tsua u eren tom a akaa a yangen mar a u wuan wan u ken u ya shio yô, mase shin ishima ve, ka tom u orgen ga. Or môm nan de ôron ve ijir ga—Mbaromanu 14:4, 10-13.