Sha kwagh u kwaghtôvon ugen a tese yô, aluer i ver sha 100 yô, agumaior a kuman 80 nahan cii nga eren msen ken tar u Amerika, kpa ka ve 40 nahan tseegh ve eren msen hanma iyange ye. Ka u henen a hen ga, ve mbagenev ka ve henen ér: ‘Msen ka kwagh u ka a na i lu or ken ishima guda tseegh tsô shinii, kwagh wa hemba nahana?’

•  Ka nyi i lu msene?

•  Aôndo ongo msen kpa?

•  Ka nyi me fatyô u eren msen sônonô?

•  Kwagh u mbakov wou ve ôr yô

 Msen ka iliam kpôô kpôô i se lamen vea Un u a gbe akaa cii la yô. Hen ase sha kwagh u kwagh ne a tese yô! Yehova hemba uumace sha hanma gbenda cii, kpa ngu “ica a hanmô wase ga.” (Aerenakaa 17:27) Jighilii yô, Bibilo lôhô se sha gbenda u doon tsung ér: “Kporom nen hen Aôndo, Un kpaa, Una kporom her a ven.”—Yakobu 4:8.

 U fatyô u kporom ikyua hen Aôndo nena?

•   Gbenda môm yô, ka msen u eren, ka gbenda u u lamen vea Aôndo je ne.

•   Gbenda ugen yô, ka Bibilo i henen, ka gbenda u Aôndo a “lamen” vea we je la.

 Msen u eren man Bibilo i henen, vea wase u u taver ikyar i u ye vea Aôndo la.

 “U lamen a Yehova, un u a lu Uhembansha la ka môm ken ian i civirigh i hemban cii i uumace ve lu a mi yô.”—Mkaanem ma Jeremy, gumor ugen.

 “Ka mea pase Yehova er ishima i lum ker la ken msen yô, m nenge mer m seer kporom ikyua na.”—Mkaanem ma Miranda, gumkwase ugen.

 Aluer u na Aôndo jighjigh shi u eren msen hen a na kpa, alaghga a taver we u lumun a kwagh u i kaa ér mimi je ongo msen la. Nahan kpa, Bibilo yila Yehova ér “We, u U ongo msen.” (Pasalmi 65:2) Shi i kaa a vese ér “gema nen ishima i nyian yen la cii, haa nen sha a Na.” Sha ci u nyi? Sha ci u ‘ka Un A lu koson ne ye.’—1 Peteru 5:7.

 Hen ase sha kwagh ne: Ka u tôô shighe u lamen vea azende a ou a kôôsôô la sha ashighe ashighe kpa? U fatyô u eren nahan vea Aôndo kpaa. Yilan un hanma shighe ken msen, man eren nahan sha u yilan un sha iti na i Yehova la. (Ekesodu 6:3) Sha kpôô yô, Bibilo kaa a vese ér, “eren nen msen gbem.”—1 Mbatesalonika 5:17.

 “Msen ka iliam yam vea Terem u sha la, i ka i wasem u pasen wen ishima yam cii yô.”—Mkaanem ma Moises, gumor ugen.

 “Ka m lam a Yehova sha akaa a am a ishima ishima la, di vough er ka a lu ngôm shin ijende yam i kôôsôô kpa m er nahan.—Mkaanem ma Karen, gumkwase ugen.

 Bibilo kaa ér: ‘Akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.’—Mbafilipi 4:6.

 Kwagh la tese ér KA SHAMI u eren msen sha mbamzeyol ou wee? Een! Jighilii yô, Bibilo kaa ér: “Haa akaa a zan we iyol cii sha TER, tsô Una taver we.”—Pasalmi 55:22.

 Sha kpôô yô, shighe u u lu eren msen hen Aôndo yô, gba u u ôron akaa agen kpaa, a lu mbamzeyol ou tseegh ga. Gumkwase ugen u i yer un ér Chantelle yô, kaa ér, “aluer m ngu sônon Yehova iwasen tseegh yô, tese ér m ya ijende i dedoo vea na ga. M nenge mer gba u me vande sughun un shi a akaa a m lu sughun un sha mi la kpa gba u aa lu kpishi.”

 Hen ase sha kwagh ne: Ka akaa a nyi nahan u zough a mi ken uma wou a u sugh Yehova sha mini? U fatyô u henen sha akaa atar a u sugh Yehova sha mi nyian kpa?

 “Aluer u er ankwagh u cuku, er u wuese faluwa u doon ashe nahan tseegh kpa, kwagh ne una fatyô u mgbeghan se u eren msen sughun Yehova.”—Mkaanem ma Anita, gumkwase ugen.

 “Gbidye kwar sha ma kwagh u Yehova a gbe u a doo u yô, gayô sha ma ivur Bibilo i i kôr u ken ishima tsung yô, man sugh Yehova.”—Mkaanem ma Brian, gumor ugen.