እወ። የሱስ ኣብ ምድሪ ኣብ ዝነበረሉ እዋን፡ ብዛዕባ “እቲ መሲሕ፡ እቲ መራሒ” እተነግረ ሓያሎ ትንቢታት ፈጺሙ እዩ፣ እቲ መሲሕ እውን “መድሓን ዓለም” ከም ዚኸውን ተገሊጹ ኣሎ። (ዳንኤል 9:25፣ 1 ዮሃንስ 4:14) የሱስ ድሕሪ ሙማቱ እውን ከይተረፈ፡ መሲሓዊ ትንቢታት ፈጺሙ እዩ።—መዝሙር 110:1፣ ግብሪ ሃዋርያት 2:34-36።

•  “መሲሕ” ኪብሃል ከሎ እንታይ ማለት እዩ፧

•  ነቲ መሲሓዊ ትንቢታት ልዕሊ ሓደ ሰብ ኪፍጽሞ ይኽእል ድዩ፧

•  መሲሕ ኣብ መጻኢ ይመጽእ ደዀን ይኸውን፧

•  ኣብ መጽሓፍ ቅዱስ ክንደይ መሲሓዊ ትንቢታት ኣሎ፧

•  ኣብ የሱስ እተፈጸመ ገለ ኻብ መሲሓዊ ትንቢታት

 እታ ማሺያሕ (መሲሕ) እትብል ቃል እብራይስጥን እታ ክሪስቶስ (ክርስቶስ) እትብል ቃል ግሪኽኛን “ቅቡእ” ዚብል ሕደ ትርጉም ኣለወን። ስለዚ፡ “የሱስ ክርስቶስ” ኪብሃል ከሎ፡ “የሱስ እቲ ቕቡእ” ወይ “የሱስ እቲ መሲሕ” ማለት እዩ።

 ብግዜ መጽሓፍ ቅዱስ፡ ሓደ ሰብ ንፍሉይ ስልጣን ኪሽየም ከሎ፡ ዘይቲ ኣብ ርእሱ ብምፍሳስ ይቕባእ ነይሩ። (ዘሌዋውያን 8:12፣ 1 ሳሙኤል 16:13) ንየሱስ መሲሕ ኪኸውን ዝቐብኦ ድማ ኣምላኽ እዩ ነይሩ፣ መሲሕ ምዃን ከኣ ዓብዪ ስልጣን እዩ። (ግብሪ ሃዋርያት 2:36) ግናኸ፡ ኣምላኽ ንየሱስ ብዘይቲ ዘይኰነስ፡ ብመንፈስ ቅዱስ እዩ ቐቢእዎ።—ማቴዎስ 3:16።

 ኣይፋልን። ከምቲ ሓደ ሰብ ብኣሰር ኣጻብዑ ዚልለ፡ ትንቢታት መጽሓፍ ቅዱስ ከኣ ናብ ሓደ መሲሕ ወይ ክርስቶስ ጥራይ እዩ ዜብጽሕ። ኰይኑ ግና፡ መጽሓፍ ቅዱስ፡ “ናይ ሓሶት ክርስቶሳትን ናይ ሓሶት ነብያትን ኪትንስኡ፡ እንተ ተኻኢሉ፡ ነቶም ሕሩያት እኳ ምእንቲ ኼስሕቱ፡ ዓበይቲ ትእምርትታትን ተኣምራትን እውን ኪገብሩ እዮም” ኢሉ የጠንቅቕ እዩ።—ማቴዎስ 24:24።

 ኣይፋልን። መጽሓፍ ቅዱስ፡ መሲሕ ካብ ዘርኢ ዳዊት ንጉስ እስራኤል ከም ዚመጽእ ይንበ እዩ። (መዝሙር 89:3, 4) ይኹን እምበር፡ እቲ ኽሳዕ ዳዊት ዚዝርዝር መዛግብቲ ወለዶ ጠፊኡ እዩ፣ ሮማውያን ብ70 ድ.ክ. ንየሩሳሌም ኣብ ዝሰዓሩሉ እዋን ከኣ እዩ ጠፊኡ ኪኸውን ዚኽእል። a ካብቲ ግዜ እቲ ንነጀው፡ ካብ ወለዶ ነገስታት ዳዊት ከም ዝዀነ መርትዖ ኬቕርብ ዚኽእል ሰብ የልቦን። ብግዜ የሱስ ግና እቲ መዛግብቲ ወለዶ ነይሩ እዩ፣ የሱስ ካብ ዘርኢ ዳዊት ምዃኑ ኣብ ዚገልጸሉ እዋን ከኣ ጸላእቱ ነዚ ኣይተቓወምዎን።—ማቴዎስ 22:41-46።

 መሲሓዊ ትንቢታት ክንድዚ እዩ ኢልካ ውሱን ቍጽሪ ኺውሃቦ ኣይከኣልን እዩ። ንኣብነት፡ ኣብቲ ብንጹር መሲሓዊ ዝዀነ ኽፋል እኳ፡ ክንደይ ትንቢታት ከም ዘሎ ብመሰረት እቲ እንጥቀመሉ ሜላ ኣቈጻጽራ ኺፈላለ ይኽእል እዩ። ኣብ ኢሳይያስ 53:2-7 ብዛዕባ መሲሕ ብዙሕ ትንቢታዊ ነጥብታት ተጠቒሱ ኣሎ። ገሊኦም ሰባት ነዚ ኣብዚ ዘሎ ብምሉኡ ኸም ሓደ ትንቢት ኪቘጽርዎ ኸለዉ፡ ገሊኦም ግና ንዅሉ እቲ ነጥብታት በበይኑ ትንቢታት ከም ዝዀነ ገይሮም ይቘጽርዎ እዮም።