የሆዋ ኣምላኽ ኵነታቶም ብዘየገድስ፡ ኵሎም ሰባት ብዛዕባኡን ብዛዕባ ሰማያዊት መንግስቱን ኪምሃሩ ይደሊ እዩ። (1 ጢሞቴዎስ 2:3, 4) ስለዚ ድማ፡ ናይ የሆዋ መሰኻኽር፡ መጽሓፍ ቅዱስን ንመጽናዕቲ መጽሓፍ ቅዱስ ዚሕግዝ ናውትን ንብዙሓት ሰባት እንተላይ ንጽሙማን የዳልዉ እዮም። ውድብና ብኣሽሓት ዚቝጸር ቪድዮታት ቋንቋ ምልክት a ኣዳልያ እያ። እዚ ድማ ብልዕሊ 100 ቛንቋታት ምልክት ይርከብ። ነዚ ቪድዮታት እነዳልዎን እንዝርግሖን ብኸመይ ኢና፧ ምስ ግዜኸ እንታይ ምምሕያሻት ጌርና፧

 ቪድዮታት ቋንቋ ምልክት ኣብ መላእ ዓለም ብዘለዋ ጕጅለታት ትርጉም እዩ ዚዳሎ። ፈለማ ነፍሲ ወከፍ ኣባላት እቲ ጕጅለ ነቲ ዚትርጉምዎ ቪድዮ ብጥንቃቐ ይምርምርዎ። ድሕሪኡ፡ ነቲ መልእኽቲ ብቛንቋ ምልክት ብኸመይ ብጽቡቕ ከም ዚትርጉምዎ ይውስኑ። ምስ ወሰኑ ነቲ ቪድዮ ይቐድሕዎ። ኣብዚ ግዜ እዚ፡ 60 ጕጅለታት ትርጉም ንመጽናዕቲ መጽሓፍ ቅዱስ ዚሕግዝ ናውቲ ብቛንቋ ምልክት ብስሩዕ ይትርጉማ፣ ካልኦት 40 ጕጅለታት ድማ ሓሓሊፉ ይትርጉማ እየን።

 ኣብ ዝሓለፈ፡ ቪድዮታት ቋንቋ ምልክት ምድላው ኣዝዩ ኽቡር እዩ ነይሩ። ከመይሲ፡ ቪድዮ ካሜራን ካልእ ናውትን ካብዚ ሎሚ ዘለዎ ኣዝዩ ዝኸበረ እዩ ነይሩ። ብዘይካዚ፡ ቪድዮታት ኣብ ስቱድዮ እዩ ዚቕዳሕ ነይሩ፣ እዚ ድማ ንስቱድዮ ዚኸውን ቦታ ኽንሃንጽን ሓድሓድ ግዜ ድማ ዝነበረ ህንጻታት ከነሐድስን የድሊ ነይሩ እዩ። ንሓንቲ ጕጅለ ትርጉም ቋንቋ ምልክት ዜድልያ ነገራት ኵሉ ንምድላው ብድምር ልዕሊ 30,000 ዶላር b ወጻኢታት ይሓትት ነይሩ።

 ወፈያታትና ኣብ ጽቡቕ መዓላ ምእንቲ ኺውዕል፡ ውድብና መስርሕ ትርጉም ኪመሓየሽን ዝቐለለ ኪኸውንን ጽዒራ እያ። ስለዚ፡ ውጽኢታውን ብዙሕ ክቡር ዘይኰነ ዘመናዊ ናውትን ንጥቀም ኢና። ጕጅለታት ትርጉም፡ ስቱድዮ ኣብ ክንዲ ዚጥቀማ፡ ቀጠልያ ሕብሪ ዘለዎ ድሕረ ባይታ ወይ ቀጠልያ ስክሪን ተጠቒመን ነቲ ቪድዮታት ይቐድሓኦ። ብዙሓት ተርጐምቲ ቛንቋ ምልክት ምስ ዜድልዩ፡ ኣሕዋትን ኣሓትን ነቲ ዚትርጉምዎ ቪድዮ፡ ኣብቲ ዚትርጐመሉ ቦታ ወይ ኣብ ገዛኦም ኰይኖም ይቐድሕዎ። ስለዚ፡ ስቱድዮ ኣየድልዮምን እዩ።

 ብዘይካዚ፡ ንተርጐምቲ ቛንቋ ምልክት ኣብ ስራሖም ዚሕግዞም ሶፍት ዌር ኣዳሊና ኢና። ከምዚ ዝኣመሰለ ምምሕያሻት ነቲ ተርጐምቲ ንኽትርጉሙ ዚወስደሎም ዝነበረ ግዜ ዳርጋ ብፍርቂ ነክይዎ እዩ። ኣሕዋትና ነዚ ምምሕያሻት እዚ የማስዉሉ እዮም። ኣሌክሳንደር እተባህለ ሓው ከምዚ ይብል፦ “ካብ ቅድሚ ሕጂ ብዝያዳ ብዙሕ ቪድዮታት ቋንቋ ምልክት ይወጽእ ኣሎ። እዚ ብዙሕ የሐጒሱኒ እዩ። ነቲ ቪድዮታት መዓልታዊ እየ ዝርእዮ።”

 ኣብዚ ግዜ እዚ፡ ንሓንቲ ጕጅለ ትርጉም ዜድልያ ነገራት ንምምላእ ትሕቲ 5,000 ዶላር እዩ ዜድሊ። ከም ውጽኢቱ ድማ፡ ቪድዮታት ቋንቋ ምልክት ብኣዝዩ ብዙሕ ቋንቋታት ከነዳሉ ኽኢልና ኢና።

 ሓንቲ ጕጅለ ትርጉም ንሓደ ቪድዮ ቛንቋ ምልክት ቀዲሓ ምስ ወድአት፡ እቲ ቪድዮ ናብቶም ዜድልዮም ሰባት ኪበጽሕ ኣለዎ። ኣብ ዝሓለፈ እዋን፡ ቪድዮ ካሴታትን ዲቪዲታትን ነዳሉ ኔርና፣ እዚ ግና ኣዝዩ ኽቡርን ግዜ ዚወስድን ብዙሕ ጻዕሪ ዚሓትትን እዩ ነይሩ። እቲ ቕድሓት ምእንቲ ኺባዛሕ ናብ ካልእ ትካላት ይለኣኽ ነይሩ። ኣብ መወዳእታ፡ እቲ ቪድዮ ካሴታታትን ዲቪዲታትን ናብ ጉባኤታት ይልኣኽ ነይሩ። ኣብ 2013 ጥራይ፡ ዲቪዲ ቛንቋ ምልክት ንምድላው ልዕሊ 2,000,000 ዶላር ኣውጺእና ኔርና።

 እቶም ጽሙማን ነዚ መሰናድዎታት እዚ ኣዝዮም እዮም ዜማስዉሉ። ይኹን እምበር፡ ነቲ ቪድዮታት ክትጥቀመሉ ወትሩ ቐሊል ኣይነበረን፣ ብፍላይ ድማ ቍጽሪ ካሴታት ወይ ዲቪዲታት ኣዝዩ እናወሰኸ ምስ ከደ ነዚ ምጥቃሙ ቀሊል ኣይነበረን። ኣብ ገሊኡ ዅነታት፡ ንሓንቲ ኽፍሊ መጽሓፍ ቅዱስ ንምቕዳሕ፡ ብዙሕ ዲቪዲ እዩ ዜድሊ ነይሩ። ጊለኒ ዝስሙ ኣብ ብራዚል ዚነብር ሓው ከምዚ ኢሉ የዘንቱ፦ “ሓንቲ ጥቕሲ መጽሓፍ ቅዱስ ከነንብብ እንተ ደሊና፡ ነቲ ግቡእ ካሴት ክንደልዮ፡ ድሕሪኡ ድማ ነቲ ጥቕሲ ኽንደልዮ ነይሩና። ኣዝዩ ኣጸጋሚ እዩ ነይሩ።” ዲቪዲ ቛንቋ ምልክት እትጥቀም ራፋየነ እትብሃል ሓብቲ ኸምዚ ትብል፦ “ብሕታዊ መጽናዕቲ ምግባር ኣዝዩ ኣድካሚ እዩ ነይሩ። ጥቕስታት ወይ መወከሲታት ክንደሊ ብዙሕ ግዜ ኢና ነጥፍእ ኔርና።” ብዘይካዚ፡ ኣሕዋትን ኣሓትን ኣብ ዕዮ ስብከት ኪካፈሉ ኸለዉ፡ መብዛሕትኡ ግዜ ዲቪዲታት ወይ ቪድዮ ካሴታት ይማልኡ ነይሮም፣ ነዚ ድማ ኣብ ተሌቪዥን ናይቲ ተገዳስነት ዘሕደረ ሰብ ይውልዕዎ። ገሊኦም ኣሕዋት ድማ ናይ ገዛእ ርእሶም መጻወቲ ዲቪዲ ሒዞም ይኸዱ ነይሮም እዮም። ነዊሕ ከይጸንሐ ግና፡ ስክሪን ዘለዎ ተንቐሳቓሲ መጻወቲ ዲቪዲ ኺርከብ ተኻኢሉ፣ ብዙሓት ኣሕዋት ድማ ነዚ ይጥቀሙሉ ነይሮም እዮም። ኣብ ሕቡራት መንግስትታት ኣመሪካ ዚነብር ቦቢ ዝስሙ ሓው ከምዚ ይብል፦ “ሓንቲ ጥቕሲ ምስ ኣንበብካ ኻልእ ጥቕሲ ኸተንብብ እንተ ደሊኻ፡ መብዛሕትኡ ግዜ ኻልእ ዲቪዲ ኢኻ እትውልዕ። እዚ ድማ ግዜ ዚወስድን መጽሓፍ ቅዱስ ክንጥቀም ኣጸጋሚ ዚገብርን እዩ ነይሩ።”

 ኣብ 2013 ውድብ የሆዋ፡ JW Library Sign Language app ኣውጺኡ፣ እዚ ድማ ኣሕዋትን ኣሓትን ንቪድዮታት ቋንቋ ምልክት ኣብ ሞባይሎም ወይ ኣብ ታብለቶም ኬራግፍዎን ኪውልዕዎን ኣኽኢልዎም እዩ። እዚ ኣፕሊኬሽን ፈለማ ብቛንቋ ምልክት ኣመሪካ እዩ ወጺኡ ነይሩ። ጸኒሑ፡ ብ2017 ኵለን ቋንቋታት ምልክት ምእንቲ ኺጥቀማሉ ዘሚኑ እዩ። በዚ ድማ ኣብ መላእ ዓለም ዚርከቡ ኣሕዋትን ኣሓትን ኣዝዮም ተሓጒሶም እዮም። ጁሰሊኖ ዚብሃል ኣብ ብራዚል ዚነብር ሓው ከምዚ ይብል፦ “ፈጺመ ኽኣምን ኣይከኣልኩን። ኣመሓዳሪ ኣካል ንዓና ንጽሙማን ክሳዕ ክንደይ ከም ዜፍቅረናን ከምቶም ብቛንቋኦም ዚዛረቡ ኻልኦት ሰባት ኣብ ሓቂ ዕቤት ክንገብር ከም ዚደልየናን ብቐጻሊ እሓስብ እየ። ኣዝየ እየ ተሓጒሰ፣ እቲ ኣፕሊኬሽን መጽሓፍ ቅዱስ ዝያዳ ኼጽንዕ ደሪኹኒ እዩ።”

 ሎሚ ዅሉ ቪድዮታት ቋንቋ ምልክት ብዲጂታዊ ነዳሉ፡ ኣብ ወብ ሳይትናን ኣብ JW Library Sign Language app⁠ን ድማ ንዝርግሖ። በዚ ኸምዚ፡ ቪድዮታት ቋንቋ ምልክት ንምትርጓም፡ ንምቕዳሕ፡ ንምዝርጋሕ፡ ኣዋርሕ ወይ ዓመታት ዘይኰነስ፡ ሒደት መዓልትታት ጥራይ እዩ ዚወስድ። ወረግ፡ መብዛሕትኡ ቪድዮታት ቋንቋ ምልክት ምስቲ ዚዝረብ ቋንቋታት ማዕረ እዩ ዚወጽእ።

 ገሊኦም ጽሙማን ኣሕዋትን ኣሓትን ዝሃብዎ ርእይቶታት ንርአ። ኪሊዝያ ዝስማ ሓብቲ ኸምዚ ትብል፦ “ኣየነይቲ ውድብ እያ እሞ ብዛዕባ ጽሙማን እትግደስን ዜድልዮም መንፈሳዊ ነገራት ብዝቐለለ መገዲ እተቕርብን፧ውድብ የሆዋ ዝገበረትልና ነገራት ምስቲ ኣብ ዓለም ዘሎ ፈጺሙ ኺወዳደር ኣይክእልን እዩ።” ቭላድሚር ከምዚ ይብል፦ “እዚ ቪድዮታት፡ የሆዋ ንዓና ንጽሙማን ከምቶም ካልኦት ሰባት ከም ዚሓልየልና ኽርዳእ ሓጊዙኒ እዩ።”

 ቪድዮታት ቋንቋ ምልክት መብዛሕትኡ ግዜ ነዚ ዚስዕብ ይጠቅስ፦ “እዚ ቪድዮ ኽፍሊ እቲ ፈቲኻ ብዚግበር ወፈያ ዚድገፍ ዓለምለኻዊ ናይ መጽሓፍ ቅዱስ ትምህርታዊ ዕዮ እዩ።” ነቲ ብ⁠donate.jw.org. እትገብሮ ወፈያ ኣዚና ነማስወሉ ኢና። እዚ ወፈያታት እዚ፡ መጽሓፍ ቅዱስን ንመጽናዕቲ መጽሓፍ ቅዱስ ዚሕግዝ ሕታማትን ንዅሎም ሰባት፡ እንተላይ ንተጠቀምቲ ቛንቋ ምልክት ንኺዳሎ ዚሕግዝ እዩ።