1, 2. Inyoin ibusakinit oni ajenun kanuikamunitos Satan keda akejokin?

EJOKUNAR aijarawok kotoma akwap nakitetet. Ibuni oni aijar kwape ajaar alosikinet naka Edeke. Konye kwape kwana ijai oni toma akwap naipugat Satan keda akejokin. (2 Ikorinton 4:4) Karaida mam oni ipedorit aanyun kesi, ejaasi kesi ido epol agogong.

² Kosula kalo, ibuni oni aitetem epone loipedoria oni asalakin imunokina neejai Yawe ka ayuwar kaneejai Satan. Isumunit Yawe aingarakin oni. Konye ekoto oni ajenun iponesio luitosomaete Satan keda akejokin aingalaaria keda asurokin oni.

3. Inyoin bo ekoto Satan aiswamakin oni?

³ Ebala Satan ebe ijaanakinete itunga Yawe kanu iboro luijaanakini Yawe kes ido epalarete kesi aijaanakin ngesi arai keninikar aijar. (Kosiom Yob 2:4, 5.) Arai keanyutu Satan keda akejokin ebe euta itunganan asisia nuikamunitos Yawe, etamete kesi aitolitol. Ekadakini kesi noi arai eiinaki itunganan akeijar neejai Yawe kosodi aibatisaun. Itupusit  Ebaibuli Satan keda “engatuny loegat, emoot yenenyamari.” (1 Petero 5:8) Ekoto Satan amunaar eidicanewok keda Yawe.​—Isabulin 7:1, 2; 2 Timoteo 3:12.

4, 5. (a) Anyoika bo numam Satan epedori aswam? (b) Inyoin bo apolou naka ‘aitepeg Satan’?

⁴ Konye mam ekoto oni akurian Satan keda akejokin. Itidisiarit Yawe akecegogong kanuepedorete kesi aiswamakin oni. Isumunit Yawe ebe ebuni “ekodet loepol noi” loka Ikristayon lukabeit aiku  “aiticanio naepol.” (Apukokinio 7:9, 14) Mam Satan epedori aisimik ngun aitodolikin, naarai eyuwarit Yawe ejaanakinakake.

⁵ Arai isalak oni imunokina neejai Yawe, mam Satan epedori amunaar eidicanewok keda Yawe. Elimokinit oni Ebaibuli ebe: “Ejai EJAKAIT kayes, naijaatar yesi kanges.” (2 Aisiitonokin 15:2; kosiom 1 Ikorinton 10:13.) Ejaanakinak luka Yawe lukolo sek, kwape nat Abel, Enok, Noa, Sara, ka Musa apotu kitepegata Satan kopone loasalakin emunokina neejai Yawe. (Iburanian 11:4-40) Ipedori oni da aswam ngun. Ebala Ebaibuli ebe: “Kitepegata Satan, kikeri ngesi da yes.”​—Yakob 4:7.

6. Epone bo ani esuronokinia Satan oni?

⁶ Karaida ejeni Satan ebe itidisiarit Yawe akegogong kanuepedori ngesi aiswamakin oni, inyikokinit ngesi aswam nuepedori kere kanu amunaar eidicanewok keda Edeke. Itosomai lolo Satan iponesio luegelegela asurokinia oni ido etosom ngesi iponesio lu adaun ikar luipu. Ani bo iponesio ngul?

7. Kanukinyo eutar Satan asurokin ejaanakinak luka Yawe?

⁷ Iwadikat ekiyakia Yokana ebe: “Iboiete da akwapin kere kotoma lokaronon.” (1 Yokana 5:19) Satan nges ipugat akwap na nakaronon ido ekoto ngesi aipuga ejaanakinak luka Yawe da. (Mika 4:1; Yokana 15:19; Apukokinio 12:12, 17) Ejeni Satan ebe edit akepak, aso iswamai ngesi nuepedori kere ainakin oni aijal Edeke. Itosomai Satan iponesio luideleleete  asurokina oni ido acepakio itosomai ngesi iponesio lumam ideleleete.

8. Inyoin bo ibusakinit Ikristayon kere ajenun?

⁸ Ebakasi Ipeson 6:12 ebe: “Kiwuta . . . ka ajoresio nuka imoyon luka aronis, luejaasi toma aiboisio nuka akuj.” Ejai Ikristayon kere auta keda Satan ka akejokin. Ekoto oni ajenun ebe oni kere luidau ainakin aijarawok neejai Yawe, kijai toma ojie lo. Kobaluwake loewadikakini ngesi Ipeson, abu ekiyakia Paul kisinyikok Ikristayon irwan auni “aibwo.” ​—Ipeson 6:11, 13, 14.

9. Inyoin bo euta Satan keda akejokin aiswamakin oni?

⁹ Itosomaete Satan keda akejokin iponesio luegelegela kanu aingalaar oni. Karaida kipedo oni aipikor aitemisio ace nuka Satan, epedori bobo ngesi amoun ecepone loitemis oni. Itosomai Satan akalanyanutowok kanu alokunia oni kotoma acodunio. Konye mam Satan kipikori oni naarai isisianakini Ebaibuli oni nuikamunitos iboteike. (2 Ikorinton 2:11; koany Nuengesete 31.) Ecudet nges ediope kakesi.

10. (a) Inyoin bo ecudet? (b) Epone bo ani esesenia Yawe ecudet?

¹⁰ Imoriarit ecudet aswam iboro lukaumokin kitosomai ajokin, kwape nat aidwar nukoingaren, airo, eipied, arai bo aituputoor einer keda lukatwak. Elimokinit Ebaibuli oni ebe erai ecudet ibore “yeniketal” ido mam oni ipedori aijaanakin Yawe keswamaete ecudet. (Ikisila 18:10-12; Apukokinio 21:8) Ibusakinit Ikristayon ainac iponesio kere luka ecudet.​—Iromayon 12:9.

11. Kanukinyo eroniar oni alelakinit aumonokineta?

 ¹¹ Ejeni Satan ebe elelakinitos itunga iboro lukaumonokineta, aso epatana nges aingalaar kesi toma ocudet. Emunaari ecudet eidicanewok keda Yawe.

12. Epone bo ani etamitor Satan aitolitol aomisiowok?

¹² Etamit Satan aitolitol aomisio nuka itunga. Aijaikinit kes abuonokin, ka anyarit “aronis ajokis, ka ajokis aronis.” (Isaia 5:20) Isinyikokinit Satan aomisioit naebala ebe mam aicoreta nuka Ebaibuli ingarakinete ido idumuni oni aiyalama arai mam oni itupit aicorakineta nuka Edeke.

13. Epone bo ani ijaikinitor Satan itunga abuonokin?

¹³ Abuonokin nges ediope koponesio luepedoria Satan aingalaar itunga luipu. Eswama nges ngun adaun apak naepol. Komanikor loka Eden abu nges kijaik Keba abuonokin naengisia nges ebe: ‘Abala teni Edeke ebe, “Mam inyamenenete araito nuka ekitoi kere lokomanikor”?’ (Ageun 3:1) Kapakio nuka Yob, abu Satan kingit Yawe kojaasi imalaikan da ebe: ‘Eyongit kereka Yob Edeke atai?’ (Yob 1:9) Kedau Yesu aibatisaun, abu Satan kocodu nges kobala ebe: ‘Arai tope irai ijo Okoku loka Edeke, kicorak amor nu koraunos atap.’​—Matayo 4:3.

14. Epone bo ani ijaikinitor Satan itunga aomit ebe mam ecudet erono?

¹⁴ Inyikokinit Satan aijaikinit itunga abuonokin. Ijaikinit nges itunga aomit ebe mam iponesio ice luka ecudet eroko ido eraasi luiteleleete. Iinacan ice kotoma atukot mam aticepak iteete atiokisio nuepedorete atikanun kanuka ecudet. (2 Ikorinton  11:3) Aso, anyoika bo nuipedori oni aswam kanu aidarakin bonik? Epone bo ani ipedoria oni acoit aingal naka Satan? Kaanyut bobo iponesio iarei luepedoria Satan aijodoor oni: aitelelio kede amukian.

15. Epone bo ani epedoria aitelelio ainakin itunga alomar ocudet?

¹⁵ Apakio nu, eraasi ainapeta nuipu, ibidion, iboro luitodianario kotelebision, aboliasio nuejaasi akompiuta, keda olago nuitopoloorito ecudet. Iteete itunga luipu iboro lu kobalas ebe emamei ationis, mam kesi ijenete aronis naka airiunit ajokin toma aijarakec. Epedori bobo itunganan aswam iboro luka ecudet kwape nat aingic apolou naka aacer, aisiom akanin, akaadin nuka aidwar, ka aingic alabira. Ibwait Satan aronis naka iboro kangul kosubitos bala aumonokineta, nuibusiak ido kiteleleete. Epedori itunganan aomoom ebe emamei aronis asesen iboro ngul ebe naarai mam erai ecudet cut elopet. Kanukinyo eroniar aomit kwangin?​—1 Ikorinton 10:12.

16. Kanukinyo ibusakinitor oni ainac aitelelio naka ecudet?

¹⁶ Mam Satan keda akejokin epedorete aisiom aomisiowok. Konye isisiaunete kesi ipudesiawok keda epone loiwomooma oni kotoma asesen aseununetawok nuimoriaritos aitelelio. Arai kiseu oni asesen ibidion, aipup ikososinei arai bo nat aisiom iitabon luitetemitos akiro nuka ecudet, eipied, itunga luitingitos ajokin, alogan, imusimun ka ace da, ejenunete Satan ka akejokin iboro lueminakinitos oni. Egeunete  do kesi ainakin oni alomar cut toma akiro nuka ecudet.​—Kosiom Igalatian 6:7.

17. Epone bo ani epedoria Satan amecakin toma opudesiawok luka amoot angaleu?

¹⁷ Epedori bobo Satan amecakin toma opudesiawok luka amoot angaleu. Ipu adekasinei apakio nu noi. Epedori itunganan aimoo amukian konye etiono adumun. (Marako 5:25, 26) Epedori kwana ngesi aburun kosodi atamanar iponesio kere nuka amukian. Konye oni Ikristayon ibusakinit aseun amukian namam ikamanara keda “aumonokineta nuka ecudet.”​—Isaia 1:13, NW.

18. Ani bo amukian naibusakinit Ikristayon ainac?

 ¹⁸ Kapakio nuka idwe luka Isirael, apotu ice kitosomata “aumonokineta nuka ecudet.” Kanuka ngun abu Yawe kolimok kesi ebe: “Nailoianariata akusikanin ebwaenenei akakonye kama ijaas; eebo, nailipenenata nuipu, mam eiranari.” (Isaia1:15) Ekoto oni aiitun ebe mam Yawe abu kopup akeceilipasinei. Mam ekoto oni aswam iboro luemunarete eidicanewok keda Yawe ido luijaikinete ngesi ainyekin aingarakin oni kacut neijaar oni toma ariebo. (Isabulin 41:3) Aso ekoto oni ajenun arai imoriarit amukian naikoto oni iboro luka ecudet arai bo nat iboro luka ajokin. (Matayo 6:13) Arai kijenu oni ebe ikoni nen, ibusakinit oni ainac cut!​—Koany Nuengesete 32.

19. Epone bo ani itukuriana Satan itunga?

¹⁹ Ewomitos icetunga ebe nueminai aitetem nuikamunitos Satan ka akejokin eraasi awaragan, konye ice ejenete ebe ejaasi ajokin naarai aticepak apotu kiticanata kesi. Itunga luipu epol noi akurian imoyon lukarokok kanuka ngun, araut kesi ibulesin kononosio luka ajokin. Eminasi ice aiwe akiro nuitukurianete, nuikamunitos epone loapotu ajokin itisilarata luce. Elelakinitos kesi duc aipup akiro nu keda aitatamanakin luce da. Erai ngol epone loitukuriana Satan itunga.

20. Epone ani aticepak ipedoria oni aweyar aingal naka Satan?

²⁰ Kojen ebe ekoto Satan itunga akurian nges. (2 Isesalonikan 2:9, 10) Erai nges ekengalan loejeni  epone loijodooret aomisio nuka ngul lueminasi nuka ecudet kainakin kesi aomit ebe eraasi iboro ngun lukabeit. Aticepak epedorete kesi aitatam iboro luebakasi kesi ebe apotu koanyutu ido kopuputu da. Iyatakinos akiro nu anyanyaar kinyikokin aitatam. Mam ekoto oni aingarakin Satan aiweyar akiro nuitukurianete kopone lo oni aitatam akiro ngun.​—Yokana 8:44; 2 Timoteo 2:16.

21. Aiboisit na oni aitatam akiro nuikamunitos ajokin, anyoika bo nuibusakinit oni alimonokin?

²¹ Arai iticanitotor ijo ajokin siritatam ngun aitekwenia arai bo nat aitukuriania luce. Mam ejaanakinak luka Yawe ibusakinit akurian aswamisio nuka Satan keda akejokin. Konye, ibusakinit kesi amunokin apedor naadumu Yesu kaneejai Yawe. (Iburanian 12:2) Mam Yesu abu kitatamanak ikesisiakake akiro nuitukurianete nuikamunitos ajokin. Apodokinit ngesi “aswamisio nuepolok nuka Edeke” ka alimonokin akiro nukajokak nuka Ajakanut.​—Aswamisio 2:11; Luka 8:1; Iromayon 1:11, 12.

22. Anyoika bo nuikapakina ijo aswam?

²² Ekoto oni aiitun ebe alosikinet naka Satan ngesi amunaar eidicanewok keda Yawe. Etamit ngesi aswam nuepedori kere kanu aitodolikin ngun. Konye ijeni oni ibotei luka Satan ido ekoto oni akapakina aisac akiro kere nuikamanara kede ecudet. “Sirikiinakis Satan apak,” aso ekoto oni aiketakin. (Kosiom Ipeson 4:27.) Eebo, arai kitepeg oni Satan, eyuwari Yawe oni kaneejaasi ibotei luka Satan.​—Ipeson 6:11.