1, 2. Epone bo ani abu Balaam kokunia idwe luka Isirael?

ELOKIKINI alokan toma aiboisit naejeni ngesi ebe ipu agaria. Ibwaikini ngesi eritanit olikot kosodi acakakin akipi. Idareikini ngesi motimot, arai kekony agar eritanit, idetuni ngesi.

² Epone ngon elokere itunga da. Kwape aanyunet, naayapiarata idwe luka Isirael alomar toma Akwap Nakaisumunet, apotu kesi kidukuroto Apuutona nuko Moab. Kosodi ekabaka loko Moab aisumunikin etunganan loanyaritai Balaam ikapun luipu kanu aiken idwe luka Isirael. Abu Balaam komou epone loikenokinotor idwe luka Isirael bonik. Abu ngesi ibwaik ibore yenilokunet. Kijukari apesur nuka Moab toma okaabi loka idwe luka Isirael tetere isuparete ikiliokokec.​—Aimario 22:1-7; 31:15, 16; Apukokinio 2:14.

3. Epone bo ani apotu idwe luka Isirael kibirokinos toma olokit loka Balaam?

³ Abu kereka ainerun naka Balaam kitodolikin? Eebo. Apotu idwe luka Isirael luipu kodiakasi ido  “kogeutu itunga aelo kapesur nuka Moab.” Apotu kesi kogeutu aima idekesio luka adoteu kwape nat Baal-Peor. Ido apotu itunga 24,000 kotwakata kanuka adiakaret kangin keyapiasi kes Akwap Nakaisumunet.​—Aimario 25:1-9.

4. Kanukinyo adoteata idwe luka Isirael?

⁴ Kanukinyo abu Balaam kopedoria alokun idwe luipu luka Isirael? Naarai apotu kesi kopodokisi ipudesia luka akuan keda apotu kesi imurwokis nueswamaikinit Yawe kes. Ebusakinit idwe luka Isirael asalakin emunokina neejai Edeke. Abu nges kolakunite kesi kotoma obulesene koMisiri, kitanyam kes kamoding ka ayuwarit kes kitoni naayapiarata Akwap Nakaisumunet. (Iburanian 3:12) Konye apotu kes kodiakasi kanuka adoteu. Abala ekiyakia Paul ebe: “Sirikidoteata, kwape ice kakesi, kibiroros da.”​—1 Ikorinton 10:8.

5, 6. Anyoika bo nuisisiauni oni kanuapotu kotakanutu kApuutona nuko Moab?

⁵ Eyapie akwap nakitetet. Isubit oni da kwana bala idwe luka Isirael naayapiarata kesi Akwap Nakaisumunet. (1 Ikorinton 10:11) Epol lolo adoteu kotoma akwap adepar apakio nuka idwe luko Moab. Epedori adoteu amunaar ejaanakinak luka Edeke Yawe da. Kabeit, ibore yenepol yenitosomai Ekejodijodon kanu alokunia itunga luka Yawe nges adoteu.​—Aimario 25:6, 14; 2 Ikorinton 2:11; Yuda 4.

⁶ Ingitakin ber ijo, ‘Ibusakinit kereka eong alelakin aswamisinei nuka adoteu naarai akote eong adumun aiyalama, arai bo ejok ti eong atitingikin tetere  ajari ikar kere kotoma akwap nakitetet?’ Mam kereka eraas nukajokak eong atupakin aicoreta nuka Yawe ebe: “Kinacata adoteu”?​—1 Ikorinton 6:18.

7, 8. Inyoin bo adoteu? Kanukinyo eraatar ngun akiro nueroko noi?

⁷ Itunga luipu lolo iswamaete akiro nuka adoteu ido mam epodokinitos ikisila luka Edeke luikamunitos aelo. Kotoma Obaibuli, imoriarit “adoteu” aelo kiding itunga lumam edukokina kotoma okisil. Imoriarit bobo adoteu ikiliok aelo bonik arai bo nat angor aelo bonik ka itunga aelo keda itiang. Erai bobo adoteu ajaikin keda epai, itunganan ainak yenice neileicike, aitep nges kauke, aiminimin itunganan neileicike kanu aitodolikin eipud loka aelo.​—Koany Nuengesete 23.

⁸ Itacaunit Ebaibuli ebe mam itunganan yeniswamai akiro nuka adoteu ibusakinit asalakin toma atukot. (1 Ikorinton 6:9; Apukokinio 22:15) Aiyatakin nen, irumete idotea ileic ido mam luce epote amunokin kes. Ipuak atiokisio nuelomunete kanuka adoteu. Aomisio nuarokok, apotuu, atiokisio nuka okale, adekasinei nuikopasi kotoma aelo arai bo nat atwanare da. (Kosiom Igalatian 6:7, 8.) Korai itunganan aomoom nuikamunitos atiokisio nuelomunete kanuka adoteu, timam nges iswama adoteu. Konye ationis eomoomoete itunga duc nuikamunitos aitodolikin eipudikec loka aelo. Ibore yenisodit yenetapit kes aswam nges ageun asesen aputosia nuimujalalas.

9. Kanukinyo eroniar asesen aputosia nuimujalalas?

⁹ Aputosia nuimujalalas inomunitai keda alosikinet naka agwaun eipud loka aelo. Ido idilasi lolo aputosia nuimujalalas kotoma amagasinis, oitabon, obidion, otelebision keda olago. Eomitos itunga luipu ebe emamei aronis aite aputosia ngun, konye kotoma abeit, ejai aronis asesen aputosia ngun. Ijaikinete aputosia ngun itunganan aidulokin aomoom akiro nuka aelo ka ipudesia lukarokok. Naegeunia itunganan aidulokin asesen aputosia nuimujalalas, einakinete itunganan agear aiminimin neileicike, eyauni atiokisio toma odukone ka aticepak elakit da.​—Iromayon 1:24-27; Ipeson 4:19; koany Nuengesete 24.

10. Epone bo ani ingarakiniata oni aicoreta nuejaasi toma oitabo loka Yakob 1:14, 15 ainac adoteu?

¹⁰ Ibusakinit oni amisiikin epone loegeuniata aomisio nuka adoteu alomakin oni. Koany aikwenyaret naejai toma oitabo loka Yakob 1:14, 15: “Nginitunganan ecodunio kiriite ekeimiel elopet kaijodijodio. Kosodi kepotuu eimiel euriei adiakar, adiakar ngin da kepoloor idouni atwanare.” Aso, kelomakisi ijo aomisio nuarokok, ibusakinit ijo alemar katipet. Arai kituriaikin ijo asesen apotusia nuimujalalas, ibusakinit ijo apalar asesen katipet. Kogweta akompiuta arai bo kijukak nenice. Mam icamakini aomisio nuarokok alomakin ijo. Tetere mam eimiel loaronon epedori aijodoor ijo.​—Kosiom Matayo 5:29, 30.

11. Epone bo ani ingarakinia Yawe oni arai ejaunos oni aomisio nuka adoteu?

 ¹¹ Ejeni Yawe oni adepar epone loijenia oni awatewok kikulepek. Ejeni ngesi ebe mam oni irai luidolit. Ejeni bobo Yawe ebe ipedori oni aipikor aomisio nuarokok. Elimokinit oni Yawe ebe: “Aso kitwataniasi akusitutubeta nuejaas akwap; adoteu, asilianut, ainekit, eimiel loerono, ka airangaanut, nges aima aputosia.” (Ikolosain 3:5) Arai da etionikit oni aswam ngun, etitingikinit Yawe oni ido ingarakini ngesi oni. (Isabulin 68:19) Abu atumunan ediopet loarai onac kijodoor asesen aputosia nuimujalalas kogeari aiminimin neileicike. Abakasi ipapero kosomeroke ebe ejok aswam ngun ido ebe itodunit ebe ipoloor ijo konye abu ngesi kotema ebe: “Apotu nu  komunasi akaomisio ido atapit eong aomoom akiro nuka adoteu.” Abu ngesi koany ebe ebusakinit ngesi aitikitik ipudesiake ido abu Yawe kingarak ngesi aisac aswam ngun. Arai epotu ijo aomisio nuka adoteu, kilip Yawe “apedor” naka aipikor aomisio nuarokok.​—2 Ikorinton 4:7; 1 Ikorinton 9:27.

12. Kanukinyo ibusakinitor oni ‘aidar iwokotauon’?

¹² Abu Solomon kiwadik ebe: “Kodunyakinite noi aidar ekonitau; Naarai kotomake nges elomuniata nuka aijar.” (Awaragasia 4:23) “Etau” ngesi etunganan lokotoma, loeseseni Yawe. Epedorete iboro luiseseni oni amunaar oni. Abu Yob kolimunite ebe: “Abu ketutuk aitutuket kakonyeka; aso ti kapedo biai asesen apese?” (Yob 31:1) Kwape ka Yob, ekoto oni acoit iboro luiseseni ka luiwomoomoenenei oni. Ido kwape ekayoon Isabulin, ekoto oni ailip ebe: “Kibelok akakonye kaite aamameak.”​—Isabulin 119:37.

13. Ani bo ipapero luabu Dina koseu?

¹³ Epedorete ipaperowok aijaikin oni aswam nuejok arai nueroko. Arai kiseu oni ipapero luetupitos aicoreta nuka Edeke, ingarakinete kesi oni da aswam kwangin. (Awaragasia 13:20; kosiom 1 Ikorinton 15:33.) Isisiauni oni kaneejai Dina ebe erai ibore yenepol oni aseun ipapero luejokuka. Arai ngesi akoku naka Yakob, ketopolounitai ngesi kokale loejaanakini Yawe. Mam Dina arai naadote, konye abu ngesi kogeu aupenena keda apesur nuko Kanan numam ejaanakinete Yawe. Araasi itunga luko Kanan luadote  noi, etegelikina itunga luka Edeke. (Ilebin 18:6-25) Naupatar Dina keda apaperoke, abu ngesi kodum esapat loenyaritai Sekem loabu kominu nges. Arai Sekem ‘loetopolooritai kakere’ kotogo loka papake. Konye mam ngesi ejaanakini Yawe.​—Ageun 34:18, 19.

14. Anyoika bo nuapotu kotakanikisi Dina?

¹⁴ Abu Sekem kiswama nuepedori kere kanu aisupar Dina. Abu ngesi kominak Dina, “kikam nges” kosodi ‘aitisil nges.’ (Kosiom Ageun 34:1-4.) Apotu ngun koyautu ationis naepol neejai Dina ka ekalekec.​—Ageun 34:7, 25-31; Igalatian 6:7, 8.

15, 16. Epone bo ani ipedoria oni araun lukacoa?

¹⁵ Isisiauni oni kaneejai aibucaret naka Dina ebe erono aimwang aicoreta nuka Yawe nuikamunitos aise ipapero. “Koupenenasi kalukacoa, icouni ijo da: Konye eswalar aupakec loka ibangiok.” (Awaragasia 13:20) Ekoto jo ajaut kede alosikinet naka amisiikin “ngolirot loejok” tetere isaci atiokisio nueinakinete oni adumun aiticanitoi.​—Awaragasia 2:6-9; Isabulin 1:1-3.

¹⁶ Ipedori oni araut luicoak arai kisisianenei oni Ebaibuli, ailip eroko itolomunia aseunet ka atupakin aicoreta nuka ebulesit lomunot kopiriana da. (Matayo 24:45; Yakob 1:5) Eebo, ejena ebe irai oni kere luikalanyaka ido lumam idolit. (Yeremia 17:9) Konye anyoika bo nuiswamauni ijo arai elimoki ijo itunganan ebe iuta ijo adotear? Inyunyurikin kereka ijo arai bo ijauni ijo aicoretait kaitasono?​—2 Ikabakan 22:18, 19.

17. Kijaik aanyunet naitodunit ebe epedori aicorakinet naka iinacan aingarakin oni.

 ¹⁷ Koomoom ber ijo kwape aanyunet. Etunganan agear aisup inac kotoma aswam ka anyaraar inac na aupar kangesi. Mam etunganan lo erai loijaanakini Yawe konye esubit ekesa je bala ejok ido esiana. Koanyuni inac ace kesi eupasi kosodi aikwenyar ngesi. Anyoika bo nuiswamauni inac naaupasi keda etunganan ngon? Ededengar kereka ngesi arai bo ijauni aicoretait kwape naejok? Aticepak emina inac ngin Yawe ido okoto aswam nuejok. Konye arai inyikoki ngesi aupanena keda etunganan ngol, ‘inacit kereka ngesi adoteu’ arai bo ‘emunokina ngesi etauke bon’?​—Awaragasia 22:3; 28:26; Matayo 6:13; 26:41.

18, 19. Kitetem epone loabu Yosep kinacia adoteu.

¹⁸ Naaraar Yosep atumunan, abu ngesi koraun ebulesit koMisiri. Atapit aberu naka lokapolonike akote aelo keda nges, konye ajeni Yosep ebe erai ibore yenerono nges aswam ngun. Amina Yosep Yawe noi ido eswamai ngesi nuisiyalamikinito Yawe. Naakotor aberu ngin aelo keda nges, abu Yosep konger. Konye kwape araar nges ebulesit, mam nges apedori anyoun ajalakin lokapolonike. Adiopepaaran ketam aberu naka lokapolonike abuikin nges aelo, abu nges “koker kinga.”​—Kosiom Ageun 39:7-12.

¹⁹ Ti akiro ngun itegelikina arai kocamakinite Yosep aomisio nuka aelo adukun kaneejai ngesi arai bo nat aomoomoenen nuikamunitos aelo kede aberu ngin. Konye eidicaneke keda Yawe araasi nuepolok noi kaneejai Yosep adepar idiobore kere. Abu nges “kolimok aberu naka ekapolonike ebe . . . ‘Ekapolonika . . . emamei da imodiobore yenimam kainakinit nabarai ijo bon, naarai irai ijo akeberu: aso ekoni apedori ai aswam aronis naetia nen, adiakar da kama ejai Edeke?’”​—Ageun 39:8, 9.

20. Epone bo ani ijenunia oni ebe abu Yawe kisiyalamik Yosep?

²⁰ Karaida amamei Yosep kaneejaasi iketunga, abu nges kosalak emunokina neejai Yawe ido abu Yawe kisirereng nges. (Ageun 41:39-49) Abu Yawe kisiyalamik amunoonut naka Yosep. (Awaragasia 27:11) Mam epatana ainac adoteu. Konye iitu akiro nu: “Aso ca, yes luiminasi EJAKAIT, kolaata aronis: idari ngesi  itauon luka lukalaunakake; eyuuni kesi kakan naka ikaronon.”​—Isabulin 97:10.

21. Epone bo ani abu onac ediopet koputooria Yosep?

²¹ Kanginipaaran, itodununete Ajenak Luka Yawe ebe ‘elaito kes aronis’ ido ‘eminas ajokis.’ (Amos 5:15) Ipedori jo asalakin imunokina neejai Yawe arai idite jo arai mam. Abu onac ediopet kotereikinos keda ainingosit kosomero. Abu apese adiope kisumunik onac aelo arai kingaraki onac nges keda aimar. Inyoin bo abu onac iswama? Abu nges kiswama bala Yosep. Ebala nges ebe: “Abu eong anger akekiro. Kanuka amunoonutuka neejai Yawe, abu ngin kijaik eong aibuses ka angosibib.” Eebo, ‘aitalakaario naka apak naedit’ naedumunio kotoma adoteu eyauni atiokisio nuipu. (Iburanian 11:25) Arimaarit Yawe duc eyauni aiyalama nakabeit.​—Awaragasia 10:22.

22, 23. Epone bo ani ingarakinia Yawe oni arai kidiaka oni?

²² Itosomai Satan adoteu kanu aikamunia oni, ido erai na acodunet naepol. Idumununei oni kere icesawan aomisio nueroko. (Iromayon 7:21-25) Emisiikinit Yawe ido ejeni ngesi ebe “kirai oni apua.” (Isabulin 103:14) Do bo do arai edotet Ikristayot? Epedorio kereka aingarakin? Eebo. Arai cut kitoronikin itunganan epedori Yawe aingarakin nges. Ekapakina Edeke “aisioni.”​—Isabulin 86:5; Yakob 5:16; kosiom Awaragasia 28:13.

²³ Ejaiki Yawe oni imakio kwape “itunga ainakineta” lueminas ido kopodokinitos oni. (Ipeson 4:8, 12;  Yakob 5:14, 15) Ejaiki Edeke oni imakio kanu aingarakin oni aitogogong eidicanewok keda nges.​—Awaragasia 15:32.

24, 25. Epone bo ani ingarakinia “acoa” oni ainac adoteu?

²⁴ Kanu oni aitolomunun aseununeta nuajokak, ekoto ber oni amisiikin ikisila luka Yawe. Mam ekoto oni asubit bala esapat loitetemitos Awaragasia 7:6-23. Naarai amamei nges “acoa,” abu aberu naadote kingala nges. Ejok acoa adepar aijen. Arai ijaatar oni keda acoa, ibuni oni amisiikin nuekoto Yawe ka aibwaikin toma aswamisioit. Kiitu akiro nuta nuka acoa: “Loedumuni acoa, emina aijarake. Loerici aijen edumuni ajokis.”​—Awaragasia 19:8.

²⁵ Icamunit kereka ijo cut ebe edolitos aicoreta nuka Edeke? Icamunit kereka ijo cut ebe idumuni jo aiyalama arai kitupaki jo aicoreta nuka Edeke? (Isabulin 19:7-10; Isaia 48:17, 18) Arai iroko jo ibuonokin, ekoto jo aiitun nuajokak kere nueswamaki Yawe jo. ‘Kiir ber, koany ebe ejok Yawe.’ (Isabulin 34:8) Arai kiswama jo ngun, ebuni aminakon kanuka Edeke apoloor. Komin iboro luemina Yawe, kolaa iboro luelait ngesi. Ekoto jo aileleb aomisiokon keda iboro lukabeit, luedolito, luelaete, lutemela ka luisupete. (Ipilipin 4:8, 9) Ipedori oni da aputoor bala Yosep loabu kimedau kotoma aicoreta nuka Yawe.​—Isaia 64:8.

26. Anyoika bo nuebeit aisisia?

²⁶ Ekoto Yawe oni kere ajaut keda aiyalama ka aijar naejok arai idukokina ijo arai mam. Ingarakinete oni isulai iyarei luetupakinete alelakin edukone.