1.  Ajenun Babulon Nakapolon

2.  Iwori bo Abeitor Mesia Adolun?

3.  Iponesio Luka Amukian Luimoriaritos Aitwasam Aokot

4.  Atiakakin Kodukone

5.  Apaarasia Nukapolok Keda Ipucino

6.  Adekasinei Nuekorasi

7.  Agwelanar ka Akiro Nuka Ikisila

 1. Ajenun Babulon Nakapolon

Epone ani ijenunia oni ebe ebwoikinit ‘Babulon Nakapolon’ idiinin kere lukaisab? (Apukokinio 17:5) Kojen akiro nuta:

• Ejai ngesi anatar akwap kere. Itejenunitai Babulon Nakapolon kwape naiboio “ikodeta, ka atekerin.” Irumit bobo ngesi “ikabakan luka akwap.”​—Apukokinio 17:15, 18.

• Mam ngesi erai atukot naka epugak arai bo naka ikagwelanarak. “Ikabakan luka akwap” keda “ikagwelanarak” ekuete amudiario naka Babulon Nakapolon.​—Apukokinio 18:9, 15.

• Emunaarit ngesi ekiror loka Edeke. Enyaritai ngesi aberu naadote naarai imorikikina ngesi keda apuganisinei kanu adumun ikapun ka iboro ice da. (Apukokinio 17:1, 2) Ingalai ngesi itunga luka atekerin kere. Ido ainaki itunga luipu etwakete.​—Apukokinio 18:23, 24.

Obongo aisisiaet na 13 akirot na 6

 2. Iwori bo Abeitor Mesia Adolun?

Adwarit Ebaibuli ebe etakanuni Mesia akaulo asabaton 69 ajaun.​—Kosiom Daniel 9:25.

• Iwori bo ageunotor asabaton 69? Okaru lo 455 E.L.K. Kapak kangin abu Nekemia Ekayaiton kodol Yerusalem aiteten ka ‘aiduk’ eibuga ngol.​—Daniel 9:25; Nekemia 2:1, 5-8.

• Apak naetia ai apotu asabaton 69 kodautu? Kotoma adwareta ace nuka Ebaibuli, ebwoikinit apaaran ekaru. (Aimario 14:34; Esekiel 4:6) Aso, asabaton nu akanyaarei ebwoikinitos ikaru ikanyaarei. Kotoma adwaretait kana, asabaton 69 imario kwape ikar 483 (asabaton 69 x apaarasia 7).

• Iwori bo angetakinotor asabaton 69? Aimarun ikar 483 anyoun kokaru 455 E.L.K. eyauni oni toni okaru lo 29 E.L. a Ngol nges ekaru loebatisaunor Yesu ido loaraunor ngesi Mesia!​—Luka 3:1, 2, 21, 22.

Obongo aisisiaet na 15 akirot na 5

 3. Iponesio Luka Amukian Luimoriaritos Aitwasam Aokot

Ejai amukian naimukeere itunganan kitwasamaete akeokot ilope. Ace kotoma amukiasinei kanu imoriaritos itunganan akorar akeokot arai bo igaunio akeokot kosodete aingadakin kanu ngesi aitwasam kapak naejengere ngesi​—konye mam Ikristayon iswamaete ngun.​—Ikisila 15:23.

Konye epedorete Ikristayon acamun iponesio ice luka amukian luimoriaritos aitwasam aokot. Imoriaritos iponesio ngul aitwasam aokot kanu ainwakun adekasinei, hemodialysis, hemodilution, arai bo cell-salvage keda heart-lung bypass machine. Erai Nginikristayot ilopet eseuni epone loitwasamaere aokotoke kapak naejengere nges, nainwakere aokotoke, arai bo naejaar ngesi adumun amukian. Kangolimuron epedori aitwasam iponesio lu luka amukian kopone loegitakina mot. Kanuangun, eringa Ikristayot ecamuna epone edio kere loka ajengio, ainwakio, ka loka amukian, ibusakinit ngesi alingakin aingitun imurwok epone loekotore aitwasam akeokot. Koomoom nuikamunitos aingiseta nuta:

• Do bo arai kitukudoor aokot ace kakuanaka ido aticepak kopalarete alele adaun apak? Ecamakinete kereka akawomisio eong ayait aokot ngun kwape nueringa ejaasi akuanaka, arai bo eyaitos akawomisio aokot ngun kwape nuibusakinit ‘abukor kwap’?​—Ikisila 12:23, 24.

• Do bo arai igaun akaokot kapak naka amukian, kosodete aitalaun, ido konyet ainyakakin akuanaka? Epote kereka akawomisio nuituutoorit Ebaibuli aican eong, arai bo acamuni eong amukian naepone kangol?

Obongo aisisiaet na 39 akirot na 3

 4. Atiakakin Kodukone

Mam Ebaibuli itojokaarit ekiliokit keda aberu luedukokina atiakakin ido itacaunit bobo ebe arai ketiakakinos kesi, mam ibusakinit idiokakesi adukoor nenice. (1 Ikorinton 7:10, 11) Konye epedori ejautene atakanun loaticepak einakini Ikristayon ice luedukokina aseun atiakakin.

• Apeleikin aigir aigangit ekale: Egir ekiliokit aidar lukokaleke kitoni naemamikiniata kesi iboro luipudasi kanu ajaria.​—1 Timoteo 5:8.

•   Aibungaenen: Epedori idiopet kaluedukokina aibungaenen yenice kitoni aibwaikin aijar naka yenikowaike oitelesit.​—Igalatian 5:19-21.

• Aimik yenice cut aijaanakin Yawe: Epeleiki itunganan aimik yenikowaike cut aijaanakin Yawe.​—Aswamisio 5:29.

Obongo aisisiaet na 42 akirot na 3

 5. Apaarasia Nukapolok Keda Ipucino

Mam Ikristayon inumunumete apaarasia nukapolok numam isiyalamikinitos Yawe. Konye Nginikristayot ibusakinit aitwasam akeomisio nuituutoonorit Ebaibuli aitutubio nuiswama kapak nainumunumiata luce apaarasia ngun. Koomoom nuikamunitos aanyuneta nu.

• Emunor itunganan ijo ainumunum jokan apaaran nakapolon. Ipedori ijo alimokin ngesi ebe, “Eyalama.” Arai ekoto itunganan ngin ajenun nuipu, ipedori ijo aitetemikin ngesi kanuinyo mam ijo inumunumia apaaran ngin nakapolon.

• Enyararit ijo yenikowaikon yenimam erai idiope ka Ajenak Luka Yawe ainyam kipajan kapaaran nakapolon. Arai ecamakinitos aomisiokon ijo alosit, ipedori ijo alingakin aitetemikin yenikowaikon ebe arai ejaunos inonosio luka ikapirin osawan luenyamere, mam ijo ibuni atupakin inonosio ngul.

• Ejaiki ijo loapolonikon kotoma aswam ainakinet kapakio nukapolok. Ibusakinit kereka ijo ainger ainakinet ngin? Aticepak mam. Eseseni kereka loapolonikon ainakinet ngin kwape naimoriarit ainumunum, arai bo erai aisiyalamikinet kanu aswamukon?

• Ejaiki itunganan ijo ainakinet kapak nainumunumere apaaran nakapolon. Epedori ikainakinan atemar ebe: “Ajeni eong mam ijo inumunumei apaarasia nukapolok, konye akot eong aijaikin ijo ainakinet na.” Acepak erai ngesi yenekori kasianut. Kejaa ngun da, erai kereka ebe euta ngesi aitem akoniiyuun kanu aanyun arai inumunumei ijo apaarasia nukapolok? Akaulo najo aomoom ngun, ibusakinit ijo ilopet aitutub acamun arai ainger ainakinet ngin. Kotoma aseunetawok kere, ekoto oni ajaut keda aomisio nuelaete kojautene edio kere ka asalakinit imunokina neejai Yawe.​—Aswamisio 23:1.

Obongo aisisiaet na 44 akirot na 1

 6. Adekasinei Nuekorasi

Naarai imina oni itunga, icoit oni akorakin kesi adekasinei. Kanuangun, ibusakinit oni acoit noi arai ijeni oni ebe ijaatar oni keda adiodeka naikopa, arai bo iwomit oni ebe aticepak engopit adeka ngin kamawok. Iswamai oni kwangin naarai icorakinit Ebaibuli oni ebe: “Komina ikoniidunyet kwape iminar bon.”​—Iromayon 13:8-10.

Epone ani epedoria itunganan yenejaatar ka adeka naikopa atupakin aicoretait na? Mam ibusakinit ngesi aitodikin luce amin kopone loatunanar kakes arai bo ainu kes. Mam ibusakinit itunganan ngin akadakin arai epupi yenice ebe kanu ayuwara naka ekaleke, mam ngesi enyarari itunganan ngin oreke. Ido eringa yenejaatar keda adeka naikopa ibatisauna, ibusakinit ngesi aitejenikin onac loerucokinit imakio ekejautene tetere itemokinio ainapeta nuka ayuwar luce luibatisaunos. Ibusakinit itunganan yenewomit ebe aticepak ejaatar ngesi ka adeka naikopa, ilopet alemun alosit ainwak aokot eroko egeara eisupane. Kiswama ngesi ngun, itoduni ebe epodokinit ngesi mere “nuke bon, konye nuka luce da.”​—Ipilipin 2:4.

Obongo aisisiaet na 56 akirot na 2

 7. Agwelanar ka Akiro Nuka Ikisila

Aitolomun aiwadikaeta ka luce karaida keda Idiokristayot, ingarakini oni airebokin atiokisio nuipu nuelomunete kotoma okapun ka agwelanar. (Yeremia 32:9-12) Konye bobo, epedorete ingungeta ajaun kiding Ikristayot ka yenice kanu ikapun arai bo kanu akiro ace. Ibusakinit kesi aitemokin ingungetakec katipet, kainapakina ido korai kesi bon ikulepek.

Konye epone ani ibusakinitor oni aitemokin ationis naepol kwape nat erodit keda amunaario naka ekiror kayenice? (Kosiom Matayo 18:15-17.) Ijaikinit Yesu oni akiro auni nuibusakinit atupit:

1. Otamata yes ikulepek aitemokin ationis.​—Koany ekokoro lo 15.

2. Arai mam ngun ingarakinete, kolimok idiopetunganan arai itunga iarei aupar kajo.​—Koany ekokoro lo 16.

3. Arai kitam ijo ngun da, komam akiro itemokinos, ngesi konyet ilimokinia ijo imakio.​—Koany ekokoro lo 17.

Mam kanoinoi ibusakinit oni ayangaar iinacanawok okooti naarai eyaunete ngun amorosit neejai Yawe keda atukot. (1 Ikorinton 6:1-8) Karaida ikote iboro nen, ejaasi acekiro nuekotokinos aitemokinio kokooti: alakakin kodukone, aidario naka idwe, aitiak iboro, akiro nuikamunitos insurance, ekuroki itunganan aitac apesen naepol, keda aitolomun ka aitogogong ewiil. Ikristayot yenelosi okooti kanu aitemokin akiro kwape kangun kainapakina, mam ebilit aicoreta nuka Ebaibuli.

Arai iswamauna nueroko noi kwape nat aibu aisiol, aiteper ikoku, esurokin idiotunganan, akoko, arai bo eyarit​—mam Ikristayot yenelimori akiro kwa ngun ebilit adioicoretait naka Ebaibuli.

Obongo aisisiaet na 56 akirot na 3