AISISIAET NA 34

Epone Ani Ipedoria Oni Aitodun Ebe Imina Oni Yawe?

KOBOLIAK

Ipupi kereka ijo ebe eyatakin aminakon kanuka Edeke ameun naigeunia ijo aisisia Ebaibuli? Ikoto kereka ijo ainyikokin aitogogong eidicanekon ka Yawe? Arai erai kwangin, naesesenia Yawe akonimin inyikokinit apolo, inyikokini ngesi da aminun ka apodokinit ijo. Epone ani ipedoria ijo aitodun ebe imina ijo Yawe?

1. Epone ani ipedoria oni aitodikin Yawe ebe imina oni nges?

Itoduni oni ebe imina oni Yawe kotoma arimaarit ngesi. (Kosiom 1 Yokana 5:3.) Mam Yawe ebuikinit idiotunganan arimaar nges. Konye einakinit ngesi oni kere arereng naka aseun arai irimaari nges arai mam. Kanuinyo? Ekoto Yawe arimaaritewok korai naelomunit ‘kotau.’ (Iromayon 6:17) Apolouke ebe ekoto ngesi ijo arimaar nges, mere bon naarai ibusakinit ijo aswam ngun konye naarai imina ijo nges. Itemokinitai atutubet na 3 ka na 4 naka eitaabo kalo kanu aingarakinia ijo aitodun aminakon kanuka Yawe kotoma aswam nuisiyalamikinitos nges ka aisac nuitakadikinete nges.

2. Kanuinyo aticepak etionor aitodun aminawok kanuka Yawe?

“Ipu aicaneta nuka ikadoliton.” (Isabulin 34:19) Oni kere kiwuta keda amamus adolit. Ido aticepak itereinikin kibakor, etube loaronon, ka atiokisio ace da. Aswam nuekot Yawe epedori ationior kitereikin oni katiokisio. Ikote iboro nen naarai aticepak epatanikini oni aswam numam ibusakinito. Konye kiswama ijo nuekoto Yawe, itoduni ijo ebe imina jo nges adepar idiobore kere. Bobo da, itogogongi ijo cut ebe imunokina jo nges. Kanuangun, emunokin ngesi da ijo. Mam nges ejali jo.—Kosiom Isabulin 4:3.

KISISIAU NUIPU

Kisisiau kanuinyo eraar akonirimaarit ibore yenepol kaneejai Yawe, ido kojenu nuepedorete aingarakin ijo ainyikokinit arimaarit ngesi.

3. Itoronit Satan ijo

Katupitos eitaabo loka Yob, mam Satan abu kitoron Yob bon etunganan lokolo sek, konye itoronit ngesi itunga kere luekotosi aima Yawe. Kosiom Yob 1:1, 6–2:10, kosodete aimor aingiseta nuta:

Anyoika bo nuabala Satan ebe ainakinitos Yob aijaanakin Yawe?—Koany Yob 1:9-11.
Anyoika bo nuebala Satan kanuikamunitos itunga kere?—Koany Yob 2:4.

Kosiom Yob 27:5b, kosodete aimor aingiset nata:

Epone ani abu Yob kitodunia ebe amina ngesi Yawe?

Abu Yob kitodu ebe amina ngesi Yawe kopone lo ngesi asalakinit emunoono

Itoduni oni ebe imina oni Yawe kopone loasalakinit imunoono

4. Kisiyalamik etau loka Yawe

Kosiom Awaragasia 27:11, kosodete aimor aingiseta nuta:

Epone ani epupio Yawe arai kirai ijo yenico ido korimaarite nges? Kanuinyo?

5. Ipedori ijo amunokina Yawe

Amin Yawe einakini oni alimonokin luce nuikamunitos nges. Amunokina Yawe einakini oni aswam nuekoto ngesi karaida etionikinit oni aswam ngun. Koboliak EBIDIO, kosodete aimor aingiseta nuetupakinete.

EBIDIO: Koyuwa Akoniiyuun Karaida Ejai Areio (5:09)

Etionikinit kereka ijo alimonokin luce nuikamunitos Yawe?
Kotoma obidio, inyo abu ingarak Grayson aipikor akurianuke?

Epatana arimaar Yawe arai imina oni nuemina ngesi ido kalaitos nuelait ngesi. Kosiom Isabulin 97:10, kosodete aimor aingiseta nuta:

Katupitos nuidau ijo aisisiaun, anu bo iboro luemina Yawe? Anu bo iboro luelait ngesi?
Epone ani ipedoria ijo aisisiaun aminun nuejokuka ka aila nueroko?

6. Imedauni oni kotoma arimaar Yawe

Arimaarit Yawe erai duc ibore yenejok noi. Kosiom Isaia 48:17, 18, kosodete aimor aingiseta nuta:

Iwomit kereka ijo ebe ekotor Yawe oni nuejokuka kakere? Kanuinyo?
Epone ani imedaunitor ijo kotoma aisisia Ebaibuli keda kotoma ajenun Yawe, Edeke lokabeit?

EBAKASI ICETUNGA EBE: “Mam epatana aisiyalamikin Edeke.”