AISISIAET NA 11

Epone Loipedoria Ijo Aimedaun Noi Kotoma Aisiom Ebaibuli

KOBOLIAK

Itamitor kereka ijo ageun aswam naepol konye kopupi bala etiono noi? Aticepak kanu jo apedor aitodolikin aswam ngin, iseuni jo atiakunun nges adio adio. Aisiom Ebaibuli da ikoni nen. Ipedori jo aingitakin ebe ‘Ai bo do agearia eong?’ Kotoma aisisiaet kana, ilosi oni aanyun iboro luepataka luipedori ijo aswam luingarakinete ijo alelakin asiomenen ka aisisiaenen Ebaibuli.

1. Kanuinyo ibusakinitor oni atapit asiomenen Ebaibuli?

Itunganan yenetapit asiomenen Ebaibuli arai bo ‘ekisil loka Ejakait,’ eraun yeniyalama ido yenekeriana. (Kosiom Isabulin 1:1-3.) Kanu ageun, kotam asiomenen adaun idakikan idis kanginipaaran. Kinaik ijo Akirot Naka Edeke, ibuni ijo alelakin asiomenen.

2. Inyo ingarakini ijo aimedaun kotoma asiomenen Ebaibuli?

Kanu adumun ajokis naepol kotoma aisiom Ebaibuli, ibusakinit oni apalanar naisiomia kasodete ‘aomoomoenen’ nuikamunitos akiro nuidau oni aisiom. (Yosua 1:8) Naisiomia ijo, kingitanakin aingiseta kwape kanuta: ‘Anu bo nuesisiauni eong kane kanuikamunitos Edeke Yawe? Epone bo ani apedoria eong aitwasam akiro nu kotoma aijaraka? Epone bo ani apedoria eong aitwasam ikokoron lu aingarakinia luce?’

3. Epone bo ani ipedoria ijo aridun apak aisiom Ebaibuli?

Etionikinit kereka ijo aridun apak asiomenen Ebaibuli? Luipu kaoni emina apak amamikinit. Kotamak ‘ayuunun apak.’ (Ipeson 5:16) Ipedori ijo aswam ngun arai kitemok ijo apak naka asiomenen Ebaibuli kanginipaaran. Itemokinitos ice asiomenen Ebaibuli kanginitupuruc. Eseunitos ice apak kwape nat isawan luenyamere lukapaaran. Konye bobo ice esiomete Ebaibuli ebong eroko eloto ajo. Ani bo apak naibecokina keda ejautenekon?

KISISIAU NUIPU

Isisiau epone loipedoria ijo alelakin asiomenen Ebaibuli. Koany epone loitemonokinet jokan tetere ijo imedauni noi kotoma aisisiaenen Ebaibuli.

Kwape ipedoria oni aisisiaun aminun ainyam inyamat luegelegela, ipedori oni aisisiaun alelakin asiomenen Ebaibuli

4. Kisisiau alelakin asiomenen Ebaibuli

Mam aticepak epatana ageun asiomenen Ebaibuli. Konye, ipedori oni adukun ‘eimiel’ loka aswam ngun, kwape epedoria itunganan aisisiaun anaikin ainyam inyamat lulem mam nges anyamenenei. Kosiom 1 Petero 2:2, kosodete aimor aingiset nata:

Arai kisiomenen jo Ebaibuli kanginipaaran, iwomit kereka ijo ebe ipedori jo anaikin ka ainyikokin asiomenen nges?

Koboliak EBIDIO kanu aanyun epone loagearata itunga ice alelakin asiomenen Ebaibuli. Kosodete aimor aingiseta nuetupakinete.

EBIDIO: Atumunak Luesisiautu Amin Akirot Naka Edeke (5:33)

Anu bo ainingosia nuitodunitai kotoma obidio nuapotu atumunak kipikosi?
Inyo bo abu ingarak kes aitodolikin akecelosikinet naka asiomenen Ebaibuli duc?
Epone bo ani apotu kesi itarauniata asioman naka Ebaibuli ibore yenelelakinitos kesi?

Nuepedorete aingarakin ijo ageun:

Koseu Ebaibuli loijulunitai ejok ido loepana amisiikin. Kotamak aitwasam New World Translation arai ejai kotoma angajepekon.
Kogeu ber aisiom atutubena nuilelakinit ijo noi. Kanu adumun akiro nuingarakinete ijo, koany acaat naebala ebe “Kogeu Asiomenen Ebaibuli.”
Iwadik nuidau ijo aisiom. Itwasam acaat naka oitaabo kalo naebala ebe “Kokweta Neidol Ijo Kotoma Asiomanikon Naka Ebaibuli.”
Kitwasam JW Library^®app. Isipedori ijo kaneijai kere, aisiom arai bo apupokinit Ebaibuli esiomio kitwasamai esimu arai bo ice koboro luisipedoritos ngun.
Itwasam nuitetemitai nuejaasi toma New World Translation. Imoriaritos ngun amaapun, acaatin, keda nuitacaunitai nuingarakinete ijo aminun asiomenen Ebaibuli.

5. Kitemonok kanu aisisia Ebaibuli

Kosiom Isabulin 119:34, kosodete aimor aingiset nata:

Kanuinyo ejokunar ijo aige ber ailip eroko egeuna aisiom arai bo aitemonokin kanu aisisia Ebaibuli?

Epone bo ani ipedoria ijo aimedaun noi kanginipak naisisia ijo Ebaibuli? Naitemonokinia ijo adioisisiaet, kotamak aswam nuta:

Kosiom atiakunet naitegeari aisisiaet.
Koany ido kosiom ikokoron luka Ebaibuli, kosodi aitam amisiikin epone loeraatar ikokoron ngul luerucokina keda nuisisiao.
Kigirak akirot arai bo akiro nuebongokinitos kanginingiset naarai ingarakini ngin ijo naimoriata ijo keda esisianakinanikon.

Ijeni kereka jo?

Etwasamata Ajenak Luka Yawe Ibaibulin luipu luka aijulununeta nuegelegela. Konye, kanoinoi ilelakinit sio aitwasam New World Translation of the Holy Scriptures naarai erai aijulunet naibecokina, naepatana amisiikin, ido itwasamai ekiror loka Edeke.—Koany aisisiaet naka Olago “Ejai Kereka Ajenak Luka Yawe Ebaibulikec?”

EBAKASI ICETUNGA EBE: “Aisisia Ebaibuli erai ibore yenetiono noi. Emamei eong apak ido epol eong aswam.”

Iwomit ijo biai?

NUIDAU AISISIAUN

Kanu aimedaun noi kotoma kanuisisianakini Ebaibuli, kitemok apak kanu asiomenen Ebaibuli, kilip tetere ipedori amisiikin nuisiomi jo, ido itemonok ejok kanu aisisiakon naka Ebaibuli.